Jeremiah 44
The Book of Jeremiah
܀ ܐܪܡܝܐ ܡܕ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ ܡܶܢ ܩܕܳܡ ܡܳܪܝܳܐ: ܕܢܶܬܢܰܒܶܐ ܥܰܠ ܟܽܠܗܽܘܢ ܝܽܘܕܳܝ̈ܶܐ ܕܝܳܬܒܺܝܢ ܒܰܐܪܥܳܐ ܕܡܶܨܪܶܝܢ: ܘܰܕܝܳܬܒܺܝܢ ܒܡܰܓܕܽܘܠ ܘܰܒܬܰܚܦܺܝܣ: ܘܰܒܡܰܦܰܣ: ܘܒܰܐܪܥܳܐ ܕܦܰܬܪܽܘܣ.
2 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܰܢ̱ܬܽܘܢ ܚܙܰܝܬܽܘܢ ܟܽܠܳܗ̇ ܒܺܝܫܬܳܐ ܕܰܐܝܬܺܝ݀ܬ ܥܰܠ ܐܽܘܪܺܫܠܶܡ: ܘܥܰܠ ܟܽܠܗܶܝܢ ܩܽܘܖ̈ܝܳܐ ܕܺܝܗܽܘܕܳܐ: ܘܗܶܢܶܝܢ ܚܰܖ̈ܒܳܢ ܝܰܘܡܳܢܳܐ: ܘܠܰܝܬ ܒܗܶܝܢ ܐ̱ܢܳܫ ܕܝܳܬܶܒ.
3 ܡܶܛܽܠ ܟܽܠܳܗ̇ ܒܺܝܫܬܳܐ ܕܰܥܒܰܕܘ ܘܰܐܪܓܙܽܘܢܝ: ܘܶܐܙܰܠܘ ܣܳܡܘ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ: ܐܰܝܠܶܝܢ ܕܠܳܐ ܝܺܕܰܥܘ ܐܶܢܽܘܢ ܗܶܢܽܘܢ ܘܰܐܒܳܗܰܝ̈ܗܽܘܢ.
4 ܘܫܰܕܪܶܬ ܠܘܳܬܗܽܘܢ ܠܟܽܠܗܽܘܢ ܥܰܒܕܰܝ̈ ܢܒܺܝ̈ܶܐ: ܩܰܕܡܶܬ ܘܫܰܕܪܶܬ ܘܶܐܡܪܶܬ: ܠܳܐ ܬܶܥܒܕܽܘܢ ܛܰܢܦܽܘܬܳܐ ܗܳܕܶܐ ܕܰܣܢܺܝ݀ܬ.
5 ܘܠܳܐ ܫ̣ܡܰܥܘ ܘܠܳܐ ܨܠܰܘ ܐܶܕܢܗܽܘܢ ܕܢܶܗܦܟܽܘܢ ܡܶܢ ܒܺܝ̈ܫܳܬܗܽܘܢ: ܕܠܳܐ ܢܣܺܝܡܽܘܢ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ.
6 ܘܶܐܬܬܢܺܝܚܘ ܪܽܘܓܙܝ ܘܚܶܡܬܝ: ܘܶܐܚܕܰܬ ܢܽܘܪܳܐ ܒܩܽܘܖ̈ܝܳܐ ܕܺܝܗܽܘܕܳܐ: ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ: ܘܰܗܘܰܝ̈ ܠܚܽܘܪܒܳܐ ܘܰܠܬܶܡܗܳܐ ܐܰܝܟ ܕܝܰܘܡܳܢܳܐ.
7 ܘܗܳܫܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܠܡܳܢܳܐ ܥܳܒܕܺܝܬܽܘܢ ܒܺܝܫܬܳܐ ܪܰܒܬܳܐ ܥܰܠ ܢܰܦ̈ܫܳܬܟܽܘܢ: ܕܬܰܘܒܕܽܘܢ ܡܶܢܟܽܘܢ ܓܰܒܖ̈ܶܐ ܘܢܶܫ̈ܶܐ: ܘܰܥܠܰܝ̈ܡܶܐ ܘܝܰܠܽܘ̈ܕܶܐ ܡܶܢ ܓܰܘ ܝܺܗܽܘܕܳܐ: ܕܠܳܐ ܬܶܫܒܩܽܘܢ ܠܟܽܘܢ ܚܰܪܬܳܐ.
