Jeremiah 15
The Book of Jeremiah
܀ ܐܪܡܝܐ ܝܗ ܀
1 ܘܶܐܡܰܪ ܠܺܝ ܡܳܪܝܳܐ: ܐܶܢ ܢܩܽܘܡ ܡܽܘܫܶܐ ܘܰܫܡܽܘܐܶܝܠ ܩܕܳܡܝ: ܠܳܐ ܨܳܒܝܳܐ ܢܰܦܫܝ ܒܥܰܡܳܐ ܗܳܢܳܐ: ܐܰܦܶܩ ܐܶܢܽܘܢ ܡܶܢ ܩܕܳܡ ܐܰܦܰܝ̈ ܘܢܶܦܩܽܘܢ.
2 ܘܶܐܢ ܢܺܐܡܪܽܘܢ ܠܳܟ ܠܰܐܝܟܳܐ ܢܶܦܽܘܩ: ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܕܰܠܡܰܘܬܳܐ ܠܡܰܘܬܳܐ: ܘܕܰܠܚܰܪܒܳܐ ܠܚܰܪܒܳܐ: ܘܕܰܠܟܰܦܢܳܐ ܠܟܰܦܢܳܐ: ܘܕܰܠܫܶܒܝܳܐ ܠܫܶܒܝܳܐ.
3 ܘܶܐܦܩܽܘܕ ܥܠܰܝܗܽܘܢ ܐܰܪܒܰܥ ܡܰܚ̈ܘܳܢ ܐܳܡܰܪ ܡܳܪܝܳܐ: ܚܰܪܒܳܐ ܠܡܶܩܛܰܠ: ܘܟܰܠ̈ܒܶܐ ܠܡܶܓܰܪ: ܘܦܳܪܰܚܬܳܐ ܕܰܫܡܰܝܳܐ: ܘܚܰܝܽܘܬܳܐ ܕܰܐܪܥܳܐ ܠܡܶܐܟܰܠ ܘܠܰܡܚܰܒܳܠܽܘ.
4 ܘܶܐܬܶܠ ܐܶܢܽܘܢ ܠܙܰܘܥܬܳܐ ܒܰܝܢܳܬ ܟܽܠܗܶܝܢ ܡܰܠ̈ܟܘܳܬܳܐ ܕܰܐܪܥܳܐ: ܡܶܛܽܠ ܚܰܘ̈ܒܰܘܗܝ ܕܰܡܶܢܫܶܐ ܒܰܪ ܚܶܙܰܩܝܳܐ ܡܰܠܟܳܐ ܕܺܝܗܽܘܕ: ܥܰܠ ܟܠ ܡܶܕܶܡ ܕܰܥ̣ܒܰܕ ܒܽܐܘܪܺܫܠܶܡ.
5 ܡܰܢܽܘ ܢܚܽܘܣ ܥܠܰܝܟܝ ܐܽܘܪܺܫܠܶܡ: ܘܰܠܡܶܢ ܬܶܟܪܶܐ ܥܠܰܝܟܝ: ܘܡܰܢܽܘ ܢܶܣܛܶܐ ܠܡܶܫܐܰܠ ܒܰܫܠܳܡܶܟܝ.
6 ܐܰܢ̱ܬܝ ܫܒܰܩܬܺܝܢܝ ܐܳܡܰܪ ܡܳܪܝܳܐ: ܘܰܠܒܶܣܬܪܶܟܝ ܐܶܙܰܠܬܝ: ܘܰܐܪܺܝܡ ܐܺܝܕܝ ܥܠܰܝܟܝ ܘܶܐܚܰܒܠܶܟܝ: ܘܬܽܘܒ ܠܳܐ ܐܶܫܒܽܘܩ ܠܗܽܘܢ.
7 ܘܶܐܕܪܶܐ ܐܶܢܽܘܢ ܒܡܰܕܪܝܳܐ ܒܩܽܘܖ̈ܝܳܗ̇ ܕܰܐܪܥܳܐ: ܓܰܙܺܝ݀ܬ ܘܰܐܘܒܕܶܬ ܥܰܡܝ: ܡܶܢ ܐܽܘܖ̈ܚܳܬܗܽܘܢ ܠܳܐ ܬܳܒܘ.
