Jeremiah 38
The Book of Jeremiah
܀ ܐܪܡܝܐ ܠܚ ܀
1 ܘܰܫܡܰܥ ܫܦܰܛܝܳܐ ܒܰܪ ܡܳܬܳܢ: ܘܓܰܕܠܝܳܐ ܒܰܪ ܦܰܫܚܽܘܪ: ܘܝܽܘܒܳܠ ܒܰܪ ܫܠܰܡܝܳܐ: ܘܦܰܫܚܽܘܪ ܒܰܪ ܡܠܰܟܝܳܐ: ܦܶܬܓܳܡ̈ܶܐ ܕܶܐܡܰܪ ܐܶܪܰܡܝܳܐ ܠܟܽܠܶܗ ܥܰܡܳܐ.
2 ܗܳܟܰܢܳܐ ܐܳܡܰܪ ܡܳܪܝܳܐ: ܡܰܢ ܕܝܳܬܶܒ ܒܰܩܪܺܝܬܳܐ ܗܳܕܶܐ: ܢܡܽܘܬ ܒܚܰܪܒܳܐ: ܘܰܒܟܰܦܢܳܐ: ܘܰܒܡܰܘܬܳܢܳܐ: ܘܡܰܢ ܕܢܳܦܶܩ ܠܘܳܬ ܟܰܠܕܳܝ̈ܶܐ: ܚܳܝܶܐ ܘܰܡܫܰܘܙܶܒ ܢܰܦܫܶܗ.
3 ܗܳܟܰܢܳܐ ܐܳܡܰܪ ܡܳܪܝܳܐ: ܬܶܫܬܠܶܡ ܩܪܺܝܬܳܐ ܗܳܕܶܐ ܒܺܐܝܕܳܐ ܕܚܰܝܠܶܗ ܕܡܰܠܟܳܐ ܕܒܳܒܶܠ: ܘܢܶܟܒܫܺܝܗ̇.
4 ܘܶܐܡܰܪܘ ܪܰܘܖ̈ܒܳܢܶܐ ܠܡܰܠܟܳܐ: ܢܶܬܩܛܶܠ ܓܰܒܪܳܐ ܗܳܢܳܐ: ܡܶܛܽܠ ܕܗܽܘܝܽܘ ܡܪܰܦܶܐ ܐܺܝܕܰܝ̈ܳܐ ܕܓܰܒܖ̈ܶܐ ܥܳܒ̈ܕܰܝ ܩܪܳܒܳܐ ܕܶܐܫܬܚܰܪܘ ܒܰܩܪܺܝܬܳܐ ܗܳܕܶܐ: ܘܺܐܝܕܰܝ̈ܳܐ ܕܟܽܠܶܗ ܥܰܡܳܐ ܕܶܐܡܰܪ ܠܗܽܘܢ ܦܶܬܓܳܡܳܐ ܗܳܢܳܐ: ܡܶܛܽܠ ܕܓܰܒܪܳܐ ܗܳܢܳܐ: ܠܳܐ ܨܳܒܶܐ ܫܠܳܡܳܐ ܠܥܰܡܳܐ ܗܳܢܳܐ: ܐܶܠܳܐ ܐܶܢ ܒܺܝܫܬܳܐ.
5 ܘܶܐܡܰܪ ܡܰܠܟܳܐ ܨܶܕܰܩܝܳܐ: ܗܳܐ ܡܰܫܠܰܡ ܒܺܐܝ̈ܕܰܝܟܽܘܢ: ܡܶܛܽܠ ܕܡܰܠܟܳܐ ܠܳܐ ܡܶܫܟܰܚ ܠܡܺܐܡܰܪ ܠܟܽܘܢ ܡܶܕܶܡ.
6 ܘܕܰܒܪܽܘܗܝ ܠܶܐܪܰܡܝܳܐ: ܘܰܐܪܡܝܽܘܗܝ ܒܓܽܘܒܳܐ ܕܡܰܠܟܝܳܐ ܒܰܪ ܡܰܠܟܳܐ ܒܕܳܪܬܳܐ ܕܒܶܝܬ ܐܰܣܺܝܖ̈ܶܐ: ܘܫܰܒܽܘܗܝ ܠܶܐܪܰܡܝܳܐ ܒܚܰܒܠܳܐ ܠܓܽܘܒܳܐ: ܘܰܒܓܽܘܒܳܐ ܠܰܝܬ ܡܰܝ̈ܳܐ ܐܶܠܳܐ ܐܶܢ ܣܝܳܢܳܐ: ܘܰܛܒܰܥ ܐܶܪܰܡܝܳܐ ܒܰܣܝܳܢܳܐ.
