Jeremiah 48
The Book of Jeremiah
܀ ܐܪܡܝܐ ܡܚ ܀
1 ܥܰܠ ܡܽܘܐܳܒ. ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܘܳܝ ܠܢܳܒܽܘ ܕܶܐܬܒܰܙܙܰܬ: ܒܶܗܬܰܬ ܘܰܐܚܦܪܰܬ ܩܽܘܪܝܰܬܺܝܡ: ܒܗܶܬ ܥܽܘܫܢܳܗ̇ ܘܶܐܬܒܰܕܰܪ.
2 ܘܠܰܝܬ ܬܽܘܒ ܬܶܫܒܽܘܚܬܳܐ ܠܡܽܘܐܳܒ: ܒܚܶܫܒܽܘܢ ܐܶܬܚܰܫܰܒܘ ܥܠܶܝܗ̇ ܒܺܝܫܬܳܐ: ܘܶܐܡܰܪܘ ܬܰܘ ܢܰܘܒܕܺܝܗ̇ ܡܶܢ ܥܰܡܳܐ: ܐܳܦܶܢ ܡܶܫܬܰܩ ܐܶܢ ܬܶܫܬܩܺܝܢ: ܒܳܬܪܶܟܝ ܬܺܐܙܰܠ ܚܰܪܒܳܐ.
3 ܩܳܠ ܝܺܠܶܠܬܳܐ ܡܶܢ ܚܽܘܪܢܺܝܡ. ܒܶܙܬܳܐ ܘܰܬܒܳܪܳܐ ܪܰܒܳܐ.
4 ܐܶܬܬܰܒܪܰܬ ܡܽܘܐܳܒ: ܐܰܫܡܰܥܘ ܝܺܠܶܠܬܳܐ ܡܶܣܟܺܢܶܝ̈ܗ̇.
5 ܒܡܰܣܩܳܢܳܐ ܕܠܽܘܚܝܰܬ ܟܰܕ ܒܳܟܶܝܢ ܢܶܣܩܽܘܢ: ܘܰܒܡܰܚܰܬܬܳܐ ܕܚܽܘܪܢܺܝܡ: ܐܽܘܠܨܳܢܳܐ ܘܰܓܥܳܬܳܐ ܕܰܬܒܳܪܳܐ ܢܶܥܒܕܽܘܢ.
6 ܫܡܰܥܘ ܘܰܥܪܽܘܩܘ ܘܦܰܨܰܘ ܢܰܦܫܟܽܘܢ: ܘܰܗܘܰܘ ܐܰܝܟ ܥܶܩܳܪܳܐ ܒܡܰܕܒܪܳܐ.
7 ܥܰܠ ܕܶܐܬܬܟܶܠܬܝ ܥܰܠ ܚܶܣܢܰܝ̈ܟܝ ܘܥܰܠ ܓܰܙܰܝ̈ܟܝ: ܐܳܦ ܐܰܢ̱ܬܝ ܬܶܬܰܚܕܺܝܢ: ܘܢܶܦܽܘܩ ܟܳܡܽܘܫ ܒܰܫܒܺܝܬܳܐ: ܘܟܽܘܡܖ̈ܰܘܗܝ ܘܪܰܘܖ̈ܒܳܢܰܘܗܝ ܐܰܟܚܕܳܐ.
8 ܘܢܺܐܬܶܐ ܒܳܙܽܘܙܳܐ ܥܰܠ ܟܽܠܗܶܝܢ ܩܽܘܖ̈ܝܳܝܟ ܘܠܳܐ ܢܶܬܦܰܨ̈ܝܳܢ: ܘܢܺܐܒܰܕ ܥܽܘܡܩܳܐ ܘܬܶܚܪܰܒ ܦܩܰܥܬܳܐ: ܐܰܝܟܰܢܳܐ ܕܶܐܡܰܪ ܡܳܪܝܳܐ.
