Jeremiah 14
The Book of Jeremiah
܀ ܐܪܡܝܐ ܝܕ ܀
1 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܥܰܠ ܒܨܺܝܪܽܘܬ ܡܶܛܪܳܐ.
2 ܐܶܬܐܰܒܠܰܬ ܝܺܗܽܘܕܳܐ: ܘܬܰܖ̈ܥܶܝܗܝ ܨܕܺܝܘ ܘܰܢܦܰܠܘ ܒܰܐܪܥܳܐ: ܘܰܨܘܰܚܬܳܗ̇ ܕܽܐܘܪܺܫܠܶܡ ܣܶܠܩܰܬ.
3 ܪܰܘܖ̈ܒܳܢܰܝܗܽܘܢ ܫܰܕܰܪܘ ܒܨܺܝܖ̈ܰܝܗܽܘܢ ܠܡܰܝ̈ܳܐ: ܐܶܬܰܘ ܠܓܽܘ̈ܒܶܐ ܘܠܳܐ ܐܶܫܟܰܚܘ ܡܰܝ̈ܳܐ: ܗܦܰܟܘ ܡܳܐܢܰܝ̈ܗܽܘܢ ܣܪܺܝܩܳܐܺܝܬ: ܒܗܶܬܘ ܘܶܐܬܬܟܶܣܘ ܘܚܰܦܺܝܘ ܖ̈ܺܝܫܰܝܗܽܘܢ.
4 ܡܶܛܽܠ ܥܒܳܕܶܝ̈ܗ̇ ܕܰܐܪܥܳܐ ܠܳܐ ܗܘܳܐ ܡܶܛܪܳܐ: ܒܗܶܬܘ ܐܰܟܳܖ̈ܶܐ ܘܚܰܦܺܝܘ ܖ̈ܺܝܫܰܝܗܽܘܢ.
5 ܘܳܐܦ ܐܰܝ̈ܠܳܬܳܐ ܒܕܰܒܪܳܐ ܝܺܠܕ ܘܰܫܒܰܩ ܒܢܰܝ̈ܗܶܝܢ: ܡܶܛܽܠ ܕܠܳܐ ܗܘܳܐ ܬܰܕܐܳܐ.
6 ܘܰܥܖ̈ܳܕܶܐ ܩ̣ܳܡܘ ܥܰܠ ܫܒܺܝ̈ܠܶܐ: ܣܳܩܘ ܪܽܘܚܳܐ ܐܰܝܟ ܝܳܪܽܘܖ̈ܶܐ: ܚܫܶܟ̈ܝ ܥܰܝܢܰܝ̈ܗܽܘܢ ܡܶܛܽܠ ܕܠܰܝܬ ܥܶܣܒܳܐ.
7 ܐܶܢ ܚܛܳܗܰܝ̈ܢ ܣܗܶܕܘ ܒܰܢ: ܡܳܪܝܳܐ ܚܽܘܣ ܡܶܛܽܠ ܫܡܳܟ: ܡܶܛܽܠ ܕܣܰܓܺܝܐܳܐ ܗ̱ܝ ܛܰܝܒܽܘܬܳܟ: ܘܠܳܟ ܚܛܰܝܢ.
8 ܣܰܒܪܶܗ ܕܺܝܣܪܳܐܶܝܠ ܘܦܳܪܽܘܩܶܗ ܒܙܰܒܢܳܐ ܕܽܐܘܠܨܳܢܳܐ: ܠܳܐ ܬܶܗܘܶܐ ܐܰܝܟ ܬܰܘܬܳܒܳܐ ܒܰܐܪܥܳܐ: ܘܰܐܝܟ ܐܳܪܚܳܐ ܕܣܳܛܶܐ ܠܰܡܒܳܬ.
9 ܠܳܐ ܬܶܗܘܶܐ ܐܰܝܟ ܓܰܒܪܳܐ ܒܨܺܝܪܳܐ: ܘܰܐܝܟ ܓܰܒܪܳܐ ܕܠܳܐ ܡܶܫܟܰܚ ܠܡܶܦܪܰܩ: ܘܰܐܢ̱ܬ ܡܳܪܝܳܐ ܒܓܰܘܰܢ ܐܰܢ̱ܬ: ܘܰܫܡܳܟ ܐܶܬܩܪܺܝ ܥܠܰܝܢ ܠܳܐ ܬܶܫܒܩܰܢ.
