Ezekiel 11
The Book of Ezekiel
܀ ܚܙܩܝܐܝܠ ܝܐ ܀
1 ܘܰܫܩܰܠܬܰܢܝ ܪܽܘܚܳܐ: ܘܰܐܝܬܝܰܬܰܢܝ ܠܬܰܪܥܳܐ ܡܰܕܢܚܳܝܳܐ ܕܒܰܝܬܶܗ ܕܡܳܪܝܳܐ ܕܚܳܐܰܪ ܠܡܰܕܢܚܳܐ: ܘܰܚܙܺܝ݀ܬ ܒܡܰܥܠܳܢܳܐ ܕܬܰܪܥܳܐ ܥܶܣܪܺܝܢ ܘܚܰܡܫܳܐ ܓܰܒܖ̈ܺܝܢ: ܘܰܚܙܺܝ݀ܬ ܒܰܝܢܳܬܗܽܘܢ ܠܝܰܥܙܰܢܝܳܐ ܒܰܪ ܥܳܙܽܘܪ: ܘܠܰܦܠܰܛܝܳܐ ܒܰܪ ܒܢܳܝܳܐ ܪܰܘܖ̈ܒܳܢܶܐ ܕܥܰܡܳܐ.
2 ܘܶܐܡܰܪ ܠܺܝ ܡܳܪܝܳܐ: ܒܰܪܢܳܫܳܐ: ܗܳܠܶܝܢ ܐܶܢܽܘܢ ܓܰܒܖ̈ܶܐ ܕܡܶܬܚܰܫܒܺܝܢ ܥܶܬܳܐ: ܘܡܳܠܟܺܝܢ ܡܶܠ̈ܟܶܐ ܒܺܝ̈ܫܶܐ ܒܰܡܕܺܝܢ̱ܬܳܐ ܗܳܕܶܐ.
3 ܘܳܐܡܪܺܝܢ: ܠܳܐ ܗ̱ܘܳܐ ܒܓܰܘܳܗ̇ ܒܢܰܝܢ ܒ̈ܳܬܶܐ: ܗܺܝ ܩܰܕܣܳܐ ܘܰܚܢܰܢ ܒܶܣܪܳܐ.
4 ܡܶܟܺܝܠ ܐܶܬܢܰܒܳܐ ܥܠܰܝܗܽܘܢ: ܐܶܬܢܰܒܳܐ ܒܰܪܢܳܫܳܐ.
5 ܘܢܶܦܠܰܬ ܥܠܰܝ ܪܽܘܚܶܗ ܕܡܳܪܝܳܐ: ܘܶܐܡܰܪ ܠܺܝ: ܐܶܡܰܪ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܟܰܢܳܐ ܪܚܶܡܬܽܘܢ ܒܢܰܝ̈ ܝܺܣܪܳܐܶܝܠ: ܘܬܰܖ̈ܥܝܳܬܳܐ ܕܪܽܘܚܟܽܘܢ ܐܶܢܳܐ ܝܳܕܰܥ ܐ̱ܢܳܐ ܠܗܶܝܢ.
6 ܐܰܣܓܺܝܬܽܘܢ ܩܛܺܝܠܰܝ̈ܟܽܘܢ ܒܰܡܕܺܝܢ̱ܬܳܐ ܗܳܕܶܐ: ܘܰܡܠܰܝܬܽܘܢ ܫܽܘ̈ܩܶܝܗ̇ ܚܖ̈ܺܝܒܶܐ.
7 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܚܖ̈ܺܝܒܰܝܟܽܘܢ ܕܰܐܪܡܺܝܬܽܘܢ ܒܓܰܘܳܗ̇: ܗܶܢܽܘܢ ܐܶܢܽܘܢ ܒܶܣܪܳܐ ܘܗܺܝ ܩܰܕܣܳܐ: ܘܰܠܟܽܘܢ ܡܰܦܶܩ ܐ̱ܢܳܐ ܡܶܢ ܓܰܘܳܗ̇.
