Ezekiel 23
The Book of Ezekiel
܀ ܚܙܩܝܐܝܠ ܟܓ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܬܰܪܬܶܝܢ ܢܶܫܺܝ̈ܢ ܐܺܝܬ ܗ̱ܘܰܝ̈ ܒ̈ܢܳܬ ܚܕܳܐ ܐܶܡܳܐ.
3 ܘܙܰܢܺܝ̈ ܒܡܶܨܪܶܝܢ ܒܛܰܠܝܽܘܬܗܶܝܢ: ܬܰܡܳܢ ܡܰܪܶܣܘ ܬܕܰܝ̈ܗܶܝܢ: ܘܬܰܡܳܢ ܐܶܬܒܰܬܰܠܝ̈.
4 ܫܡܳܗ̇ ܕܩܰܫܺܝܫܬܳܐ ܐܰܗܠܳܐ: ܘܰܫܡܳܗ̇ ܕܰܐ̱ܚܪܺܬܳܐ ܐܰܗܠܺܝܒܳܐ: ܘܰܗܘܰܝ̈ ܠܺܝ: ܘܺܝܠܶܕܝ̈ ܒܢܰܝ̈ܳܐ ܘܰܒܢ̈ܳܬܳܐ: ܫܡܳܗ̇ ܕܫܳܡܪܺܝܢ ܐܰܗܠܳܐ: ܘܕܽܐܘܪܺܫܠܶܡ ܐܰܗܠܺܝܒܳܐ.
5 ܘܙܰܢܝܰܬ ܐܰܗܠܳܐ ܡܶܢܝ: ܘܢܶܩܦܰܬ ܠܖ̈ܳܚܡܶܝܗ̇: ܠܳܐܬܽܘܖ̈ܝܶܐ ܕܩܰܪܺܝܒܺܝܢ ܠܳܗ̇.
6 ܕܰܠܒܺܝܫܺܝܢ ܬܶܟܠܬܳܐ ܡܳܖ̈ܰܘܳܬܳܐ ܘܫܰܠܺܝܛܳܢ̈ܶܐ: ܓܰܕܽܘ̈ܕܶܐ ܕܪܶܓܬܳܐ: ܟܽܠܗܽܘܢ ܦܰܖ̈ܳܫܶܐ ܖ̈ܳܟܒܰܝ ܖ̈ܰܟܫܳܐ.
7 ܘܰܐܪܡܝܰܬ ܙܳܢܝܽܘܬܳܗ̇ ܥܠܰܝܗܽܘܢ: ܥܰܠ ܟܽܠܗܽܘܢ ܓܒܰܝ̈ܳܐ ܕܰܒܢܰܝ̈ ܐܳܬܽܘܪ: ܘܥܰܠ ܟܽܠ ܕܶܐܬܢܰܩܦܰܬ ܒܰܦܬܰܟܖ̈ܰܝܗܽܘܢ ܘܶܐܬܛܰܘܫܰܬ.
8 ܘܙܳܢܝܽܘܬܳܗ̇ ܕܰܒܡܶܨܪܶܝܢ ܠܳܐ ܫܶܒ̣ܩܰܬ: ܡܶܛܽܠ ܕܠܳܗ̇ ܨܰܥܰܪܘ ܒܛܰܠܝܽܘܬܳܗ̇: ܘܗܶܢܽܘܢ ܒܰܬܠܽܘܗ̇: ܘܰܐܪܡܺܝܘ ܥܠܶܝܗ̇ ܙܳܢܝܽܘܬܗܽܘܢ.
9 ܡܶܛܽܠ ܗܳܢܳܐ ܗܳܐ ܐܰܫܠܶܡܬܳܗ̇ ܒܺܐܝܕܳܐ ܕܖ̈ܳܚܡܶܝܗ̇: ܒܺܐܝܕܳܐ ܕܰܒ̈ܢܰܝ ܐܳܬܽܘܪ ܕܶܐܬܢܰܩܦܰܬ ܠܗܽܘܢ.
