Jeremiah 13
The Book of Jeremiah
܀ ܐܪܡܝܐ ܝܓ ܀
1 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ ܙܶܠ ܙܒܶܢ ܠܳܟ ܣܽܘܕܳܪܳܐ ܕܟܶܬܳܢܳܐ ܘܰܐܣܽܘܪܳܝܗܝ ܒܚܰܨܰܝ̈ܟ: ܘܰܒܡܰܝ̈ܳܐ ܠܳܐ ܬܶܨܒܥܺܝܘܗܝ.
2 ܘܙܶܒܢܶ݀ܬ ܣܽܘܕܳܪܳܐ: ܐܰܝܟ ܦܶܬܓܳܡܶܗ ܕܡܳܪܝܳܐ ܘܶܐܣܪܶܬ ܒܚܰܨܰܝ̈.
3 ܘܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܕܬܰܪܬܶܝܢ ܙܰܒ̈ܢܺܝܢ: ܘܶܐܡܰܪ ܠܺܝ.
4 ܣܰܒ ܣܽܘܕܳܪܳܐ ܕܰܙܒ̣ܰܢܬ ܕܰܒܚܰܨܰܝ̈ܟ: ܘܩܽܘܡ ܙܶܠ ܠܰܦܪܳܬ: ܘܰܛܡܽܘܪܳܝܗܝ ܬܰܡܳܢ ܒܨܶܪܝܳܐ ܕܟܺܐܦܳܐ.
5 ܘܶܐܙܶܠ̱ܬ ܘܰܛܡܰܪܬܶܗ ܒܰܦܪܳܬ ܐܰܝܟ ܕܦܰܩܕܰܢܝ ܡܳܪܝܳܐ.
6 ܘܡܶܢ ܒܳܬܰܪ ܝܰܘ̈ܡܳܬܳܐ ܣܰܓܺܝ̈ܐܶܐ ܐܶܡܰܪ ܠܺܝ ܡܳܪܝܳܐ: ܩܽܘܡ ܙܶܠ ܠܰܦܪܳܬ: ܘܣ̣ܰܒ ܡܶܢ ܬܰܡܳܢ ܣܽܘܕܳܪܳܐ ܕܦܰܩܶܕܬܳܟ ܕܬܶܛܡܪܺܝܘܗܝ ܬܰܡܳܢ.
7 ܘܶܐܙܶܠ̱ܬ ܠܰܦܪܳܬ: ܘܚܶܦܪܶܬ ܘܰܢܣܰܒܬܶܗ ܠܣܽܘܕܳܪܳܐ ܡܶܢ ܟܰܪ ܕܰܛܡܰܪܬܶܗ: ܘܗܳܐ ܐܶܬܚܰܒܶܠ ܣܽܘܕܳܪܳܐ: ܘܰܠܡܶܕܶܡ ܠܳܐ ܟܳܫܰܪ.
8 ܘܰܗܘܳܐ ܦܶܬܓܳܡܶܗ ܕܡܳܪܝܳܐ ܥܠܰܝ: ܘܶܐܡܰܪ.
9 ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܗܳܟܰܢܳܐ ܐܶܚܰܒܶܠ ܠܰܓ̈ܐܰܝܳܐ ܕܺܝܗܽܘܕܳܐ: ܘܠܰܓ̈ܐܰܝܳܐ ܕܽܐܘܪܺܫܠܶܡ ܣܰܓܺܝ̈ܐܶܐ.
10 ܥܰܡܳܐ ܗܳܢܳܐ ܒܺܝܫܳܐ ܕܠܳܐ ܨܒ̣ܰܘ ܠܡܶܫܡܰܥ ܦܶܬܓܳܡܰܝ̈: ܕܰܡܗܰܠܟܺܝܢ ܒܨܶܒܝܳܢܳܐ ܕܠܶܒܗܽܘܢ: ܘܶܐܙܰܠܘ ܒܳܬܰܪ ܐܰܠܳܗ̈ܶܐ ܐ̱ܚܖ̈ܳܢܶܐ: ܠܡܶܦܠܰܚ ܐܶܢܽܘܢ: ܘܰܠܡܶܣܓܰܕ ܠܗܽܘܢ܆ ܢܶܗܘܽܘܢ ܐܰܝܟ ܣܽܘܕܳܪܳܐ ܗܳܢܳܐ ܕܰܠܡܶܕܶܡ ܠܳܐ ܟܳܫܰܪ.
