Jeremiah 37
The Book of Jeremiah
܀ ܐܪܡܝܐ ܠܙ ܀
1 ܘܰܐܡܠܶܟ ܡܰܠܟܳܐ ܨܶܕܰܩܝܳܐ ܒܰܪ ܝܽܘܫܺܝܳܐ: ܚܠܳܦ ܝܽܘܟܰܢܝܳܐ ܒܪ ܝܽܘܝܰܩܺܝܡ: ܕܰܐܡܠܶܟ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܒܰܐܪܥܳܐ ܕܺܝܗܽܘܕܳܐ.
2 ܘܠܳܐ ܫܡܰܥ ܗܽܘ ܘܥܰܒܕܰܘ̈ܗܝ ܘܥܰܡܳܐ ܕܰܐܪܥܳܐ: ܦܶܬܓܳܡܰܘ̈ܗܝ ܕܡܳܪܝܳܐ ܕܶܐܡܰܪ ܒܝܰܕ ܐܶܪܰܡܝܳܐ ܢܒܺܝܳܐ.
3 ܘܫܰܕܰܪ ܡܰܠܟܳܐ ܨܶܕܰܩܝܳܐ ܠܝܽܘܒܳܠ ܒܰܪ ܫܠܰܡܝܳܐ: ܘܠܰܨܦܰܢܝܳܐ ܒܰܪ ܡܥܰܣܝܳܐ ܟܳܗܢܳܐ: ܠܘܳܬ ܐܶܪܰܡܝܳܐ ܢܒܺܝܳܐ ܠܡܺܐܡܰܪ: ܨܰܠܳܐ ܥܠܰܝܢ ܩܕܳܡ ܡܳܪܝܳܐ ܐܰܠܳܗܳܟ.
4 ܘܶܐܪܰܡܝܳܐ ܢܳܦܶܩ ܗ̱ܘܳܐ ܘܥܳܐܶܠ ܒܓܰܘ ܥܰܡܳܐ: ܘܠܳܐ ܐܰܪܡܝܽܘܗܝ ܒܶܝܬ ܐܰܣܺܝܖ̈ܶܐ.
5 ܘܚܰܝܠܶܗ ܕܦܶܪܥܽܘܢ ܢܦܰܩ ܡܶܢ ܡܶܨܪܶܝܢ: ܘܰܫܡܰܥܘ ܟܰܠܕܳܝ̈ܶܐ ܕܰܟܪܺܝܟܺܝܢ ܠܽܐܘܪܺܫܠܶܡ ܫܶܡܥܗܽܘܢ: ܘܫܰܢܺܝܘ ܠܗܽܘܢ ܡܶܢ ܐܽܘܪܺܫܠܶܡ.
6 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܐܶܪܰܡܝܳܐ ܢܒܺܝܳܐ ܠܡܺܐܡܰܪ.
7 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܟܰܢܳܐ ܬܺܐܡܪܽܘܢ ܠܡܰܠܟܳܐ ܕܺܝܗܽܘܕܳܐ ܕܫܰܕܰܪܟܽܘܢ ܠܘܳܬܝ ܕܬܶܒܥܽܘܢ ܡܶܢܝ: ܗܳܐ ܚܰܝܠܶܗ ܕܦܶܪܥܽܘܢ ܕܰܢܦܰܩ ܠܰܡܥܰܕܳܪܽܘܬܟܽܘܢ: ܗܦܰܟ ܠܰܐܪܥܶܗ ܠܡܶܨܪܶܝܢ.
8 ܘܢܶܗܦܟܽܘܢ ܟܰܠܕܳܝ̈ܶܐ ܘܢܶܬܟܰܬܫܽܘܢ ܥܰܠ ܩܪܺܝܬܳܐ ܗܳܕܶܐ: ܘܢܶܟܒܽܫܘܢܳܗ̇ ܘܢܰܘܩܕܽܘܢܳܗ̇ ܒܢܽܘܪܳܐ.
9 ܗܳܟܰܢܳܐ ܐܳܡܰܪ ܡܳܪܝܳܐ: ܠܳܐ ܬܶܣܒܪܽܘܢ ܒܢܰܦܫܟܽܘܢ ܘܬܺܐܡܪܽܘܢ ܕܳܐܙܺܠܝܢ ܡܶܢܰܢ ܟܰܠܕܳܝ̈ܶܐ: ܡܶܛܽܠ ܕܠܳܐ ܐܳܙܺܠܝܢ.
