Jeremiah 32
The Book of Jeremiah
܀ ܐܪܡܝܐ ܠܒ ܀
1 ܦܶܬܓܳܡܳܐ ܕܰܗܘܳܐ ܥܰܠ ܐܶܪܰܡܝܳܐ: ܡܶܢ ܩܕܳܡ ܡܳܪܝܳܐ: ܒܫܰܢܬܳܐ ܥܣܺܝܪܳܝܬܳܐ ܘܰܕܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ. ܗܺܝ ܗܺܝ ܬܡܳܢܰܥܶܣܖ̈ܶܐ ܠܢܰܒܽܘܒܟܰܕܢܳܨܰܪ ܡܰܠܟܳܐ ܕܒܳܒܶܠ.
2 ܘܗܳܝܕܶܝܢ ܚܰܝ̈ܠܶܐ ܕܡܰܠܟܳܐ ܕܒܳܒܶܠ ܟܪܺܝܟܺܝܢ ܠܽܐܘܪܺܫܠܶܡ: ܘܶܐܪܰܡܝܳܐ ܢܒܺܝܳܐ ܟܠܶܐ ܗ̱ܘܳܐ ܒܕܳܪܰܬ ܡܰܛܰܪܬܳܐ ܕܒܶܝܬ ܡܰܠܟܳܐ ܕܺܝܗܽܘܕܳܐ.
3 ܕܰܟܠܳܝܗܝ ܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܘܶܐܡܰܪ: ܡܶܛܽܠ ܡܳܢܳܐ ܡܶܬܢܰܒܶܐ ܐܰܢ̱ܬ ܘܳܐܡܰܪ ܐܰܢ̱ܬ: ܗܳܟܰܢܳܐ ܐܳܡܰܪ ܡܳܪܝܳܐ ܗܳܐ ܡܰܫܠܶܡ ܐ̱ܢܳܐ ܠܳܗ̇ ܠܰܩܪܺܝܬܳܐ ܗܳܕܶܐ ܒܺܐܝ̈ܕܰܘܗܝ ܕܡܰܠܟܳܐ ܕܒܳܒܶܠ: ܘܢܶܟܒܫܺܝܗ̇.
4 ܘܨܶܕܰܩܝܳܐ ܡܰܠܟܳܐ ܕܺܝܗܽܘܕܳܐ: ܠܳܐ ܢܶܬܦܰܠܰܛ ܡܶܢ ܐܺܝܕܳܐ ܕܟܰܠܕܳܝ̈ܶܐ: ܡܶܛܽܠ ܕܡܶܫܬܠܳܡܽܘ ܢܶܫܬܠܶܡ ܒܺܐܝ̈ܕܰܘܗܝ ܕܡܰܠܟܳܐ ܕܒܳܒܶܠ: ܘܰܢܡܰܠܶܠ ܦܽܘܡܶܗ ܥܰܡ ܦܽܘܡܶܗ: ܘܥܰܝ̈ܢܰܘܗܝ ܠܥܰܝ̈ܢܰܘܗܝ ܢܶܚ̈ܙܝܳܢ.
5 ܘܰܠܒܳܒܶܠ ܢܰܘܒܠܺܝܘܗܝ ܠܨܶܕܰܩܝܳܐ: ܘܬܰܡܳܢ ܢܶܗܘܶܐ ܥܕܰܡܳܐ ܠܝܰܘܡܳܐ ܕܦܳܩܶܕ ܐ̱ܢܳܐ ܠܶܗ ܐܳܡܰܪ ܡܳܪܝܳܐ: ܡܶܛܽܠ ܕܬܶܬܟܰܬܫܽܘܢ ܥܰܡ ܟܰܠܕܳܝ̈ܶܐ ܘܠܳܐ ܬܶܙܟܽܘܢ.
6 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܠܡܺܐܡܰܪ.
