Jeremiah 11
The Book of Jeremiah
܀ ܐܪܡܝܐ ܝܐ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܡܳܪܝܳܐ ܠܡܺܐܡܰܪ.
2 ܫܡܰܥ ܦܶܬܓܳܡܰܝ̈ ܩܝܳܡܳܐ ܗܳܢܳܐ: ܘܶܐܡܰܪ ܠܓܰܒܖ̈ܶܐ ܕܺܝܗܽܘܕܳܐ: ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
3 ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܠܺܝܛ ܗ̱ܘ̣ ܓܰܒܪܳܐ ܕܠܳܐ ܢܶܫܡܰܥ ܦܶܬܓܳܡܰܝ̈ ܩܝܳܡܳܐ ܗܳܢܳܐ.
4 ܕܦ̣ܶܩܕܶܬ ܠܰܐܒܳܗܰܝ̈ܟܽܘܢ: ܒܝܰܘܡܳܐ ܕܰܐܦܶܩܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ ܡܶܢ ܟܽܘܪܳܐ ܕܦܰܪܙܠܳܐ: ܘܶܐܡܪܶܬ ܫܡܰܥܘ ܒܩܳܠܝ: ܘܬܶܥܒܕܽܘܢ ܐܰܢ̱ܬܽܘܢ ܟܽܠ ܕܶܐܦܰܩܶܕܟܽܘܢ: ܘܬܶܗܘܢ ܠܺܝ ܥܰܡܳܐ܆ ܘܶܐ̱ܢܳܐ ܐܶܗܘܶܐ ܠܟܽܘܢ ܐܰܠܳܗܳܐ.
5 ܘܰܐܩܺܝܡ ܡܰܘܡܳܬܳܐ ܕܺܝܡܺܝ݀ܬ ܠܰܐܒܳܗܰܝ̈ܟܽܘܢ: ܠܡܶܬܰܠ ܠܟܽܘܢ ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ ܐܰܝܟ ܕܝܰܘܡܳܢܳܐ: ܘܰܥܢܺܝ݀ܬ ܘܶܐܡܪܶܬ: ܐܰܡܺܝܢ: ܡܳܪܝܳܐ.
6 ܘܶܐܡܰܪ ܠܺܝ ܡܳܪܝܳܐ: ܩܪܺܝ ܟܽܠܗܽܘܢ ܦܶܬܓܳܡ̈ܶܐ ܗܳܠܶܝܢ ܒܩܽܘܖ̈ܝܳܐ ܕܺܝܗܽܘܕܳܐ ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ: ܘܶܐܡܰܪ: ܫܡܰܥܘ ܦܶܬܓܳܡ̈ܶܐ ܕܕܺܝܰܬܺܩ̈ܺܐ ܗܳܕܶܐ ܘܬܶܥܒܕܽܘܢ ܐܶܢܽܘܢ.
7 ܡܶܛܽܠ ܕܰܡܣܰܗܳܕܽܘ ܣܰܗܕܶܬ ܒܰܐܒܳܗܰܝ̈ܟܽܘܢ: ܒܝܰܘܡܳܐ ܕܰܐܣܩܶܬ ܐܶܢܽܘܢ ܡܶܢ ܐܰܪܥܳܐ ܕܡܶܨܪܶܝܢ ܘܰܥܕܰܡܳܐ ܠܝܰܘܡܳܢܳܐ: ܩܰܕܡܶ݀ܬ ܘܫܰܕܪܶܬ ܘܶܐܡܪܶܬ ܫܡܰܥܘ ܒܩܳܠܝ.
8 ܘܠܳܐ ܫܡܰܥܘ: ܘܠܳܐ ܐܰܪܟܶܢܘ ܐܶܕܢܗܽܘܢ: ܘܗܰܠܶܟܘ ܓܒܰܪ ܒܨܶܒ̈ܝܳܢܰܝ ܠܶܒܗܽܘܢ ܒܺܝܫܳܐ. ܘܰܐܝܬܺܝܬ ܥܠܰܝܗܽܘܢ ܟܠ ܦܶܬܓܳܡܰܝ̈ ܩܝܳܡܳܐ ܗܳܢܳܐ: ܕܦܰܩܕܶܬ ܠܡܶܫܡܰܥ ܘܠܳܐ ܫܡܰܥܘ.
