Jeremiah 16
The Book of Jeremiah
܀ ܐܪܡܝܐ ܝܘ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܠܳܐ ܬܶܣܰܒ ܠܳܟ ܐܰܢ̱ܬܬܳܐ: ܘܠܳܐ ܢܶܗܘܽܘܢ ܠܳܟ ܒܢܰܝ̈ܳܐ ܘܒ̈ܢܳܬܳܐ ܒܰܐܬܪܳܐ ܗܳܢܳܐ.
3 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܒܢܰܝ̈ܳܐ ܘܥܰܠ ܒ̈ܢܳܬܳܐ ܕܡܶܬܝܰܠܕܺܝܢ ܒܰܐܬܪܳܐ ܗܳܢܳܐ: ܘܥܰܠ ܐܶܡ̈ܗܳܬܗܽܘܢ ܕܝܳܠ̈ܕܳܢ ܠܗܽܘܢ: ܘܥܰܠ ܐܰܒܳܗܰܝ̈ܗܽܘܢ ܕܡܰܘܠܕܺܝܢ ܠܗܽܘܢ ܒܰܐܬܪܳܐ ܗܳܢܳܐ.
4 ܡܰܘܬܳܐ ܕܰܡܛܰܖ̈ܦܰܝ ܟܰܦܢܳܐ ܢܡܽܘܬܽܘܢ: ܘܠܳܐ ܢܰܪܩܕܽܘܢ ܥܠܰܝܗܽܘܢ: ܘܠܳܐ ܢܶܬܩܰܒܪܽܘܢ: ܐܶܠܳܐ ܐܰܝܟ ܙܶܒܠܳܐ ܥܰܠ ܐܰܦܰܝ̈ ܐܰܪܥܳܐ ܢܶܗܘܽܘܢ: ܘܰܒܚܰܪܒܳܐ ܘܰܒܟܰܦܢܳܐ ܢܣܽܘܦܽܘܢ: ܘܢܶܗܘ̈ܝܳܢ ܫܠܰܕܰܝ̈ܗܽܘܢ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ: ܘܰܠܚܰܝܽܘܬܳܐ ܕܰܐܪܥܳܐ.
5 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܠܳܐ ܬܺܐܙܰܠ ܠܒܶܝܬ ܡܰܪܩܽܘܕܬܳܐ: ܘܠܳܐ ܬܺܐܙܰܠ ܠܡܰܪܩܳܕܽܘ: ܘܠܳܐ ܬܢܽܘܕ ܥܠܰܝܗܽܘܢ: ܡܶܛܽܠ ܕܰܐܥܒܪܶܬ ܫܠܳܡܝ ܡܶܢ ܥܰܡܳܐ ܗܳܢܳܐ ܐܳܡܰܪ ܡܳܪܝܳܐ: ܘܛܰܝܒܽܘܬܳܐ ܘܖ̈ܰܚܡܶܐ.
6 ܘܰܢܡܽܘܬܽܘܢ ܪܰܘܖ̈ܒܳܢܶܐ ܘܕܰܩ̈ܕܩܶܐ ܒܰܐܪܥܳܐ ܗܳܕܶܐ: ܠܳܐ ܢܶܬܩܰܒܪܽܘܢ: ܘܠܳܐ ܢܰܪܩܕܽܘܢ ܥܠܰܝܗܽܘܢ: ܘܠܳܐ ܢܰܝܠܠܽܘܢ: ܘܠܳܐ ܢܶܩܕܚܽܘܢ ܥܠܰܝܗܽܘܢ.
7 ܘܠܳܐ ܢܶܩܨܽܘܢ ܥܠܰܝܗܽܘܢ ܒܶܐܒܠܳܐ: ܕܢܶܬܒܰܝܐܽܘܢ ܥܰܠ ܡܺܝܬܳܐ: ܘܠܳܐ ܢܰܫܩܽܘܢ ܐܶܢܽܘܢ ܟܳܣܳܐ ܕܒܽܘܝܳܐܳܐ: ܥܰܠ ܐܰܒܳܗܰܝ̈ܗܽܘܢ ܘܥܰܠ ܐܶܡ̈ܗܳܬܗܽܘܢ.
8 ܘܰܠܒܶܝܬ ܡܰܫܬܝܳܐ ܠܳܐ ܬܶܥܽܘܠ: ܠܡܶܬܰܒ ܥܰܡܗܽܘܢ ܠܡܶܠܥܰܣ ܘܰܠܡܶܫܬܳܐ.
