Ezekiel 1
The Book of Ezekiel
܀ ܚܙܩܝܐܝܠ ܐ ܀
1 ܘܰܗܘܳܐ ܒܰܫܢܰܬ ܬܠܳܬܺܝܢ ܒܚܰܡܶܫܬܳܐ ܒܝܰܪܚܳܐ ܪܒܺܝܥܳܝܳܐ: ܘܶܐ̱ܢܳܐ ܒܓܰܘ ܫܒܺܝܬܳܐ ܗܘܺܝܬ: ܥܰܠ ܢܗܰܪ ܟܒܰܪ: ܘܶܐܬܦܬܰܚܘ ܫܡܰܝ̈ܳܐ: ܘܰܚܙܺܝܬ ܚܶܙܘܳܐ ܕܰܐܠܳܗܳܐ
2 ܒܚܰܡܶܫܬܳܐ ܒܝܰܪܚܳܐ: ܒܰܫܢܰܬ ܚܰܡܶܫ ܕܰܫܒܺܝܬܶܗ ܕܝܽܘܝܳܟܺܝܢ ܡܰܠܟܳܐ ܕܺܝܗܽܘܕܳܐ.
3 ܗܘܳܐ ܦܶܬܓܳܡܶܗ ܕܡܳܪܝܳܐ ܥܰܠ ܚܰܙܩܺܝܐܶܝܠ ܒܰܪ ܒܽܘܙܺܝ ܟܳܗܢܳܐ: ܒܰܐܪܥܳܐ ܕܟܰܠܕܳܝ̈ܶܐ ܥܰܠ ܢܗܰܪ ܟܒܰܪ: ܘܰܗܘܳܬ ܥܠܰܝ ܬܰܡܳܢ ܐܺܝܕܶܗ ܕܡܳܪܝܳܐ.
4 ܘܰܚܙܺܝ݀ܬ ܘܗܳܐ ܪܽܘܚܳܐ ܕܥܰܠܥܳܠܳܐ ܐܳܬܝܳܐ ܡܶܢ ܓܰܪܒܝܳܐ: ܥܢܳܢܳܐ ܪܰܒܬܳܐ: ܘܢܽܘܪܳܐ ܕܡܶܬܓܰܘܙܠܳܐ ܘܡܰܙܗܪܳܐ ܚܕܳܪܶܝܗ̇: ܘܡܶܢ ܓܰܘܳܗ̇ ܐܰܝܟ ܚܶܙܘܳܐ ܡܶܢ ܓܰܘ ܢܽܘܪܳܐ.
5 ܘܡܶܢ ܓܰܘܳܗ̇ ܕܡܽܘܬܳܐ ܕܰܐܪܒܰܥ ܚܰܝ̈ܘܳܢ: ܘܗܳܢܰܘ ܚܶܙܘܗܶܝܢ: ܐܰܝܟ ܕܡܽܘܬܳܐ ܕܰܒܢܰܝ̈ܢܳܫܳܐ.
6 ܘܰܐܪܒܰܥ ܐܰܦܺܝ̈ܢ ܠܰܚܕܳܐ: ܘܰܐܪܒܥܳܐ ܓܶܦܺܝ̈ܢ.
7 ܘܖ̈ܶܓܠܰܝܗܶܝܢ ܦܫܺܝ̈ܛܳܢ: ܘܦܰܖ̈ܣܳܬܳܐ ܕܖ̈ܶܓܠܰܝܗܶܝܢ: ܐܰܝܟ ܦܰܖ̈ܣܳܬܳܐ ܕܥܶܓ̈ܠܶܐ: ܘܡܰܒܖ̈ܩܳܢ ܐܰܝܟ ܢܚܳܫܳܐ ܕܡܰܒܪܶܩ.
8 ܘܺܐܝܕܳܐ ܕܒܰܪܢܳܫܳܐ ܬܚܶܝܬ ܓܶܦܰܝ̈ܗܶܝܢ ܡܶܢ ܐܰܪܒܥܳܐ ܓܰܒܰܝ̈ܗܶܝܢ: ܘܰܐܦܰܝ̈ܗܶܝܢ ܘܓܶܦܰܝ̈ܗܶܝܢ ܒܓܰܒܰܝ̈ܗܶܝܢ.
