Jeremiah 41
The Book of Jeremiah
܀ ܐܪܡܝܐ ܡܐ ܀
1 ܘܰܒܝܰܪܚܳܐ ܕܫܰܒܥܳܐ ܐܶܬܳܐ ܐܺܝܫܡܳܥܺܝܠ: ܒܰܪ ܢܬܰܢܝܳܐ: ܒܰܪ ܐܺܫܡܳܥܺܝܠ: ܡܶܢ ܙܰܪܥܳܐ ܕܡܰܠܟܽܘܬܳܐ: ܘܪܰܘܖ̈ܒܳܢܰܝ ܡܰܠܟܳܐ: ܘܥܶܣܪܺܝܢ ܓܰܒܖ̈ܺܝܢ ܥܰܡܶܗ: ܠܘܳܬ ܓܕܰܠܝܳܐ ܒܰܪ ܐܰܚܺܝܩܰܡ ܠܡܰܨܦܝܳܐ: ܘܶܐܟܰܠܘ ܬܰܡܳܢ ܠܰܚܡܳܐ ܐܰܟܚܕܳܐ ܒܡܰܨܦܝܳܐ.
2 ܘܩܳܡ ܐܺܫܡܳܥܺܝܠ ܒܰܪ ܢܬܰܢܝܳܐ ܗܽܘ ܘܥܶܣܪܺܝܢ ܓܰܒܖ̈ܺܝܢ ܕܶܐܬܰܘ ܥܰܡܶܗ: ܘܰܡܚܰܐܗܝ ܠܰܓܕܰܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܒܚܰܪܒܳܐ ܘܩܰܛܠܽܘܗܝ: ܗܰܘ ܕܰܐܫܠܛܶܗ ܡܰܠܟܳܐ ܕܒܳܒܶܠ ܒܰܐܪܥܳܐ ܕܺܝܗܽܘܕܳܐ.
3 ܘܰܠܟܽܠܗܽܘܢ ܝܽܘܕܳܝ̈ܶܐ ܕܺܐܝܬ ܗܘܰܘ ܥܰܡܶܗ ܥܰܡ ܓܕܰܠܝܳܐ ܒܡܰܨܦܝܳܐ: ܘܰܠܟܰܠܕܳܝ̈ܶܐ ܕܶܐܫܬܟܰܚܘ ܬܰܡܳܢ: ܘܳܐܦ ܠܓܰܒܖ̈ܶܐ ܩܖ̈ܰܒܬܳܢܶܐ ܩܰܛܶܠ ܐܺܫܡܳܥܺܝܠ: ܘܐ̱ܢܳܫ ܠܳܐ ܫܡܰܥ.
4 ܘܰܒܝܰܘܡܳܐ ܕܰܬܪܶܝܢ ܒܳܬܰܪ ܕܶܐܬܩܛܶܠ ܓܕܰܠܝܳܐ.
5 ܐܶܬܰܘ ܓܰܒܖ̈ܶܐ ܡܶܢ ܫܟܺܝܡ: ܘܡܶܢ ܫܺܝܠܽܘ: ܘܡܶܢ ܫܳܡܪܺܝܢ: ܬܡܳܢܺܝܢ ܓܰܒܖ̈ܺܝܢ: ܓܪܺܝܥܺܝܢ ܕܰܩܢܰܝ̈ܗܽܘܢ: ܘܰܡܨܰܪܶܝܢ ܠܒܽܘܫܰܝ̈ܗܽܘܢ: ܘܡܶܬܟܰܬܫܺܝܢ: ܘܩܽܘܪܒܳܢܳܐ ܘܰܠܒܽܘܢܬܳܐ ܒܺܐܝܕܰܝ̈ܗܽܘܢ: ܠܡܰܥܳܠܽܘ ܠܒܰܝܬܶܗ ܕܡܳܪܝܳܐ.
6 ܘܰܢܦܰܩ ܐܺܝܫܡܳܥܺܝܠ ܒܰܪ ܢܬܰܢܝܳܐ ܠܽܐܘܪܥܗܽܘܢ ܡܶܢ ܡܰܨܦܝܳܐ: ܡܗܰܠܶܟ ܘܳܐܙܶܠ ܘܒܳܟܶܐ: ܘܟܰܕ ܦܓܰܥ ܒܗܽܘܢ: ܐܶܡܰܪ ܠܗܽܘܢ ܬܰܘ ܠܘܳܬ ܓܕܰܠܝܳܐ ܒܰܪ ܐܰܚܺܝܩܰܡ.