10 ܡܶܛܽܠ ܕܶܐܢ ܬܶܚܪܒܽܘܢ ܟܽܠܶܗ ܚܰܝܠܳܐ ܕܟܰܠܕܳܝ̈ܶܐ ܕܡܶܬܟܰܬܫܺܝܢ ܥܰܡܟܽܘܢ: ܘܢܶܫܬܰܚܪܽܘܢ ܒܗܽܘܢ ܐ̱ܢܳܫ̈ܳܐ ܕܰܡܡܰܚܶܝܢ: ܓܒܰܪ ܡܶܢ ܡܰܫܟܢܶܗ ܢܩܽܘܡܽܘܢ: ܘܢܰܘܩܕܽܘܢܳܗ̇ ܠܰܩܪܺܝܬܳܐ ܗܳܕܶܐ ܒܢܽܘܪܳܐ.
11 ܘܫܰܢܺܝ ܠܶܗ ܚܰܝܠܳܐ ܕܟܰܠܕܳܝ̈ܶܐ ܡܶܢ ܐܽܘܪܺܫܠܶܡ ܡܶܢ ܩܕܳܡ ܚܰܝܠܶܗ ܕܦܶܪܥܽܘܢ.
12 ܘܰܢܦܰܩ ܐܶܪܰܡܝܳܐ ܡܶܢ ܐܽܘܪܺܫܠܶܡ ܠܡܺܐܙܰܠ ܠܰܐܪܥܳܐ ܕܒܶܢܝܳܡܶܝܢ: ܠܰܡܦܰܠܳܓܽܘ ܬܰܡܳܢ ܡܢܳܬܳܐ ܥܰܡ ܥܰܡܳܐ.
13 ܘܟܰܕ ܩܳܐܶܡ ܗ̱ܘܳܐ ܒܬܰܪܥܳܐ ܕܒܶܢܝܳܡܶܝܢ: ܐܺܝܬ ܗ̱ܘܳܐ ܬܰܡܳܢ ܓܰܒܪܳܐ ܦܳܩܽܘܕܳܐ: ܘܰܫܡܶܗ ܢܺܪܝܳܐ ܒܰܪ ܫܠܰܡܝܳܐ: ܒܰܪ ܚܰܢܰܢܝܳܐ: ܘܰܐܚܕܶܗ ܠܶܐܪܰܡܝܳܐ ܢܒܺܝܳܐ: ܘܶܐܡܰܪ ܠܶܗ: ܠܘܳܬ ܟܰܠܕܳܝ̈ܶܐ ܥܳܪܶܩ ܐܰܢ̱ܬ.
14 ܘܶܐܡܰܪ ܠܶܗ ܐܶܪܰܡܝܳܐ ܡܰܕܓܶܠ ܐܰܢ̱ܬ: ܠܳܐ ܥܳܪܶܩ ܐ̱ܢܳܐ ܠܘܳܬ ܟܰܠܕܳܝ̈ܶܐ: ܘܠܳܐ ܫܰܡܥܶܗ: ܘܰܐܚܕܶܗ ܢܺܪܝܳܐ ܠܶܐܪܰܡܝܳܐ ܘܰܐܝܬܝܶܗ̇ ܠܘܳܬ ܪܰܘܖ̈ܒܳܢܶܐ.
15 ܘܰܪܓܶܙܘ ܪܰܘܖ̈ܒܳܢܶܐ ܥܰܠ ܐܶܪܰܡܝܳܐ ܘܢܰܓܕܽܘܗܝ: ܘܰܐܪܡܝܽܘܗܝ ܒܶܝܬ ܐܰܣܺܝܖ̈ܶܐ ܒܶܝܬ ܝܽܘܢܳܬܳܢ ܣܳܦܪܳܐ: ܡܶܛܽܠ ܕܠܶܗ ܥܒܰܕܘ ܪܰܒ ܐܰܣܺܝܖ̈ܶܐ.