9 ܗܰܒܘ ܟܠܺܝܠܳܐ ܠܡܽܘܐܳܒ ܡܶܛܽܠ ܕܡܶܚܪܰܒ ܚܳܪܒܳܐ: ܘܟܽܠܗܶܝܢ ܩܽܘܖ̈ܝܳܗ̇ ܢܶܗܘ̈ܝܳܢ ܠܚܽܘܪܒܳܐ ܡܶܢ ܒܠܰܝ ܕܝܳܬܶܒ.
10 ܠܺܝܛ ܗ̱ܘ ܡܰܢ ܕܢܶܥܒܶܕ ܥܒܳܕܶܗ ܕܡܳܪܝܳܐ ܒܢܶܟܠܳܐ: ܘܠܺܝܛ ܗ̱ܘ ܡܶܢ ܕܢܶܟܠܶܐ ܚܰܪܒܶܗ ܡܶܢ ܕܡܳܐ.
11 ܫܠܶܝܢ ܡܽܘܐܳܒܝ̈ܶܐ ܡܶܢ ܛܰܠܝܽܘܬܗܽܘܢ: ܘܫܰܟܽܘܬܺܝܢ ܥܰܠ ܬܶܛܖ̈ܰܝܗܽܘܢ: ܘܠܳܐ ܣܰܪܶܩܘ ܡܶܢ ܡܳܐܢܳܐ ܠܡܳܐܢܳܐ: ܘܒܰܫܒܺܝܬܳܐ ܠܳܐ ܐܶܙܰܠܘ: ܡܶܛܽܠ ܗܳܢܳܐ ܩܰܝܳܡ ܛܰܥܡܗܽܘܢ ܒܗܽܘܢ: ܘܪܺܝܚܗܽܘܢ ܠܳܐ ܦܳܓ.
12 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܶܐܫܰܕܰܪ ܥܠܰܝܗܽܘܢ ܒܳܙܽܘ̈ܙܶܐ ܘܢܶܒܙܽܘܢ ܐܶܢܽܘܢ: ܘܡܳܐܢܰܝ̈ܗܽܘܢ ܢܣܰܪܩܽܘܢ: ܘܰܓܖ̈ܳܒܰܝܗܽܘܢ ܢܫܰܚܩܽܘܢ.
13 ܘܢܶܒܗܰܬ ܡܽܘܐܳܒ ܡܶܢ ܟܳܡܽܘܫ: ܐܰܝܟ ܕܰܒܗܶܬܘ ܒܢܰܝ̈ ܝܺܣܪܳܐܶܝܠ ܡܶܢ ܒܶܝܬ ܐܺܝܠ ܬܽܘܟܠܳܢܗܽܘܢ.
14 ܐܰܝܟܰܢܳܐ ܐܳܡܪܺܝܬܽܘܢ ܕܓܰܢ̱ܒܳܖ̈ܶܐ ܚܢܰܢ: ܘܓܰܒܖ̈ܶܐ ܚܰܝܠܬܳܢ̈ܶܐ ܠܰܩܪܳܒܳܐ.
15 ܐܶܬܒܙܶܙ ܡܽܘܐܳܒ ܘܩܽܘܖ̈ܝܳܗ̇ ܣܠܶܩ̈ܝ: ܘܰܓܒܰܝ̈ܳܐ ܕܓܰܢ̱ܒܳܖ̈ܰܘܗܝ ܐܶܫܬܠܶܡܘ ܠܩܶܛܠܳܐ: ܐܳܡܰܪ ܡܰܠܟܳܐ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܫܡܶܗ.
16 ܩܰܪܺܝܒܽ ܗ̱ܘ ܬܒܳܪܶܗ ܕܡܽܘܐܳܒ ܠܡܶܐܬܳܐ: ܘܒܺܝܫܬܶܗ ܡܣܰܪܗܒܳܐ ܛܳܒ.