10 ܘܗܶܢܽܘܢ ܓܠܰܘ ܦܽܘܪܣܳܝܳܗ̇: ܘܰܕܒܰܪܘ ܒܢܶܝ̈ܗ̇ ܘܰܒ̈ܢܳܬܳܗ̇: ܘܠܳܗ̇ ܩ̣ܛܰܠܘ ܒܚܰܪܒܳܐ: ܘܰܗܘܳܬ ܬܰܡܳܢ ܡܡܰܠܠܳܐ ܠܢܶܫ̈ܶܐ: ܘܕܺܝ̈ܢܶܐ ܥ̣ܒܰܕܘ ܒܳܗ̇.
11 ܘܰܚܙܳܬ ܚܳܬܳܗ̇ ܐܰܗܠܺܝܒܳܐ: ܘܚܰܒܠܰܬ ܢܶܩܦܳܗ̇ ܝܰܬܺܝܪ ܡܶܢܳܗ̇: ܘܙܳܢܝܽܘܬܳܗ̇ ܝܰܬܺܝܪ ܡܶܢ ܙܳܢܝܽܘܬܳܐ ܕܚܳܬܳܗ̇.
12 ܠܰܒܢܰܝ̈ ܐܳܬܽܘܪ ܢܶܩܦܰܬ: ܠܡܳܖ̈ܰܘܳܬܳܐ ܘܰܠܫܰܠܺܝܛܳܢ̈ܶܐ ܕܩܰܪܺܝܒܺܝܢ ܠܳܗ̇: ܦܰܖ̈ܳܫܶܐ ܠܒܺܝܫܰܝ̈ ܬܶܟܠܬܳܐ ܘܖ̈ܳܟܒܰܝ ܖ̈ܰܟܫܳܐ: ܟܽܠܗܽܘܢ ܓܰܕܽܘ̈ܕܶܐ ܐܶܢܽܘܢ ܕܪܶܓܬܳܐ.
13 ܘܰܚܙܺܝ݀ܬ ܕܶܐܬܛܰܢܦܰܬ ܐܽܘܪܚܳܐ ܕܬܰܖ̈ܬܰܝܗܶܝܢ.
14 ܘܶܐܬܬܰܘܣܰܦ ܥܰܠ ܙܳܢܝܽܘܬܗܶܝܢ: ܘܰܚܙܰܝ̈ ܓܰܒܖ̈ܶܐ ܕܨܺܝܪܺܝܢ ܒܶܐܣܬܳܐ: ܨܰܠ̈ܡܶܐ ܕܟܰܠܕܳܝ̈ܶܐ ܕܨܺܝܪܺܝܢ ܒܣܰܡ̈ܡܳܢܶܐ.
15 ܘܰܚܙܺܝܩܺܝܢ ܡܰܚ̈ܙܩܳܬܳܐ ܒܚܰܨܰܝ̈ܗܽܘܢ: ܘܥܰܖ̈ܩܶܐ ܩܛܺܝܖ̈ܳܢ ܒܖ̈ܺܝܫܰܝܗܽܘܢ: ܚܶܙܘܳܐ ܐܶܢܽܘܢ ܕܓܰܒܖ̈ܶܐ ܟܽܠܗܽܘܢ: ܕܡܽܘܬܳܐ ܐܶܢܽܘܢ ܕܰܒܢܰܝ̈ ܒܳܒܶܠ ܟܽܠܗܽܘܢ: ܕܡܽܘܬܳܐ ܐܶܢܽܘܢ ܕܰܒܢܰܝ̈ ܒܳܒܶܠ ܘܰܕܟܰܠܕܳܝ̈ܶܐ: ܐܰܪܥܳܐ ܕܶܐܬܺܝܠܶܕܘ ܒܳܗ̇.
16 ܘܶܐܬܢܰܩܦܰܬ ܠܗܽܘܢ ܒܚܶܙܘܳܐ ܕܥܰܝ̈ܢܶܝܗ̇: ܘܫܰܕܪܰܬ ܥܠܰܝܗܽܘܢ ܡܰܠܰܐܟ̈ܶܐ ܠܰܐܪܥܳܐ ܕܟܰܠܕܳܝ̈ܶܐ.
17 ܘܶܐܬܰܘ ܠܘܳܬܳܗ̇ ܒܢܰܝ̈ ܒܳܒܶܠ ܠܡܶܕܡܰܟ ܥܰܡܳܗ̇: ܘܛܰܢܦܽܘܗ̇ ܒܙܳܢܝܽܘܬܗܽܘܢ: ܘܶܐܬܛܰܢܦܰܬ ܒܗܽܘܢ: ܘܢܶܕܰܬ ܢܰܦܫܳܗ̇ ܡܶܢܗܽܘܢ.