10 ܗܳܟܰܢܳܐ ܐܳܡܰܪ ܡܳܪܝܳܐ ܠܥܰܡܳܐ ܗܳܢܳܐ: ܗܶܢܽܘܢ ܪܚܶܡܘ ܠܰܡܙܳܥ: ܖ̈ܶܓܠܰܝܗܽܘܢ ܠܳܐ ܚܣܰܟܘ: ܘܡܳܪܝܳܐ ܠܳܐ ܨܳܒܶܐ ܒܗܽܘܢ: ܡܶܟܺܝܠ ܢܶܬܕܟܰܪ ܥܰܘܠܗܽܘܢ ܘܢܶܦܩܽܘܕ ܚܛܳܗܰܝ̈ܗܽܘܢ.
11 ܘܶܐܡܰܪ ܠܺܝ ܡܳܪܝܳܐ: ܠܳܐ ܬܨܰܠܶܐ ܥܰܠ ܥܰܡܳܐ ܗܳܢܳܐ ܠܛܳܒܬܳܐ.
12 ܡܶܛܽܠ ܕܶܐܢ ܨܳܝܡܺܝܢ ܠܳܐ ܫܳܡܰܥ ܐ̱ܢܳܐ ܨܠܽܘܬܗܽܘܢ. ܘܶܐܢ ܡܰܣܩܺܝܢ ܝܰܩ̈ܕܶܐ ܘܩܽܘܖ̈ܒܳܢܶܐ ܠܳܐ ܨܳܒܶܐ ܐ̱ܢܳܐ ܒܗܽܘܢ: ܡܶܛܽܠ ܕܰܒܚܰܪܒܳܐ ܘܰܒܟܰܦܢܳܐ ܘܰܒܡܰܘܬܳܢܳܐ ܐܶܢܳܐ ܡܓܰܡܰܪ ܐ̱ܢܳܐ ܠܗܽܘܢ.
13 ܘܶܐܡܪܶܬ ܒܒܳܥܽܘ ܡܳܪܝܳܐ ܐܰܠܳܗܳܐ: ܗܳܐ ܢܒܺܝ̈ܶܐ ܗ̱ܘ̣ ܐܳܡܪܺܝܢ ܠܗܽܘܢ ܕܠܳܐ ܬܶܚܙܽܘܢ ܚܰܪܒܳܐ: ܘܟܰܦܢܳܐ ܠܳܐ ܢܶܗܘܶܐ ܠܟܽܘܢ: ܐܶܠܳܐ ܫܠܳܡܳܐ ܘܩܽܘܫܬܳܐ ܐܶܬܶܠ ܠܟܽܘܢ ܒܰܐܬܪܳܐ ܗܳܢܳܐ.
14 ܘܶܐܡܰܪ ܠܺܝ ܡܳܪܝܳܐ: ܒܕܰܓܳܠܽܘܬܳܐ ܢܒܺܝ̈ܶܐ ܡܶܬܢܰܒܶܝܢ ܒܫܶܡܝ: ܕܶܐܢܳܐ ܠܳܐ ܫܰܕܪܶܬ ܐܶܢܽܘܢ: ܘܠܳܐ ܦܰܩܕܶܬ ܐܶܢܽܘܢ ܘܠܳܐ ܐܶܡܪܶܬ ܠܗܽܘܢ: ܚܶܙ̈ܘܳܢܶܐ ܕܰܓ̈ܳܠܶܐ: ܘܩܶܨܡ̈ܶܐ: ܘܢܶܚܫ̈ܶܐ. ܘܢܶܟܠܳܐ ܕܠܶܒܗܽܘܢ ܗܶܢܽܘܢ ܡܶܬܢܰܒܶܝܢ ܠܟܽܘܢ.
15 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܢܒܺܝ̈ܶܐ ܕܡܶܬܢܰܒܶܝܢ ܒܫܶܡܝ: ܕܶܐܢܳܐ ܠܳܐ ܫܰܕܪܶܬ ܐܶܢܽܘܢ: ܘܗܶܢܽܘܢ ܐܳܡܪܺܝܢ ܚܰܪܒܳܐ ܘܟܰܦܢܳܐ ܠܳܐ ܢܶܗܘܶܐ ܒܰܐܪܥܳܐ ܗܳܕܶܐ: ܒܚܰܪܒܳܐ ܘܰܒܟܰܦܢܳܐ ܢܣܽܘܦܽܘܢ ܢܒܺܝ̈ܶܐ ܗܳܢܽܘܢ.
