Jeremiah 3
The Book of Jeremiah
܀ ܐܪܡܝܐ ܓ ܀
1 ܐܶܢ ܢܶܫܒܽܘܩ ܓܰܒܪܳܐ ܐܰܢ̱ܬܬܶܗ: ܘܬܺܐܙܰܠ ܡܶܢ ܠܘܳܬܶܗ ܘܬܶܗܘܶܐ ܠܓܰܒܪܳܐ ܐ̱ܚܪܺܢܳܐ: ܐܶܢ ܡܶܬܦܢܶܐ ܠܘܳܬܳܗ̇ ܬܽܘܒ: ܗܳܐ ܡܶܬܛܰܢܳܦܽܘ ܬܶܬܛܰܢܰܦ ܐܰܪܥܳܐ ܗܳܝ. ܘܰܐܢ̱ܬܝ ܙܰܢܺܝܬܝ ܒܖ̈ܳܥܰܘܳܬܳܐ ܣܰܓܺܝ̈ܐܶܐ: ܬܽܘܒܝ ܠܘܳܬܝ. ܐܳܡܰܪ ܡܳܪܝܳܐ.
2 ܐܰܪܺܝܡܝ ܥܰܝܢܰܝ̈ܟܝ ܥܰܠ ܫܒܺܝ̈ܠܶܐ܆ ܘܰܚܙܳܝ ܐܰܝܟܳܐ ܠܳܐ ܐܶܬܛܰܢܰܦܬܝ: ܥܰܠ ܐܽܘܖ̈ܚܳܬܳܐ ܝܺܬܶܒܬܝ ܠܗܽܘܢ ܐܰܝܟ ܢܰܥܒܳܐ ܒܡܰܕܒܪܳܐ: ܘܛܰܢܶܦـܬܝ ܐܰܪܥܳܐ ܒܙܳܢܝܽܘܬܶܟܝ.
3 ܘܰܒܒܺܝܫܽܘܬܶܟܝ ܐܶܬܟܠܺܝܘ ܖ̈ܣܺܝܣܶܐ: ܘܰܪܒܺܝܥܳܐ ܠܳܐ ܗܘܳܐ: ܘܒܶܝܬ ܥܰܝ̈ܢܶܐ ܕܰܐܢ̱ܬܬܳܐ ܙܳܢܺܝܬܳܐ ܗܘܳܐ ܠܶܟܝ: ܘܠܳܐ ܨܒܰܝܬܝ ܠܡܶܬܬܟܳܣܽܘ.
4 ܗܳܐ ܡܶܟܺܝܠ ܩܳܪܝܳܐ ܐܰܢ̱ܬܝ ܠܺܝ: ܐܳܒܝ: ܘܰܡܪܰܒܝܳܢܝ ܕܡܶܢ ܛܰܠܝܽܘܬܝ ܐܰܢ̱ܬ.
5 ܕܰܠܡܳܐ ܢܶܬܢܛܰܪ ܠܥܳܠܰܡ: ܐܰܘ ܢܶܬܢܛܰܪ ܠܥܳܠܡܺܝܢ: ܗܳܐ ܡ̣ܰܠܶܠܬܝ ܘܰܥ̣ܒܰܕܬܝ ܒܺܝܫܬܳܐ ܘܶܐܬܚܰܝܰܠܬܝ.
6 ܘܶܐܡܰܪ ܠܺܝ ܡܳܪܝܳܐ ܒܝܰܘܡܰܘ̈ܗܝ ܕܝܽܘܫܺܝܳܐ ܡܰܠܟܳܐ: ܚ̣ܙܰܝܬ ܡܶܕܶܡ ܕܥ̣ܶܒܕܰܬ ܥܳܡܽܘܪܬܳܐ ܕܺܝܣܪܳܐܶܝܠ: ܐܶܙܰܠܬ ܗܺܝ ܠܟܽܠ ܛܽܘܪ ܕܪܳܡ: ܘܰܬܚܶܝܬ ܟܽܠ ܐܺܝܠܳܢ ܕܥܰܒܺܝܛ: ܘܙܰܢܝܰܬ ܬܰܡܳܢ.