18 ܘܰܓ̣ܠܳܬ ܙܳܢܝܽܘܬܳܗ̇: ܘܰܓ̣ܠܳܬ ܦܽܘܪܣܳܝܳܗ̇: ܘܢܶܕܰܬ ܢܰܦܫܝ ܡܶܢܳܗ̇: ܐܰܝܟ ܕܢܶܕܰܬ ܢܰܦܫܝ ܡܶܢ ܚܳܬܳܗ̇.
19 ܘܰܐܣܓܝܰܬ ܙܳܢܝܽܘܬܳܗ̇: ܘܶܐܬܕܰܟܪܰܬ ܝܰܘ̈ܡܳܬܳܐ ܕܛܰܠܝܽܘܬܳܗ̇: ܕܙܰܢܝܰܬ ܒܰܐܪܥܳܐ ܕܡܶܨܪܶܝܢ.
20 ܘܶܐܬܢܰܩܦܰܬ ܠܥܰܒܕܰܝ̈ܗܽܘܢ: ܕܒܶܣܪܗܽܘܢ ܐܰܝܟ ܒܶܣܪܳܐ ܗ̱ܘ ܕܚܶܡܖ̈ܶܐ. ܘܚܰܢܰܝ̈ܗܽܘܢ ܐܰܝܟ ܚܰܢ̈ܶܐ ܕܖ̈ܰܟܫܳܐ.
21 ܘܰܦܩܰܕܬܶܟܝ ܥܰܘܠܳܐ ܕܛܰܠܝܽܘܬܶܟܝ: ܟܰܕ ܐܶܬܒܰܬܰܠܬܝ ܒܡܶܨܪܶܝܢ: ܘܶܐܬܡܰܪܰܣܘ ܬܕܰܝ̈ ܛܰܠܝܽܘܬܶܟܝ.
22 ܡܶܛܽܠ ܗܳܢܳܐ ܐܰܗܠܺܝܒܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܡܥܺܝܪ ܐ̱ܢܳܐ ܥܠܰܝܟܝ ܠܟܽܠܗܽܘܢ ܖ̈ܳܚܡܰܝܟܝ ܕܢܶܕܰܬ ܢܰܦܫܶܟܝ ܡܶܢܗܽܘܢ: ܘܰܐܝܬܶܐ ܐܶܢܽܘܢ ܥܠܰܝܟܝ.
23 ܘܢܶܚܕܪܽܘܢܶܟܝ ܒܢܰܝ̈ ܒܳܒܶܠ: ܘܟܽܠܗܽܘܢ ܟܰܠܕܳܝ̈ܶܐ: ܘܦܽܘܛ: ܘܠܽܘܕ: ܘܩܽܘܥ: ܘܟܽܠܗܽܘܢ ܒܢܰܝ̈ ܐܳܬܽܘܪ ܥܰܡܗܽܘܢ: ܓܰܕܽܘ̈ܕܶܐ ܕܪܶܓܬܳܐ: ܡܳܖ̈ܰܘܳܬܳܐ ܘܫܰܠܺܝܛܳܢ̈ܶܐ: ܟܽܠܗܽܘܢ ܓܰܒܖ̈ܶܐ ܕܩܶܕܳܪ ܖ̈ܳܟܒܰܝ ܖ̈ܰܟܫܳܐ.
24 ܢܺܐܬܽܘܢ ܥܠܰܝܟܝ ܟܰܕ ܡܙܰܝܢܺܝܢ: ܒܡܰܖ̈ܟܒܳܬܳܐ ܘܰܒܓܺܝ̈ܓܠܶܐ: ܘܰܒܟܶܢ̈ܫܶܐ ܕܥܰܡ̈ܡܶܐ: ܒܢܰܝܙܟ̈ܶܐ ܘܰܒܣܰܟܖ̈ܶܐ ܘܰܒܣܰܢܘܖ̈ܳܬܳܐ ܢܶܟܪܟܽܘܢܶܟܝ: ܘܶܐܬܶܠ ܩܕܳܡܝܗܽܘܢ ܕܺܝ̈ܢܶܐ: ܘܰܢܕܽܘܢܽܘܢܶܟܝ ܒܕܺܝܢܰܝ̈ܗܽܘܢ.