17 ܐܶܬܕܰܠܰܚܘ ܘܙܳܥܘ ܟܽܠ ܕܰܚܕܳܖ̈ܰܘܗܝ: ܘܟܽܠ ܕܝܳܕܥܺܝܢ ܫܡܶܗ ܐܶܡܰܪܘ: ܐܰܝܟܰܢܳܐ ܐܶܬܬܒܰܪ ܚܽܘܛܪܳܐ ܥܰܫܺܝܢܳܐ ܘܓܽܘܙܥܳܐ ܕܬܶܫܒܽܘܚܬܳܐ.
18 ܚܽܘܬܝ ܡܶܢ ܐܺܝܩܳܪܳܐ ܘܬܶܒܝ ܒܨܰܥܪܳܐ: ܥܳܡܽܘܪܬܳܐ ܕܒܰܪܬ ܪܺܝܒܽܘܢ: ܡܶܛܽܠ ܕܒܳܙܽܘܙܳܐ ܕܡܽܘܐܳܒ ܣܠܶܩ ܥܠܰܝܟܝ ܘܰܐܚܪܶܒ ܟܰܖ̈ܟܰܝܟܝ.
19 ܥܰܠ ܐܽܘܖ̈ܚܳܬܳܐ ܩܽܘܡܝ ܘܚܽܘܪܝ ܥܳܡܽܘܪܬܳܐ ܕܥܰܕܘܳܥܺܝܪ: ܫܰܐܶܠܝ ܠܰܕܥܳܪܶܩ: ܘܠܰܕܡܶܬܦܰܠܰܛ ܐܶܡܰܪܝ ܡܳܢܳܐ ܗܘܳܐ.
20 ܒܗܶܬ ܡܽܘܐܳܒ ܡܶܛܽܠ ܕܶܐܬܬܒܰܪ: ܘܰܐܝܠܶܠܘ ܘܰܐܙܥܶܩܘ ܒܰܐܪܢܽܘܢ: ܡܶܛܽܠ ܕܶܐܬܬܒܰܪ ܡܽܘܐܳܒ.
21 ܘܕܺܝܢܳܐ ܐܶܬܳܐ ܥܰܠ ܐܰܪܥܳܐ ܕܡܰܫܽܘܪ: ܘܥܰܠ ܚܰܠܽܘܢ: ܘܥܰܠ ܝܳܗܳܨ: ܘܥܰܠ ܡܦܺܝܥܰܬ.
22 ܘܥܰܠ ܪܺܝܒܽܘܢ ܘܥܰܠ ܢܳܒܽܘ: ܘܥܰܠ ܒܶܝܬ ܕܰܒܠܰܬܺܝܡ.
23 ܘܥܰܠ ܩܽܘܪܝܰܬܺܝܡ ܘܥܰܠ ܒܶܝܬ ܓܳܡܽܘܠ: ܘܥܰܠ ܒܶܝܬ ܡܥܽܘܢ.
24 ܘܥܰܠ ܩܶܪܝܽܘܬ: ܘܥܰܠ ܒܽܘܨܳܪ: ܘܥܰܠ ܟܽܠܗܶܝܢ ܩܽܘܖ̈ܝܳܐ ܕܰܐܪܥܳܐ ܕܡܽܘܐܳܒ ܕܖ̈ܰܚܺܝܩܳܢ ܘܰܕܩܰܖ̈ܺܝܒܳܢ.
25 ܐܶܬܓܰܕܡܰܬ ܩܰܪܢܶܗ ܕܡܽܘܐܳܒ: ܘܰܕܪܳܥܶܗ ܐܶܬܬܒܰܪ ܐܳܡܰܪ ܡܳܪܝܳܐ.
26 ܕܰܘܐܗܝ ܡܶܛܽܠ ܕܥܰܠ ܡܳܪܝܳܐ ܐܶܬܬܪܺܝܡ: ܘܢܶܬܛܰܪܰܦ ܡܽܘܐܳܒ ܒܰܬܝܳܒܬܶܗ: ܘܢܶܗܘܶܐ ܠܓܽܘܚܟܳܐ ܐܳܦ ܗܽܘ.