8 ܡܶܛܽܠ ܕܰܐܪܓܶܙܬܽܘܢܳܢܝ ܒܰܥܒܳܕ ܐܺܝܕܰܝ̈ܟܽܘܢ: ܘܣܳܡܬܽܘܢ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ: ܒܰܐܪܥܳܐ ܕܡܶܨܪܶܝܢ ܕܥܰܠܬܽܘܢ ܠܡܶܥܡܰܪ ܬܰܡܳܢ: ܕܰܐܘܒܶܕܟܽܘܢ ܘܬܶܗܘܢ ܠܠܰܘܛܬܳܐ ܘܰܠܚܶܣܕܳܐ: ܒܟܽܠܗܽܘܢ ܥܰܡ̈ܡܶܐ ܕܰܐܪܥܳܐ.
9 ܠܡܳܐ ܛܥܰܝܬܽܘܢ ܒܺܝܫܬܳܐ ܕܰܐܒܳܗܰܝ̈ܟܽܘܢ: ܘܒܺܝܫܬܳܐ ܕܡܰܠ̈ܟܶܐ ܕܺܝܗܽܘܕܳܐ: ܘܒܺܝܫܬܳܐ ܕܢܶܫܰܝ̈ܗܽܘܢ: ܕܰܥܒܰܕܘ ܒܰܐܪܥܳܐ ܕܺܝܗܽܘܕܳܐ: ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ.
10 ܘܠܳܐ ܐܶܬܕܰܟܺܝܘ ܥܕܰܡܳܐ ܠܝܰܘܡܳܢܳܐ: ܘܠܳܐ ܕܚܶܠܘ: ܘܠܳܐ ܦܰܠܚܽܘܢܝ: ܘܠܳܐ ܗܰܠܶܟܘ ܒܢܳܡܽܘܣܝ ܘܒܰܩܝܳܡܝ ܕܝܶܗܒܶ݀ܬ ܠܗܽܘܢ ܘܠܰܐܒܳܗܰܝ̈ܗܽܘܢ.
11 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܣܳܐܶܡ ܐ̱ܢܳܐ ܐܰܦܰܝ̈ ܒܟܽܘܢ ܠܒܺܝܫܬܳܐ: ܘܰܠܡܰܘܒܳܕܽܘ ܠܟܽܠܗܽܘܢ ܕܒܶܝܬ ܝܺܗܽܘܕܳܐ.
12 ܘܶܐܬܒܰܪ ܫܰܪܟܳܐ ܕܺܝܗܽܘܕܳܐ: ܕܣ̣ܳܡܘ ܐܰܦܰܝ̈ܗܽܘܢ ܠܡܶܥܰܠ ܠܡܶܨܪܶܝܢ ܠܡܶܥܡܰܪ ܬܰܡܳܢ: ܘܰܢܣܽܘܦܽܘܢ ܟܽܠܗܽܘܢ ܒܰܐܪܥܳܐ ܕܡܶܨܪܶܝܢ. ܘܰܢܡܽܘܬܽܘܢ ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܘܢܶܗܘܽܘܢ ܠܡܰܘܡܳܬܳܐ: ܘܰܠܬܶܡܗܳܐ: ܘܰܠܠܰܘܛܬܳܐ ܘܰܠܚܶܣܕܳܐ.
13 ܘܶܐܦܩܽܘܕ ܥܰܠ ܕܝܳܬܒܺܝܢ ܒܰܐܪܥܳܐ ܕܡܶܨܪܶܝܢ: ܐܰܝܟ ܕܦܶܩܕܶܬ ܥܰܠ ܐܽܘܪܺܫܠܶܡ: ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ.
14 ܘܠܳܐ ܢܶܗܘܶܐ ܠܗܽܘܢ ܦܰܠܺܝܛܳܐ ܘܰܣܪܺܝܕܳܐ: ܠܫܰܪܟܳܐ ܕܺܝܗܽܘܕܳܐ ܕܥܳܐܠܺܝܢ ܠܡܶܥܡܰܪ ܬܰܡܳܢ ܒܰܐܪܥܳܐ ܕܡܶܨܪܶܝܢ: ܘܰܠܡܶܗܦܰܟ ܠܰܐܪܥܳܐ ܕܺܝܗܽܘܕܳܐ: ܕܗܶܢܽܘܢ ܣܳܒܪܺܝܢ ܒܢܰܦܫܗܽܘܢ ܠܡܶܗܦܰܟ ܠܬܰܡܳܢ: ܠܳܐ ܢܶܗܦܟܽܘܢ ܐܶܠܳܐ ܐܶܢ ܙܥܽܘܖ̈ܶܐ.
