Jeremiah 47
The Book of Jeremiah
܀ ܐܪܡܝܐ ܡܙ ܀
1 ܥܰܠ ܦܠܶܫܬ. ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ: ܕܢܶܬܢܰܒܶܐ ܥܰܠ ܦܠܶܫ̈ܬܳܝܶܐ: ܥܰܕܠܳܐ ܢܶܡܚܶܐ ܦܶܪܥܽܘܢ ܠܥܳܐܙܳܐ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܰܝܬܶܐ ܐ̱ܢܳܐ ܥܠܰܝ̈ܡܶܐ ܡܶܢ ܓܰܪܒܝܳܐ: ܘܢܶܗܘܽܘܢ ܐܰܝܟ ܢܰܚܠܳܐ ܕܓܳܪܶܦ: ܘܢܶܓܪܦܽܘܢ ܐܰܪܥܳܐ ܘܰܡܠܳܐܳܗ̇: ܩܪܺܝܬܳܐ ܘܥܳܡܽܘܖ̈ܶܝܗ̇: ܘܰܢܒܰܓܢܽܘܢ ܒܢܰܝ̈ܢܳܫܳܐ: ܘܢܰܝܠܠܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ.
3 ܡܶܢ ܩܳܠܳܐ ܕܗܶܠܰܟܬܳܐ ܕܦܰܖ̈ܣܳܬܳܐ ܕܓܰܢ̱ܒܳܖ̈ܰܘܗܝ: ܘܡܶܢ ܙܰܘܥܳܐ ܕܡܰܖ̈ܟܒܳܬܶܗ: ܘܡܶܢ ܩܳܠܳܐ ܕܓܺܝܓܠܰܘ̈ܗܝ: ܠܳܐ ܐܶܬܦܢܺܝܘ ܐܰܒܳܗ̈ܶܐ ܥܰܠ ܒܢܰܝ̈ܳܐ: ܡܶܛܽܠ ܕܶܐܬܖ̈ܰܦܺܝ ܐܺܝܕܰܝ̈ܗܽܘܢ.
4 ܗܳܐ ܝܰܘܡܳܐ ܐܶܬܳܐ ܠܡܶܒܰܙ ܠܟܽܠܗܽܘܢ ܦܶܠܫܬܳܝ̈ܶܐ: ܘܰܠܡܰܘܒܳܕܽܘ ܠܨܽܘܪ ܘܰܠܨܰܝܕܳܢ: ܘܰܠܟܽܠ ܕܶܐܫܬܚܰܪ ܠܰܡܥܰܕܳܪܽܘ: ܡܶܛܽܠ ܕܚܳܪܶܒ ܡܳܪܝܳܐ ܠܰܦܶܠܫܬܳܝ̈ܶܐ: ܠܫܰܪܟܳܐ ܕܓܳܙܖ̈ܳܬܳܐ ܕܩܰܦܽܘܕܩܳܝ̈ܶܐ.
5 ܡܛܳܬ ܡܚܽܘܬܳܐ ܠܥܶܐܙܳܐ: ܐܶܬܬܰܒܪܰܬ ܐܰܫܩܳܠܽܘܢ: ܘܟܽܠ ܕܶܐܫܬܚܰܪ ܒܝܰܬܒܗܽܘܢ.
6 ܐܳܘ ܣܰܦܣܺܪܶܗ ܕܡܳܪܝܳܐ ܥܕܰܡܳܐ ܠܶܐܡܰܬܝ ܠܳܐ ܬܶܫܠܶܝܢ: ܘܠܳܐ ܬܶܬܢܺܝܚܺܝܢ ܡܶܢ ܕܰܠܡܶܚܪܰܒ ܐܶܬܚܰܡܠܝ ܒܚܶܠܬܶܟܝ: ܐܶܬܚܰܡܠܝ ܘܰܫܠܳܝ.
7 ܐܰܝܟܰܢܳܐ ܬܶܫܠܶܐ ܕܡܳܪܝܳܐ ܦܰܩܕܳܗ̇ ܥܰܠ ܐܰܫܩܳܠܽܘܢ: ܘܥܰܠ ܣܦܳܖ̈ܰܝ ܝܰܡܳܐ: ܬܰܡܳܢ ܐܰܫܠܛܳܗ̇.