8 ܡܶܢ ܚܰܪܒܳܐ ܕܚܶܠܬܽܘܢ: ܘܚܰܪܒܳܐ ܐܰܝܬܶܐ ܥܠܰܝܟܽܘܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
9 ܘܰܐܦܶܩܟܽܘܢ ܡܶܢ ܓܰܘܳܗ̇: ܘܰܐܫܠܶܡܟܽܘܢ ܒܺܐܝܕܳܐ ܕܢܽܘܟܖ̈ܳܝܶܐ: ܘܶܐܥܒܶܕ ܡܶܢܟܽܘܢ ܕܺܝ̈ܢܶܐ.
10 ܒܚܰܪܒܳܐ ܬܶܦܠܽܘܢ: ܘܥܰܠ ܬܚܽܘܡܳܐ ܕܺܝܣܪܳܐܶܝܠ ܐܶܕܽܘܢܟܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
11 ܘܗܺܝ ܠܳܐ ܬܶܗܘܶܐ ܠܟܽܘܢ ܩܰܕܣܳܐ: ܘܰܐܢ̱ܬܽܘܢ ܠܳܐ ܬܶܗܘܢ ܒܓܰܘܳܗ̇ ܒܶܣܪܳܐ: ܥܰܠ ܬܚܽܘܡܳܐ ܕܺܝܣܪܳܐܶܝܠ ܐܶܕܽܘܢܟܽܘܢ.
12 ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܰܒܦܽܘܩ̈ܕܳܢܰܝ ܠܳܐ ܗܰܠܶܟܬܽܘܢ: ܘܕܺܝܢܰܝ̈ ܠܳܐ ܥܒܰܕܬܽܘܢ: ܘܰܐܝܟ ܕܺܝ̈ܢܶܐ ܕܥܰܡ̈ܡܶܐ ܕܰܚܕܳܖ̈ܰܝܟܽܘܢ ܥܒܰܕܬܽܘܢ.
13 ܘܟܰܕ ܐܶܬܢܰܒܺܝ݀ܬ: ܡܺܝܬ ܦܠܰܛܝܳܐ ܒܰܪ ܒܢܳܝܳܐ: ܘܢܶܦܠܶ݀ܬ ܥܰܠ ܐܰܦܰܝ̈: ܘܰܐܝܠܠܶܬ ܒܩܳܠܳܐ ܪܳܡܳܐ: ܘܶܐܡܪܶܬ: ܐܽܘܗ ܡܳܪܶܐ ܡܳܖ̈ܰܘܳܬܳܐ: ܣܰܘܦܳܢܳܐ ܥܳܒܶܕ ܐܰܢ̱ܬ ܠܫܰܪܟܶܗ ܕܺܝܣܪܳܐܶܝܠ.
14 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
15 ܒܰܪܢܳܫܳܐ: ܐܰܚܰܝ̈ܟ ܐܰܚܰܝ̈ܟ ܐ̱ܢܳܫ̈ܳܐ ܕܰܫܒܺܝܬܳܟ: ܘܟܽܠܗܽܘܢ ܕܒܶܝܬ ܝܺܣܪܳܐܶܝܠ ܢܣܽܘܦܽܘܢ: ܕܶܐܡܰܪܘ ܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܐܶܬܪܰܚܰܩܘ ܡܶܢ ܡܳܪܝܳܐ: ܠܰܢ ܗ̱ܘ ܓܶܝܪ ܐܬܝܰܗܒܰܬ ܐܰܪܥܳܐ ܠܝܳܪܬܽܘܬܳܐ.
16 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܕܚܽܘܩ ܐܶܢܽܘܢ ܒܥܰܡ̈ܡܶܐ: ܘܶܐܒܰܕܰܪ ܐܶܢܽܘܢ ܒܰܐܖ̈ܥܳܬܳܐ: ܘܶܐܗܘܶܐ ܠܗܽܘܢ ܠܡܰܩܕܫܳܐ ܙܥܽܘܪܳܐ ܒܰܐܖ̈ܥܳܬܳܐ ܕܶܐܙܰܠܘ ܠܗܶܝܢ.