9 ܘܶܐܡܰܪ ܠܺܝ ܡܳܪܝܳܐ: ܐܶܫܬܟܰܚ ܡܶܪܕܳܐ ܒܓܰܒܖ̈ܶܐ ܕܺܝܗܽܘܕܳܐ: ܘܰܒܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
10 ܬܳܒܘ ܠܰܚܛܳܗ̈ܶܐ ܕܰܐܒܳܗܰܝ̈ܗܽܘܢ ܩܰܕܡܳܝ̈ܶܐ: ܘܠܳܐ ܨܒܰܘ ܠܡܶܫܡܰܥ ܦܶܬܓܳܡܰܝ̈: ܘܗܶܢܽܘܢ ܐܶܙܰܠܘ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ ܠܡܶܦܠܰܚ ܐܶܢܽܘܢ: ܘܒܰܛܶܠܘ ܒܢܰܝ̈ ܝܺܣܪܳܐܶܝܠ ܘܰܒܢܰܝ̈ ܝܺܗܽܘܕܳܐ ܕܺܝܰܬܺܩܺܐ ܕܺܝܠܝ: ܕܰܐܩܺܝܡܶ݀ܬ ܥܰܡ ܐܰܒܳܗܰܝ̈ܗܽܘܢ.
11 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܰܝܬܶܐ ܐ̱ܢܳܐ ܥܠܰܝܗܽܘܢ ܒܺܝܫܬܳܐ: ܕܠܳܐ ܢܶܫܟܚܽܘܢ ܠܡܶܦܰܩ ܡܶܢܳܗ̇: ܘܢܶܓܥܽܘܢ ܠܘܳܬܝ ܘܠܳܐ ܐܶܫܡܰܥ ܐܶܢܽܘܢ.
12 ܘܢܺܐܙܳܠ̱̈ܢ ܩܽܘܖ̈ܝܳܐ ܕܺܝܗܽܘܕܳܐ ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܘܢܶܓܥܽܘܢ ܠܘܳܬ ܐܰܠܳܗ̈ܶܐ ܕܣܳܝܡܺܝܢ ܗܘܰܘ ܠܗܽܘܢ ܒܶܣ̈ܡܶܐ: ܘܡܶܦܪܰܩ ܠܳܐ ܢܶܦܪܩܽܘܢ ܐܶܢܽܘܢ ܒܙܰܒܢܳܐ ܕܒܺܝܫܬܗܽܘܢ.
13 ܡܶܛܽܠ ܕܰܐܝܟ ܡܶܢܝܳܢܳܐ ܕܩܽܘܖ̈ܝܳܝܟ ܗܘܰܘ ܐܰܠܳܗܰܝ̈ܟ ܝܺܗܽܘܕܳܐ: ܘܰܐܝܟ ܡܶܢܝܳܢܳܐ ܕܫܽܘ̈ܩܶܝܗ̇ ܕܽܐܘܪܺܫܠܶܡ: ܣܳܡܬܽܘܢ ܡܰܕܒܚ̈ܶܐ ܠܒܶܗܬܬܳܐ: ܡܰܕܒܚ̈ܶܐ ܠܰܡܣܳܡ ܒܶܣ̈ܡܶܐ ܠܒܰܥܠܳܐ.
14 ܘܰܐܢ̱ܬ ܠܳܐ ܬܨܰܠܶܐ ܥܰܠ ܥܰܡܳܐ ܗܳܢܳܐ: ܘܠܳܐ ܬܶܒܥܶܐ ܥܠܰܝܗܽܘܢ ܒܳܥܽܘܬܳܐ ܘܰܨܠܽܘܬܳܐ: ܡܶܛܽܠ ܕܠܳܐ ܫܳܡܰܥ ܐ̱ܢܳܐ ܒܙܰܒܢܳܐ ܕܩܳܪܶܝܢ ܠܺܝ ܒܰܙܒܰܢ ܒܺܝܫܬܗܽܘܢ.
15 ܠܡܳܢܳܐ ܚܰܒܺܝܒܬܝ ܒܒܰܝܬܝ ܥܒܰܕܬܝ ܛܰܢܦܽܘܬܳܐ ܣܰܓܺܝܐܬܳܐ: ܘܰܒܣܰܪ ܩܽܘܕܫܳܐ ܢܰܥܒܪܽܘܢ ܡܶܢܟܝ: ܡܶܛܽܠ ܒܺܝܫܬܶܟܝ ܕܥܶܫܢܰܬ.
