Jeremiah 39
The Book of Jeremiah
܀ ܐܪܡܝܐ ܠܛ ܀
1 ܒܫܰܢ̱ܬܳܐ ܕܰܬܫܰܥ ܕܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܒܝܰܪܚܳܐ ܕܥܶܣܪܳܐ: ܐܶܬܳܐ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܗܽܘ ܘܟܽܠܶܗ ܚܰܝܠܶܗ ܥܰܠ ܐܽܘܪܺܫܠܶܡ: ܘܰܫܪܰܘ ܥܠܶܝܗ̇.
2 ܘܒܰܫܢܰܬ ܚܕܰܥܶܣܖ̈ܶܐ ܕܡܰܠܟܳܐ ܨܶܕܰܩܝܳܐ: ܒܝܰܪܚܳܐ ܚܡܺܝܫܳܝܳܐ ܒܰܬܫܰܥܬܳܐ ܒܶܗ ܒܝܰܪܚܳܐ: ܐܶܬܬܰܪܥܰܬ ܩܪܺܝܬܳܐ.
3 ܘܶܐܬܰܘ ܟܽܠܗܽܘܢ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ: ܘܺܝܬܶܒܘ ܒܬܰܪܥܳܐ ܡܶܨܥܳܝܳܐ: ܢܰܪܓܶܠ: ܫܰܪܐܨܰܪ: ܘܣܰܡܓܶܕܢܽܒܘ: ܘܣܰܪܣܟܺܝܡ: ܪܰܒ ܡܗܰܝܡܳܢ̈ܶܐ: ܢܰܪܓܶܠ: ܫܰܪܐܨܰܪ: ܪܰܒܡܰܓ: ܘܟܽܠܗܽܘܢ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ.
4 ܘܟܰܕ ܚܙܳܐ ܐܶܢܽܘܢ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܘܟܽܠܗܽܘܢ ܓܰܒܖ̈ܶܐ ܩܖ̈ܰܒܬܳܢܶܐ: ܥܪܰܩܘ ܘܰܢ̣ܦܰܩܘ ܡܶܢ ܩܪܺܝܬܳܐ ܒܠܺܠܝܳܐ: ܒܽܐܘܪܚܳܐ ܕܓܰܢܬܳܐ ܕܡܰܠܟܳܐ ܒܬܰܪܥܳܐ ܕܒܶܝܬ ܫܽܘܖ̈ܶܐ. ܘܰܢ̣ܦܰܩܘ ܒܽܐܘܪܚܳܐ ܕܰܦܩܰܥܬܳܐ.
5 ܘܰܪܕܰܦܘ ܚܰܝܠܳܐ ܕܟܰܠܕܳܝ̈ܶܐ ܒܳܬܰܪܗܽܘܢ: ܘܰܐܕܪܟܽܘܗܝ ܠܨܶܕܰܩܝܳܐ ܒܰܦܩܰܥܬܳܐ ܕܺܐܝܪܺܝܚܽܘ: ܘܟܽܠܶܗ ܚܰܝܠܶܗ ܐܶܬܒܰܕܰܪ ܡܶܢܶܗ: ܘܕܰܒܪܽܘܗܝ ܘܰܐܣܩܽܘܗܝ ܠܘܳܬ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܠܕܶܒܠܰܬ ܒܰܐܪܥܳܐ ܕܰܚܡܳܬ: ܘܡܰܠܶܠ ܥܰܡܶܗ ܕܺܝܢܳܐ.
6 ܘܰܢܟܰܣ ܡܰܠܟܳܐ ܕܒܳܒܶܠ ܠܰܒܢܰܘ̈ܗܝ ܕܨܶܕܰܩܝܳܐ ܒܕܶܒܠܰܬ ܠܥܺܢܰܘ̈ܗܝ: ܘܰܠܟܽܠܗܽܘܢ ܪܰܘܖ̈ܒܳܢܶܐ ܕܺܝܗܽܘܕܳܐ: ܢܟܰܣ ܡܰܠܟܳܐ ܕܒܳܒܶܠ ܒܕܶܒܠܰܬ.
7 ܘܥܰܝܢܰܘ̈ܗܝ ܕܨܶܕܰܩܝܳܐ ܥܰܘܰܪ: ܘܰܐܣܪܶܗ ܒܫܺܫ̈ܠܳܬܳܐ ܠܡܰܘܒܠܽܘܬܶܗ ܠܒܳܒܶܠ.
8 ܘܰܠܒܶܝܬ ܡܰܠܟܳܐ ܘܰܠܒ̈ܳܬܶܐ ܕܥܰܡܳܐ: ܐܰܘܩܶܕܘ ܟܰܠܕܳܝ̈ܶܐ ܒܢܽܘܪܳܐ: ܘܰܠܫܽܘܪܳܐ ܕܽܐܘܪܺܫܠܶܡ ܟܰܕ ܚܳܕܪܳܐ ܥܩܰܪܘ.