27 ܘܶܐܢ ܠܳܐ ܗ̱ܘܳܐ ܠܓܽܘܚܟܳܐ ܗܘܳܐ ܠܳܟ ܝܺܣܪܳܐܶܝܠ: ܘܰܒܓܰܢܳܒ̈ܶܐ ܐܶܫܬܟܰܚ ܟܰܕ ܥܳܒܶܕ ܗ̱ܘܰܝܬ ܥܰܡܶܗ ܩܪܳܒܳܐ.
28 ܫܒܽܘܩܘ ܩܽܘܖ̈ܝܳܐ: ܘܰܫܪܰܘ ܒܰܫܩܺܝ̈ܦܶܐ ܝܳܬܒܰܝ̈ ܡܽܘܐܳܒ: ܘܰܗܘܰܘ ܐܰܝܟ ܝܰܘܢܳܐ ܕܡܰܩܢܳܐ ܒܰܓܕܳܢܦܳܐ.
29 ܫܡܰܥܢ ܪܰܘܖ̈ܒܳܢܶܐ ܕܡܽܘܐܳܒ ܕܡܶܬܓܰܐܶܝܢ ܛܳܒ: ܓܰܐܝܽܘܬܗܽܘܢ ܘܪܳܡܽܘܬܗܽܘܢ ܘܪܳܡܽܘܬ ܠܶܒܗܽܘܢ: ܐܶܢܳܐ ܝܳܕܰܥ ܐ̱ܢܳܐ ܐܳܡܰܪ ܡܳܪܝܳܐ.
30 ܥܒܳܕܰܝ̈ܗܽܘܢ ܕܠܳܐ ܗܘܰܘ ܟܺܐܢܺܝ̈ܢ܆ ܘܩܳܨܽܘܡܰܘ̈ܗܝ ܠܳܐ ܗ̱ܘܳܐ ܗܳܟܰܢܳܐ ܒܰܕܶܩܘ ܥܠܰܘܗܝ.
31 ܡܶܛܽܠ ܗܳܢܳܐ ܥܰܠ ܡܽܘܐܳܒ ܐܰܝܠܶܠܘ: ܘܥܰܠ ܡܽܘܐܳܒ ܟܽܠܶܗ ܡܶܢ ܟܠ ܐܰܬܰܪ ܩܥܰܘ: ܘܥܰܠ ܐ̱ܢܳܫ̈ܳܐ ܕܥܳܡܪܺܝܢ ܒܒܰܝܬܶܗ: ܒܺܝܫܬܳܐ ܢܶܗܘܽܘܢ ܪܳܢܶܝܢ.
32 ܡܶܢ ܒܟܳܬܳܐ ܕܝܰܥܙܺܝܪ ܐܶܒܰܟܶܝܟܝ ܓܦܶܬܳܐ ܕܣܰܒܡܳܐ: ܫܰܒܽܘܩܰܝ̈ܟܝ ܥ̣ܒܰܪܘ ܝܰܡܳܐ: ܘܰܥܕܰܡܳܐ ܠܝܰܡܳܐ ܕܝܰܥܙܺܝܪ ܡ̣ܛܰܘ: ܡܶܛܽܠ ܕܥܰܠ ܚܨܳܕܶܟܝ ܘܥܰܠ ܩܛܳܦܶܟܝ ܒܳܙܽܘܙܳܐ ܢ̣ܦܰܠ.