17 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܟܰܢܫܟܽܘܢ ܡܶܢ ܥܰܡ̈ܡܶܐ: ܘܶܐܩܰܪܶܒܟܽܘܢ ܡܶܢ ܐܰܖ̈ܥܳܬܳܐ ܕܶܐܬܒܰܕܰܪܬܽܘܢ ܒܗܶܝܢ: ܘܶܐܬܶܠ ܠܟܽܘܢ ܐܰܪܥܳܐ ܕܺܝܣܪܳܐܶܝܠ.
18 ܘܢܶܥܠܽܘܢ ܠܳܗ̇: ܘܢܰܥܒܪܽܘܢ ܟܽܠܗܶܝܢ ܕܶܚ̈ܠܳܬܳܗ̇: ܘܟܽܠܗܶܝܢ ܛܰܢܦ̈ܘܳܬܳܗ̇ ܡܶܢܳܗ̇.
19 ܘܶܐܬܶܠ ܠܗܽܘܢ ܠܶܒܳܐ ܚܰܕܬܳܐ: ܘܪܽܘܚܳܐ ܚܕܰܬܳܐ ܐܶܬܶܠ ܒܗܽܘܢ: ܘܰܐܥܒܰܪ ܠܶܒܳܐ ܕܟܺܐܦܳܐ ܡܶܢ ܒܶܣܪܗܽܘܢ: ܘܶܐܬܶܠ ܠܗܽܘܢ ܠܶܒܳܐ ܕܒܶܣܪܳܐ.
20 ܘܰܢܗܰܠܟܽܘܢ ܒܦܽܘܩ̈ܕܳܢܰܝ: ܘܢܶܛܪܽܘܢ ܕܺܝܢܰܝ̈ ܘܢܶܥܒܕܽܘܢ ܐܶܢܽܘܢ: ܘܢܶܗܘܽܘܢ ܠܺܝ ܥܰܡܳܐ: ܘܶܐ̱ܢܳܐ ܐܶܗܘܶܐ ܠܗܽܘܢ ܐܰܠܳܗܳܐ
21 ܒܪܶܥܝܳܢܳܐ ܓܶܝܪ ܕܰܦܬܰܟܖ̈ܰܝܗܽܘܢ ܘܰܕܛܰܢܦ̈ܘܳܬܗܽܘܢ ܐܳܙܶܠ ܗ̱ܘܳܐ ܠܶܒܗܽܘܢ: ܐܽܘܖ̈ܚܳܬܗܽܘܢ ܐܶܦܪܽܘܥ ܒܪܺܝܫܗܽܘܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
22 ܘܰܐܪܺܝܡܘ ܟܖ̈ܽܘܒܶܐ ܓܶܦܰܝ̈ܗܽܘܢ: ܘܓܺܝ̈ܓܠܶܐ ܥܰܡܗܽܘܢ: ܘܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ ܠܥܶܠ ܡܶܢܗܽܘܢ.
23 ܘܶܐܬܬܪܺܝܡ ܫܽܘܒܚܶܗ ܕܡܳܪܝܳܐ ܡܶܢ ܓܰܘ ܡܕܺܝܢ̱ܬܳܐ: ܘܩܳܡ ܥܰܠ ܛܽܘܪܳܐ ܕܰܒܡܰܕܢܚܳܝܳܗ̇ ܕܰܡܕܺܝܢ̱ܬܳܐ.
24 ܘܪܽܘܚܳܐ ܫܩܰܠܬܰܢܝ: ܘܰܐܝܬܝܰܬܰܢܝ ܠܰܐܪܥܳܐ ܕܟܰܠܕܳܝ̈ܶܐ ܠܰܫܒܺܝܬܳܐ: ܒܚܶܙܘܳܐ ܘܰܒܪܽܘܚܳܐ ܕܰܐܠܳܗܳܐ: ܘܰܦܪܰܩ ܠܶܗ ܡܶܢܝ ܚܶܙܘܳܐ ܕܰܚܙܺܝ݀ܬ.
25 ܘܡܰܠܠܶܬ ܥܰܡ ܫܒܺܝܬܳܐ: ܟܽܠܗܽܘܢ ܦܶܬܓܳܡܰܘ̈ܗܝ ܕܡܳܪܝܳܐ ܕܚܰܘܝܰܢܝ.