9 ܘܓܶܦܰܝ̈ܗܶܝܢ ܢܰܩܺܝܦܺܝܢ ܗܘܰܘ ܚܰܕ ܠܚܰܕ: ܘܡܳܐ ܕܳܐܙܳܠ̱̈ܢ ܗ̱ܘܰܝ̈ ܠܽܘܩܒܰܠܗܶܝܢ ܐܳܙܳܠ̱̈ܢ ܗ̱ܘܰܝ̈: ܘܠܳܐ ܡܶܬܗܰܦ̈ܟܳܢ ܗ̱ܘܰܝ̈.
10 ܘܰܕܡܽܘܬܳܐ ܕܰܐܦܰܝ̈ܗܶܝܢ: ܐܰܦ̈ܶܐ ܕܒܰܪܢܳܫܳܐ: ܘܰܐܦ̈ܶܐ ܕܰܐܪܝܳܐ ܒܓܰܒܰܝ̈ܗܶܝܢ: ܕܝܰܡܺܝܢܳܐ: ܘܰܐܦ̈ܶܐ ܕܬܰܘܪܳܐ: ܘܰܐܦ̈ܶܐ ܕܢܶܫܪܳܐ: ܒܓܰܒܰܝ̈ܗܶܝܢ ܕܣܶܡܳܠܳܐ.
11 ܘܰܐܦܰܝ̈ܗܶܝܢ ܘܓܶܦܰܝ̈ܗܶܝܢ ܦܪܺܝܣܺܝܢ ܗܘܰܘ ܡܶܢ ܠܥܶܠ: ܬܪܶܝܢ ܢܰܩܺܝܦܺܝܢ ܚܰܕ ܠܚܰܕ: ܘܰܬܪܶܝܢ ܡܟܰܣܶܝܢ ܓܽܘܫܡܗܶܝܢ.
12 ܘܠܽܘܩܒܰܠܗܶܝܢ ܐܳܙܳܠ̱̈ܢ ܗ̱ܘܰܝ̈ ܠܰܐܬܪܳܐ ܕܳܐܙܳܠ̱ܐ ܗܘܳܬ ܪܽܘܚܳܐ: ܘܠܳܐ ܡܶܬܗܰܦ̈ܟܳܢ ܗ̱ܘܰܝ̈.
13 ܘܰܕܡܽܘܬܳܐ ܕܚܰܝ̈ܘܳܬܳܐ: ܐܰܝܟ ܚܶܙܘܳܐ ܕܓܽܘܡܖ̈ܶܐ ܕܢܽܘܪܳܐ ܕܝܳܩ̈ܕܳܢ: ܘܰܐܝܟ ܚܶܙܘܳܐ ܕܠܰܡܦܺܝܕܳܐ ܡܗܰܠܟܳܐ ܗܘܳܬ ܒܶܝܬ ܚܰܝ̈ܘܳܬܳܐ: ܘܡܰܙܗܪܳܐ ܗܘܳܬ ܢܽܘܪܳܐ: ܘܒܰܪܩܳܐ ܢܳܦܶܩ ܗ̱ܘܳܐ ܡܶܢܳܗ̇.
14 ܘܚܰܝ̈ܘܳܬܳܐ ܖ̈ܳܗܛܳܢ ܗ̱ܘܰܝ̈ ܘܠܳܐ ܡܶܬܦܰܢ̈ܝܳܢ ܗ̱ܘܰܝ̈: ܐܰܝܟ ܚܶܙܘܳܐ ܕܙܺܝܩܬܳܐ.
15 ܘܰܚܙܺܝ݀ܬ ܚܰܝ̈ܘܳܬܳܐ: ܘܗܳܐ ܓܺܝ̈ܓܠܶܐ ܒܰܐܪܥܳܐ ܥܰܠ ܓܶܢ̱ܒ ܐܰܖ̈ܒܥܳܬܰܝܗܶܝܢ ܚܰܝ̈ܘܳܬܳܐ.
16 ܘܚܶܙܘܳܐ ܕܓܺܝ̈ܓܠܶܐ ܘܰܥܒܳܕܗܶܝܢ: ܐܰܝܟ ܚܶܙܘܳܐ ܕܬܰܪܫܺܝܫ: ܘܰܕܡܽܘܬܳܐ ܚܕܳܐ ܠܰܐܖ̈ܒܰܥܬܰܝܗܶܝܢ: ܘܚܶܙܘܗܶܝܢ ܘܰܥܒܳܕܗܶܝܢ ܐܰܝܟ ܓܺܝܓܠܳܐ ܒܓܰܘ ܓܺܝܓܠܳܐ.