33 ܘܬܶܥܒܰܪ ܚܰܕܽܘܬܳܐ ܘܰܕܝܳܨܳܐ ܡܶܢ ܐܰܪܥܳܐ ܕܟܰܪܡܠܳܐ: ܘܡܶܢ ܐܰܪܥܳܐ ܕܡܽܘܐܳܒ: ܘܚܰܡܪܳܐ ܡܶܢ ܡܰܥܨܰܪܬܳܐ ܢܶܒܛܰܠ: ܘܠܳܐ ܢܶܥܨܪܽܘܢ ܥܳܨܽܘܖ̈ܶܐ: ܘܠܳܐ ܢܶܥܢܽܘܢ ܘܠܳܐ ܢܺܐܡܪܽܘܢ ܝܳܗܳܝ ܝܳܗܳܝ.
34 ܡܶܢ ܝܺܠܶܠܬܳܐ ܕܚܶܫܒܽܘܢ ܘܰܥܕܰܡܳܐ ܠܰܐܠܥܳܠܳܐ: ܘܰܥܕܰܡܳܐ ܠܝܳܗܳܨ ܐܰܪܺܝܡܘ ܩܳܠܗܽܘܢ: ܡܶܢ ܨܰܥܰܪ ܘܰܥܕܰܡܳܐ ܠܚܽܘܪܢܺܝܡ: ܘܰܥܕܰܡܳܐ ܠܟܰܪܟܳܐ ܕܰܐܠܶܣ ܥܓܶܠܬܳܐ ܬܽܘܠܬܳܐ: ܡܶܛܽܠ ܕܡܰܝ̈ܳܐ ܕܢܰܡܪܺܝܡ ܢܓܽܘܙܽܘܢ.
35 ܘܶܐܒܰܛܶܠ ܡܶܢ ܡܽܘܐܳܒ ܐܳܡܰܪ ܡܳܪܝܳܐ: ܕܡܰܣܶܩ ܥܠܳܬܳܐ ܘܣܳܐܶܡ ܒܶܣ̈ܡܶܐ ܠܰܐܠܳܗܶܗ.
36 ܡܶܛܽܠ ܗܳܢܳܐ ܠܶܒܝ ܥܰܠ ܡܽܘܐܳܒ ܐܰܝܟ ܟܶܢܳܪܳܐ ܢܡܰܠܶܠ: ܡܶܛܽܠ ܕܒܺܝܫܬܳܐ ܥܒܰܕܘ ܘܶܐܒܰܕܘ.
37 ܖ̈ܺܝܫܰܝܗܽܘܢ ܓܶܝܪ ܡܣܰܦܪܺܝܢ: ܘܕܰܩܢܰܝ̈ܗܽܘܢ ܓܪܺܝܥܺܝܢ: ܘܥܰܠ ܟܽܠܗܶܝܢ ܐܺܝܕܰܝ̈ܗܽܘܢ ܡܰܖ̈ܩܕܳܬܳܐ: ܘܥܰܠ ܚܰܨ̈ܶܐ ܣܰܩ̈ܶܐ.
38 ܘܥܰܠ ܟܽܠ ܐܶܓܳܖ̈ܶܐ ܕܡܽܘܐܳܒ ܘܰܒܫܽܘܩ̈ܶܐ ܟܽܠܗܽܘܢ ܡܰܖ̈ܩܕܳܬܳܐ: ܡܶܛܽܠ ܕܬܶܒܪܶܬ ܠܡܽܘܐܳܒ: ܐܰܝܟ ܡܳܐܢܳܐ ܕܠܰܝܬ ܒܶܗ ܚܰܫܚܽܘ ܐܳܡܰܪ ܡܳܪܝܳܐ.
39 ܐܰܝܟܰܢܳܐ ܐܶܬܬܒܰܪܘ ܘܰܐܝܠܶܠܘ ܐܰܝܟܰܢܳܐ ܐܰܦܢܺܝ ܩܕܳܠܶܗ ܡܽܘܐܳܒ ܘܰܒܗܶܬ. ܘܢܶܗܘܶܐ ܡܽܘܐܳܒ ܠܓܽܘܚܟܳܐ ܘܠܰܬܒܳܪܳܐ ܠܟܽܠܗܽܘܢ ܕܰܚܕܳܖ̈ܰܘܗܝ.