8 ܣܓܺܝ̈ ܐܰܖ̈ܡܠܳܬܗܽܘܢ ܡܶܢ ܚܳܠܳܐ ܕܝܰܡܳܐ: ܐܰܝܬܺܝ݀ܬ ܥܠܰܝܗܽܘܢ ܥܰܠ ܐܶܡܳܐ ܘܥܰܠ ܥܠܰܝ̈ܡܶܐ ܒܳܙܽܘ̈ܙܶܐ ܒܛܰܗܪܳܐ: ܐܰܪܡܺܝ݀ܬ ܥܠܰܝܗܽܘܢ ܡܶܢ ܫܶܠܝܳܐ ܕܠܽܘܚܝܳܐ ܘܰܪܬܺܝܬܳܐ.
9 ܐܶܠܰܬ ܝܳܠܕܰܬ ܫܰܒܥܳܐ: ܢܶܦܚܰܬ ܟܰܪܣܳܗ̇: ܥܶܪܒܰܬ ܫܶܡܫܳܗ̇ ܒܦܳܠܓܽܘܬ ܝܰܘ̈ܡܶܝܗ̇: ܒܶܗܬܰܬ ܘܰܐܚܦܪܰܬ: ܘܫܰܪܟܗܽܘܢ ܠܚܰܪܒܳܐ ܐܰܫܠܶܡ ܩܕܳܡ ܒܥܶܠܕܒܳܒܰܝ̈ܗܽܘܢ ܐܳܡܰܪ ܡܳܪܝܳܐ.
10 ܘܳܝ ܠܺܝ ܐܶܡܝ ܕܺܝܠܶܕܬܺܝܢܝ: ܓܒܰܪ ܕܶܝܢ: ܘܰܓܒܰܪ ܡܰܟܣܳܢ ܒܟܽܠܳܗ̇ ܐܰܪܥܳܐ: ܠܳܐ ܚܰܝܳܒ ܐ̱ܢܳܐ ܘܠܳܐ ܚܰܝܳܒܺܝܢ ܠܺܝ: ܘܟܽܠܗܽܘܢ ܡܨܰܚܶܝܢ ܠܺܝ.
11 ܐܳܡܰܪ ܡܳܪܝܳܐ ܠܳܐ ܐܶܫܒܩܳܟ ܒܛܳܒܬܳܐ: ܐܶܠܳܐ ܐܰܦܓܰܥ ܒܳܟ ܒܥܶܠܕܒܳܒܳܐ ܡܶܢ ܓܰܪܒܝܳܐ: ܒܙܰܒܢܳܐ ܕܽܐܘܠܨܳܢܳܐ: ܒܙܰܒܢܳܐ ܕܒܺܝܫܬܳܐ.
12 ܕܰܩܫܶܐ ܐܰܝܟ ܦܰܪܙܠܳܐ ܘܰܐܝܟ ܢܚܳܫܳܐ:
13 ܢܶܟܣܰܝ̈ܟ ܘܓܰܙܰܝ̈ܟ ܘܟܽܠܶܗ ܬܚܽܘܡܳܟ: ܠܒܶܙܬܳܐ ܐܶܬܶܠ ܡܶܛܽܠ ܚܛܳܗܰܝ̈ܟ.
14 ܘܶܐܫܰܥܒܕܳܟ ܠܰܒܥܶܠܕܒܳܒܰܝ̈ܟ ܒܰܐܪܥܳܐ ܕܠܳܐ ܝܳܕܰܥ ܐܰܢ̱ܬ: ܡܶܛܽܠ ܕܢܽܘܪܳܐ ܩܶܕܚܰܬ ܒܪܽܘܓܙܝ ܥܠܰܝܟܽܘܢ ܘܬܺܐܩܰܕ.