25 ܘܶܐܬܶܠ ܒܶܟܝ ܛܢܳܢܝ: ܘܰܢܬܰܒܪܽܘܢ ܢܚܺܝܖ̈ܰܝܟܝ ܒܚܶܡܬܳܐ: ܘܶܐܕܢܰܝ̈ܟܝ ܢܥܰܩܪܽܘܢ: ܘܚܰܪܬܶܟܝ ܒܚܰܪܒܳܐ ܬܶܦܶܠ: ܗܶܢܽܘܢ ܢܶܕܒܪܽܘܢ ܒܢܰܝ̈ܟܝ ܘܰܒ̈ܢܳܬܶܟܝ: ܘܚܰܪܬܶܟܝ ܬܶܬܐܟܶܠ ܒܢܽܘܪܳܐ.
26 ܘܢܶܣܒܽܘܢ ܡܳܐܢ̈ܶܐ ܕܫܽܘܒܚܶܟܝ: ܘܢܰܫܠܚܽܘܢܶܟܝ ܠܒܽܘܫܰܝ̈ܟܝ.
27 ܘܶܐܒܰܛܶܠ ܬܰܪܥܺܝܬܶܟܝ ܡܶܢܶܟܝ: ܘܙܳܢܝܽܘܬܶܟܝ ܡܶܢ ܐܰܪܥܳܐ ܕܡܶܨܪܶܝܢ: ܘܠܳܐ ܬܪܺܝܡܺܝܢ ܥܰܝܢܰܝ̈ܟܝ ܥܠܰܝܗܽܘܢ: ܘܰܠܡܶܨܪܶܝܢ ܬܽܘܒ ܠܳܐ ܬܶܬܕܰܟܪܺܝܢ.
28 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܡܰܫܠܶܡ ܐ̱ܢܳܐ ܠܶܟܝ ܒܝܰܕ ܐܰܝܠܶܝܢ ܕܰܣܢܰܝܬܝ: ܒܝܰܕ ܐܳܬܽܘܖ̈ܳܝܶܐ ܕܢܶܕܰܬ ܢܰܦܫܶܟܝ ܡܶܢܗܽܘܢ.
29 ܘܢܶܡܚܽܘܢܶܟܝ ܒܣܶܢܰܐܬܗܽܘܢ: ܘܢܶܣܒܽܘܢ ܟܽܠܳܗ̇ ܠܶܐܘܬܶܟܝ: ܘܢܶܫܒܩܽܘܢܶܟܝ ܥܰܪܛܶܠ ܘܥܰܪܝܰܬ: ܘܢܶܬܓܠܶܐ ܦܽܘܪܣܳܝܳܐ ܕܙܳܢܝܽܘܬܶܟܝ ܘܰܕܥܰܘܠܶܟܝ.
30 ܘܰܒܙܳܢܝܽܘܬܶܟܝ ܐܶܬܥܒܶܕܘ ܠܶܟܝ ܗܳܠܶܝܢ: ܕܙܰܢܺܝܬܝ ܒܳܬܰܪ ܥܰܡ̈ܡܶܐ: ܘܶܐܬܛܰܢܦܬܝ ܒܰܦܬܰܟܖ̈ܰܝܗܽܘܢ.
31 ܘܥܰܠ ܕܗܰܠܶܟܬܝ ܒܽܐܘܖ̈ܚܳܬܳܗ̇ ܕܚܳܬܶܟܝ: ܐܶܬܶܠ ܟܳܣܳܗ̇ ܒܺܐܝܕܰܝ̈ܟܝ.
32 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܟܳܣܳܐ ܕܚܳܬܶܟܝ ܬܶܫܬܶܝܢ: ܥܰܡܺܝܩܳܐ ܘܰܪܘܺܝܚܳܐ: ܘܬܶܗܘܶܝܢ ܠܓܽܘܚܟܳܐ ܘܰܠܡܽܘܝܳܩܳܐ ܪܰܒܳܐ ܘܰܓܡܺܝܪܳܐ.
33 ܪܰܘܳܝܽܘܬܳܐ ܘܕܽܘܘܳܢܳܐ ܬܶܬܡܠܶܝܢ: ܟܳܣܳܐ ܕܬܶܡܗܳܐ ܘܕܰܚܒܳܠܳܐ: ܟܳܣܳܐ ܕܚܳܬܶܟܝ ܫܳܡܪܺܝܢ.