7 ܘܟܰܕ ܥܰܠܘ ܠܰܩܪܺܝܬܳܐ: ܢܰܟܶܣ ܐܶܢܽܘܢ ܐܺܫܡܳܥܺܝܠ ܒܰܪ ܢܬܰܢܝܳܐ: ܘܰܐܪܡܺܝ ܐܶܢܽܘܢ ܒܓܽܘܒܳܐ ܗܽܘ ܘܓܰܒܖ̈ܶܐ ܕܥܰܡܶܗ.
8 ܘܥܶܣܪܳܐ ܓܰܒܖ̈ܺܝܢ ܐܶܫܬ̇ܟܰܚܘ ܒܗܽܘܢ: ܘܳܐܡܪܺܝܢ ܠܺܐܫܡܳܥܺܝܠ ܠܳܐ ܬܶܩܛܠܰܢ: ܡܶܛܽܠ ܕܺܐܝܬ ܠܰܢ ܚܰܕ̈ܘܳܬܳܐ ܒܚܰܩܠܳܐ ܕܚ̈ܶܛܶܐ ܘܕܰܣܥܳܖ̈ܶܐ: ܘܡܶܫܚܳܐ ܘܕܶܒܫܳܐ. ܘܰܫ̣ܒܰܩ ܐܶܢܽܘܢ ܘܠܳܐ ܩܰܛܶܠ ܐܶܢܽܘܢ ܥܰܡ ܐܰܚܰܝ̈ܗܽܘܢ.
9 ܘܓܽܘܒܳܐ ܕܰܫܕܳܐ ܒܶܗ ܐܺܫܡܳܥܺܝܠ ܟܽܠܗܶܝܢ ܫܠ̈ܰܕܶܐ ܕܓܰܒܖ̈ܶܐ ܕܩܰܛܶܠ ܥܰܡ ܓܕܰܠܝܳܐ: ܗܰܘ ܗܽܘ ܕܰܥܒܰܕ ܐܳܣܳܐ ܡܰܠܟܳܐ ܕܺܝܗܽܘܕܳܐ: ܡܶܢ ܩܕܳܡ ܒܰܥܫܳܐ ܡܰܠܟܳܐ ܕܺܝܣܪܳܐܶܝܠ: ܠܶܗ ܠܓܽܘܒܳܐ ܗܰܘ ܡܠܳܝܗܝ ܐܺܫܡܳܥܺܝܠ ܒܰܪ ܢܬܰܢܝܳܐ ܩܛܺܝ̈ܠܶܐ.
10 ܘܰܫܒܳܐ ܐܺܫܡܳܥܺܝܠ ܟܽܠܶܗ ܫܰܪܟܶܗ ܕܥܰܡܳܐ ܕܰܒܡܰܨܦܝܳܐ ܕܰܐܫܠܶܡ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ ܠܰܓܕܰܠܝܳܐ ܒܰܪ ܐܰܚܺܝܩܰܡ: ܘܰܫܒܳܐ ܐܶܢܽܘܢ ܐܺܫܡܳܥܺܝܠ ܒܰܪ ܢܬܰܢܝܳܐ: ܘܶܐܙܰܠ ܠܥܶܒܪܳܐ ܕܰܒܢܰܝ̈ ܥܰܡܽܘܢ.
11 ܘܰܫܩܰܠ ܝܽܘܚܰܢܳܢ ܒܰܪ ܩܽܘܪܰܚ: ܘܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܥܰܡܶܗ: ܥܰܠ ܟܽܠܳܗ̇ ܫܒܺܝܬܳܐ ܕܰܕܒܰܪ ܐܺܫܡܳܥܺܝܠ ܒܰܪ ܢܬܰܢܝܳܐ.
