Jeremiah 29
The Book of Jeremiah
܀ ܐܪܡܝܐ ܟܛ ܀
1 ܘܗܳܠܶܝܢ ܦܶܬܓܳܡܰܝ̈ ܐܶܓܰܪܬܳܐ ܕܫܰܕܰܪ ܐܶܪܰܡܝܳܐ ܢܒܺܝܳܐ ܡܶܢ ܐܽܘܪܺܫܠܶܡ ܠܒܳܒܶܠ: ܠܘܳܬ ܫܰܪܟܳܐ ܕܣܳܒ̈ܶܐ ܕܰܫܒܺܝܬܳܐ: ܘܰܠܘܳܬ ܟܳܗ̈ܢܶܐ: ܘܰܠܘܳܬ ܢܒܺܝ̈ܶܐ ܕܰܓ̈ܳܠܶܐ: ܘܰܠܘܳܬ ܟܽܠܶܗ ܥܰܡܳܐ ܕܰܫܒܳܐ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܡܶܢ ܐܽܘܪܺܫܠܶܡ ܠܒܳܒܶܠ.
2 ܡܶܢ ܒܳܬܰܪ ܕܰܢ̣ܦܰܩ ܝܽܘܟܰܢܝܳܐ ܡܰܠܟܳܐ ܘܡܰܠܟܬܳܐ: ܘܰܡܗܰܝܡܳܢܳܐ ܘܪܰܘܖ̈ܒܳܢܶܐ ܕܺܝܗܽܘܕܳܐ ܘܕܽܐܘܪܺܫܠܶܡ: ܐܘܡܳܢ̈ܶܐ ܘܕܰܚ̈ܫܶܐ ܡܶܢ ܐܽܘܪܺܫܠܶܡ.
3 ܒܝܰܕ ܐܰܠܥܳܣ ܒܰܪ ܫܳܦܳܢ: ܘܰܓܡܳܪܝܳܐ ܒܰܪ ܚܶܠܰܩܝܳܐ: ܕܫܰܕܰܪ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ ܠܘܳܬ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܠܒܳܒܶܠ.
4 ܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ ܐܰܠܳܗܳܐ ܕܺܝܣܪܳܐܶܝܠ: ܠܟܽܠܳܗ̇ ܫܒܺܝܬܳܐ ܕܶܐܫܬܰܒܝܰܬ ܡܶܢ ܐܽܘܪܺܫܠܶܡ ܠܒܳܒܶܠ.
5 ܒܢܰܘ ܒ̈ܳܬܶܐ ܘܬܶܒܘ: ܘܨܽܘܒܘ ܓܰܢ̈ܶܐ ܘܰܐܟܽܘܠܘ ܦܺܐܖ̈ܰܝܗܶܝܢ.
6 ܘܣܰܒܘ ܢܶܫ̈ܶܐ ܘܰܐܘܠܶܕܘ ܒܢܰܝ̈ܳܐ ܘܰܒ̈ܢܳܬܳܐ: ܣܰܒܘ ܠܰܒܢܰܝ̈ܟܽܘܢ ܢܶܫ̈ܶܐ: ܘܰܒ̈ܢܳܬܟܽܘܢ ܗܰܒܘ ܠܓܰܒܖ̈ܶܐ: ܘܢܰܘܠܕܽܘܢ ܒܢܰܝ̈ܳܐ ܘܰܒ̈ܢܳܬܳܐ: ܘܰܣܓܰܘ ܬܰܡܳܢ ܘܠܳܐ ܬܶܙܥܪܽܘܢ.
7 ܘܰܫܐܰܠܘ ܒܰܫܠܳܡܶܗ̇ ܕܰܩܪܺܝܬܳܐ ܕܰܫܒܺܝܬܟܽܘܢ ܬܰܡܳܢ: ܘܨܰܠܰܘ ܥܠܶܝܗ̇ ܩܕܳܡ ܡܳܪܝܳܐ: ܕܒܰܫܠܳܡܳܗ̇ ܢܶܗܘܶܐ ܠܟܽܘܢ ܫܠܳܡܳܐ.
8 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܠܳܐ ܢܰܛܥܽܘܢܟܽܘܢ ܢܒܺܝ̈ܶܐ ܕܒܰܝܢܳܬܟܽܘܢ: ܘܩܳܨܽܘܡܰܝ̈ܟܽܘܢ: ܘܠܳܐ ܬܶܫܡܥܽܘܢ ܠܚܶܠܡܰܝ̈ܟܽܘܢ ܕܰܐܢ̱ܬܽܘܢ ܚܳܠܡܺܝܢ.