7 ܘܶܐܡܪܶܬ ܡܶܢ ܒܳܬܰܪ ܕܥܶܒܕܰܬ ܗܳܠܶܝܢ ܟܽܠܗܶܝܢ: ܕܬܽܘܒܝ ܠܘܳܬܝ ܘܠܳܐ ܬܳܒܰܬ: ܘܰܚܙܳܬ ܫܽܘܩܪܳܗ̇ ܚܳܬܳܗ̇ ܝܺܗܽܘܕܳܐ.
8 ܘܰܚܙܳܬ ܟܽܠܗܶܝܢ ܨܶܒ̈ܘܳܬܳܗ̇. ܘܥܰܠ ܕܓܳܪܰܬ ܥܳܡܽܘܪܬܳܐ ܕܺܝܣܪܳܐܶܝܠ ܫܒܰܩܬܳܗ̇: ܘܝܶܗܒܶܬ ܠܳܗ̇ ܟܬܳܒܳܐ ܕܫܽܘܒܩܳܢܳܐ: ܘܠܳܐ ܕܶܚܠܰܬ ܫܰܩܳܪܬܳܐ ܚܳܬܳܗ̇ ܝܺܗܽܘܕܳܐ: ܘܶܐܙܰܠ̱ܬ ܘܙܰܢܝܰܬ ܐܳܦ ܗܺܝ.
9 ܘܡܶܛܽܠ ܕܙܰܠܺܝܠܳܐ ܗ̱ܘܳܬ ܙܳܢܝܽܘܬܳܗ̇ ܛܰܢܦܰܬ ܐܰܪܥܳܐ: ܘܓܳܪܰܬ ܒܟܺܐܦ̈ܶܐ ܘܰܒܩܰܝ̈ܣܶܐ.
10 ܘܳܐܦ ܡܶܢ ܒܳܬܰܪ ܗܳܠܶܝܢ ܟܽܠܗܶܝܢ: ܠܳܐ ܬܳܒܰܬ ܠܘܳܬܝ ܫܰܩܳܪܬܳܐ ܚܳܬܳܗ̇ ܝܺܗܽܘܕܳܐ ܡܶܢ ܟܽܠܶܗ ܠܶܒܳܗ̇: ܐܶܠܳܐ ܐܶܢ ܒܕܰܓܳܠܽܘܬܳܐ ܐܳܡܰܪ ܡܳܪܝܳܐ.
11 ܘܶܐܡܰܪ ܠܺܝ ܡܳܪܝܳܐ: ܙܰܕܩܰܬ ܢܰܦܫܳܗ̇ ܥܳܡܽܘܪܬܳܐ ܕܺܝܣܪܳܐܶܝܠ: ܡܶܢ ܫܰܩܳܪܬܳܐ ܚܳܬܳܗ̇ ܝܺܗܽܘܕܳܐ.
12 ܙܶܠ ܘܰܐܟܪܶܙ ܦܶܬܓܳܡ̈ܶܐ ܗܳܠܶܝܢ ܒܓܰܪܒܝܳܐ: ܘܶܐܡܰܪ: ܬܽܘܒܝ ܥܳܡܽܘܪܬܳܐ ܕܺܝܣܪܳܐܶܝܠ ܐܳܡܰܪ ܡܳܪܝܳܐ: ܘܠܳܐ ܐܶܩܰܫܶܐ ܐܰܦܰܝ̈ ܒܟܽܘܢ: ܡܶܛܽܠ ܕܛܳܒ ܐ̱ܢܳܐ ܐܳܡܰܪ ܡܳܪܝܳܐ: ܘܠܳܐ ܐܳܠܶܡ ܐ̱ܢܳܐ ܠܥܳܠܰܡ.
