Jeremiah 19
The Book of Jeremiah
܀ ܐܪܡܝܐ ܝܛ ܀
1 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܙܶܠ ܘܰܙܒܶܢ ܒܰܓܒܽܘܓܳܐ ܕܦܰܚܳܪܳܐ: ܘܰܕܒܰܪ ܥܰܡܳܟ ܡܶܢ ܣܳܒ̈ܶܐ ܕܥܰܡܳܐ: ܘܡܶܢ ܣܳܒ̈ܶܐ ܕܟܳܗ̈ܢܶܐ.
2 ܘܦܽܘܩ ܠܢܰܚܠܳܐ ܕܒܰܪ ܗܳܢܽܘܡ: ܕܰܒܡܰܥܠܳܢܳܐ ܕܬܰܪܥܳܐ ܕܚܰܕܣܺܝ݀ܬ: ܘܰܐܟܪܶܙ ܬܰܡܳܢ ܦܶܬܓܳܡ̈ܶܐ ܕܺܐܡܰܪ ܠܳܟ.
3 ܘܶܐܡܰܪ: ܫܡܰܥܘ ܦܳܬܓܳܡܶܗ ܕܡܳܪܝܳܐ ܡܰܠ̈ܟܶܐ ܕܺܝܗܽܘܕܳܐ: ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܝܬܶܐ ܐ̱ܢܳܐ ܒܺܝܫܬܳܐ ܥܰܠ ܐܰܬܪܳܐ ܗܳܢܳܐ: ܕܟܽܠ ܕܢܶܫܡܥܺܝܗ̇ ܢܶܨ̈ܠܳܢ ܐܶܕܢܰܘܗܝ.
4 ܥܰܠ ܕܫܰܒܩܽܘܢܝ ܘܛܰܢܦܽܘܗܝ ܠܰܐܬܪܳܐ ܗܳܢܳܐ ܘܣܳܡܘ ܒܶܗ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ: ܕܠܳܐ ܝܺܕܰܥܘ ܐܶܢܽܘܢ ܗܶܢܽܘܢ ܘܰܐܒܳܗܰܝ̈ܗܽܘܢ: ܘܡܰܠ̈ܟܶܐ ܕܺܝܗܽܘܕܳܐ: ܘܰܡܠܰܐܗܝ ܠܰܐܬܪܳܐ ܗܳܢܳܐ ܕܡܳܐ ܙܰܟܳܝܳܐ.
5 ܘܰܒܢܰܘ ܥܰܠ̈ܘܳܬܐ ܠܒܰܥܠܳܐ: ܠܡܰܘܩܳܕܽܘ ܒܢܰܝ̈ܗܽܘܢ ܒܢܽܘܪܳܐ ܝܰܩܕܳܐ ܠܒܰܥܠܳܐ: ܕܠܳܐ ܦܰܩܕܶܬ: ܘܠܳܐ ܐܶܡܪܶܬ: ܘܠܳܐ ܣ̣ܶܠܩܰܬ ܥܰܠ ܠܶܒܝ.
6 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܕܠܳܐ ܢܶܬܩܪܶܐ ܬܽܘܒ ܐܰܬܪܳܐ ܗܳܢܳܐ ܬܰܦܰܬ ܘܢܰܚܠܳܐ ܕܒܰܪ ܗܳܢܽܘܡ: ܐܶܠܳܐ ܐܶܢ ܢܰܚܠܳܐ ܕܰܩܛܺܝ̈ܠܶܐ.
7 ܘܶܐܒܰܛܶܠ ܬܰܪܥܺܝܬܳܐ ܕܺܝܗܽܘܕܳܐ ܘܕܽܐܘܪܺܫܠܶܡ ܒܰܐܬܪܳܐ ܗܳܢܳܐ: ܘܰܐܪܡܶܐ ܐܶܢܽܘܢ ܒܚܰܪܒܳܐ ܩܕܳܡ ܒܥܶܠܕܒܳܒܰܝ̈ܗܽܘܢ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܗܽܘܢ: ܘܶܐܬܶܠ ܫܠܰܕܰܝ̈ܗܽܘܢ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ: ܘܰܠܚܰܝܽܘܬܳܐ ܕܰܐܪܥܳܐ.
8 ܘܶܐܥܒܕܺܝܗ̇ ܠܰܩܪܺܝܬܳܐ ܗܳܕܶܐ ܠܬܶܡܗܳܐ ܘܰܠܡܰܫܪܽܘܩܺܝܬܳܐ: ܘܟܽܠ ܡܶܢ ܕܢܶܥܒܰܪ ܥܠܶܝܗ̇. ܢܶܬܡܰܗ ܘܢܰܫܪܶܩ ܥܰܠ ܟܽܠܗܶܝܢ ܡܰܚ̈ܘܳܬܳܗ̇.