7 ܘܰܫܡܰܥ ܥܰܒܕܡܰܠܟ ܟܽܘܫܳܝܳܐ ܓܰܒܪܳܐ ܡܗܰܝܡܳܢܳܐ: ܘܗܽܘ ܒܒܶܝܬ ܡܰܠܟܳܐ ܗ̱ܘܳܐ: ܕܰܐܪܡܝܽܘܗܝ ܠܶܐܪܰܡܝܳܐ ܒܓܽܘܒܳܐ: ܘܡܰܠܟܳܐ ܝܳܬܶܒ ܗ̱ܘܳܐ ܒܬܰܪܥܳܐ ܕܒܶܢܝܳܡܶܝܢ.
8 ܘܰܢܦܰܩ ܥܒܰܕܡܠܰܟ ܡܶܢ ܒܶܝܬ ܡܰܠܟܳܐ: ܘܶܐܡܰܪ ܠܡܰܠܟܳܐ.
9 ܡܳܪܝ ܒܺܝܫ ܥܒܰܕܘ ܓܰܒܖ̈ܶܐ ܗܳܠܶܝܢ: ܡܶܕܶܡ ܕܰܥܒܰܕܘ ܠܶܐܪܰܡܝܳܐ ܢܒܺܝܳܐ: ܕܰܐܪܡܝܽܘܗܝ ܒܓܽܘܒܳܐ: ܘܗܳܐ ܡܳܐܶܬ ܠܟܰܦܢܳܐ: ܡܶܛܽܠ ܕܠܰܝܬ ܠܰܚܡܳܐ ܒܰܩܪܺܝܬܳܐ.
10 ܘܰܦܩܰܕ ܡܰܠܟܳܐ ܠܥܰܒܕܡܠܰܟ ܟܽܘܫܳܝܳܐ: ܘܶܐܡܰܪ ܠܶܗ: ܕܒܰܪ ܥܰܡܳܟ ܡܶܟܳܐ ܬܠܳܬܺܝܢ ܓܰܒܖ̈ܺܝܢ: ܘܙܶܠ ܐܰܣܶܩܳܝܗܝ ܠܶܐܪܰܡܝܳܐ ܡܶܢ ܓܽܘܒܳܐ ܥܰܕܠܳܐ ܢܡܽܘܬ.
11 ܘܰܕܒܰܪ ܥܒܰܕܡܠܰܟ ܟܽܘܫܳܝܳܐ ܓܰܒܖ̈ܶܐ ܡܶܢ ܒܶܝܬ ܡܰܠܟܳܐ ܥܰܡܶܗ: ܘܥ̣ܰܠ ܠܒܶܝܬ ܓܰܙܳܐ ܕܰܠܬܰܚܬ ܡܶܢ ܒܶܝܬ ܡܰܠܟܳܐ: ܘܰܢܣܰܒ ܡܶܢ ܬܰܡܳܢ ܒܠܳܝ̈ܶܐ ܕܰܣܚ̈ܰܘܳܬܳܐ: ܘܰܒܠܳܝ̈ܶܐ ܕܖ̈ܽܘܩܥܶܐ: ܘܫܰܒ ܐܶܢܽܘܢ ܠܶܐܪܰܡܝܳܐ ܒܚܰܒܠܳܐ ܠܓܽܘܒܳܐ.
12 ܘܶܐܡܰܪ ܥܒܰܕܡܠܰܟ ܟܽܘܫܳܝܳܐ ܠܶܐܪܰܡܝܳܐ: ܒܠܳܝ̈ܶܐ ܕܰܣܚ̈ܰܘܳܬܳܐ ܘܰܕܖ̈ܽܘܩܥܶܐ: ܣܺܝܡ ܬܚܶܝܬ ܫܰܚܘ̈ܳܬܳܟ ܠܬܰܚܬ ܡܶܢ ܚܰܒܠܳܐ: ܘܰܥܒܰܕ ܐܶܪܰܡܝܳܐ ܗܳܟܰܢܳܐ.
13 ܘܢܰܓܕܽܘܗܝ ܠܶܐܪܰܡܝܳܐ ܒܚܰܒܠܳܐ: ܘܰܐܣܩܽܘܗܝ ܡܶܢ ܓܽܘܒܳܐ: ܘܺܝܬܶܒ ܐܶܪܰܡܝܳܐ ܒܕܳܪܬܳܐ ܕܒܶܝܬ ܐܰܣܺܝܖ̈ܶܐ.