15 ܘܰܥܢܰܘ ܘܶܐܡܰܪܘ ܠܶܐܪܰܡܝܳܐ: ܟܠ ܓܰܒܖ̈ܶܐ ܕܝܳܕܥܺܝܢ ܗܘܰܘ ܕܣܳܝ̈ܡܳܢ ܗܘܰܝ̈ ܢܶܫܰܝ̈ܗܽܘܢ ܒܶܣ̈ܡܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ: ܘܟܽܠܗܶܝܢ ܢܶܫ̈ܶܐ ܕܩܳܝ̈ܡܳܢ ܟܶܢܫܳܐ ܪܰܒܳܐ: ܘܟܽܠܶܗ ܥܰܡܳܐ ܕܝܳܬܒܺܝܢ ܒܰܐܪܥܳܐ ܕܡܶܨܪܶܝܢ ܘܰܒܦܰܬܪܽܘܣ.
16 ܘܶܐܡܰܪܘ ܠܶܗ: ܦܶܬܓܳܡܳܐ ܕܶܐܡܰܪܬ ܠܰܢ ܒܫܶܡ ܡܳܪܝܳܐ: ܠܳܐ ܫܳܡܥܺܝܢܰܢ ܠܳܟ.
17 ܐܶܠܳܐ ܥܳܒܕܺܝܢܰܢ ܟܠ ܦܶܬܓܳܡܳܐ ܕܰܢܦܰܩ ܡܶܢ ܦܽܘܡܶܢ: ܠܰܡܣܳܡ ܒܶܣ̈ܡܶܐ ܠܦܽܘܠܚܳܢ ܫܡܰܝܳܐ: ܘܠܰܡܢܰܩܳܝܽܘ ܠܳܗ̇ ܢܽܘ̈ܩܳܝܶܐ: ܐܰܝܟ ܕܰܥܒܰܕܢ ܚܢܰܢ: ܘܰܐܒܳܗܰܝ̈ܢ: ܘܡܰܠ̈ܟܰܝܢ: ܘܪܰܘܖ̈ܒܳܢܰܝܢ: ܒܩܽܘܖ̈ܝܳܐ ܕܺܝܗܽܘܕܳܐ ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ ܘܣܳܒܥܺܝܢ ܗܘܰܝܢ ܠܰܚܡܳܐ: ܘܛܳܒ ܗ̱ܘܳܐ ܠܰܢ: ܘܒܺܝܫܬܳܐ ܠܳܐ ܚܙܰܝܢ.
18 ܘܗܳܐ ܡܶܢ ܕܦܳܫܢ ܡܶܢ ܕܠܰܡܣܳܡ ܒܶܣ̈ܡܶܐ ܠܦܽܘܠܚܳܢ ܫܡܰܝܳܐ: ܘܠܰܡܢܰܩܳܝܽܘ ܠܳܗ̇ ܢܽܘ̈ܩܳܝܶܐ: ܚܣܰܪ ܠܰܢ ܟܠ ܡܶܕܶܡ: ܘܰܒܚܰܪܒܳܐ ܘܰܒܟܰܦܢܳܐ ܣܳܦܢ.
19 ܘܰܥܢܰܝ̈ ܟܽܠܗܶܝܢ ܢܶܫ̈ܶܐ ܘܳܐܡܖ̈ܳܢ: ܟܰܕ ܚܢܰܢ ܣܳܝ̈ܡܳܢ ܗܘܰܝܢ ܒܶܣ̈ܡܶܐ ܠܡܰܠܟܰܬ ܫܡܰܝܳܐ: ܘܡܶܢܩ̈ܝܳܢ ܗܘܰܝܢ ܠܳܗ̇ ܢܽܘ̈ܩܳܝܶܐ: ܠܳܐ ܗ̱ܘܳܐ ܒܶܠܥܳܕ ܡܶܢ ܓܰܒܖ̈ܰܝܢ ܥ̣ܒܰܕܢ ܠܳܗ̇ ܙܽܘܬܖ̈ܶܐ: ܘܢܰܩܺܝܢ ܠܳܗ̇ ܢܽܘ̈ܩܳܝܶܐ.