7 ܗܳܐ ܢܰܚܡܳܐܶܝܠ ܒܰܪ ܫܳܠܽܘܡ ܕܳܕܳܟ ܐܳܬܶܐ ܠܘܳܬܳܟ: ܘܳܐܡܰܪ: ܙܒܶܢ ܠܳܟ ܚܰܩܠܝ ܕܒܰܥܢܳܬܽܘܬ ܕܒܰܐܪܥܳܐ ܕܒܶܢܝܳܡܶܝܢ: ܡܶܛܽܠ ܕܠܳܟ ܙܳܕܩܳܐ ܝܳܪܬܽܘܬܳܐ ܠܡܶܙܒܰܢ.
8 ܘܶܐܬܳܐ ܠܘܳܬܝ ܢܰܚܡܳܐܶܝܠ ܒܰܪ ܕܳܕܝ: ܐܰܝܟ ܦܶܬܓܳܡܶܗ ܕܡܳܪܝܳܐ ܠܕܳܪܰܬ ܡܰܛܰܪܬܳܐ: ܘܶܐܡܰܪ ܠܺܝ: ܙܒܶܢ ܠܳܟ ܚܰܩܠܝ ܕܒܰܥܢܳܬܽܘܬ ܕܒܰܐܪܥܳܐ ܕܒܶܢܝܳܡܶܝܢ: ܡܶܛܽܠ ܕܠܳܟ ܙܳܕܩܳܐ ܝܳܪܬܽܘܬܳܐ: ܘܠܳܟ ܘܳܠܝܳܐ. ܙܒܶܢܶܝܗ̇ ܠܳܟ.
9 ܘܝܶܕܥܶ݀ܬ ܕܦܶܬܓܳܡܶܗ ܗ̱ܘ ܕܡܳܪܝܳܐ: ܘܙܶܒܢܶ݀ܬ ܚܰܩܠܳܐ ܡܶܢ ܢܰܚܡܳܐܶܝܠ ܒܰܪ ܕܳܕܝ ܕܒܰܥܢܳܬܽܘܬ: ܘܬܶܩܠܶܬ ܠܶܗ ܟܶܣܦܳܐ: ܫܰܒܥܳܐ ܡܰܬܩܳܠܺܝ̈ܢ ܘܥܶܣܪܳܐ ܕܟܶܣܦܳܐ.
10 ܘܟܶܬܒܶ݀ܬ ܫܛܳܖ̈ܶܐ ܘܚܰܬܡܶ݀ܬ ܘܣܰܗܕܶܬ ܣܳܗ̈ܕܶܐ: ܘܬܶܩܠܶܬ ܟܶܣܦܳܐ ܒܡܰܣܰܐܬܳܐ.
11 ܘܢܶܣܒܶ݀ܬ ܫܛܳܖ̈ܶܐ ܕܰܙܒܺܝܢܬܳܐ: ܕܰܚܬܺܝܡ ܒܦܽܘܩܕܳܢܳܐ ܘܰܒܢܳܡܽܘܣܳܐ ܘܰܕܠܳܐ ܡܚܰܬܰܡ.
12 ܘܝܶܗܒܶ݀ܬ ܫܛܳܖ̈ܶܐ ܕܰܙܒܺܝܢܬܳܐ ܠܒܰܪܽܘܟ ܒܰܪ ܢܺܪܝܳܐ: ܒܰܪ ܡܥܰܣܝܳܐ: ܠܥܺܝܢ ܢܰܚܡܳܐܶܝܠ ܒܰܪ ܕܳܕܝ: ܘܰܠܥܺܝܢ ܣܳܗ̈ܕܶܐ ܕܰܟܬܺܝܒܺܝܢ ܒܰܫܛܳܖ̈ܶܐ ܕܰܙܒܺܝܢܬܳܐ: ܘܰܠܥܺܝܢ ܟܽܠܗܽܘܢ ܝܽܘ̈ܕܳܝܶܐ ܕܝܳܬܒܺܝܢ ܒܕܳܪܰܬ ܡܰܛܰܪܬܳܐ.