12 ܘܰܕܒܰܪ ܟܽܠܗܽܘܢ ܓܰܒܖ̈ܶܐ: ܘܶܐܙܰܠ ܠܡܶܬܟܰܬܳܫܽܘ ܥܰܡ ܐܺܫܡܳܥܺܝܠ ܒܰܪ ܢܬܰܢܝܳܐ: ܘܶܐܫܟܚܽܘܗܝ ܥܰܠ ܡܰܝ̈ܳܐ ܣܰܓܺܝ̈ܐܶܐ ܕܺܐܝܬ ܒܓܶܒܥܽܘܢ.
13 ܘܟܰܕ ܚ̣ܙܳܐ ܟܽܠܶܗ ܥܰܡܳܐ ܕܥܰܡ ܐܺܫܡܳܥܺܝܠ ܠܝܽܘܚܰܢܳܢ ܒܰܪ ܩܽܘܪܰܚ: ܘܰܠܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܥܰܡܶܗ ܚܕܺܝܘ.
14 ܘܰܗܦܰܟܘ ܟܽܠܶܗ ܥܰܡܳܐ ܕܰܫܒܳܐ ܐܺܫܡܳܥܺܝܠ ܡܶܢ ܡܰܨܦܝܳܐ: ܘܶܐܬܰܘ ܠܘܳܬ ܝܽܘܚܰܢܳܢ ܒܰܪ ܩܽܘܪܰܚ.
15 ܘܺܐܫܡܳܥܺܝܠ ܒܰܪ ܢܬܰܢܝܳܐ ܐܶܫܬܰܘܙܰܒ: ܒܰܬܡܳܢܝܳܐ ܐ̱ܢܳܫܺܝ̈ܢ ܡܶܢ ܩܕܳܡ ܝܽܘܚܰܢܳܢ: ܘܶܐܙܰܠ ܠܘܳܬ ܒܢܰܝ̈ ܥܰܡܽܘܢ.
16 ܘܰܕܒܰܪ ܝܽܘܚܰܢܳܢ ܒܰܪ ܩܽܘܪܰܚ: ܘܟܽܠܗܽܘܢ ܖ̈ܰܒܰܝ ܚܰܝ̈ܠܶܐ ܕܥܰܡܶܗ: ܟܠ ܫܰܪܟܳܐ ܕܥܰܡܳܐ ܕܰܐܗܦܶܟ ܡܶܢ ܠܘܳܬ ܐܺܫܡܳܥܺܝܠ ܒܰܪ ܢܬܰܢܝܳܐ ܡܶܢ ܡܰܨܦܝܳܐ: ܡܶܢ ܒܳܬܰܪ ܕܰܩܛܰܠ ܐܺܫܡܳܥܺܝܠ ܠܰܓܕܰܠܝܳܐ ܒܰܪ ܐܰܚܺܝܩܰܡ: ܘܰܕܒܰܪ ܓܰܒܖ̈ܶܐ ܩܖ̈ܰܒܬܳܢܶܐ ܘܢܶܫ̈ܶܐ ܘܰܛܠܳܝ̈ܶܐ ܘܰܡܗܰܝܡܳܢ̈ܶܐ ܕܰܐܗܦܶܟ ܡܶܢ ܓܶܒܥܽܘܢ.
17 ܘܶܐܙܰܠܘ ܘܺܝܬܶܒܘ ܒܶܐܕܖ̈ܶܐ ܕܒܶܡܗܰܡ ܕܥܰܠ ܓܶܢ̱ܒ ܒܶܝܬ ܠܚܶܡ: ܠܡܺܐܙܰܠ ܠܡܶܥܰܠ ܠܡܶܨܪܶܝܢ.
18 ܡܶܢ ܩܕܳܡ ܟܰܠܕܳܝ̈ܶܐ ܕܰܕܚܶܠܘ ܡܶܢܗܽܘܢ: ܥܰܠ ܕܰܩ̣ܛܰܠ ܐܺܫܡܳܥܺܝܠ ܒܰܪ ܢܬܰܢܝܳܐ ܠܰܓܕܰܠܝܳܐ ܒܰܪ ܐܰܚܺܝܩܰܡ: ܗܰܘ ܕܰܐܫܠܛܶܗ ܡܰܠܟܳܐ ܕܒܳܒܶܠ ܒܰܐܪܥܳܐ ܕܺܝܗܽܘܕܳܐ.