20 ܘܶܐܡܰܪ ܐܶܪܰܡܝܳܐ ܠܟܽܠܶܗ ܥܰܡܳܐ ܠܓܰܒܖ̈ܶܐ ܘܰܠܢܶܫ̈ܶܐ: ܘܰܠܟܽܠܶܗ ܥܰܡܳܐ ܕܶܐܡܰܪܘ ܠܶܗ ܡ̈ܶܠܶܐ ܗܳܠܶܝܢ.
21 ܗܰܘ ܥܶܛܪܳܐ ܕܒܶܣ̈ܡܶܐ ܕܣܳܡܬܽܘܢ ܒܩܽܘܖ̈ܝܳܐ ܕܺܝܗܽܘܕܳܐ ܘܰܒܫܽܘ̈ܩܶܝܗ̇ ܕܽܐܘܪܺܫܠܶܡ: ܐܰܢ̱ܬܽܘܢ ܘܰܐܒܳܗܰܝ̈ܟܽܘܢ: ܘܡܰܠܟܰܝ̈ܟܽܘܢ: ܘܪܰܘܖ̈ܒܳܢܰܝܟܽܘܢ: ܘܥܰܡܳܐ ܕܰܐܪܥܳܐ: ܠܗܰܘ ܐܶܬܕܟܰܪ ܡܳܪܝܳܐ ܘܰܣܠܶܩ ܥܰܠ ܠܶܒܶܗ.
22 ܘܠܳܐ ܡܶܫܟܰܚ ܬܽܘܒ ܡܳܪܝܳܐ ܠܡܶܫܒܰܩ ܠܟܽܘܢ: ܡܶܛܽܠ ܒܺܝܫܽܘܬܐ ܕܰܥܒܳܕܰܝ̈ܟܽܘܢ ܘܡܶܛܽܠ ܛܰܢܦܽܘܬܳܐ ܕܰܥܒܰܕܬܽܘܢ: ܘܰܗܘܳܬ ܐܰܪܥܟܽܘܢ ܠܬܶܡܗܳܐ: ܘܰܠܠܰܘܛܬܳܐ: ܘܰܠܚܽܘܪܒܳܐ ܡܶܢ ܒܠܰܝ ܕܝܳܬܶܒ ܐܰܝܟ ܕܝܰܘܡܳܢܳܐ.
23 ܥܰܠ ܕܣܳܡܬܽܘܢ ܒܶܣ̈ܡܶܐ ܘܰܚܛܰܝܬܽܘܢ ܠܡܳܪܝܳܐ: ܘܠܳܐ ܫܡܰܥܬܽܘܢ ܒܩܳܠܶܗ ܕܡܳܪܝܳܐ: ܘܰܒܢܳܡܽܘܣܶܗ ܘܒܰܩܝܳܡܶܗ ܘܰܒܣܳܗ̈ܕܘܳܬܶܗ ܠܳܐ ܗܰܠܶܟܬܽܘܢ: ܡܶܛܽܠ ܗܳܢܳܐ ܐܰܕܪܟܰܬܟܽܘܢ ܒܺܝܫܬܳܐ ܗܳܕܶܐ ܐܰܝܟ ܕܝܰܘܡܳܢܳܐ.
24 ܘܶܐܡܰܪ ܐܶܪܰܡܝܳܐ ܠܟܽܠܶܗ ܥܰܡܳܐ ܠܓܰܒܖ̈ܶܐ ܘܰܠܢܶܫ̈ܶܐ: ܫܡܰܥܘ ܦܶܬܓܳܡܶܗ ܕܡܳܪܝܳܐ ܟܽܠܶܗ ܝܺܗܽܘܕܳܐ ܕܒܰܐܪܥܳܐ ܕܡܶܨܪܶܝܢ.
25 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܰܢ̱ܬܽܘܢ ܘܢܶܫܰܝ̈ܟܽܘܢ ܐܶܡܰܪܬܽܘܢ ܒܦܽܘܡܟܽܘܢ ܘܒܺܐܝ̈ܕܰܝܟܽܘܢ: ܫܰܡܠܺܝܬܽܘܢ: ܘܶܐܡܰܪܬܽܘܢ ܢܰܫܰܪ ܢܶܕܖ̈ܰܝܢ ܕܰܢܕܰܪܢ ܠܰܡܣܳܡ ܒܶܣ̈ܡܶܐ ܠܦܽܘܠܚܳܢ ܫܡܰܝܳܐ: ܘܠܰܡܢܰܩܳܝܽܘ ܠܶܗ ܢܽܘ̈ܩܳܝܶܐ: ܐܰܫܰܪܬܽܘܢ ܡܰܘܡܳܬܟܽܘܢ: ܘܰܥܒܰܕܬܽܘܢ ܢܶܕܖ̈ܰܝܟܽܘܢ.