14 ܘܫܰܕܰܪ ܡܰܠܟܳܐ ܨܶܕܰܩܝܳܐ: ܘܕܰܒܪܶܗ ܠܶܐܪܰܡܝܳܐ ܢܒܺܝܳܐ ܠܘܳܬܶܗ: ܠܓܰܘ ܡܶܢ ܬܠܳܬܳܐ ܡܰܥܠܳܢܺܝ̈ܢ ܕܒܰܝܬܶܗ ܕܡܳܪܝܳܐ: ܘܶܐܡܰܪ ܡܰܠܟܳܐ ܠܶܐܪܰܡܝܳܐ: ܫܳܐܶܠ ܐ̱ܢܳܐ ܠܳܟ ܡܶܠܬܳܐ: ܠܳܐ ܬܟܰܣܶܐ ܡܶܢܝ ܡܶܠܬܳܐ.
15 ܘܶܐܡܰܪ ܐܶܪܰܡܝܳܐ ܠܨܶܕܰܩܝܳܐ: ܐܶܢ ܡܚܰܘܶܐ ܐ̱ܢܳܐ ܠܳܟ ܗܳܐ ܩܳܛܶܠ ܐܰܢ̱ܬ ܠܺܝ: ܘܶܐܢ ܡܳܠܶܟ ܐ̱ܢܳܐ ܠܳܟ ܠܳܐ ܫܳܡܰܥ ܐܰܢ̱ܬ ܠܺܝ.
16 ܘܺܝܡܳܐ ܡܰܠܟܳܐ ܨܶܕܰܩܝܳܐ ܠܶܐܪܰܡܝܳܐ ܡܰܛܫܝܳܐܺܝܬ ܒܒܰܝܬܳܐ: ܘܶܐܡܰܪ: ܚܰܝ ܗ̱ܘ ܡܳܪܝܳܐ ܕܰܥܒܰܕ ܒܰܢ ܢܰܦܫܳܐ ܕܠܳܐ ܐܶܩܛܠܳܟ: ܘܠܳܐ ܐܰܫܠܡܳܟ ܒܝܰܕ ܐ̱ܢܳܫ̈ܳܐ ܐܰܝܠܶܝܢ ܕܒܳܥܶܝܢ ܢܰܦܫܳܟ.
17 ܘܶܐܡܰܪ ܐܶܪܰܡܝܳܐ ܠܨܶܕܰܩܝܳܐ: ܗܳܟܰܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܐܶܢ ܬܶܦܽܘܩ ܠܘܳܬ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ: ܡܰܚܶܐ ܐܰܢ̱ܬ ܢܰܦܫܳܟ: ܘܰܩܪܺܝܬܳܐ ܗܳܕܶܐ ܠܳܐ ܝܳܩܕܳܐ ܒܢܽܘܪܳܐ: ܘܚܳܝܶܐ ܐܰܢ̱ܬ ܘܒܰܝܬܳܟ
18 ܘܶܐܢ ܠܳܐ ܢܳܦܶܩ ܐܰܢ̱ܬ ܠܘܳܬ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ: ܡܶܫܬܰܠܡܳܐ ܩܪܺܝܬܳܐ ܗܳܕܶܐ ܒܺܐܝܕܳܐ ܕܟܰܠܕܳܝ̈ܶܐ: ܘܡܰܘܩܕܺܝܢ ܠܳܗ̇ ܒܢܽܘܪܳܐ: ܘܰܐܢ̱ܬ ܠܳܐ ܬܶܬܦܰܠܰܛ ܡܶܢ ܐܺܝܕܰܝ̈ܗܽܘܢ.
19 ܘܶܐܡܰܪ ܡܰܠܟܳܐ ܨܶܕܰܩܝܳܐ ܠܶܐܪܰܡܝܳܐ: ܕܳܚܶܠ ܐ̱ܢܳܐ ܡܶܢ ܝܽܘ̈ܕܳܝܶܐ ܕܶܐܦܽܘܩ ܠܘܳܬ ܟܰܠܕܳܝ̈ܶܐ: ܕܰܠܡܳܐ ܢܰܫܠܡܽܘܢܳܢܝ ܒܺܐܝܕܰܝ̈ܗܽܘܢ ܘܰܢܒܰܙܚܽܘܢ ܒܺܝ.
20 ܘܶܐܡܰܪ ܐܶܪܰܡܝܳܐ ܠܳܐ ܡܰܫܠܡܺܝܢ ܠܳܟ: ܫܡܰܥ ܕܶܝܢ ܡܶܠܬܶܗ ܕܡܳܪܝܳܐ ܕܳܐܡܰܪ ܐ̱ܢܳܐ ܠܳܟ: ܕܢܰܛܐܶܒ ܠܳܟ: ܘܬܺܚܶܐ ܢܰܦܫܳܟ.
21 ܘܶܐܢ ܠܳܐ ܨܳܒܶܐ ܐܰܢ̱ܬ ܠܡܶܦܰܩ: ܗܳܢܰܘ ܦܶܬܓܳܡܳܐ ܕܚܰܘܝܰܢܝ ܡܳܪܝܳܐ.
