Jeremiah 50
The Book of Jeremiah
܀ ܐܪܡܝܐ ܢܢ ܀
1 ܥܰܠ ܒܳܒܠ. ܦܶܬܓܳܡܳܐ ܕܶܐܡܰܪ ܡܳܪܝܳܐ ܥܰܠ ܒܳܒܶܠ ܘܥܰܠ ܐܰܪܥܳܐ ܕܟܰܠܕܳܝ̈ܶܐ: ܒܺܐܝܕܶܗ ܕܶܐܪܰܡܝܳܐ ܢܒܺܝܳܐ.
2 ܚܰܘܰܘ ܒܥܰܡ̈ܡܶܐ ܘܰܐܫܡܰܥܘ: ܘܰܫܩܽܘܠܘ ܐܳܬܳܐ: ܐܰܫܡܰܥܘ ܘܠܳܐ ܬܟܰܣܽܘܢ: ܐܶܡܰܪܘ ܐܶܬܬܰܚܕܰܬ ܒܳܒܶܠ: ܢܦܰܠ ܒܺܝܠ: ܘܰܐܚܦܰܪ ܡܪܽܘܕܰܟ: ܒܗܶܬܘ ܦܬܰܟܖ̈ܶܝܗ̇: ܘܶܐܬܬܰܒܰܪܘ ܓܠܺܝ̈ܦܶܝܗ̇.
3 ܡܶܛܽܠ ܕܰܣܠܶܩ ܥܠܶܝܗ̇ ܥܰܡܳܐ ܡܶܢ ܓܰܪܒܝܳܐ: ܗܽܘ ܢܶܥܒܶܕ ܐܰܪܥܳܗ̇ ܠܚܽܘܪܒܳܐ: ܘܠܳܐ ܢܶܗܘܶܐ ܒܳܗ̇ ܕܝܳܬܶܒ: ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ ܢܳܕܘ ܘܶܐܙܰܠܘ.
4 ܒܝܰܘ̈ܡܳܬܳܐ ܗܳܢܽܘܢ ܘܰܒܙܰܒܢܳܐ ܗܰܘ ܐܳܡܰܪ ܡܳܪܝܳܐ: ܢܺܐܬܽܘܢ ܒܢܰܝ̈ ܝܺܣܪܳܐܶܝܠ ܗܶܢܽܘܢ ܘܰܒܢܰܝ̈ ܝܺܗܽܘܕܳܐ ܐܰܟܚܕܳܐ: ܡܗܰܠܟܺܝܢ ܘܒܳܟܶܝܢ ܘܰܠܡܳܪܝܳܐ ܐܰܠܳܗܗܽܘܢ ܒܳܥܶܝܢ.
5 ܥܰܠ ܐܽܘܖ̈ܚܳܬܳܗ̇ ܕܨܶܗܝܽܘܢ ܢܫܰܐܠܽܘܢ ܒܰܐܦܰܝ̈ܗܽܘܢ: ܬܰܘ ܢܶܬܠܰܘܶܐ ܠܡܳܪܝܳܐ ܩܝܳܡܳܐ ܕܰܠܥܳܠܰܡ ܕܠܳܐ ܡܶܬܛܥܶܐ.
6 ܐܰܝܟ ܥܳܢ̈ܳܐ ܐܰܒܺܝܕܬܳܐ ܗܘܳܐ ܥܰܡܝ: ܖ̈ܳܥܰܘܳܬܗܽܘܢ ܐܰܛܥܺܝܘ ܐܶܢܽܘܢ: ܘܥܰܠ ܛܽܘܖ̈ܶܐ ܒܰܕܰܪܘ ܐܶܢܽܘܢ: ܡܶܢ ܛܽܘܖ̈ܶܐ ܠܖ̈ܳܡܳܬܳܐ ܐܶܙܰܠܘ: ܘܰܛܥܰܘ ܒܡܰܪܒܰܥܗܽܘܢ.