34 ܬܶܫܬܺܝܢܶܗ ܘܬܰܡܨܺܝܢܶܗ. ܘܣܰܥܪܶܟܝ ܬܶܓܙܺܝܢ: ܘܰܬܕܰܝ̈ܟܝ ܬܩܰܛܥܺܝܢ: ܡܶܛܽܠ ܕܶܐܢܳܐ ܡܰܠܠܶܬ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
35 ܥܰܠ ܕܰܛܥܰܝܬܺܝܢܝ ܘܶܐܫܬܕܺܝܬܝ ܒܳܬܰܪ ܕܶܚ̈ܠܳܬܶܟܝ: ܘܳܐܦ ܐܰܢ̱ܬܝ ܩܰܒܶܠܝ ܥܰܘܠܶܟܝ ܘܙܳܢܝܽܘܬܶܟܝ.
36 ܘܶܐܡܰܪ ܠܺܝ ܡܳܪܝܳܐ: ܒܰܪܢܳܫܳܐ: ܕܽܘܢ ܠܰܐܗܠܳܐ ܘܠܰܐܗܠܺܝܒܳܐ: ܘܚܰܘܳܐ ܐܶܢܶܝܢ ܛܰܢܦܽܘܬܗܶܝܢ.
37 ܕܓܳܖ̈ܝ ܘܰܕܡܳܐ ܐܺܝܬ ܒܺܐܝܕܰܝ̈ܗܶܝܢ: ܘܒܰܦܬܰܟܖ̈ܰܝܗܶܝܢ ܓܳܖ̈ܝ: ܘܰܒܢܰܝ̈ܗܶܝܢ ܕܺܝܠܶܕ̈ܝ ܠܺܝ: ܐܰܘܩܶܕܶܝ̈ܢ ܠܗܽܘܢ ܒܢܽܘܪܳܐ.
38 ܘܗܳܕܶܐ ܐ̱ܚܪܺܬܳܐ ܕܰܥܒܰܕ̈ܝ ܠܺܝ: ܛܰܢܶܦ̈ܝ ܡܰܩܕܰܫܝ ܒܶܗ ܒܝܰܘܡܳܐ ܗܰܘ: ܘܫܰܒܰܝ̈ ܛܰܘܶܫܝ̈.
39 ܘܟܰܕ ܢܟܰܣܝ̈ ܗ̱ܘܰܝ̈ ܒܢܰܝ̈ܗܶܝܢ ܠܰܦܬܰܟܖ̈ܰܝܗܶܝܢ: ܥܰܠ ܠܡܰܩܕܫܝ ܒܶܗ ܒܝܰܘܡܳܐ ܗܰܘ ܘܛܰܘܫܳܝ̈ܗܝ: ܗܳܟܰܢܳܐ ܥܒܰܕܝ̈ ܒܓܰܘ ܒܰܝܬ̇ܝ.
40 ܘܳܐܦ ܫܠܰܚܝ̈ ܥܰܠ ܓܰܒܖ̈ܶܐ ܕܳܐܬܶܝܢ ܠܘܳܬܗܶܝܢ ܡܶܢ ܪܽܘܚܩܳܐ: ܗܳܢܽܘܢ ܕܫܰܕܰܪ ܥܠܰܝܗܽܘܢ ܡܰܠܰܐܟ̈ܶܐ: ܘܟܰܕ ܐܶܬܰܘ ܒܰܪ ܫܳܥܬܶܗ ܣܚܰܝ̈ ܘܰܟܚܰܠܝ̈ ܥܰܝܢܰܝ̈ܗܶܝܢ: ܘܶܐܨܛܰܒܰܬܝ̈ ܨܶܒܬܗܶܝܢ.
41 ܘܺܝܬܶܒܝ̈ ܥܰܠ ܥܰܖ̈ܣܳܬܳܐ ܕܰܩܖ̈ܺܝܡܶܢ: ܘܦܳܬܽܘܖ̈ܶܐ ܐܶܣܬܕܰܪܘ ܩܕܳܡܰܝܗܶܝܢ: ܘܡܶܫܚܝ ܘܒܶܣܡܰܝ̈ ܫܩܰܠܝ̈ ܥܠܰܝܗܶܝܢ.