22 ܕܟܽܠܗܶܝܢ ܢܶܫ̈ܶܐ ܕܶܐܫܬܚܰܖ̈ܝ ܒܒܰܝܬܶܗ ܕܡܰܠܟܳܐ ܕܺܝܗܽܘܕܳܐ: ܢܳܦ̈ܩܳܢ ܠܘܳܬ ܪܰܘܖ̈ܒܳܢܶܐ ܕܡܰܠܟܳܐ ܕܒܳܒܶܠ: ܘܗܶܢܶܝܢ ܐܳܡܖ̈ܳܢ: ܐܰܛܥܝܽܘܟ ܘܰܙܟܰܐܟ ܐ̱ܢܳܫ̈ܳܐ ܕܫܳܐܠܺܝܢ ܗ̱ܘܰܘ ܒܰܫܠܳܡܳܟ: ܘܛܰܒܰܥܘ ܒܰܣܝܳܢܳܐ ܖ̈ܶܓܠܰܝܟ ܘܰܗܦܰܟܘ ܠܶܒܣܬܰܪܗܽܘܢ.
23 ܘܟܽܠܗܶܝܢ ܢܶܫܰܝ̈ܟ ܘܰܒܢܰܝ̈ܟ ܡܰܦܩܺܝܢ ܠܘܳܬ ܟܰܠܕܳܝ̈ܶܐ: ܘܰܐܢ̱ܬ ܠܳܐ ܬܶܬܦܰܠܰܛ ܡܶܢ ܐܺܝܕܰܝ̈ܗܽܘܢ: ܐܶܠܳܐ ܒܺܐܝܕܰܘ̈ܗܝ ܕܡܰܠܟܳܐ ܕܒܳܒܶܠ ܬܶܫܬܠܶܡ: ܘܰܩܪܺܝܬܳܐ ܗܳܕܶܐ ܬܺܐܩܰܕ ܒܢܽܘܪܳܐ.
24 ܘܶܐܡܰܪ ܨܶܕܰܩܝܳܐ ܠܶܐܪܰܡܝܳܐ: ܐ̱ܢܳܫ ܠܳܐ ܢܶܕܰܥ ܒܗܳܠܶܝܢ ܡ̈ܶܠܶܐ ܕܠܳܐ ܬܡܽܘܬ.
25 ܘܟܰܕ ܢܶܫܡܥܽܘܢ ܪܰܘܖ̈ܒܳܢܶܐ ܕܡܰܠܠܶܬ ܥܰܡܳܟ: ܘܢܺܐܬܽܘܢ ܠܘܳܬܳܟ ܘܢܺܐܡܪܽܘܢ ܠܳܟ: ܚܰܘܳܢ ܡܳܢܳܐ ܡܰܠܶܠܬ ܥܰܡ ܡܰܠܟܳܐ: ܘܡܳܢܳܐ ܐܶܡܰܪ ܠܳܟ ܡܰܠܟܳܐ: ܠܳܐ ܬܟܰܣܶܐ ܡܶܢܰܢ ܕܠܳܐ ܢܶܩܛܠܳܟ.
26 ܐܶܡܰܪ ܠܗܽܘܢ: ܡܶܒܥܳܐ ܒܥܺܝ݀ܬ ܡܶܢ ܡܰܠܟܳܐ: ܕܠܳܐ ܢܰܗܦܟܰܢܝ ܠܒܶܝܬ ܝܽܘܢܳܬܳܢ ܣܳܦܪܳܐ ܕܠܳܐ ܐܶܡܽܘܬ ܬܡܶܢ.
27 ܘܶܐܬܰܘ ܟܽܠܗܽܘܢ ܪܰܘܖ̈ܒܳܢܶܐ ܠܘܳܬ ܐܶܪܰܡܝܳܐ ܘܫܰܐܠܽܘܗܝ ܘܚܰܘܺܝ ܐܶܢܽܘܢ ܟܽܠܗܶܝܢ ܡ̈ܶܠܶܐ ܕܦܰܩܕܶܗ ܡܰܠܟܳܐ ܘܰܫܬܶܩܘ ܠܗܽܘܢ ܡܶܢܶܗ: ܡܶܛܽܠ ܕܠܳܐ ܐܶܫܬܰܡܥܰܬ ܡܶܠܬܳܐ.
28 ܘܺܝܬܶܒ ܐܶܪܰܡܝܳܐ ܒܕܳܪܬܳܐ ܕܒܶܝܬ ܐܰܣܺܝܖ̈ܶܐ: ܥܕܰܡܳܐ ܠܝܰܘܡܳܐ ܕܶܐܬܟܰܒܫܰܬ ܐܽܘܪܺܫܠܶܡ.