16 ܘܥܰܡܳܐ ܕܗܶܢܽܘܢ ܡܶܬܢܰܒܶܝܢ ܠܗܽܘܢ: ܢܶܗܘܽܘܢ ܪܡܶܝܢ ܒܫܽܘ̈ܩܶܝܗ̇ ܕܽܐܘܪܺܫܠܶܡ: ܡܶܢ ܩܕܳܡ ܚܰܪܒܳܐ: ܘܟܰܦܢܳܐ: ܘܡܰܘܬܳܢܳܐ: ܘܠܰܝܬ ܠܗܽܘܢ ܩܳܒܽܘܪ: ܗܶܢܽܘܢ ܘܢܶܫܰܝ̈ܗܽܘܢ: ܘܰܒܢܰܝ̈ܗܽܘܢ: ܘܰܒ̈ܢܳܬܗܽܘܢ: ܘܶܐܫܽܘܕ ܥܠܰܝܗܽܘܢ ܒܺܝܫܽܘܬܗܽܘܢ.
17 ܘܶܐܡܰܪ ܠܗܽܘܢ ܦܶܬܓܳܡܳܐ ܗܳܢܳܐ: ܢܶܫܚ̈ܠܳܢ ܥܰܝ̈ܢܰܝܢ ܕܶܡ̈ܥܶܐ ܒܺܐܝܡܳܡܳܐ ܘܰܒܠܺܠܝܳܐ ܘܠܳܐ ܢܶܫ̈ܬܩܳܢ: ܡܶܛܽܠ ܕܰܬܒܳܪܳܐ ܪܰܒܳܐ ܐܶܬܬܰܒܪܰܬ ܒܬܽܘܠܬܳܐ ܒܰܪܬ ܥܰܡܝ: ܡܚܽܘܬܳܐ ܘܟܳܝܒܳܐ ܛܳܒ.
18 ܐܶܢ ܢܶܦܩܶܬ ܠܡܰܕܒܪܳܐ ܗܳܐ ܩܛܺܝܠܰܝ̈ ܚܰܪܒܳܐ: ܘܶܐܢ ܥܶܠܶܬ ܠܰܩܪܺܝܬܳܐ: ܗܳܐ ܡܛܰܖ̈ܦܰܝ ܟܰܦܢܳܐ: ܡܶܛܽܠ ܕܳܐܦ ܢܒܺܝ̈ܶܐ ܘܳܐܦ ܟܳܗ̈ܢܶܐ: ܚܕܰܪܘ ܒܰܐܪܥܳܐ ܘܠܳܐ ܝܺܕܰܥܘ.
19 ܡܰܣܠܳܝܽܘ ܐܰܣܠܺܝ݀ܬ ܠܺܝܗܽܘܕܳܐ: ܐܰܘ ܒܨܶܗܝܽܘܢ ܓܶܥܨܰܬ ܢܰܦܫܳܟ: ܡܶܛܽܠ ܡܳܢܳܐ ܡܚܰܝܬܳܢ ܘܠܰܝܬ ܠܰܢ ܐܳܣܝܽܘܬܳܐ: ܣܰܟܺܝܢ ܠܰܫܠܳܡܳܐ ܘܠܰܝܬ ܛܳܒܬܳܐ: ܘܰܠܙܰܒܢܳܐ ܕܳܐܣܝܽܘܬܳܐ ܘܗܳܐ ܕܶܚܠܬܳܐ.
20 ܝܳܕܥܺܝܢܰܢ ܡܳܪܝܳܐ ܚܛܳܗܰܝ̈ܢ: ܘܰܚܛܳܗ̈ܶܐ ܕܰܐܒܳܗܰܝ̈ܢ: ܡܶܛܽܠ ܕܰܚܛܰܝܢ ܠܳܟ.
21 ܠܳܐ ܬܶܪܓܰܙ ܡܶܛܽܠ ܫܡܳܟ: ܘܠܳܐ ܬܨܰܥܰܪ ܟܽܘܪܣܝܳܐ ܕܺܐܝܩܳܪܳܟ: ܐܶܬܕܰܟܪ ܘܠܳܐ ܬܒܰܛܶܠ ܩܝܳܡܳܟ ܕܥܰܡܰܢ.
22 ܠܳܐ ܓܶܝܪ ܡܶܫ̈ܟܚܳܢ ܕܶܚ̈ܠܳܬܳܐ ܕܥܰܡ̈ܡܶܐ ܕܢܰܚ̈ܬܳܢ ܡܶܛܪܳܐ: ܐܳܦܠܳܐ ܫܡܰܝ̈ܳܐ ܕܢܶܬܠܽܘܢ ܖ̈ܣܺܝܣܶܐ: ܐܶܠܳܐ ܐܰܢ̱ܬ ܗ̱ܘ̣ ܡܳܪܝܳܐ ܐܰܠܳܗܰܢ ܘܰܢܣܰܟܶܐ ܠܳܟ. ܕܰܐܢ̱ܬ ܥܳܒܶܕ ܐܰܢ̱ܬ ܗܳܠܶܝܢ ܟܽܠܗܶܝܢ.