13 ܘܦܰܩܕܶܬ ܠܒܰܪܽܘܟ ܠܥܺܢܰܝ̈ܗܽܘܢ ܘܶܐܡܪܶܬ.
14 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܣܰܒ ܫܛܳܖ̈ܶܐ ܗܳܠܶܝܢ: ܫܛܳܪܳܐ ܗܳܢܳܐ ܕܰܙܒܺܝܢܬܳܐ ܕܰܚܬܺܝܡ: ܘܰܫܛܳܪܳܐ ܗܳܢܳܐ ܕܠܳܐ ܡܚܰܬܰܡ: ܘܰܐܪܡܳܐ ܐܶܢܽܘܢ ܒܡܳܐܢܳܐ ܕܦܰܚܳܪܳܐ: ܕܢܶܬܢܰܛܪܽܘܢ ܝܰܘ̈ܡܳܬܳܐ ܣܰܓܺܝ̈ܐܶܐ.
15 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܨܒܰܐܬ ܐܰܠܳܗܳܐ ܕܺܝܣܪܳܐܶܝܠ: ܡܶܟܺܝܠ ܢܶܙܕܰܒܢܽܘܢ ܒ̈ܳܬܶܐ ܘܚܰܩ̈ܠܳܬܳܐ: ܘܟܰܖ̈ܡܶܐ ܒܰܐܪܥܳܐ ܗܳܕܶܐ.
16 ܘܨܰܠܺܝܬ ܩܕܳܡ ܡܳܪܝܳܐ: ܡܶܢ ܒܳܬܰܪ ܕܝܶܗܒܶ݀ܬ ܫܛܳܖ̈ܶܐ ܕܰܙܒܺܝܢܬܳܐ ܠܒܰܪܽܘܟ ܒܰܪ ܢܶܪܝܳܐ.
17 ܘܨܰܠܺܝ݀ܬ ܩܕܳܡ ܡܳܪܝܳܐ ܘܶܐܡܪܶܬ: ܒܒܳܥܘ ܡܳܪܝܳܐ ܐܰܠܳܗܳܐ: ܗܳܐ ܐܰܢ̱ܬ ܥܒܰܕܬ ܫܡܰܝܳܐ ܘܰܐܪܥܳܐ: ܒܚܰܝܠܳܟ ܪܰܒܳܐ ܘܒܰܕܪܳܥܳܟ ܪܳܡܳܐ: ܘܠܳܐ ܛܫܶܐ ܡܶܢ ܩܕܳܡܝܟ ܟܠ ܦܶܬܓܳܡ.
18 ܥܳܒܶܕ ܛܰܝܒܽܘܬܳܐ ܠܰܐܠܦ̈ܶܐ ܕܕܳܖ̈ܶܐ: ܦܳܪܰܥ ܚܛܳܗ̈ܶܐ ܕܰܐܒܳܗ̈ܶܐ ܠܥܽܘܒܳܐ ܕܰܒܢܰܝ̈ܗܽܘܢ ܒܳܬܰܪܗܽܘܢ: ܐܰܠܳܗܳܐ ܪܰܒܳܐ: ܘܓܰܢ̱ܒܳܪܳܐ: ܘܰܕܚܺܝܠܳܐ: ܡܳܪܝܳܐ ܚܰܝܠܬܳܢܳܐ ܫܡܶܗ.
19 ܕܪܰܒܳܐ ܬܰܪܥܺܝܬܶܗ ܘܣܰܓܺܝܐܺܝܢ ܥܒܳܕܰܘ̈ܗܝ: ܘܥܰܝ̈ܢܰܘܗܝ ܦܬܺܝ̈ܚܳܢ ܥܰܠ ܟܽܠܗܶܝܢ ܐܽܘܖ̈ܚܳܬܗܽܘܢ ܕܰܒܢܰܝ̈ܢܳܫܳܐ: ܕܬܶܬܶܠ ܠܓܰܒܪܳܐ ܐܰܝܟ ܐܽܘܖ̈ܚܳܬܶܗ: ܘܰܐܝܟ ܦܺܐܖ̈ܰܝ ܥܒܳܕܰܘ̈ܗܝ.