9 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܐ ܡܒܰܛܶܠ ܐ̱ܢܳܐ ܡܶܢ ܐܰܬܪܳܐ ܗܳܢܳܐ ܠܥܺܢܰܝ̈ܟܽܘܢ ܘܰܒܝܰܘ̈ܡܳܬܟܽܘܢ: ܩܳܠܳܐ ܕܰܕܝܳܨܳܐ ܘܩܳܠܳܐ ܕܚܰܕܽܘܬܳܐ: ܩܳܠܳܐ ܕܚܰܬܢܳܐ: ܘܩܳܠܳܐ ܕܟܰܠܬܳܐ.
10 ܘܶܐܢ ܬܚܰܘܶܐ ܠܥܰܡܳܐ ܗܳܢܳܐ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ: ܢܺܐܡܪܽܘܢ ܠܳܟ: ܡܶܛܽܠ ܡܳܢܳܐ ܐܶܡܰܪ ܡܳܪܝܳܐ ܥܠܰܝܢ ܟܽܠܳܗ̇ ܒܺܝܫܬܳܐ ܗܳܕܶܐ ܪܰܒܬܳܐ: ܡܳܢܳܐ ܚ̣ܳܒܢ: ܘܡܳܢܳܐ ܗ̱ܝ ܚܛܺܝܬܰܢ ܕܰܚܛܰܝܢ ܠܡܳܪܝܳܐ ܐܰܠܳܗܰܢ.
11 ܐܶܡܰܪ ܠܗܽܘܢ: ܥܰܠ ܕܫܰܒܩܽܘܢܝ ܐܰܒܳܗܰܝ̈ܟܽܘܢ ܐܳܡܰܪ ܡܳܪܝܳܐ: ܘܶܐܙܰܠܘ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ: ܘܰܦܠܰܚܘ ܐܶܢܽܘܢ ܘܰܣܓܶܕܘ ܠܗܽܘܢ: ܘܠܺܝ ܫܒܰܩܘ ܘܢܳܡܽܘܣܝ ܠܳܐ ܢܛܰܪܘ.
12 ܘܰܐܢ̱ܬܽܘܢ ܐܰܒܐܶܫܬܽܘܢ ܠܡܶܥܒܰܕ ܝܰܬܺܝܪ ܡܶܢ ܐܰܒܳܗܰܝ̈ܟܽܘܢ: ܘܗܳܐ ܐܳܙܺܠܝܢ ܐܢ̱ܬܽܘܢ ܓܒܰܪ ܒܳܬܰܪ ܨܶܒܝܳܢܰܝ̈ ܠܶܒܶܗ ܒܺܝܫܳܐ ܕܠܳܐ ܬܶܫܡܥܽܘܢܳܢܝ.
13 ܘܶܐܫܕܶܝܟܽܘܢ ܡܶܢ ܐܰܪܥܳܐ ܗܳܕܶܐ: ܠܰܐܪܥܳܐ ܕܠܳܐ ܝܺܕܰܥܬܽܘܢ ܐܢ̱ܬܽܘܢ ܘܰܐܒܳܗܰܝ̈ܟܽܘܢ: ܘܬܶܦܠܚܽܘܢ ܬܰܡܳܢ ܠܰܐܠܳܗ̈ܶܐ ܐ̱ܚܖ̈ܳܢܶܐ ܒܺܐܝܡܳܡܳܐ ܘܰܒܠܺܠܝܳܐ: ܘܠܳܐ ܐܶܬܶܠܟܽܘܢ ܠܖ̈ܰܚܡܶܐ.
14 ܡܶܛܽܠ ܗܳܢܳܐ ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ: ܘܠܳܐ ܢܶܬܶܐܡܰܪ ܬܽܘܒ ܚܰܝ ܗܽܘ ܡܳܪܝܳܐ ܕܰܐܣܶܩ ܠܰܕܒܶܝܬ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ.
15 ܐܶܠܳܐ ܚܰܝ ܗܽܘ ܡܳܪܝܳܐ: ܕܢܰܣܶܩ ܘܢܰܝܬܶܐ ܠܰܕܒܶܝܬ ܝܺܣܪܳܐܶܝܠ ܡܶܢ ܐܰܪܥܳܐ ܕܓܰܪܒܝܳܐ: ܡܶܢ ܟܽܠ ܐܰܬܖ̈ܰܘܳܬܳܐ ܕܕܶܚܩܶܬ ܐܶܢܽܘܢ ܠܬܰܡܳܢ: ܘܰܐܗܦܶܟ ܐܶܢܽܘܢ ܠܰܐܪܥܗܽܘܢ ܕܝܶܗܒܶ݀ܬ ܠܰܐܒܳܗܰܝ̈ܗܽܘܢ.