7 ܟܽܠ ܡܶܢ ܕܶܐܫܟܰܚ ܐܶܢܽܘܢ ܐܶܟܰܠ ܐܶܢܽܘܢ: ܘܰܒܥܶܠܕܒܳܒܰܝ̈ܗܽܘܢ ܐܳܡܪܺܝܢ ܠܳܐ ܢܶܫܒܽܘܩ ܐܶܢܽܘܢ: ܥܰܠ ܕܰܚܛܰܘ ܠܡܳܪܝܳܐ ܘܰܠܕܰܝܪܶܗ ܙܰܕܺܝܩܬܳܐ: ܘܣܰܒܪܳܐ ܕܰܐܒܳܗܰܝ̈ܗܽܘܢ: ܡܳܪܝܰܐ ܗ̱ܘ.
8 ܥܪܽܘܩܘ ܡܶܢ ܓܰܘ ܒܳܒܶܠ: ܘܡܶܢ ܐܰܪܥܳܐ ܕܟܰܠܕܳܝ̈ܶܐ ܦܽܘܩܘ: ܘܰܗܘܰܘ ܐܰܝܟ ܬܰܝ̈ܫܶܐ ܩܕܳܡ ܥܳܢ̈ܳܐ.
9 ܡܶܛܽܠ ܕܗܳܐ ܡܕܺܝܠ ܐ̱ܢܳܐ ܘܡܰܣܶܩ ܐ̱ܢܳܐ ܥܰܠ ܒܳܒܶܠ: ܟܶܢܫܳܐ ܕܥܰܡ̈ܡܶܐ ܣܰܓܺܝ̈ܐܶܐ ܡܶܢ ܐܰܪܥܳܐ ܕܓܰܪܒܝܳܐ: ܘܢܶܣܬܰܕܪܽܘܢ ܥܠܶܝܗ̇: ܘܡܶܢ ܬܰܡܳܢ ܬܶܬܚܶܕ: ܓܶܐܖ̈ܰܝܗܽܘܢ ܐܰܝܟ ܓܰܒܪܳܐ ܕܡܰܨܠܰܚ ܘܠܳܐ ܗܳܦܶܟ ܣܪܺܝܩܳܐܺܝܬ.
10 ܘܬܶܗܘܶܐ ܐܰܪܥܳܐ ܕܟܰܠܕܳܝ̈ܶܐ ܠܒܶܙܬܳܐ: ܘܟܽܠܗܽܘܢ ܒܳܙܽܘܙܶܝ̈ܗ̇ ܢܶܣܒܥܽܘܢ ܐܳܡܰܪ ܡܳܪܝܳܐ.
11 ܡܶܛܽܠ ܕܬܶܚܕܽܘܢ ܘܡܶܛܽܠ ܕܰܬܕܽܘܨܽܘܢ: ܪܺܝܫ ܝܳܪܬܽܘܬܝ: ܘܰܬܕܽܘܨܽܘܢ ܐܰܝܟ ܥܶܓ̈ܠܶܐ ܕܦܶܛܡܳܐ: ܘܰܬܪܰܩܕܽܘܢ ܐܰܝܟ ܕܶܟܖ̈ܶܐ ܕܥܳܢ̈ܳܐ.
12 ܒܶܗܬܰܬ ܐܶܡܟܽܘܢ ܛܳܒ: ܘܰܐܚܦܪܰܬ ܝܳܠܶܕܬܟܽܘܢ: ܗܳܐ ܚܰܪܬܳܐ ܕܥܰܡ̈ܡܶܐ ܐܰܝܟ ܡܰܕܒܪܳܐ ܚܰܪܒܳܐ ܘܨܰܕܝܳܐ.