9 ܡܶܛܽܠ ܕܫܽܘܩܪܳܐ ܗܶܢܽܘܢ ܡܶܬܢܰܒܶܝܢ ܠܟܽܘܢ ܒܫܶܡܝ: ܘܶܐ̱ܢܳܐ ܠܳܐ ܫܰܕܪܶܬ ܐܶܢܽܘܢ ܐܳܡܰܪ ܡܳܪܝܳܐ.
10 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܐܶܡܰܬܝ ܕܡܰܠ̈ܝܳܢ ܠܒܳܒܶܠ ܫܰܒܥܺܝܢ ܫܢܺܝ̈ܢ: ܐܶܦܪܽܘܩܟܽܘܢ ܘܰܐܩܺܝܡ ܥܠܰܝܟܽܘܢ ܦܶܬܓܳܡ̈ܶܐ ܛܳܒ̈ܶܐ: ܠܡܰܗܦܳܟܽܘܬܟܽܘܢ ܠܰܐܬܪܳܐ ܗܳܢܳܐ.
11 ܡܶܛܽܠ ܕܶܐܢܳܐ ܝܳܕܰܥ ܐ̱ܢܳܐ ܡܰܚܫܰܒܬܳܐ ܕܡܶܬܚܰܫܰܒ ܐ̱ܢܳܐ ܥܠܰܝܟܽܘܢ ܐܳܡܰܪ ܡܳܪܝܳܐ: ܡܰܚܫܰܒܬܳܐ ܕܰܫܠܳܡܳܐ ܘܠܳܐ ܕܒܺܝܫܬܳܐ: ܠܡܶܬܰܠ ܠܟܽܘܢ ܠܚܰܪܬܳܐ ܣܰܒܪܳܐ.
12 ܘܬܶܩܪܽܘܢܳܢܝ ܘܰܬܨܰܠܽܘܢ ܩܕܳܡܝ.
13 ܘܟܰܕ ܬܶܒܥܽܘܢܳܢܝ ܡܶܢ ܟܽܠܶܗ ܠܶܒܟܽܘܢ: ܬܶܫܟܚܽܘܢܳܢܝ ܐܳܡܰܪ ܡܳܪܝܳܐ.
14 ܘܰܐܗܦܶܟ ܫܒܺܝܬܟܽܘܢ: ܘܶܐܟܰܢܶܫܟܽܘܢ ܡܶܢ ܟܽܠܗܽܘܢ ܥܰܡ̈ܡܶܐ: ܘܡܶܢ ܟܽܠ ܐܰܖ̈ܥܳܬܳܐ ܕܒܰܕܰܪܬܟܽܘܢ ܠܬܰܡܳܐ ܐܳܡܰܪ ܡܳܪܝܳܐ: ܘܰܐܗܦܶܟܟܽܘܢ ܠܰܐܬܪܳܐ ܕܰܐܫܒܺܝܬܟܽܘܢ ܡܶܢ ܬܰܡܳܢ.
15 ܡܶܛܽܠ ܕܶܐܡܰܪܬܽܘܢ ܕܰܐܩܺܝܡ ܠܰܢ ܡܳܪܝܳܐ ܢܒܺܝ̈ܶܐ ܒܒܳܒܶܠ.
16 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܡܰܠܟܳܐ ܕܝܳܬܶܒ ܥܰܠ ܟܽܘܪܣܝܶܗ ܕܕܰܘܺܝܕ: ܘܥܰܠ ܟܽܠܶܗ ܥܰܡܳܐ ܕܝܳܬܶܒ ܒܰܩܪܺܝܬܳܐ ܗܳܕܶܐ: ܐܰܚܰܝ̈ܟܽܘܢ ܐܰܝܠܶܝܢ ܕܠܳܐ ܢܦܰܩܘ ܥܰܡܟܽܘܢ ܒܰܫܒܺܝܬܳܐ.
17 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ: ܗܳܐ ܡܫܰܕܰܪ ܐ̱ܢܳܐ ܥܠܰܝܗܽܘܢ ܚܰܪܒܳܐ: ܘܟܰܦܢܳܐ: ܘܡܰܘܬܳܢܳܐ: ܘܶܐܥܒܶܕ ܐܶܢܽܘܢ ܐܰܝܟ ܬܺܐܢ̈ܶܐ ܒܺܝ̈ܫܳܬܳܐ ܕܠܳܐ ܡܶܬܐܟ̈ܠܳܢ ܡܶܢ ܒܺܝܫܽܘܬܗܶܝܢ.