17 ܥܰܠ ܐܰܪܒܥܳܐ ܓܰܒܰܝ̈ܗܶܝܢ ܐܳܙܳܠ̱̈ܢ ܗ̱ܘܰܝ̈ ܘܠܳܐ ܡܶܬܗܰܦ̈ܟܳܢ ܗ̱ܘܰܝ̈: ܘܠܰܐܬܪܐ ܕܦܳܢܝܳܐ ܗܘܳܬ ܪܺܝܫܺܝܬܗܶܝܢ ܠܡܺܐܙܰܠ ܒܳܬܪܳܗ̇ ܐܳܙܳܠ̱̈ܢ ܗ̱ܘܰܝ̈ ܘܠܳܐ ܡܶܬܗܰܦ̈ܟܳܢ ܗ̱ܘܰܝ̈.
18 ܘܪܰܘܡܳܐ ܐܺܝܬ ܠܚܰܨܰܝ̈ܗܶܝܢ ܘܚܳܙ̈ܝܳܢ ܗ̱ܘܰܝ̈: ܘܚܰܨܰܝ̈ܗܶܝܢ ܡܠܶܐ ܥܰܝ̈ܢܶܐ ܗ̱ܘܳܐ: ܕܰܐܖ̈ܒܥܳܬܰܝܗܶܝܢ ܟܰܕ ܡܶܬܟܰܖ̈ܟܳܢ.
19 ܘܟܰܕ ܐܳܙܳܠ̱̈ܢ ܗ̱ܘܰܝ̈ ܚܰܝ̈ܘܳܬܳܐ: ܐܳܙܳܠ̱̈ܢ ܗ̱ܘܰܝ̈ ܓܺܝ̈ܓܠܶܐ ܥܰܡܗܶܝܢ: ܘܡܳܐ ܕܫܳܩ̈ܠܳܢ ܗ̄ܘܰܝ ܚܰܝ̈ܘܳܬܳܐ ܡܶܢ ܐܰܪܥܳܐ: ܫܳܩ̈ܠܳܢ ܗ̱ܘܰܝ̈ ܓܺܝ̈ܓܠܶܐ ܥܰܡܗܶܝܢ.
20 ܘܠܰܐܬܰܪ ܕܳܐܙܳ̄ܠ̱ܐ ܗܘܳܬ ܪܽܘܚܳܐ ܐܳܙܳܠ̱̈ܢ ܗ̱ܘܰܝ̈: ܘܓܺܝ̈ܓܠܶܐ ܫܳܩ̈ܠܳܢ ܗ̱ܘܰܝ̈ ܥܰܡܗܶܝܢ: ܡܶܛܽܠ ܕܪܽܘܚܳܐ ܚܰܝܬܳܐ ܐܺܝܬ ܗܘܳܬ ܒܓܺܝ̈ܓܠܶܐ.
21 ܘܡܳܐ ܕܳܐܙܳܠ̱ܢ ܗ̱ܘܰܝ̈ ܐܳܙܳܠ̱̈ܢ ܗ̱ܘܰܝ̈: ܘܡܳܐ ܕܩܳܝ̈ܡܳܢ ܗ̱ܘܰܝ̈ ܩܳܝ̈ܡܳܢ ܗ̱ܘܰܝ̈: ܘܡܳܐ ܕܫܳܩ̈ܠܳܢ ܗ̱ܘܰܝ̈ ܡܶܢ ܐܰܪܥܳܐ: ܫܳܩ̈ܠܳܢ ܗ̱ܘܰܝ̈ ܓܺܝ̈ܓܠܶܐ ܥܰܡܗܶܝܢ. ܡܶܛܽܠ ܕܪܽܘܚܳܐ ܚܰܝܬܳܐ ܐܺܝܬ ܗܘܳܬ ܒܓܺܝ̈ܓܠܶܐ.
22 ܘܰܡܬܺܝܚ ܠܥܶܠ ܡܶܢ ܪܺܝܫܳܐ ܕܚܰܝ̈ܘܳܬܳܐ: ܐܰܝܟ ܕܡܽܘܬܳܐ ܕܚܶܙܘܳܐ ܕܰܩܪܽܘܣܛܶܠܳܘܣ ܕܚܺܝܠܳܐ.
23 ܘܰܬܚܽܘܬܰܘܗܝ ܓܶܦܰܝ̈ܗܶܝܢ ܬܪܺܝܨܺܝܢ ܗܘܰܘ ܚܰܕ ܠܽܘܩܒܰܠ ܚܰܕ: ܡܶܢ ܠܥܶܠ ܘܡܶܢ ܠܬܰܚܬ: ܬܪܶܝܢ ܡܟܰܣܝܢ ܠܗܶܝܢ: ܘܰܬܪܶܝܢ ܡܟܰܣܶܝܢ ܓܽܘܫܡܗܶܝܢ.