9 ܘܰܐܘܟܶܠ ܐܶܢܽܘܢ ܒܶܣܪܳܐ ܕܰܒܢܰܝ̈ܗܽܘܢ ܘܕܰܒ̈ܢܳܬܗܽܘܢ: ܘܰܓܒܰܪ ܒܣܰܪ ܚܰܒܪܶܗ ܢܶܐܟܠܽܘܢ: ܒܽܐܘܠܨܳܢܳܐ ܘܰܒܥܳܩܬܳܐ ܕܰܢܥܺܝܩܽܘܢ ܠܗܽܘܢ ܒܥܶܠܕܒܳܒܰܝ̈ܗܽܘܢ: ܘܰܐܝܠܶܝܢ ܕܒܳܥܶܝܢ ܢܰܦܫܗܽܘܢ.
10 ܘܰܬܒܰܪܳܝܗܝ ܠܒܰܓܒܽܘܓܳܐ ܠܥܺܝܢ ܓܰܒܖ̈ܶܐ ܕܳܐܙܺܠܝܢ ܥܰܡܳܟ.
11 ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܗܳܟܰܢܳܐ ܐܶܬܒܪܺܝܘܗܝ ܠܥܰܡܳܐ ܗܳܢܳܐ: ܘܠܰܩܪܺܝܬܳܐ ܗܳܕܶܐ. ܐܰܝܟ ܕܶܐܬܬܒܰܪ ܡܳܐܢܳܐ ܗܳܢܳܐ ܕܦܰܚܳܪܳܐ: ܕܬܽܘܒ ܠܳܐ ܡܶܫܟܰܚ ܠܡܶܬܐܰܣܳܝܽܘ: ܘܰܒܬܰܦܰܬ ܢܶܩܪܒܽܘܢ ܡܶܢ ܒܠܰܝ ܐܰܬܪܳܐ ܠܡܶܩܒܰܪ.
12 ܗܳܟܰܢܳܐ ܐܶܥܒܶܕ ܠܰܐܬܪܳܐ ܗܳܢܳܐ ܘܰܠܥܳܡܽܘܖ̈ܰܘܗܝ ܐܳܡܰܪ ܡܳܪܝܳܐ: ܘܶܐܥܒܕܺܝܗ̇ ܠܰܩܪܺܝܬܳܐ ܗܳܕܶܐ ܐܰܝܟ ܬܰܦܰܬ.
13 ܘܢܶܗܘܽܘܢ ܒ̈ܳܬܶܐ ܕܽܐܘܪܺܫܠܶܡ: ܘܒ̈ܳܬܶܐ ܕܡܰܠ̈ܟܶܐ ܕܺܝܗܽܘܕܳܐ: ܐܰܝܟ ܐܰܬܪܳܐ ܕܬܰܦܰܬ ܡܛܰܡܐܺܝܢ: ܟܽܠ ܒ̈ܳܬܶܐ ܕܣ̣ܳܡܘ ܒܶܣ̈ܡܶܐ ܥܰܠ ܐܶܓܳܖ̈ܰܝܗܽܘܢ ܠܟܽܠ ܚܰܝ̈ܠܘܳܬܐ ܕܰܫܡܰܝܳܐ: ܘܢܰܩ̣ܺܝܘ ܢܽܘܩܳܝ̈ܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ.
14 ܘܶܐܬܳܐ ܐܶܪܰܡܝܳܐ ܡܶܢ ܬܰܦܰܬ ܕܫܰܕܪܶܗ ܡܳܪܝܳܐ: ܠܡܶܬܢܰܒܳܝܽܘ ܬܰܡܳܢ: ܘܩܳܡ ܒܕܳܪܬܳܐ ܕܒܰܝܬܶܗ ܕܡܳܪܝܳܐ: ܘܶܐܡܰܪ ܠܟܽܠܶܗ ܥܰܡܳܐ.
15 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܝܬܶܐ ܐ̱ܢܳܐ ܥܰܠ ܡܕܺܝܢ̱ܬܳܐ ܗܳܕܶܐ ܘܥܰܠ ܟܽܠܗܶܝܢ ܩܽܘܖ̈ܝܳܗ̇: ܟܽܠܳܗ̇ ܒܺܝܫܬܳܐ ܕܶܐܡܪܶܬ ܥܠܶܝܗ̇: ܥܰܠ ܕܩܰܫܺܝܘ ܩܕܳܠܗܽܘܢ ܕܠܳܐ ܢܶܫܡܥܽܘܢ ܦܶܬܓܳܡܰܝ̈.