16 ܙܰܝܬܳܐ ܥܰܒܺܝܛܳܐ ܫܰܦܺܝܪ ܦܺܐܖ̈ܶܐ ܘܫܰܦܺܝܪ ܚܶܙܘܳܐ ܩ̣ܪܳܐ ܡܳܪܝܳܐ ܫܡܶܟܝ: ܠܩܳܠܳܐ ܕܰܓܙܺܝܪܬܳܐ ܪܰܒܳܬܳܐ: ܫܒܽܘܩܘ ܢܽܘܪܳܐ ܥܠܶܝܗ̇ ܘܰܬܚܰܒܶܠ ܣܰܘ̈ܟܶܝܗ̇.
17 ܘܡܳܪܝܳܐ ܨܒܰܐܬ ܕܢܰܨܒܶܟܝ: ܡܰܠܶܠ ܥܠܰܝܟܝ ܒܺܝܫܬܳܐ: ܡܶܛܽܠ ܒܺܝܫܽܘܬܳܐ ܕܒܶܝܬ ܝܺܣܪܳܐܶܝܠ ܘܰܕܒܶܝܬ ܝܺܗܽܘܕܳܐ: ܕܰܥܒܰܕܘ ܠܗܽܘܢ ܠܡܰܪܓܳܙܽܘܬܰܢܝ: ܠܰܡܣܳܡ ܒܶܣ̈ܡܶܐ ܠܒܰܥܠܳܐ.
18 ܡܳܪܝܳܐ ܚܰܘܳܢܝ ܘܶܐܕܰܥ ܫܰܪܺܝܪܳܐܺܝܬ. ܚܰܘܺܝܬܳܢܝ ܥܒܳܕܰܝ̈ܗܽܘܢ.
19 ܘܶܐ̱ܢܳܐ ܐܰܝܟ ܐܶܡܪܳܐ ܒܪܺܝܪܳܐ ܕܡܶܬܕܒܰܪ ܠܢܶܟܣܬܳܐ: ܘܠܳܐ ܝܶܕܥܶܬ ܕܰܥܠܰܝ ܐܶܬܚܰܫܰܒܘ ܡܰܚܫܰܒܬܳܐ: ܘܶܐܡܰܪܘ ܢܰܚܒܶܠ ܩܰܝܣܳܐ ܒܠܰܚܡܶܗ: ܘܢܰܘܒܕܺܝܘܗܝ ܡܶܢ ܐܰܪܥܳܐ ܕܚܰܝ̈ܶܐ: ܘܰܫܡܶܗ ܬܽܘܒ ܠܳܐ ܢܶܬܕܟܰܪ.
20 ܘܡܳܪܝܳܐ ܚܰܝܠܬܳܢܳܐ ܕܰܝܳܢܳܐ ܕܩܽܘܫܬܳܐ: ܒܳܚܰܪ ܟܽܘܠ̈ܝܳܬܳܐ ܘܠܶܒܳܐ: ܐܶܚܙܶܐ ܦܽܘܪܥܳܢܳܟ ܡܶܢܗܽܘܢ: ܡܶܛܽܠ ܕܠܳܟ ܓܠܺܝ݀ܬ ܕܺܝܢܰܝ̈.
21 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܐ̱ܢܳܫܝ̈ ܥܢܳܬܽܘܬ ܕܒܳܥܶܝܢ ܢܰܦܫܳܟ: ܘܳܐܡܪܺܝܢ ܠܳܐ ܬܶܬܢܰܒܶܐ ܒܰܫܡܶܗ ܕܡܳܪܝܳܐ ܕܠܳܐ ܬܡܽܘܬ ܒܺܐܝ̈ܕܰܝܢ.
22 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܨܒܰܐܬ: ܗܳܐ ܦܳܩܶܕ ܐ̱ܢܳܐ ܥܠܰܝܗܽܘܢ: ܥܠܰܝ̈ܡܶܐ ܢܡܽܘܬܽܘܢ ܒܚܰܪܒܳܐ: ܘܳܐܦ ܒܢܰܝ̈ܗܽܘܢ ܘܰܒ̈ܢܳܬܗܽܘܢ ܢܡܽܘܬܽܘܢ ܒܟܰܦܢܳܐ.
23 ܘܚܰܪܬܳܐ ܠܳܐ ܬܶܗܘܶܐ ܠܗܽܘܢ: ܡܶܛܽܠ ܕܡܰܝܬܶܐ ܐ̱ܢܳܐ ܒܺܝܫܬܳܐ ܥܰܠ ܐ̱ܢܳܫܰܝ̈ ܥܢܳܬܽܘܬ ܫܰܢ̱ܬܳܐ ܕܦܽܘܩܕܳܢܗܽܘܢ.