16 ܘܰܐܪܡܝܽܘܗܝ ܠܶܐܪܰܡܝܳܐ ܡܶܢ ܟܰܘܰܬ ܓܽܘܒܳܐ ܠܓܽܘܒܳܐ: ܘܰܗܘܳܐ ܬܰܡܳܢ ܐܶܪܰܡܝܳܐ ܝܰܘ̈ܡܳܬܳܐ ܣܰܓܺܝ̈ܐܶܐ.
17 ܘܫܰܕܰܪ ܡܰܠܟܳܐ ܨܶܕܰܩܝܳܐ ܘܰܐܣܩܶܗ: ܘܫܰܐܠܶܗ ܡܰܠܟܳܐ ܒܒܰܝܬܳܐ ܡܛܰܫܝܳܐܺܝܬ: ܘܶܐܡܰܪ ܠܶܗ: ܢܦܰܩ ܦܶܬܓܳܡܳܐ ܡܶܢ ܩܕܳܡ ܡܳܪܝܳܐ: ܘܶܐܡܰܪ ܐܶܪܰܡܝܳܐ ܢܦܰܩ: ܘܶܐܡܰܪ ܡܰܠܟܳܐ ܐܰܝܟܰܢܳܐ ܢܦܰܩ: ܘܶܐܡܰܪ ܕܒܺܐܝܕܰܘ̈ܗܝ ܕܡܰܠܟܳܐ ܕܒܳܒܶܠ ܬܶܫܬܠܶܡ.
18 ܘܶܐܡܰܪ ܐܶܪܰܡܝܳܐ ܠܡܰܠܟܳܐ ܨܶܕܰܩܝܳܐ: ܡܳܢܳܐ ܚܛܺܝ݀ܬ ܠܳܟ ܘܰܠܥܰܒ̈ܕܰܝܟ ܘܰܠܥܰܡܳܐ ܗܳܢܳܐ: ܕܰܐܪܡܺܝܬܽܘܢܳܢܝ ܒܶܝܬ ܐܰܣܺܝܖ̈ܶܐ.
19 ܘܰܐܝܟܳܐ ܐܶܢܽܘܢ ܢܺܒܝܰܝ̈ܟܽܘܢ ܕܡܶܬܢܰܒܶܝܢ ܗ̱ܘܰܘ ܠܟܽܘܢ ܘܳܐܡܪܺܝܢ: ܕܠܳܐ ܐܳܬܶܐ ܡܰܠܟܳܐ ܕܒܳܒܶܠ ܥܠܰܝܟܽܘܢ ܘܥܰܠ ܐܰܪܥܳܐ ܗܳܕܶܐ.
20 ܗܳܫܳܐ ܫܡܰܥܰܝܢܝ ܡܳܪܝ ܡܰܠܟܳܐ: ܘܬܶܦܶܠ ܒܳܥܽܘܬܝ ܩܕܳܡܰܝܟ: ܘܠܳܐ ܬܰܗܦܟܰܢܝ ܠܒܶܝܬ ܝܽܘܢܳܬܳܢ ܣܳܦܪܳܐ ܕܠܳܐ ܐܶܡܽܘܬ ܬܰܡܳܢ.
21 ܘܰܦܩܰܕ ܡܰܠܟܳܐ ܨܶܕܰܩܝܳܐ: ܘܫܰܒܩܽܘܗܝ ܠܶܐܪܰܡܝܳܐ ܢܒܺܝܳܐ ܒܕܳܪܬܳܐ ܕܒܶܝܬ ܐܰܣܺܝܖ̈ܶܐ: ܘܝܳܗܒܺܝܢ ܗ̱ܘܰܘ ܠܶܗ ܓܪܺܝܨܬܳܐ ܕܠܰܚܡܳܐ ܒܝܰܘܡܳܐ ܡܶܢ ܫܽܘܩܳܐ ܕܢܰܚܬܽܘܡܳܐ: ܥܕܰܡܳܐ ܕܰܓܡܰܪ ܟܽܠܶܗ ܠܰܚܡܳܐ ܡܶܢ ܩܪܺܝܬܳܐ: ܘܺܝܬܶܒ ܐܶܪܰܡܝܳܐ ܒܕܳܪܬܳܐ ܕܒܶܝܬ ܐܰܣܺܝܖ̈ܶܐ.