24 ܘܫܶܡܥܶ݀ܬ ܩܳܠܳܐ ܕܓܶܦܰܝ̈ܗܶܝܢ: ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܐܶܐ: ܘܰܐܝܟ ܩܳܠܳܐ ܕܰܐܠܳܗܳܐ ܡܳܐ ܕܳܐܙܳܠ̱̈ܢ ܗ̱ܘܰܝ̈: ܘܰܐܝܟ ܩܳܠܳܐ ܕܡܰܡܠܠܳܐ ܒܓܰܘ ܡܰܫܪܺܝܬܳܐ: ܘܡܳܐ ܕܩܳܝ̈ܡܳܢ ܗ̱ܘܰܝ̈ ܡܰܫ̈ܠܝܳܢ ܗ̱ܘܰܝ̈ ܓܶܦܰܝ̈ܗܶܝܢ.
25 ܘܰܗܘܳܐ ܩܳܠܳܐ ܥܰܠ ܡܰܛܠܠܳܐ ܕܰܠܥܶܠ ܡܶܢ ܖ̈ܺܝܫܰܝܗܶܝܢ: ܘܡܳܐ ܕܩܳܝ̈ܡܳܢ ܗ̱ܘܰܝ̈ ܡܰܫ̈ܠܝܳܢ ܗ̱ܘܰܝ̈ ܓܶܦܰܝ̈ܗܶܝܢ.
26 ܘܰܠܥܶܠ ܡܶܢ ܡܰܛܠܠܳܐ ܕܰܠܥܶܠ ܡܶܢ ܖ̈ܺܝܫܰܝܗܶܝܢ: ܐܰܝܟ ܚܶܙܘܳܐ ܕܟܺܐܦܳܐ ܕܣܰܦܺܝܠܳܐ: ܘܰܐܝܟ ܕܡܽܘܬܳܐ ܕܟܽܘܪܣܝܳܐ: ܘܥܰܠ ܕܡܽܘܬܳܐ ܕܟܽܘܪܣܝܳܐ: ܐܰܝܟ ܕܡܽܘܬܳܐ ܘܰܐܝܟ ܚܶܙܘܳܐ ܕܒܰܪܢܳܫܳܐ ܐܺܝܬ ܥܠܰܘܗܝ ܡܶܢ ܠܥܶܠ.
27 ܘܰܚܙܺܝ݀ܬ ܐܰܝܟ ܚܶܙܘܳܐ ܕܰܐܠܳܗܳܐ: ܘܰܐܝܟ ܚܶܙܘܳܐ ܕܢܽܘܪܳܐ ܡܶܢ ܠܓܰܘ ܚܳܕܰܪ ܠܶܗ: ܡܶܢ ܚܶܙܘܳܐ ܕܚܰܨܰܘ̈ܗܝ ܘܰܠܥܶܠ: ܘܡܶܢ ܚܰܨܰܘ̈ܗܝ ܘܰܠܬܰܚܬ: ܚܙܺܝ݀ܬ ܐܰܝܟ ܚܶܙܘܳܐ ܕܢܽܘܪܳܐ: ܘܙܰܗܪܳܐ ܟܳܪܶܟ ܠܶܗ.
28 ܐܰܝܟ ܚܶܙܘܳܐ ܕܩܶܫܬܳܐ ܕܗܳܘܝܳܐ ܒܰܥܢܳܢ̈ܶܐ ܒܝܰܘܡܳܐ ܕܡܶܛܪܳܐ: ܗܳܟܰܢܳܐ ܗ̱ܘܳܐ ܚܶܙܘܳܐ ܕܙܰܗܪܳܐ ܕܟܳܪܶܟ ܠܶܗ. ܘܗܳܟܰܢܳܐ ܗ̱ܘܳܐ ܕܰܕܡܽܘܬܳܐ ܕܺܐܝܩܳܪܶܗ ܕܡܳܪܝܳܐ.
29 ܘܰܚܙܺܝܬܶܗ ܘܢܶܦܠܶ݀ܬ ܥܰܠ ܐܰܦܰܝ̈: ܘܫܶܡܥܶ݀ܬ ܩܳܠܳܐ ܕܰܡܡܰܠܶܠ.