13 ܒܪܰܡ ܕܰܥܝ ܚܛܳܗܰܝ̈ܟܝ: ܕܰܒܡܳܪܝܳܐ ܐܰܠܳܗܶܟܝ ܚ̣ܛܰܝܬܝ. ܘܒܰܕܰܪܬܝ ܐܽܘܖ̈ܚܳܬܶܟܝ ܠܢܽܘܟܖ̈ܳܝܶܐ ܬܚܶܝܬ ܟܽܠ ܐܺܝܠܳܢ ܕܥܰܒܺܝܛ: ܘܰܒܩܳܠܝ ܠܳܐ ܫܡܰܥܬܽܘܢ ܐܳܡܰܪ ܡܳܪܝܳܐ.
14 ܬܽܘܒܘ ܒ̈ܢܰܝܳܐ ܬܰܝܳܒ̈ܶܐ ܐܳܡܰܪ ܡܳܪܝܳܐ: ܕܶܐܢܳܐ ܨܒܺܝܬ ܒܟܽܘܢ: ܘܰܕܒܰܪܬܟܽܘܢ ܚܰܕ ܡܶܢ ܩܪܺܝܬܳܐ: ܘܰܬܪܶܝܢ ܡܶܢ ܫܰܪܒܬܳܐ: ܘܰܐܝܬܺܝܬܟܽܘܢ ܠܨܶܗܝܽܘܢ.
15 ܘܶܐܬܶܠ ܠܟܽܘܢ ܖ̈ܳܥܰܘܳܬܳܐ ܐܰܝܟ ܠܶܒܝ: ܘܢܶܪܥܽܘܢܳܟܽܘܢ ܒܺܝܕܰܥܬܳܐ ܘܰܒܣܽܘܟܳܠܳܐ.
16 ܘܢܶܗܘܶܐ ܟܰܕ ܬܶܦܪܽܘܢ ܘܬܶܣܓܽܘܢ ܒܰܐܪܥܳܐ: ܒܝܰܘ̈ܡܳܬܳܐ ܗܳܢܽܘܢ ܐܳܡܰܪ ܡܳܪܝܳܐ: ܠܳܐ ܢܺܐܡܪܽܘܢ ܬܽܘܒ ܩܺܒܽܘܬܳܐ ܕܕܺܝܰܬܺܩܺܐ ܕܡܳܪܝܳܐ: ܘܠܳܐ ܬܶܣܰܩ ܥܰܠ ܠܶܒܳܐ: ܘܠܳܐ ܢܶܬܕܰܟܪܽܘܢܳܗ̇ ܘܠܳܐ ܢܶܦܩܕܽܘܢܳܗ̇: ܘܠܳܐ ܬܶܬܥܒܶܕ ܬܽܘܒ.
17 ܒܶܗ ܒܙܰܒܢܳܐ ܗܰܘ: ܢܶܩܪܽܘܢܳܗ̇ ܠܽܐܘܪܺܫܠܶܡ ܟܽܘܪܣܝܶܗ ܕܡܳܪܝܳܐ: ܘܰܢܣܰܟܽܘܢ ܟܽܠܗܽܘܢ ܥܰܡ̈ܡܶܐ ܠܰܫܡܶܗ ܕܡܳܪܝܳܐ: ܘܠܳܐ ܢܺܐܙܽܠܘܢ ܬܽܘܒ ܒܳܬܰܪ ܨܶܒܝܳܢܰܝ̈ ܠܶܒܗܽܘܢ ܒܺܝܫܳܐ.
18 ܒܝܰܘ̈ܡܳܬܳܐ ܗܳܢܽܘܢ: ܢܺܐܙܽܠܘܢ ܕܒܶܝܬ ܝܺܗܽܘܕܳܐ ܥܰܡ ܕܒܶܝܬ ܝܺܣܪܳܐܶܝܠ: ܘܢܺܐܬܽܘܢ ܐܰܟܚܕܳܐ ܡܶܢ ܐܰܪܥܳܐ ܕܓܰܪܒܝܳܐ: ܠܰܐܪܥܳܐ ܕܰܐܘܪܬܶܬ ܠܰܐܒܳܗܰܝ̈ܗܽܘܢ.