20 ܕܰܥܒܰܕܬ ܐܳܬܘ̈ܳܬܳܐ ܪܰܘܖ̈ܒܳܬܳܐ: ܘܬܶܕܡܖ̈ܳܬܳܐ ܒܰܐܪܥܳܐ ܕܡܶܨܪܶܝܢ ܥܕܰܡܳܐ ܠܝܰܘܡܳܢܳܐ: ܠܺܝܣܪܳܐܶܝܠ ܒܶܝܬ ܒܢܰܝ̈ ܐ̱ܢܳܫܳܐ: ܘܰܥܒܰܕܬ ܠܳܟ ܫܡܳܐ ܐܰܝܟ ܕܝܰܘܡܳܢܳܐ.
21 ܘܰܐܦܩܶܬ ܠܥܰܡܳܟ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ: ܒܳܐܬܘ̈ܳܬܳܐ ܘܰܒܬܶܕܡܖ̈ܳܬܳܐ: ܘܒܺܐܝܕܳܐ ܬܰܩܺܝܦܬܳܐ: ܘܒܰܕܪܳܥܳܐ ܪܳܡܳܐ: ܘܰܒܚܶܙܘܳܐ ܪܰܒܳܐ.
22 ܘܝܰܗܒܬ ܠܗܽܘܢ ܐܰܪܥܳܐ ܗܳܕܶܐ ܕܺܝܡܰܝܬ ܠܰܐܒܳܗܰܝ̈ܗܽܘܢ ܠܡܶܬܰܠ ܠܗܽܘܢ: ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ.
23 ܘܶܐܬܰܘ ܘܝܰܪܬܽܘܗ̇: ܘܠܳܐ ܫܡܰܥܘ ܒܩܳܠܳܟ: ܘܰܒܢܳܡܽܘܣܳܟ ܠܳܐ ܗܰܠܶܟܘ: ܘܟܽܠ ܕܦܰܩܶܕܬ ܐܶܢܽܘܢ ܠܡܶܥܒܰܕ ܠܳܐ ܥ̣ܒܰܕܘ: ܘܡܰܛܝܰܬ ܐܶܢܽܘܢ ܟܽܠܳܗ̇ ܗܳܕܶܐ ܒܺܝܫܬܳܐ.
24 ܗܳܐ ܟܡܺܐܢ̈ܶܐ ܐܶܬܰܘ ܥܰܠ ܩܪܺܝܬܳܐ ܗܳܕܶܐ ܠܡܶܐܚܕܳܗ̇: ܘܰܩܪܺܝܬܳܐ ܐܶܫܬܰܠܡܰܬ ܠܳܗ̇ ܒܺܐܝܕܳܐ ܕܟܰܠܕܳܝ̈ܶܐ ܕܡܶܬܟܰܬܫܺܝܢ ܥܠܶܝܗ̇܆ ܡܶܢ ܩܕܳܡ ܚܰܪܒܳܐ: ܘܟܰܦܢܳܐ ܘܡܰܘܬܳܢܳܐ: ܘܡܶܕܶܡ ܕܶܐܡܰܪܬ ܗܘܳܐ ܘܗܳܐ ܚܙܺܝ݀ܬ.
25 ܘܰܐܢ̱ܬ ܐܶܡܰܪܬ ܠܝܪ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܙܒܶܢ ܠܳܟ ܚܰܩܠܳܐ ܒܟܶܣܦܳܐ: ܘܣܰܗܶܕ ܣܳܗ̈ܕܶܐ: ܘܗܳܐ ܩܪܺܝܬܳܐ ܐܶܫܬܰܠܡܰܬ ܠܳܗ̇ ܒܺܐܝܕܳܐ ܕܟܰܠܕܳܝ̈ܶܐ.