15 ܐܰܢ̱ܬܝ ܡܳܪܝܳܐ ܝܳܕܰܥ ܐܰܢ̱ܬ: ܐܶܬܕܰܟܪܰܝܢܝ ܘܰܦܪܽܘܩܰܝܢܝ: ܘܶܐܬܢܰܩܰܡ ܠܺܝ ܡܶܢ ܖ̈ܳܕܽܘܦܰܝ: ܠܳܐ ܒܢܰܓܺܝܪܽܘܬ ܪܽܘܚܳܟ ܬܕܰܒܪܰܢܝ. ܕܰܥ ܕܩܰܒܠܶ݀ܬ ܥܰܠ ܐܰܦܰܝ̈ܟ ܚܶܣܕܳܐ.
16 ܘܢܶܛܪܶܬ ܦܽܘ̈ܩܕܳܢܰܝܟ ܘܥܶܒܕܶܬ ܐܶܢܽܘܢ: ܘܰܗܘܳܐ ܠܺܝ ܦܶܬܓܳܡܳܟ ܠܒܽܘܣܳܡܳܐ ܘܰܠܚܰܕܽܘܬܶܗ ܕܠܶܒܝ: ܡܶܛܽܠ ܕܶܐܬܩܪܺܝ ܫܡܳܟ ܥܠܰܝ.
17 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ: ܠܳܐ ܝܶܬܒܶ݀ܬ ܒܰܟܢܽܘܫܬܳܐ ܕܰܡܒܰܙܚܳܢ̈ܶܐ: ܐܶܠܳܐ ܕܶܚܠܶܬ ܡܶܢ ܩܕܳܡ ܐܺܝܕܳܟ ܘܒܰܠܚܽܘܕܰܝ ܝܶܬܒܶ݀ܬ: ܡܶܛܽܠ ܕܪܽܘܓܙܳܐ ܡܠܰܝܬܳܢܝ.
18 ܠܡܳܢܳܐ ܗܘܳܐ ܟܺܐܒܝ ܥܰܫܺܝܢ: ܘܰܡܚܽܘܬܝ ܚܰܣܺܝܢܳܐ ܘܠܳܐ ܨܳܒܝܳܐ ܠܡܶܬܰܐܣܳܝܽܘ: ܘܰܗܘܺܝ݀ܬ ܠܺܝ ܐܰܝܟ ܡܰܝ̈ܳܐ ܟܰܕܳܒ̈ܶܐ ܕܠܳܐ ܡܶܬܗܰܝܡܢܺܝܢ.
19 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܐܶܢ ܬܬܽܘܒ ܐܰܦܢܶܝܟ ܘܰܩܕܳܡܝ ܬܩܽܘܡ. ܘܶܐܢ ܬܰܦܶܩ ܝܰܩܺܝܪܳܐ ܡܶܢ ܙܰܠܺܝܠܳܐ: ܐܰܝܟ ܦܽܘܡܝ ܬܶܗܘܶܐ ܐܳܡܰܪ ܡܳܪܝܳܐ: ܘܢܶܬܦܢܽܘܢ ܗܶܢܽܘܢ ܠܘܳܬܳܟ: ܘܰܐܢ̱ܬ ܠܳܐ ܬܶܬܦܢܶܐ ܠܘܳܬܗܽܘܢ.
20 ܝܰܗܒܬܳܟ ܠܥܰܡܳܐ ܗܳܢܳܐ: ܐܰܝܟ ܫܽܘܪܳܐ ܥܰܫܺܝܢܳܐ ܕܰܢܚܳܫܳܐ: ܘܢܶܬܟܰܬܫܽܘܢ ܥܰܡܳܟ ܘܠܳܐ ܢܶܙܟܽܘܢܳܟ: ܡܶܛܽܠ ܕܥܰܡܳܟ ܐ̱ܢܳܐ: ܠܡܶܦܪܩܳܟ ܘܠܰܡܦܰܨܳܝܽܘܬܳܟ ܐܳܡܰܪ ܡܳܪܝܳܐ.
21 ܘܶܐܦܰܨܶܝܟ ܡܶܢ ܐܺܝܕܳܐ ܕܒܺܝ̈ܫܶܐ: ܘܶܐܦܪܩܳܟ ܡܶܢ ܐܺܝܕܳܐ ܕܥܰܫܺܝ̈ܢܶܐ.