13 ܡܶܢ ܪܽܘܓܙܶܗ ܕܡܳܪܝܳܐ ܠܳܐ ܬܶܬܶܒ: ܘܬܶܗܘܶܐ ܨܰܕܝܳܐ ܟܽܠܳܗ̇. ܘܟܽܠ ܕܢܶܥܒܰܪ ܥܰܠ ܒܳܒܶܠ: ܢܶܬܡܰܗ ܘܢܰܫܪܶܩ ܥܰܠ ܟܽܠܗܶܝܢ ܡܰܚ̈ܘܳܬܳܗ̇.
14 ܐܶܣܬܰܕܪܘ ܥܰܠ ܒܳܒܶܠ: ܟܽܠ ܐܰܝܠܶܝܢ ܕܝܳܕܥܺܝܢ ܠܡܶܫܕܳܐ ܒܩܶܫܬܳܐ ܫܕܰܘ ܥܠܶܝܗ̇: ܠܳܐ ܬܚܽܘܣܽܘܢ ܥܰܠ ܓܶܐܖ̈ܶܐ: ܡܶܛܽܠ ܕܰܠܡܳܪܝܳܐ ܚܛܳܬ.
15 ܝܰܒܶܒܘ ܥܠܶܝܗ̇ ܡܶܢ ܚܕܳܪܶܝܗ̇: ܝܶܗܒܰܬ ܐܺܝܕܳܐ: ܢ̣ܦܰܠ ܫܶܬܶܐܣܶܝ̈ܗ̇: ܐܶܣܬܚܶܦܘ ܫܽܘܖ̈ܶܝܗ̇: ܡܶܛܽܠ ܕܦܽܘܪܥܳܢܶܗ ܕܡܳܪܝܳܐ ܐܶܬܢܰܩܰܡܘ ܒܳܗ̇. ܐܰܟܡܳܐ ܕܥܶܒܕܰܬ ܥܒܶܕܘ ܠܳܗ̇.
16 ܘܰܐܘܒܶܕܘ ܙܳܪܽܘܥܳܐ ܡܶܢ ܒܳܒܶܠ: ܘܳܐܚܶܕ ܡܰܓܠܳܐ ܒܙܰܒܢܳܐ ܕܰܚܨܳܕܳܐ: ܡܶܛܽܠ ܚܰܪܒܳܐ ܕܡܰܕܘܝܳܐ: ܐ̱ܢܳܫ ܠܥܰܡܶܗ ܢܶܬܦܢܽܘܢ: ܘܰܓܒܰܪ ܠܰܐܪܥܶܗ ܢܶܥܪܩܽܘܢ.
17 ܢܶܩܝܳܐ ܛܳܥܺܝܬܳܐ ܝܺܣܪܳܐܶܝܠ: ܐܰܖ̈ܝܰܘܳܬܳܐ ܐܰܛܥܺܝܘ ܐܶܢܽܘܢ: ܩܰܕܡܳܝܳܐ ܐܰܟܠܶܗ ܡܰܠܟܳܐ ܕܳܐܬܽܘܪ: ܘܗܳܢܳܐ ܐ̱ܚܪܳܝܳܐ ܥܫܶܢ ܡܶܢܗ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ.
18 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܦܳܩܶܕ ܐ̱ܢܳܐ ܥܰܠ ܡܰܠܟܳܐ ܕܒܳܒܶܠ: ܘܥܰܠ ܐܰܪܥܶܗ: ܐܰܝܟ ܕܦܶܩܕܶܬ ܥܰܠ ܡܰܠܟܳܐ ܕܳܐܬܽܘܪ.
19 ܘܰܐܗܦܶܟ ܠܳܐܝܣܪܳܐܶܝܠ ܠܕܰܝܪܗܽܘܢ: ܘܢܶܪܥܽܘܢ ܒܟܰܪܡܠܳܐ ܘܰܒܡܰܬܢܺܝܢ: ܘܰܒܛܽܘܪܳܐ ܕܰܐܦܪܶܝܡ: ܘܰܒܓܶܠܥܳܕ: ܘܬܶܣܒܰܥ ܢܰܦܫܗܽܘܢ.