40 ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܐܰܝܟ ܢܶܫܪܳܐ ܢܶܣܰܩ ܘܰܢܛܽܘܣ: ܘܢܶܦܪܽܘܣ ܓܶܦܰܘ̈ܗܝ ܥܰܠ ܡܽܘܐܳܒ.
41 ܐܶܬܬܰܚܕܰܬ ܩܶܪܝܽܘܬ ܘܡܶܨܪܽܘܬ ܐܶܬܟܰܒܫܰܬ: ܘܢܶܗܘܶܐ ܠܶܒܗܽܘܢ ܕܓܰܢ̱ܒܳܖ̈ܰܝ ܡܽܘܐܳܒ ܒܝܰܘܡܳܐ ܗܰܘ: ܐܰܝܟ ܠܶܒܳܐ ܕܰܐܢ̱ܬܬܳܐ ܕܰܡܚܰܒܠܳܐ ܠܡܺܐܠܰܕ.
42 ܘܢܺܐܒܰܕ ܡܽܘܐܳܒ ܡܶܢ ܥܰܡܳܐ: ܡܶܛܽܠ ܕܥܰܠ ܡܳܪܝܳܐ ܐܶܬܬܪܺܝܡ.
43 ܕܶܚܠܬܳܐ ܘܓܽܘܡܳܨܳܐ ܘܦܰܚܳܐ ܥܠܰܝܟ ܥܳܡܽܘܪܳܐ ܕܡܽܘܐܳܒ ܐܳܡܰܪ ܡܳܪܝܳܐ.
44 ܘܡܰܢ ܕܢܶܥܪܽܘܩ ܡܶܢ ܩܳܠܳܐ ܕܕܶܚܠܬܳܐ ܢܶܦܶܠ ܒܓܽܘܡܳܨܳܐ: ܘܡܰܢ ܕܢܶܣܰܩ ܡܶܢ ܓܰܘ ܓܽܘܡܳܨܳܐ ܢܶܬܬܚܶܕ ܒܦܰܚܳܐ: ܡܶܛܽܠ ܕܡܰܝܬܶܐ ܐ̱ܢܳܐ ܗܳܠܶܝܢ ܥܰܠ ܡܽܘܐܳܒ: ܫܰܢ̱ܬܳܐ ܕܦܽܘܩܕܳܢܗܽܘܢ ܐܳܡܰܪ ܡܳܪܝܳܐ.
45 ܡܶܛܽܠ ܕܢܽܘܪܳܐ ܢܶܦܩܰܬ ܡܶܢ ܚܶܫܒܽܘܢ: ܘܫܰܠܗܶܒܺܝܬܳܐ ܡܶܢ ܟܰܪܟܳܐ ܕܣܺܝܚܽܘܢ: ܘܬܶܐܟܽܘܠ ܦܰܐܬܶܗ ܕܡܽܘܐܳܒ: ܘܖ̈ܺܝܫܳܢܶܐ ܕܰܒܢܰܝ̈ ܫܳܐܽܘܢ.
46 ܘܳܝ ܠܳܟ ܡܽܘܐܳܒ: ܐܶܒܰܕܬ ܥܰܡܳܐ ܕܟܳܡܽܘܫ: ܕܶܐܬܒܰܕܰܪܘ ܒܢܰܝ̈ܟ ܘܰܒ̈ܢܳܬܳܟ ܒܫܶܒܝܳܐ.
47 ܘܰܐܗܦܶܟ ܫܒܺܝܬܶܗ ܕܡܽܘܐܳܒ ܒܰܐ̱ܚܪܳܝܰܬ ܝܰܘ̈ܡܳܬܳܐ ܐܳܡܰܪ ܡܳܪܝܳܐ. ܥܕܰܡܳܐ ܠܗܳܪܟܳܐ ܕܺܝܢܶܗ ܕܡܽܘܐܳܒ.