18 ܘܶܐܪܕܽܘܦ ܒܳܬܰܪܗܽܘܢ ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܘܶܐܬܶܠ ܐܶܢܽܘܢ ܠܙܰܘܥܬܳܐ ܠܟܽܠܗܶܝܢ ܡܰܠ̈ܟܘܳܬܳܐ ܕܰܐܪܥܳܐ: ܠܬܶܡܗܳܐ ܘܰܠܠܰܘܛܬܳܐ: ܘܰܠܚܶܣܕܳܐ: ܘܰܠܡܰܫܪܽܘܩܺܝܬܳܐ: ܒܟܽܠܗܽܘܢ ܥܰܡ̈ܡܶܐ ܕܒܰܕܪܶܬ ܐܶܢܽܘܢ ܠܬܰܡܳܢ
19 ܥܰܠ ܕܠܳܐ ܫܡܰܥܘ ܦܶܬܓܳܡܰܝ̈: ܘܫܰܕܪܶܬ ܠܘܳܬܗܽܘܢ ܟܽܠܗܽܘܢ ܥܰܒܕܰܝ̈ ܢܒܺܝ̈ܶܐ: ܩܰܕܡܶ݀ܬ ܘܫܰܕܪܶܬ: ܘܠܳܐ ܫܡܰܥܘ ܐܶܢܽܘܢ ܐܳܡܰܪ ܡܳܪܝܳܐ.
20 ܘܰܐܢ̱ܬܽܘܢ ܫܡܰܥܘ ܦܶܬܓܳܡܶܗ ܕܡܳܪܝܳܐ ܟܽܠܳܗ̇ ܫܒܺܝܬܳܐ ܕܶܐܫܬܰܒܝܰܬ ܡܶܢ ܐܽܘܪܺܫܠܶܡ ܠܒܳܒܶܠ.
21 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܥܰܠ ܐܳܚܳܒ ܒܰܪ ܩܽܘܠܺܝܳܐ: ܘܥܰܠ ܨܶܕܰܩܝܳܐ ܒܰܪ ܡܥܰܣܝܳܐ: ܕܡܶܬܢܰܒܶܝܢ ܠܟܽܘܢ ܒܫܶܡܝ ܒܫܽܘܩܪܳܐ: ܗܳܐ ܡܰܫܠܶܡ ܐ̱ܢܳܐ ܠܗܽܘܢ ܒܺܐܝܕܶܐ ܕܰܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܰܢܩܰܛܶܠ ܐܶܢܽܘܢ ܒܚܰܪܒܳܐ ܠܥܺܢܰܝ̈ܟܽܘܢ.
22 ܘܢܶܗܘܽܘܢ ܠܠܰܘܛܬܳܐ ܠܟܽܠܳܗ̇ ܫܒܺܝܬܳܐ ܕܺܝܗܽܘܕܳܐ ܕܰܒܒܳܒܶܠ: ܘܢܺܐܡܪܽܘܢ. ܥܰܒܕܳܟ ܡܳܪܝܳܐ ܐܰܝܟ ܨܶܕܰܩܝܳܐ ܘܰܐܝܟ ܐܳܚܳܒ: ܕܛܰܓܶܢ ܐܶܢܽܘܢ ܡܰܠܟܳܐ ܕܒܳܒܶܠ ܒܢܽܘܪܳܐ.
23 ܥܰܠ ܕܰܥܒܰܕܘ ܥܰܘܠܳܐ ܒܺܝܣܪܳܐܶܝܠ: ܘܓܳܪܘ ܢܶܫܰܝ̈ ܚܰܒܖ̈ܰܝܗܽܘܢ: ܘܡܰܠܶܠܘ ܦܶܬܓܳܡ̈ܶܐ ܒܫܶܡܝ ܒܫܽܘܩܪܳܐ ܕܠܳܐ ܦܰܩܕܶܬ ܐܶܢܽܘܢ: ܘܶܐ̱ܢܳܐ ܝܳܕܰܥ ܐ̱ܢܳܐ ܘܣܳܗܶܕ ܐ̱ܢܳܐ ܐܳܡܰܪ ܡܳܪܝܳܐ.