26 ܡܶܛܽܠ ܗܳܢܳܐ ܫܡܰܥܘ ܦܶܬܓܳܡܶܗ ܕܡܳܪܝܳܐ: ܟܽܠܶܗ ܝܺܗܽܘܕܳܐ ܕܝܳܬܒܺܝܢ ܒܰܐܪܥܳܐ ܕܡܶܨܪܶܝܢ: ܗܳܐ ܐܶܢܳܐ ܝܺܡܺܝ݀ܬ ܒܫܶܡܝ ܪܰܒܳܐ ܐܳܡܰܪ ܡܳܪܝܳܐ: ܕܠܳܐ ܢܶܗܘܶܐ ܬܽܘܒ ܫܶܡܝ ܒܦܽܘܡܗܽܘܢ ܕܒܶܝܬ ܝܺܗܽܘܕܳܐ ܕܰܒܟܽܠܳܗ̇ ܐܰܪܥܳܐ ܕܡܶܨܪܶܝܢ: ܘܠܳܐ ܢܺܐܡܪܽܘܢ ܚܰܝ ܗܽܘ ܡܳܪܝܳܐ ܐܰܠܳܗܳܐ.
27 ܐܶܢܳܐ ܓܶܝܪ ܡܣܰܪܗܶܒ ܐ̱ܢܳܐ ܥܠܰܝܗܽܘܢ ܒܺܝܫܬܳܐ ܐܳܡܰܪ ܡܳܪܝܳܐ: ܘܰܢܣܽܘܦܽܘܢ ܟܽܠܗܽܘܢ ܓܰܒܖ̈ܶܐ ܕܺܝܗܽܘܕܳܐ ܕܒܰܐܪܥܳܐ ܕܡܶܨܪܶܝܢ: ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܥܕܰܡܳܐ ܕܶܐܓܰܡܰܪ ܐܶܢܽܘܢ.
28 ܘܦܰܠܺܝܛܰܝ̈ ܚܰܪܒܳܐ ܢܶܗܦܟܽܘܢ ܡܶܢ ܐܰܪܥܳܐ ܕܡܶܨܪܶܝܢ: ܠܰܐܪܥܳܐ ܕܺܝܗܽܘܕܳܐ ܩܰܠܺܝܠ ܒܡܶܢܝܳܢܳܐ: ܘܢܶܕܥܽܘܢ ܟܽܠܶܗ ܫܰܪܟܳܐ ܕܺܝܗܽܘܕܳܐ ܕܶܐܙܰܠܘ ܠܡܶܥܡܰܪ ܒܰܐܪܥܳܐ ܕܡܶܨܪܶܝܢ: ܦܶܬܓܳܡܳܐ ܕܡܶܢ ܢܶܫܰܪ: ܕܺܝܠܝ ܐܰܘ ܕܺܝܠܗܽܘܢ.
29 ܘܗܳܕܶܐ ܠܟܽܘܢ ܐܳܬܳܐ ܐܳܡܰܪ ܡܳܪܝܳܐ: ܕܦܳܩܶܕ ܐ̱ܢܳܐ ܥܠܰܝܟܽܘܢ ܒܰܐܬܪܳܐ ܗܳܢܳܐ: ܕܬܶܕܥܽܘܢ ܕܫܳܖ̈ܳܢ ܡܶܠܰܝ̈ ܥܠܰܝܟܽܘܢ ܠܒܺܝܫܬܳܐ.
30 ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܰܫܠܶܡ ܐ̱ܢܳܐ ܠܶܗ ܠܦܶܪܥܽܘܢ ܚܓܺܝܪܳܐ ܡܰܠܟܳܐ ܕܡܶܨܪܶܝܢ: ܒܺܐܝܕܳܐ ܕܰܒܥܶܠܕܒܳܒܰܘ̈ܗܝ: ܘܒܺܐܝܕܳܐ ܕܰܐܝܠܶܝܢ ܕܒܳܥܶܝܢ ܢܰܦܫܶܗ: ܐܰܝܟ ܕܰܐܫܠܡܶ݀ܬ ܠܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܒܺܐܝܕܳܐ ܕܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܒܥܶܠܕܒܳܒܶܗ ܘܒܳܥܶܐ ܢܰܦܫܶܗ.