42 ܘܩܳܠܳܐ ܕܚܰܕܽܘܬܗܶܝܢ ܐܳܙܶܠ ܗ̱ܘܳܐ: ܘܳܐܦ ܕܓܰܒܖ̈ܶܐ ܕܶܐܬܰܘ ܡܶܢ ܫܒܳܐ ܘܡܶܢ ܡܰܕܒܪܳܐ: ܘܰܐܪܡܺܝܘ ܫܶܐܖ̈ܶܐ ܒܺܐܝܕܰܝ̈ܗܶܝܢ: ܘܰܟܠܺܝܠܳܐ ܕܫܽܘܒܚܳܐ ܒܖ̈ܺܝܫܰܝܗܶܝܢ.
43 ܘܶܐܡܪܶܬ ܒܗܳܠܶܝܢ ܓܳܖ̈ܝ: ܘܒܰܥܒܳܕ̈ܶܐ ܕܙܳܢ̈ܝܳܬܳܐ ܙܰܢܺܝ̈.
44 ܘܥܳܐܠܺܝܢ ܗܘܰܘ ܠܘܳܬܗܶܝܢ: ܐܰܝܟ ܕܥܳܐܠܺܝܢ ܠܘܳܬ ܐܰܢ̱ܬܬܳܐ ܙܳܢܺܝܬܳܐ: ܗܳܟܰܢܳܐ ܥܳܐܠܺܝܢ ܗܘܰܘ ܥܰܠ ܐܰܗܠܳܐ ܘܥܰܠ ܐܰܗܠܺܝܒܳܐ: ܢܶܫ̈ܶܐ ܙܳܢ̈ܝܳܬܳܐ.
45 ܘܓܰܒܖ̈ܶܐ ܙܰܕܺܝ̈ܩܶܐ ܢܕܽܘܢܽܘܢ ܐܶܢܶܝܢ: ܕܺܝܢܳܐ ܕܓܰܝܳܖ̈ܳܬܳܐ: ܘܕܺܝܢܳܐ ܕܰܐܝܠܶܝܢ ܕܳܐܫ̈ܕܳܢ ܕܡܳܐ: ܡܶܛܽܠ ܕܓܰܝܳܖ̈ܳܬܳܐ ܐܶܢܶܝܢ: ܘܰܕܡܳܐ ܐܺܝܬ ܒܺܐܝܕܰܝ̈ܗܶܝܢ.
46 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܣܶܩ ܥܠܰܝܗܶܝܢ ܟܢܽܘܫܝܳܐ: ܘܗܰܒ ܐܶܢܶܝܢ ܠܙܰܘܥܬܳܐ ܘܰܠܒܶܙܬܳܐ.
47 ܘܢܶܪܓܽܘܡ ܐܶܢܶܝܢ ܟܶܢܫܳܐ ܒܟܺܐܦ̈ܶܐ: ܘܢܶܡܚܽܘܢ ܐܶܢܶܝܢ ܒܣܰܝܦܰܝ̈ܗܽܘܢ: ܘܠܰܒ̈ܢܰܝܗܶܝܢ ܘܠܰܒ̈ܢܳܬܗܶܝܢ ܢܩܰܛܠܽܘܢ: ܘܒܳܬܰܝ̈ܗܶܝܢ ܢܰܘܩܕܽܘܢ ܒܢܽܘܪܳܐ.
48 ܘܶܐܒܰܛܶܠ ܥܰܘܠܳܐ ܡܶܢ ܐܰܪܥܳܐ: ܘܢܶܬܖ̈ܰܕܝܳܢ ܟܽܠܗܶܝܢ ܢܶܫ̈ܶܐ: ܘܠܳܐ ܢܶܥ̈ܒܕܳܢ ܐܰܝܟ ܙܳܢܝܽܘܬܟܶܝܢ.
49 ܘܶܐܬܶܠ ܙܳܢܝܽܘܬܟܶܝܢ ܥܠܰܝܟܶܝܢ: ܘܰܚܛܳܗ̈ܶܐ ܕܰܦܬܰܟܖ̈ܰܝܟܶܝܢ ܬܩܰܒ̈ܠܳܢ: ܘܬܶܕܥ̈ܳܢ ܕܶܐܢܳܐ ܐ̱ܢܳܐ ܡܳܪܝܳܐ.