20 ܒܝܰܘ̈ܡܳܬܳܐ ܗܳܢܽܘܢ ܘܰܒܙܰܒܢܳܐ ܗܰܘ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܢܶܬܒܥܶܐ ܥܰܘܠܶܗ ܕܺܝܣܪܳܐܶܝܠ ܘܠܰܝܬܰܘܗܝ: ܘܰܚܛܺܝܬܶܗ ܕܺܝܗܽܘܕܳܐ: ܘܠܳܐ ܬܶܫܬܟܰܚ: ܡܶܛܽܠ ܕܶܐܫܒܽܘܩ ܠܫܰܪܟܳܐ ܕܶܐܫܬܚܰܪܘ ܡܶܢܗܽܘܢ.
21 ܣܰܩܘ ܥܰܠ ܐܰܪܥܳܐ ܡܡܰܪܡܪܳܢܺܝܬܳܐ: ܣܰܩܘ ܥܠܶܝܗ̇ ܘܥܰܠ ܥܳܡܽܘܖ̈ܶܝܗ̇: ܐܶܬܬܥܺܝܪܝ ܚܰܪܒܳܐ ܘܰܚܪܽܘܒܝ ܐܶܢܽܘܢ ܐܳܡܰܪ ܡܳܪܝܳܐ: ܘܰܥܒܶܕܝ ܐܰܝܟ ܕܦܰܩܶܕܬܶܟܝ.
22 ܩܳܠܳܐ ܕܰܩܪܳܒܳܐ ܒܰܐܪܥܳܐ ܘܰܬܒܳܪܳܐ ܪܰܒܳܐ.
23 ܐܰܝܟܰܢܳܐ ܐܶܬܬܰܒܪܰܬ ܘܶܐܫܬܰܩܠܰܬ ܬܰܩܺܝܦܬܳܐ ܕܟܽܠܳܗ̇ ܐܰܪܥܳܐ ܐܰܝܟܰܢܳܐ ܗܘܳܬ ܠܬܶܡܗܳܐ ܒܳܒܶܠ ܒܥܰܡ̈ܡܶܐ.
24 ܐܶܬܬܰܩܠܰܬ ܒܳܒܶܠ ܘܳܐܦ ܐܶܬܬܰܚܕܰܬ: ܘܠܳܐ ܝܶܕܥܰܬ ܕܠܽܘܩܒܰܠ ܡܳܪܝܳܐ ܩܳܡܰܬ.
25 ܦܬܰܚ ܡܳܪܝܳܐ ܐܰܘܨܪܶܗ: ܘܰܐܦܶܩ ܡܳܐܢ̈ܶܐ ܕܪܽܘܓܙܶܗ: ܡܶܛܽܠ ܕܰܥܒܳܕܰܐ ܗ̱ܘ ܠܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܒܰܐܪܥܳܐ ܕܟܰܠܕܳܝ̈ܶܐ.
26 ܬܰܘ ܥܠܶܝܗ̇ ܡܶܢ ܚܕܳܖ̈ܶܝܗ̇: ܦܬܰܚܘ ܬܰܖ̈ܥܶܝܗ̇: ܒܨܰܐܗ̇ ܐܰܝܟ ܥܰܪܛܶܠܳܝܬܳܐ: ܘܚܽܘܪܒܽܘܗ̇ ܘܠܳܐ ܬܶܫܒܩܽܘܢ ܠܳܗ̇ ܚܰܪܬܳܐ.
27 ܚܽܘܪܒܽܘܗ̇ ܘܟܽܠܗܽܘܢ ܦܺܐܖ̈ܶܝܗ̇ ܢܶܫܬܰܠܡܽܘܢ ܠܩܶܛܠܳܐ: ܘܳܝ ܥܠܰܝܗܽܘܢ ܕܡܰܛܺܝ ܝܰܘܡܗܽܘܢ: ܙܰܒܢܳܐ ܕܦܽܘܩܕܳܢܗܽܘܢ.