16 ܗܳܐ ܡܫܰܕܪ ܐ̱ܢܳܐ ܠܨܰܝܳܕ̈ܶܐ ܣܰܓܺܝ̈ܐܶܐ ܐܳܡܰܪ ܡܳܪܝܳܐ: ܘܰܢܨܽܘܕܽܘܢ ܐܶܢܽܘܢ: ܘܒܳܬܰܪܟܶܢ ܐܶܫܰܕܰܪ ܠܨܰܝܳܕ̈ܶܐ ܣܰܓܺܝ̈ܐܶܐ ܘܰܢܨܽܘܕܽܘܢ ܐܶܢܽܘܢ: ܡܶܢ ܟܽܠ ܛܽܘܪ ܘܡܶܢ ܟܽܠ ܪܳܡܳܐ: ܘܡܶܢ ܢܶܩܥ̈ܶܐ ܕܰܫܩܺܝ̈ܦܶܐ.
17 ܡܶܛܽܠ ܕܥܰܝܢܰܝ̈ ܥܰܠ ܟܽܠܗܶܝܢ ܐܽܘܖ̈ܚܳܬܗܽܘܢ: ܘܠܳܐ ܛܳܫܶܝܢ ܡܶܢ ܩܕܳܡܝ: ܘܠܳܐ ܡܶܬܛܰܫܶܐ ܥܰܘܠܗܽܘܢ ܡܶܢ ܩܕܳܡ ܥܰܝܢܰܝ̈.
18 ܘܶܐܦܪܽܘܥ ܐܶܢܽܘܢ ܩܰܕܡܳܝܰܬ ܚܰܕ ܬܪܶܝܢ: ܚܰܘ̈ܒܰܝܗܽܘܢ ܘܰܚܛܳܗܰܝ̈ܗܽܘܢ: ܥܰܠ ܕܛܰܘܶܫܘ ܐܰܪܥܝ ܒܕܶܒ̈ܚܶܐ ܕܰܦܬܰܟܖ̈ܰܝܗܽܘܢ: ܘܰܒܛܰܢܦܽܘܬܗܽܘܢ ܡܠܰܘ ܝܳܪܬܽܘܬܝ.
19 ܡܳܪܝܳܐ ܚܰܝܠܝ ܘܰܡܥܰܕܪܢܳܝ: ܘܒܶܝܬ ܓܰܘܣܝ ܒܝܰܘܡܳܐ ܕܽܐܘܠܨܳܢܳܐ: ܠܘܳܬܳܟ ܥܰܡ̈ܡܶܐ ܢܺܐܬܽܘܢ ܡܶܢ ܣܰܘ̈ܦܶܝܗ̇ ܕܰܐܪܥܳܐ: ܘܢܺܐܡܪܽܘܢ: ܫܰܪܺܝܪܳܐܺܝܬ ܦܬܰܟܖ̈ܶܐ ܕܕܰܓܳܠܽܘܬܳܐ ܕܰܐܘܪܬܽܘܢ ܐܰܒܳܗܰܝ̈ܢ ܠܳܐ ܡܶܕܶܡ ܐܶܢܽܘܢ: ܘܠܰܝܬ ܒܗܽܘܢ ܝܽܘܬܪܳܢ.
20 ܗܳܐ ܒܢܰܝ̈ܢܳܫܳܐ ܥܳܒܕܺܝܢ ܠܗܽܘܢ ܐܰܠܳܗ̈ܶܐ ܘܗܶܢܽܘܢ ܠܳܐ ܗܘܰܘ ܐܰܠܳܗ̈ܶܐ.
21 ܡܶܛܽܠ ܗܳܢܳܐ ܗܳܐ ܡܚܰܘܶܐ ܐ̱ܢܳܐ ܠܗܽܘܢ: ܘܰܒܙܰܒܢܳܐ ܗܳܢܳܐ ܐܰܘܕܰܥ ܐܶܢܽܘܢ ܐܺܝܕܝ ܘܓܰܢ̱ܒܳܪܽܘܬܝ: ܘܢܶܕܥܽܘܢ ܕܡܳܪܝܳܐ ܫܶܡܝ.