24 ܘܰܫܡܰܥܝܳܐ ܢܰܚܡܠܳܝܳܐ ܐܶܡܰܪ.
25 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܘܫܰܕܰܪ ܒܰܫܡܶܗ ܐܶܓܰܪܬܳܐ ܠܟܽܠܶܗ ܥܰܡܳܐ ܕܒܽܐܘܪܺܫܠܶܡ: ܘܠܰܨܦܰܢܝܳܐ ܒܰܪ ܡܥܰܣܝܳܐ ܟܳܗܢܳܐ: ܘܰܠܟܳܗ̈ܢܶܐ.
26 ܡܳܪܝܳܐ ܐܰܩܺܝܡܳܟ ܟܳܗܢܳܐ ܚܠܳܦ ܝܽܘܝܳܕܳܥ ܟܳܗܢܳܐ: ܕܬܶܗܘܶܐ ܦܳܩܽܘܕܳܐ ܒܒܰܝܬܶܗ ܕܡܳܪܝܳܐ: ܥܰܠ ܟܽܠ ܐ̱ܢܳܫ ܕܡܶܬܢܰܒܶܐ ܘܡܶܫܬܰܛܶܐ ܒܕܰܓܳܠܽܘܬܳܐ: ܘܬܰܪܡܶܝܘܗܝ ܒܶܝܬ ܐܰܣܺܝܖ̈ܶܐ: ܘܒܰܚܒܽܘܫܝܳܐ.
27 ܘܗܳܫܳܐ ܠܡܳܢܳܐ ܠܳܐ ܟܳܐܶܐ ܐܰܢ̱ܬ ܒܶܐܪܰܡܝܳܐ ܕܡܶܢ ܥܢܳܬܽܘܬ ܕܡܶܬܢܰܒܶܐ ܠܟܽܘܢ.
28 ܡܶܛܽܠ ܕܗܳܐ ܫܳܠܰܚ ܠܰܢ ܠܒܳܒܶܠ: ܕܢܽܘܓܪܳܐ ܗܰܘܝܢ ܐܰܢ̱ܬܽܘܢ ܬܰܡܳܢ: ܒܢܰܘ ܒ̈ܳܬܶܐ ܘܬܶܒܘ: ܘܨܽܘܒܘ ܓܰܢ̈ܶܐ ܘܰܐܟܽܘܠܘ ܦܺܐܖ̈ܰܝܗܶܝܢ.
29 ܘܰܩ̣ܪܳܐ ܨܦܰܢܝܳܐ ܟܳܗܢܳܐ ܐܶܓܰܪܬܳܐ ܗܳܕܶܐ ܒܶܐܕܢܰܘ̈ܗܝ ܕܶܐܪܰܡܝܳܐ ܢܒܺܝܳܐ.
30 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ ܠܡܺܐܡܰܪ.
31 ܫܠܽܘܚ ܠܟܽܠܳܗ̇ ܫܒܺܝܬܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܠܰܫܡܰܥܝܳܐ ܢܰܚܡܠܳܝܳܐ: ܥܰܠ ܕܶܐܬܢܰܒܺܝ ܠܟܽܘܢ ܫܡܰܥܝܳܐ ܡܶܕܶܡ ܕܶܐܢܳܐ ܠܳܐ ܫܰܕܰܪܬܶܗ: ܘܰܐܬܟܶܠܟܽܘܢ ܥܰܠ ܫܽܘܩܪܳܐ.
32 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܦܳܩܶܕ ܐ̱ܢܳܐ ܥܰܠ ܫܡܰܥܝܳܐ ܢܰܚܡܠܳܝܳܐ: ܘܥܰܠ ܙܰܪܥܶܗ: ܕܠܳܐ ܢܶܗܘܶܐ ܠܶܗ ܓܒܰܪ ܕܝܳܬܶܒ ܒܓܰܘ ܥܰܡܳܐ ܗܳܢܳܐ: ܘܠܳܐ ܢܶܚܙܶܐ ܒܛܳܒܬܳܐ ܕܥܳܒܶܕ ܐ̱ܢܳܐ ܠܥܰܡܝ ܐܳܡܰܪ ܡܳܪܝܳܐ: ܡܶܛܽܠ ܕܥܰܘܠܳܐ ܡܰܠܶܠ ܥܰܠ ܡܳܪܝܳܐ.