9 ܘܫܰܪܟܶܗ ܕܥܰܡܳܐ ܕܶܐܫܬܚܰܪܘ ܒܰܩܪܺܝܬܳܐ: ܘܐ̱ܢܳܫܳܐ ܕܰܥܪܰܩܘ ܠܘܳܬܶܗ: ܘܫܰܪܟܶܗ ܕܥܰܡܳܐ ܕܶܐܫܬܚܰܪܘ: ܫܒܳܐ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܘܰܐܘܒܶܠ ܐܶܢܽܘܢ ܠܒܳܒܶܠ.
10 ܘܡܶܢ ܡܶܣܟܺܢ̈ܶܐ ܕܥܰܡܳܐ ܕܠܰܝܬ ܠܗܽܘܢ ܡܶܕܶܡ: ܫܒܰܩ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ ܒܰܐܪܥܳܐ ܕܺܝܗܽܘܕܳܐ: ܘܝܰܗܒ ܠܗܽܘܢ ܟܰܖ̈ܡܶܐ ܘܦܽܘܠܚܳܢܳܐ ܒܝܰܘܡܳܐ ܗܰܘ.
11 ܘܰܦܩܰܕ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܥܰܠ ܐܶܪܰܡܝܳܐ: ܠܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܘܶܐܡܰܪ ܠܶܗ.
12 ܕܒܰܪܳܝܗܝ ܠܶܐܪܰܡܝܳܐ: ܘܥܰܝ̈ܢܰܝܟ ܢܶܗܘܳܝܢ ܥܠܰܘܗܝ: ܘܠܳܐ ܬܶܥܒܶܕ ܠܶܗ ܡܶܕܶܡ ܕܒܺܝܫ: ܘܟܽܠ ܡܶܕܶܡ ܕܳܐܡܰܪ ܠܳܟ ܥܒܶܕ ܠܶܗ.
13 ܘܫܰܕܰܪ ܢܰܒܽܘܙܰܪܕܳܢ ܪܰܒ ܕܰܚ̈ܫܶܐ: ܘܢܰܒܽܘܫܰܙܒܰܢ ܪܰܒ ܡܗܰܝܡ̈ܢܶܐ: ܘܢܰܪܓܶܠ: ܫܰܪܐܨܰܪ: ܪܰܒܡܰܓ: ܘܟܽܠܗܽܘܢ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ.
14 ܫܰܕܰܪܘ ܕܰܒܪܽܘܗܝ ܠܶܐܪܰܡܝܳܐ ܡܶܢ ܕܳܪܬܳܐ ܕܒܶܝܬ ܐܰܣܺܝܖ̈ܶܐ: ܘܰܐܫܠܡܽܘܗܝ ܠܓܰܕܠܝܳܐ ܒܰܪ ܐܰܚܺܝܩܰܡ: ܒܰܪ ܫܳܦܳܢ: ܠܡܰܗܦܳܟܽܘܬܶܗ ܠܒܰܝܬܶܗ: ܘܺܝܬܶܒ ܒܓܰܘ ܥܰܡܳܐ.
15 ܘܥܰܠ ܐܶܪܰܡܝܳܐ ܗܘܳܐ ܦܶܬܓܳܡܶܗ ܕܡܳܪܝܳܐ: ܟܰܕ ܗܽܘ ܟܠܶܐ ܗ̱ܘܳܐ ܒܕܳܪܰܬ ܡܛܰܪܬܳܐ.
16 ܙܶܠ ܘܶܐܡܰܪ ܠܥܰܒܕܡܠܰܟ ܟܽܘܫܳܝܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܝܬܶܐ ܐ̱ܢܳܐ ܦܶܬܓܳܡ̈ܶܐ ܥܰܠ ܩܪܺܝܬܳܐ ܗܳܕܶܐ: ܠܒܺܝܫܬܳܐ ܘܠܳܐ ܠܛܳܒܬܳܐ: ܘܢܶܗܘܽܘܢ ܩܕܳܡܰܝܟ ܒܝܰܘܡܳܐ ܗܰܘ.
17 ܘܶܐܦܰܨܝܶܟ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ ܘܠܳܐ ܬܶܫܬܠܶܡ ܒܺܐܝܕܳܐ ܕܓܰܒܖ̈ܶܐ ܕܕܳܚܶܠ ܐܰܢ̱ܬ ܡܶܢܗܽܘܢ.
18 ܘܶܐܦܰܨܝܶܟ ܘܰܒܚܰܪܒܳܐ ܠܳܐ ܬܶܦܶܠ: ܘܰܬܫܰܘܙܶܒ ܢܰܦܫܳܟ: ܥܰܠ ܕܶܐܬܬܟܶܠܬ ܥܠܰܝ ܐܳܡܰܪ ܡܳܪܝܳܐ.