26 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܠܡܺܐܡܰܪ.
27 ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܳܐ ܕܟܽܠ ܒܣܰܪ ܕܰܠܡܳܐ ܡܶܢ ܩܕܳܡܝ ܛܫܶܐ ܡܶܕܶܡ.
28 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܗܳܐ ܡܰܫܠܶܡ ܐ̱ܢܳܐ ܠܳܗ̇ ܠܰܩܪܺܝܬܳܐ ܗܳܕܶܐ ܒܺܐܝܕܳܐ ܕܟܰܠܕܳܝ̈ܶܐ: ܘܒܺܐܝܕܶܗ ܕܰܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܘܢܶܟܒܫܺܝܗ̇.
29 ܘܢܺܐܬܽܘܢ ܟܰܠܕܳܝ̈ܶܐ ܘܢܶܥܒܕܽܘܢ ܩܪܳܒܳܐ ܥܰܠ ܩܪܺܝܬܳܐ ܗܳܕܶܐ: ܘܢܶܥܩܪܽܘܢܳܗ̇ ܠܰܩܪܺܝܬܳܐ ܗܳܕܶܐ: ܘܢܰܘܩܕܽܘܢܳܗ̇ ܒܢܽܘܪܳܐ: ܘܒ̈ܳܬܶܐ ܕܣ̣ܳܡܘ ܒܶܣ̈ܡܶܐ ܥܰܠ ܐܶܓܳܖ̈ܰܝܗܽܘܢ ܠܒܰܥܠܳܐ: ܘܢܰܩ̣ܺܝܘ ܢܽܘܩܳܝ̈ܶܐ ܠܰܐܠܳܗ̈ܶܐ ܐ̱ܚܖ̈ܳܢܶܐ ܕܢܰܪܓܙܽܘܢܳܢܝ.
30 ܡܶܛܽܠ ܕܰܗܘܰܘ ܒܢܰܝ̈ ܝܺܣܪܳܐܶܝܠ: ܘܰܒܢܰܝ̈ ܝܺܗܽܘܕܳܐ: ܥܳܒܕܺܝܢ ܕܒܺܝܫ ܩܕܳܡܝ ܡܶܢ ܛܰܠܝܽܘܬܗܽܘܢ: ܡܶܛܽܠ ܕܰܒܢܰܝ̈ ܝܺܣܪܳܐܶܝܠ ܡܰܪܓܙܺܝܢ ܠܺܝ ܒܰܥܒܳܕ ܐܺܝܕܰܝ̈ܗܽܘܢ ܐܳܡܰܪ ܡܳܪܝܳܐ.
31 ܘܡܶܛܽܠܬܗܽܘܢ ܗܘܳܐ ܪܽܘܓܙܝ ܘܚܶܡܬܝ ܥܰܠ ܩܪܺܝܬܳܐ ܗܳܕܶܐ: ܡܶܢ ܝܰܘܡܳܐ ܕܰܒܢܰܐܗ̇ ܘܰܥܕܰܡܳܐ ܠܝܰܘܡܳܢܳܐ: ܠܡܰܥܒܳܪܽܘܬܳܗ̇ ܡܶܢ ܩܕܳܡ ܐܰܦܰܝ̈.