28 ܩܳܠܳܐ ܕܥܳܪܩܺܝܢ ܘܰܕܡܶܬܦܰܠܛܺܝܢ ܡܶܢ ܐܰܪܥܳܐ ܕܒܳܒܶܠ: ܠܰܡܚܰܘܳܝܽܘ ܒܨܶܗܝܽܘܢ ܢܩܰܡܬܶܗ ܕܡܳܪܝܳܐ: ܐܰܠܳܗܰܢ: ܘܰܢܩܰܡܬܳܐ ܕܗܰܝܟܠܶܗ.
29 ܐܰܫܡܰܥܘ ܥܰܠ ܒܳܒܶܠ. ܣܰܓܺܝ̈ܐܶܐ: ܟܠ ܕܝܳܕܥܺܝܢ ܠܡܶܫܕܳܐ ܒܩܶܫܬܳܐ ܫܕܰܘ ܥܠܶܝܗ̇ ܡܶܢ ܚܕܳܖ̈ܶܝܗ̇: ܠܳܐ ܬܶܫܒܩܽܘܢ ܠܳܗ̇ ܚܰܪܬܳܐ: ܦܽܘܪܥܽܘܗ̇ ܐܰܝܟ ܐܰܓܪܳܗ̇: ܘܰܐܝܟ ܕܥܶܒܕܰܬ ܥܒܶܕܘ ܠܳܗ̇: ܡܶܛܽܠ ܕܥܰܠ ܡܳܪܝܳܐ ܐܰܡܪܚܰܬ ܘܥܰܠ ܩܰܕܺܝܫܳܐ ܕܺܝܣܪܳܐܶܝܠ.
30 ܡܶܛܽܠ ܗܳܢܳܐ ܢܶܦܠܽܘܢ ܓܰܕܽܘܕܶܝ̈ܗ̇: ܒܓܰܘܳܗ̇: ܘܟܽܠܗܽܘܢ ܓܰܒܖ̈ܶܝܗ̇ ܩܖ̈ܰܒܬܳܢܶܐ ܢܶܫܬܰܬܩܽܘܢ ܒܝܰܘܡܳܐ ܗܰܘ.
31 ܗܳܐ ܐܶܢܳܐ ܥܠܰܝܟ ܡܰܪܳܚܳܐ ܐܳܡܰܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܡܶܛܽܠ ܕܰܡܛܳܐ ܝܰܘܡܳܟ: ܙܰܒܢܳܐ ܕܦܽܘܩܕܳܢܳܟ.
32 ܘܢܶܣܬܚܶܦ ܡܰܪܳܚܳܐ ܘܢܶܦܶܠ: ܘܠܰܝܬ ܡܰܢ ܕܰܡܩܺܝܡ ܠܶܗ: ܘܶܐܫܒܽܘܩ ܢܽܘܪܳܐ ܒܩܽܘܖ̈ܝܳܗ̇: ܘܬܶܐܟܽܘܠ ܟܽܠܗܽܘܢ ܚܕܳܖ̈ܰܘܗܝ.
33 ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ: ܛܠܺܝܡܺܝܢ ܒܢܰܝ̈ ܝܺܣܪܳܐܶܝܠ ܘܰܒܢܰܝ̈ ܝܺܗܽܘܕܳܐ ܐܰܟܚܕܳܐ: ܘܟܽܠ ܕܰܫܒܰܘ ܐܶܢܽܘܢ ܚܰܡܣܶܢܘ ܒܗܽܘܢ: ܘܠܳܐ ܨܳܒܶܝܢ ܠܡܫܰܕܳܪܽܘ ܐܶܢܽܘܢ.