19 ܘܶܐ̱ܢܳܐ ܐܶܡܪܶܬ ܕܶܐܚܫܒܳܟ ܒܰܒ̈ܢܰܝܳܐ: ܘܶܐܬܶܠ ܠܳܟ ܐܰܪܥܳܐ ܓܒܺܝܬܳܐ ܘܝܳܪܬܽܘܬܳܐ ܕܚܰܝ̈ܠܶܐ ܕܚܰܝ̈ܠܘܳܬܐ ܕܥܰܡ̈ܡܶܐ: ܘܶܐܡܪܶܬ ܐܳܒܝ ܬܶܩܪܽܘܢܳܢܝ: ܘܡܶܢ ܒܳܬܰܪܝ ܠܳܐ ܬܶܗܦܟܽܘܢ.
20 ܫܰܪܺܝܪܳܐܺܝܬ ܐܰܝܟ ܕܰܡܕܰܓܠܳܐ ܐܰܢ̱ܬܬܳܐ ܒܚܰܒܪܳܗ̇: ܗܳܟܰܢܳܐ ܕܰܓܶܠܘ ܒܺܝ ܒܢܰܝ̈ ܝܺܣܪܳܐܶܝܠ: ܐܳܡܰܪ ܡܳܪܝܳܐ.
21 ܩܳܠܳܐ ܥܰܠ ܫܒܺܝ̈ܠܶܐ ܐܶܫܬܡܰܥ: ܒܟܳܬܳܐ ܘܒܳܥܽܘܬܳܐ ܕܒܶܝܬ ܝܺܣܪܳܐܶܝܠ: ܕܥܰܩܶܡܘ ܐܽܘܖ̈ܚܳܬܗܽܘܢ: ܘܰܛܥܰܘ ܠܡܳܪܝܳܐ ܐܰܠܳܗܗܽܘܢ.
22 ܬܽܘܒܘ ܒ̈ܢܰܝܳܐ ܬܰܝܳܒ̈ܶܐ: ܘܰܐܣܶܐ ܬܝܳܒܽܘܬܟܽܘܢ: ܘܶܐܡܰܪܘ ܗܶܢܽܘܢ ܗܳܐ ܚܢܰܢ ܕܺܝܠܳܟ: ܡܶܛܽܠ ܕܰܐܢ̱ܬ ܗ̱ܘ ܡܳܪܝܳܐ ܐܰܠܳܗܰܢ.
23 ܫܰܪܺܝܪܳܐܺܝܬ ܠܕܰܓܳܠܽܘܬܳܐ. ܖ̈ܳܡܳܬܳܐ ܘܥܽܘܫܢܳܐ ܕܛܽܘܖ̈ܶܐ: ܫܰܪܺܝܪܳܐܺܝܬ ܒܡܳܪܝܳܐ ܐܰܠܳܗܰܢ ܦܽܘܪܩܳܢܶܗ ܕܺܝܣܪܳܐܶܝܠ.
24 ܘܒܶܗܬܬܳܐ ܐܶܟܠܰܬ ܠܶܐܘܰܬ ܐܰܒܳܗܰܝ̈ܢ ܡܶܢ ܛܰܠܝܽܘܬܗܽܘܢ: ܘܰܠܥܳܢ̈ܗܽܘܢ: ܘܰܠܬܰܘܖ̈ܰܝܗܽܘܢ: ܘܠܰܒܢܰܝ̈ܗܽܘܢ: ܘܠܰܒ̈ܢܳܬܗܽܘܢ.
25 ܢܶܕܡܰܟ ܒܒܶܗܬܬܰܢ: ܘܰܢܟܰܣܶܝܢ ܚܶܦܪܰܢ ܡܶܛܽܠ ܕܰܠܡܳܪܝܳܐ ܐܰܠܳܗܰܢ ܚܛܰܝܢ: ܚܢܰܢ ܘܰܐܒܳܗܰܝ̈ܢ ܡܶܢ ܛܰܠܝܽܘܬܰܢ ܘܰܥܕܰܡܳܐ ܠܝܰܘܡܳܢܳܐ: ܘܠܳܐ ܫܡܰܥܢ ܒܩܳܠܶܗ ܕܡܳܪܝܳܐ ܐܰܠܳܗܰܢ.