32 ܥܰܠ ܟܽܠܗܶܝܢ ܒܺܝ̈ܫܳܬܳܐ ܕܰܒܢܰܝ̈ ܝܺܣܪܳܐܶܝܠ: ܘܕܰܒܢܰܝ̈ ܝܺܗܽܘܕܳܐ ܕܰܥܒܰܕܘ ܠܡܰܪܓܳܙܽܘܬܰܢܝ: ܗܶܢܽܘܢ ܘܡܰܠܟܰܝ̈ܗܽܘܢ: ܘܪܰܘܖ̈ܒܳܢܰܝܗܽܘܢ: ܘܟܳܗܢܰܝ̈ܗܽܘܢ: ܘܰܢܒܺܝܰܝ̈ܗܽܘܢ: ܘܓܰܒܖ̈ܶܐ ܕܺܝܗܽܘܕܳܐ: ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
33 ܘܰܐܦܢܺܝܘ ܠܺܝ ܩܕܳܠܗܽܘܢ ܘܠܳܐ ܐܰܦܰܝ̈ܗܽܘܢ: ܘܰܐܠܦܶ݀ܬ ܐܶܢܽܘܢ: ܩܰܕܡܶܬ ܘܰܐܠܦܶ݀ܬ: ܘܠܳܐ ܫܳܡܥܺܝܢ ܠܰܡܩܰܒܳܠܽܘ ܡܰܪܕܽܘܬܳܐ.
34 ܘܣ̣ܳܡܘ ܛܰܢܦܽܘܬܗܽܘܢ ܒܒܰܝܬܳܐ ܕܶܐܬܩܪܺܝ ܫܶܡܝ ܥܠܰܘܗܝ: ܘܛܰܡܐܗܝ.
35 ܘܰܒ̣ܢܰܘ ܥܠܰܘ̈ܳܬܳܐ ܠܒܰܥܠܳܐ ܒܬܰܦܰܬ ܕܰܒܢܰܚܠܳܐ ܕܒܰܪ ܗܳܢܽܘܡ: ܠܡܰܘܩܳܕܽܘ ܒܢܰܝ̈ܗܽܘܢ ܘܰܒ̈ܢܳܬܗܽܘܢ ܠܰܐܡܠܶܟ: ܕܠܳܐ ܦܰܩܕܶܬ ܘܠܳܐ ܣܶܠܩܰܬ ܥܰܠ ܠܶܒܝ: ܕܢܶܥܒܕܽܘܢ ܛܰܢܦܽܘܬܳܐ ܗܳܕܶܐ ܘܢܰܚܛܽܘܢ ܠܺܝܗܽܘܕܳܐ.
36 ܗܳܫܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܥܰܠ ܩܪܺܝܬܳܐ ܗܳܕܶܐ ܕܳܐܡܪܺܝܢ ܐܢ̱ܬܽܘܢ ܐܶܫܬܰܠܡܰܬ ܒܺܐܝܕܶܗ ܕܡܰܠܟܳܐ ܕܒܳܒܶܠ: ܒܚܰܪܒܳܐ ܘܒܟܰܦܢܳܐ ܘܒܡܰܘܬܳܢܳܐ.
37 ܗܳܐ ܡܟܰܢܶܫ ܐ̱ܢܳܐ ܠܗܽܘܢ ܡܶܢ ܟܽܠܗܶܝܢ ܐܰܖ̈ܥܳܬܳܐ ܕܒܰܕܪܶܬ ܐܶܢܽܘܢ ܠܬܰܡܳܢ: ܒܪܽܘܓܙܝ ܘܰܒܚܶܡܬܝ ܒܪܽܘܓܙܳܐ ܪܰܒܳܐ: ܘܰܐܗܦܶܟ ܐܶܢܽܘܢ ܠܰܐܬܪܳܐ ܗܳܢܳܐ: ܘܰܐܘܬܶܒ ܐܶܢܽܘܢ ܒܫܶܠܝܳܐ.
38 ܘܢܶܗܘܽܘܢ ܠܺܝ ܥܰܡܳܐ: ܘܶܐܢܳܐ ܐܶܗܘܶܐ ܠܗܽܘܢ ܐܰܠܳܗܳܐ.
39 ܘܶܐܬܶܠ ܠܗܽܘܢ ܠܶܒܳܐ ܚܰܕܬܳܐ܆ ܘܪܽܘܚܳܐ ܚܕܰܬܳܐ: ܠܡܶܕܚܰܠ ܩܕܳܡܝ ܟܽܠܗܽܘܢ ܝܰܘ̈ܡܳܬܳܐ: ܘܢܰܛܐܶܒ ܠܗܽܘܢ ܠܗܽܘܢ ܘܠܰܒܢܰܝ̈ܗܽܘܢ ܒܳܬܰܪܗܽܘܢ.