34 ܦܳܪܽܘܩܗܽܘܢ ܬܰܩܺܝܦ ܗ̱ܘ: ܡܳܪܝܳܐ ܚܰܝܠܬܳܢܳܐ ܫܡܶܗ: ܡܕܳܢ ܢܕܽܘܢ ܕܺܝܢܗܽܘܢ: ܘܰܢܫܰܠܶܐ ܠܰܐܪܥܳܐ: ܘܢܰܪܓܶܙ ܠܟܽܠܗܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ.
35 ܚܰܪܒܳܐ ܥܰܠ ܟܰܠܕܳܝ̈ܶܐ ܐܳܡܰܪ ܡܳܪܝܳܐ: ܘܥܰܠ ܟܽܠܗܽܘܢ ܥܳܡܽܘܖ̈ܶܝܗ̇ ܕܒܳܒܶܠ: ܘܥܰܠ ܪܰܘܖ̈ܒܳܢܶܝܗ̇ ܘܥܰܠ ܚܰܟܺܝ̈ܡܶܝܗ̇.
36 ܚܰܪܒܳܐ ܥܰܠ ܩܳܨܽܘܡܶܝ̈ܗ̇ ܘܢܶܬܛܰܪܦܽܘܢ: ܚܰܪܒܳܐ ܥܰܠ ܓܰܢ̱ܒܳܖ̈ܶܝܗ̇ ܘܢܶܬܬܰܒܪܽܘܢ.
37 ܚܰܪܒܳܐ ܥܰܠ ܖ̈ܰܟܫܳܗ̇ ܘܥܰܠ ܡܰܖ̈ܟܒܳܬܳܗ̇: ܘܥܰܠ ܟܽܠܗܽܘܢ ܬܰܘܬܳܒ̈ܶܐ ܕܰܒܓܰܘܳܗ̇: ܘܢܶܗܘܽܘܢ ܐܰܝܟ ܢܶܫ̈ܶܐ: ܚܰܪܒܳܐ ܥܰܠ ܓܰܙܶܝ̈ܗ̇ ܘܢܶܬܒܰܙܙܽܘܢ.
38 ܚܰܪܒܳܐ ܥܰܠ ܡܶܝ̈ܗ̇ ܘܢܺܐܒܫܽܘܢ: ܡܶܛܽܠ ܕܰܐܪܥܳܐ ܗ̱ܝ ܕܓܳܠܦܰܝ̈ ܨܰܠ̈ܡܶܐ: ܘܒܰܦܬܰܟܖ̈ܶܐ ܡܶܫܬܰܒܗܪܺܝܢ.
39 ܡܶܛܽܠ ܗܳܢܳܐ ܢܶܥܡܖ̈ܳܢ ܒܳܗ̇ ܣܺܝܖ̈ܺܢܳܣ. ܘܢܶܬܒ̈ܳܢ ܒܳܗ̇ ܒ̈ܢܳܬ ܢܰܥܡ̈ܶܐ: ܠܳܐ ܬܶܬܶܒ ܠܥܳܠܰܡ: ܘܠܳܐ ܬܶܫܪܶܐ ܠܕܳܪܕܳܖ̈ܺܝܢ.
40 ܘܬܶܗܘܶܐ ܐܰܝܟ ܣܕܽܘܡ ܘܰܐܝܟ ܥܳܡܽܘܪܳܐ: ܕܰܗܦܰܟ ܐܶܢܶܝܢ ܐܰܠܳܗܳܐ ܘܰܠܥܳܡܽܘܖ̈ܰܝܗܶܝܢ: ܠܳܐ ܢܶܬܶܒ ܬܰܡܳܢ ܓܒܰܪ: ܘܠܳܐ ܢܶܥܡܰܪ ܬܰܡܳܢ ܒܰܪܢܳܫ.