11 ܡܶܛܽܠ ܕܰܐܝܟܰܢܳܐ ܕܢܳܩܶܦ ܣܽܘܕܳܪܳܐ ܠܚܰܨܰܘ̈ܗܝ ܕܓܰܒܪܳܐ: ܗܳܟܰܢܳܐ ܐܰܩܦܶܬ ܠܺܝ ܠܟܽܠܶܗ ܒܶܝܬ ܝܺܣܪܳܐܶܝܠ: ܘܰܠܟܽܠܶܗ ܒܶܝܬ ܝܺܗܽܘܕܳܐ ܐܳܡܰܪ ܡܳܪܝܳܐ: ܕܢܶܗܘܽܘܢ ܠܺܝ ܥܰܡܳܐ: ܘܠܰܫܡܳܐ: ܘܠܺܐܝܩܳܪܳܐ: ܘܰܠܬܶܫܒܽܘܚܬܳܐ: ܘܠܳܐ ܫܡܰܥܘ.
12 ܘܶܐܡܰܪ ܠܗܽܘܢ ܦܶܬܓܳܡܳܐ ܗܳܢܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܟܽܠ ܓܪܳܒ ܢܶܬܡܠܶܐ ܚܰܡܪܳܐ: ܗܳܐ ܐܳܡܪܺܝܢ ܠܳܟ: ܡܶܕܰܥ ܓܶܝܪ ܠܳܐ ܝܳܕܥܺܝܢܢ ܕܟܽܠܗܽܘܢ ܓܖ̈ܳܒܶܐ ܡܶܬܡܠܶܝܢ ܚܰܡܪܳܐ.
13 ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܝܳܐ: ܗܳܐ ܡܳܠܶܐ ܐ̱ܢܳܐ ܠܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ ܗܳܕܶܐ: ܘܰܠܡܰܠ̈ܟܶܐ ܕܝܳܬܒܺܝܢ ܥܰܠ ܟܽܘܪܣܝܶܗ ܕܕܰܘܺܝܕ: ܘܰܠܟܳܗ̈ܢܶܐ ܘܠܰܢܒܺܝ̈ܶܐ: ܘܰܠܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܪܰܘܳܝܽܘܬܳܐ.
14 ܘܶܐܒܰܕܰܪ ܐܶܢܽܘܢ ܓܒܰܪ ܡܶܢ ܠܘܳܬ ܐܰܚܽܘܗܝ: ܘܰܐܒܳܗ̈ܶܐ ܘܰܒܢܰܝ̈ܳܐ ܐܰܟܚܕܳܐ ܐܳܡܰܪ ܡܳܪܝܳܐ: ܠܳܐ ܐܶܪܰܚܶܡ ܘܠܳܐ ܐܶܪܰܚܶܦ: ܘܠܳܐ ܐܶܚܽܘܣ ܠܰܡܚܰܒܳܠܽܘ ܐܶܢܽܘܢ.
15 ܫܡܰܥܘ ܘܨܽܘܬܘ ܘܠܳܐ ܬܶܬܪܺܝܡܽܘܢ: ܡܶܛܽܠ ܕܡܳܪܝܳܐ ܡܰܠܶܠ.
16 ܗܰܒܘ ܠܡܳܪܝܳܐ ܐܰܠܳܗܟܽܘܢ ܐܺܝܩܳܪܳܐ ܥܰܕܠܳܐ ܢܶܚܫܰܟ: ܘܥܰܕܠܳܐ ܢܶܬܬܰܒܖ̈ܳܢ ܖ̈ܶܓܠܰܝܟܽܘܢ ܥܰܠ ܛܽܘܖ̈ܶܐ ܒܚܶܫܽܘܟܳܐ: ܘܰܬܣܰܟܽܘܢ ܠܢܽܘܗܪܳܐ ܘܢܶܥܒܕܺܝܘܗܝ ܚܶܫܽܘܟܳܐ ܘܛܶܠܳܠܰܝ̈ ܡܰܘܬܳܐ.
17 ܘܶܐܢ ܠܳܐ ܬܶܫܡܥܽܘܢܗ: ܡܰܛܫܝܳܐܺܝܬ ܬܶܒܟܶܐ ܢܰܦܫܝ ܡܶܢ ܩܕܳܡ ܥܳܩܬܳܐ: ܘܰܡܕܰܡܳܥܽܘ ܐܶܕܡܰܥ: ܘܢܶܫܚ̈ܠܳܢ ܥܰܝܢܰܝ̈ ܕܶܡ̈ܥܶܐ: ܥܰܠ ܕܶܐܫܬܒܺܝ ܓܙܳܪܶܗ ܕܡܳܪܝܳܐ.
18 ܐܶܡܰܪ ܠܡܰܠܟܳܐ ܘܰܠܪܰܘܖ̈ܒܳܢܶܐ: ܐܶܬܡܰܟܰܟܘ: ܘܬܽܘܒܘ: ܡܶܛܽܠ ܕܰܢܦܰܠ ܡܶܢ ܪܺܝܫܟܽܘܢ ܟܠܺܝܠܳܐ ܕܬܶܫܒܽܘܚܬܟܽܘܢ.