40 ܘܰܐܩܺܝܡ ܠܗܽܘܢ ܩܝܳܡܳܐ ܠܥܳܠܰܡ: ܕܠܳܐ ܐܶܗܦܽܘܟ ܡܶܢܗܽܘܢ ܠܡܰܛܐܳܒܽܘ ܠܗܽܘܢ: ܘܕܶܚܠܰܬܝ ܐܶܬܶܠ ܒܠܶܒܗܽܘܢ ܕܠܳܐ ܢܶܣܛܽܘܢ ܡܶܢܝ.
41 ܘܶܐܚܰܕܶܐ ܐܶܢܽܘܢ ܘܢܰܛܐܶܒ ܠܗܽܘܢ: ܘܶܐܨܽܘܒ ܐܶܢܽܘܢ ܒܰܐܪܥܳܐ ܗܳܕܶܐ ܒܩܽܘܫܬܳܐ: ܒܟܽܠܶܗ ܠܶܒܝ ܘܰܒܟܽܠܳܗ̇ ܢܰܦܫܝ.
42 ܗܳܟܰܢܳܐ ܐܳܡܰܪ ܡܳܪܝܳܐ: ܐܰܝܟ ܕܰܐܝܬܺܝ݀ܬ ܥܰܠ ܥܰܡܳܐ ܗܳܢܳܐ ܟܽܠܳܗ̇ ܒܺܝܫܬܳܐ ܗܳܕܶܐ ܪܰܒܬܳܐ: ܗܳܟܰܢܳܐ ܡܰܝܬܶܐ ܐ̱ܢܳܐ ܥܠܰܝܗܽܘܢ. ܟܽܠܳܗ̇ ܛܳܒܬܳܐ ܕܳܐܡܰܪ ܐ̱ܢܳܐ ܥܠܰܝܗܽܘܢ.
43 ܘܢܶܙܕܰܒ̈ܢܳܢ ܚܰܩ̈ܠܳܬܳܐ ܒܰܐܪܥܳܐ ܗܳܕܶܐ: ܕܳܐܡܪܺܝܬܽܘܢ ܚܰܪܒܳܐ ܗ̱ܝ ܡܶܢ ܒܢܰܝ̈ܢܳܫܳܐ ܘܰܒܥܺܝܪܳܐ: ܘܶܐܫܬܰܠܡܰܬ ܒܺܐܝܕܳܐ ܕܟܰܠܕܳܝ̈ܶܐ.
44 ܚܰܩ̈ܠܳܬܳܐ ܒܟܶܣܦܳܐ ܢܶܙܒܢܽܘܢ: ܘܢܶܟܬܒܽܘܢ ܫܛܳܖ̈ܶܐ ܘܰܢܚܰܬܡܽܘܢ: ܘܰܢܣܰܗܕܽܘܢ ܣܳܗ̈ܕܶܐ: ܒܰܐܪܥܳܐ ܕܒܶܢܝܳܡܶܝܢ: ܘܒܰܚܕܳܖ̈ܶܝܗ̇ ܕܽܐܘܪܺܫܠܶܡ: ܘܰܒܩܽܘܖ̈ܝܳܐ ܕܺܝܗܽܘܕܳܐ ܘܒܩܽܘܖ̈ܝܳܐ ܕܛܽܘܖ̈ܶܐ: ܘܰܒܩܽܘܖ̈ܝܳܐ ܕܦܰܩ̈ܥܳܬܳܐ: ܘܒܩܽܘܖ̈ܝܳܐ ܕܬܰܝܡܢܳܐ: ܘܰܐܗܦܶܟ ܫܒܺܝܬܗܽܘܢ ܐܳܡܰܪ ܡܳܪܝܳܐ.