41 ܗܳܐ ܥܰܡܳܐ ܐܳܬܶܐ ܡܶܢ ܓܰܪܒܝܳܐ: ܥܰܡܳܐ ܪܰܒܳܐ: ܘܡܰܠ̈ܟܶܐ ܣܰܓܺܝ̈ܐܶܐ ܢܕܽܘܠܽܘܢ ܡܶܢ ܣܰܘܦܶܝ̈ܗ̇ ܕܰܐܪܥܳܐ.
42 ܒܩܶܫ̈ܬܳܬܳܐ ܘܰܒܢܰܝܙܟ̈ܶܐ ܡܙܰܝܢܺܝܢ: ܒܺܝܫܺܝܢ ܐܶܢܽܘܢ ܘܠܳܐ ܡܪܰܚܡܳܢܺܝܢ: ܩܳܠܗܽܘܢ ܐܰܝܟ ܝܰܡܳܐ ܕܡܶܬܟܬܶܫ: ܘܥܰܠ ܖ̈ܟܫܳܐ ܪܟܺܝܒܺܝܢ: ܘܰܡܛܰܝܒܺܝܢ ܐܰܝܟ ܓܰܢ̱ܒܳܖ̈ܶܐ ܠܰܩܪܳܒܳܐ: ܥܠܰܝܟܝ ܒܰܪܬ ܒܳܒܶܠ.
43 ܫܡܰܥ ܡܰܠܟܳܐ ܕܒܳܒܶܠ ܫܶܡܥܗܽܘܢ ܘܶܐܬܪܰܫܰܠ ܐܺܝܕܰܘ̈ܗܝ: ܘܥܳܩܬܳܐ ܐܶܚܰܕܬܶܗ ܘܚܶܒ̈ܠܶܐ ܐܰܝܟ ܕܝܳܠܶܕܬܳܐ: ܗܳܐ ܐܰܝܟ ܐܰܪܝܳܐ ܢܶܣܰܩ ܡܶܢ ܥܽܘܫܢܳܐ ܕܝܽܘܪܕܢܳܢ ܠܕܰܝܪܳܐ ܕܳܐܬܳܢ: ܡܶܛܽܠ ܕܒܰܥܓܰܠ ܐܶܪܕܽܘܦ ܐܶܢܽܘܢ ܡܶܢܳܗ̇: ܘܓܰܕܽܘ̈ܕܶܐ ܐܶܦܩܽܘܕ ܥܠܶܝܗ̇: ܡܰܢܽܘ ܓܶܝܪ ܐܰܟܘܳܬܝ: ܐܰܘ ܡܰܢܽܘ ܕܢܶܬܛܪܶܐ ܒܺܝ: ܐܰܘ ܐܰܝܢܰܘ ܪܳܥܝܳܐ ܕܰܢܩܽܘܡ ܠܽܘܩܒܰܠܝ.
44 ܡܶܛܽܠ ܗܳܢܳܐ ܫܡܰܥܘ ܬܰܪܥܺܝܬܶܗ ܕܡܳܪܝܳܐ ܕܶܐܬܪܰܥܺܝ ܥܰܠ ܒܳܒܶܠ: ܘܡܰܚܫܰܒܬܶܗ ܕܶܐܬܚܰܫܰܒ ܥܰܠ ܐܰܪܥܳܐ ܕܟܰܠܕܳܝ̈ܶܐ: ܕܢܶܓܪܽܘܢ ܐܶܢܽܘܢ ܒܨܺܝܖ̈ܶܐ ܕܥܳܢ̈ܳܐ: ܘܢܰܨܕܽܘܢ ܥܠܰܝܗܽܘܢ ܕܰܝܪܗܽܘܢ.
45 ܡܶܢ ܩܳܠܳܐ ܕܶܐܬܬܰܚܕܰܬ ܒܳܒܶܠ ܙܳܥܰܬ ܐܰܪܥܳܐ: ܘܺܝܠܶܠܬܳܗ̇ ܒܥܰܡ̈ܡܶܐ ܐܶܫܬܰܡܥܰܬ.