19 ܩܽܘܖ̈ܝܳܐ ܕܬܰܝܡܢܳܐ ܐܶܬܬܚܶܕ̈ܝ: ܘܠܰܝܬ ܕܦܳܬܰܚ: ܐܶܫܬܰܒܝܰܬ ܝܺܗܽܘܕܳܐ ܟܽܠܳܗ̇ ܫܒܺܝܬܳܐ ܫܰܠܡܬܳܐ.
20 ܐܰܪܺܝܡܘ ܥܰܝܢܰܝ̈ܟܽܘܢ ܘܰܚܙܰܘ ܠܕܳܐܬܶܝܢ ܡܶܢ ܓܰܪܒܝܳܐ: ܐܰܝܢܰܘ ܓܙܳܪܳܐ ܕܶܐܬܺܝܗܶܒ ܠܶܟܝ ܥܳܢ̈ܳܐ ܕܬܶܫܒܽܘܚܬܶܟܝ.
21 ܡܳܢܳܐ ܬܺܐܡܪܺܝܢ ܟܰܕ ܢܶܦܩܽܘܕ ܥܠܰܝܟܝ: ܘܰܐܢ̱ܬܝ ܐܰܠܶܦܬܝ ܐܶܢܽܘܢ ܝܽܘܠܦܳܢܳܐ ܕܢܶܗܘܽܘܢ ܠܰܕܝܳܫܳܐ: ܗܳܐ ܚܶܒ̈ܠܶܐ ܢܶܐܚܕܽܘܢܶܟܝ: ܐܰܝܟ ܐܰܢ̱ܬܬܳܐ ܕܰܡܚܰܒܠܳܐ ܠܡܺܐܠܰܕ.
22 ܘܶܐܢ ܬܺܐܡܪܺܝܢ ܒܠܶܒܶܟܝ ܡܶܛܽܠ ܡܳܢܳܐ ܓܕܰܫ ܠܺܝ ܗܳܠܶܝܢ: ܒܣܽܘܓܰܐܬ ܚܰܘ̈ܒܰܝܟܝ ܐܶܬܓܰܠܰܓܘ ܫܦܽܘܠܰܝ̈ܟܝ: ܘܶܐܬܓܠܺܝ̈ ܥܶܩܒܰܝ̈ܟܝ.
23 ܘܰܐܝܟ ܕܠܳܐ ܡܶܫܟܰܚ ܗܶܢܕܘܳܝܳܐ ܕܰܢܫܰܚܠܶܦ ܡܶܫܟܶܗ: ܘܢܶܡܪܳܐ ܟܳܟ̈ܠܳܬܶܗ: ܘܳܐܦ ܐܰܢ̱ܬܽܘܢ ܠܳܐ ܡܶܫܟܚܺܝܢ ܐܰܢ̱ܬܽܘܢ ܠܡܰܛܐܳܒܽܘ: ܡܶܛܽܠ ܕܺܝܠܶܦܬܽܘܢ ܒܺܝܫܬܳܐ.
24 ܘܶܐܒܰܕܰܪ ܐܶܢܽܘܢ ܐܰܝܟ ܓܶܠܳܐ ܕܥܳܒܰܪ ܩܕܳܡ ܪܽܘܚܳܐ ܒܡܰܕܒܪܳܐ.
25 ܗܳܕܳܐ ܗ̱ܝ ܦܶܨܬܶܟܝ ܘܰܡܢܳܬܳܐ ܕܝܳܪܬܽܘܬܶܟܝ ܡܶܢ ܩܕܳܡܝ ܐܳܡܰܪ ܡܳܪܝܳܐ: ܥܰܠ ܕܰܛܥܰܝܬܺܝܢܝ ܘܶܐܬܬܟܶܠܬܝ ܥܰܠ ܫܽܘܩܪܳܐ.
26 ܘܳܐܦ ܐ̱ܢܳܐ ܐܶܓܰܠܶܓ ܫܦܽܘܠܰܝ̈ܟܝ ܘܰܐܪܡܶܐ ܥܰܠ ܐܰܦܰܝ̈ܟܝ: ܘܢܶܬܚܙܶܐ ܨܰܥܪܶܟܝ.
27 ܘܓܰܘܪܶܟܝ: ܘܰܨܗܳܠܶܟܝ: ܘܙܳܢܝܽܘܬܳܐ ܕܙܳܢܝܽܘܬܶܟܝ: ܥܰܠ ܖ̈ܳܡܳܬܳܐ ܒܡܰܕܒܪܳܐ ܚܙܺܝ݀ܬ ܛܰܢܦܽܘܬܶܟܝ: ܘܳܝ ܠܶܟܝ ܐܽܘܪܺܫܠܶܡ ܕܠܳܐ ܬܶܬܕܰܟܶܝܢ: ܥܕܰܡܳܐ ܠܶܐܡܰܬܝ: ܬܽܘܒܝ.