Ezekiel 18
The Book of Ezekiel
܀ ܚܙܩܝܐܝܠ ܝܚ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ: ܒܰܪܢܳܫܳܐ.
2 ܠܡܳܢܳܐ ܡܰܡܬܠܺܝܢ ܐܢ̱ܬܽܘܢ ܡܰܬܠܳܐ ܗܳܢܳܐ ܒܰܐܪܥܳܐ ܕܺܝܣܪܳܐܶܝܠ: ܘܳܐܡܪܺܝܢ ܐܢ̱ܬܽܘܢ: ܐܰܒܳܗ̈ܶܐ ܐܶܟܰܠܘ ܒܶܣܖ̈ܶܐ: ܘܫܶܢ̈ܶܐ ܕܰܒܢܰܝ̈ܳܐ ܩܰܗ̈ܝܳܢ.
3 ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܢ ܢܶܗܘܶܐ ܬܽܘܒ ܕܡܰܡܬܶܠ ܡܰܬܠܳܐ ܗܳܢܳܐ ܒܺܝܣܪܳܐܶܝܠ.
4 ܡܶܛܽܠ ܕܟܽܠܗܶܝܢ ܢܰܦ̈ܫܳܬܳܐ ܕܺܝܠܝ ܐܶܢܶܝܢ: ܢܰܦܫܳܐ ܕܰܐܒܳܐ ܘܢܰܦܫܳܐ ܕܰܒܪܳܐ ܕܺܝܠܝ ܐܶܢܶܝܢ: ܢܰܦܫܳܐ ܕܚܳܛܝܳܐ ܗܺܝ ܬܡܽܘܬ.
5 ܘܓܰܒܪܳܐ ܐܶܢ ܢܶܗܘܶܐ ܙܰܕܺܝܩ: ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ.
6 ܘܥܰܠ ܛܽܘܖ̈ܶܐ ܠܳܐ ܐܶܟܰܠ: ܘܠܳܐ ܐܰܪܺܝܡ ܥܰܝܢܰܘ̈ܗܝ ܠܰܦܬܰܟܖ̈ܶܐ ܘܰܠܕܶܚ̈ܠܳܬܳܐ ܕܰܒܢܰܝ̈ ܝܺܣܪܳܐܶܝܠ: ܘܠܰܐܢ̱ܬܰܬ ܚܰܒܪܶܗ ܠܳܐ ܛܰܢܶܦ: ܘܠܰܐܢ̱ܬܬܳܐ ܒܟܶܦܣܳܗ̇ ܠܳܐ ܐܶܬܩܰܪܰܒ.
7 ܘܰܠܐ̱ܢܳܫ ܠܳܐ ܛܠܰܡ ܘܰܠܐ̱ܢܳܫ ܠܳܐ ܬܰܟ: ܘܦܰܢܺܝ ܡܶܫܟܳܢܳܐ ܕܰܢܣܰܒ: ܘܝܰܗܒ ܠܰܚܡܶܗ ܠܟܰܦܢܳܐ: ܘܰܠܥܰܪܛܶܠܳܝܳܐ ܐܰܠܒܶܫ ܬܰܟܣܺܝܬܳܐ.
8 ܘܰܒܪܶܒܺܝܬܳܐ ܠܳܐ ܐܰܘܙܶܦ: ܘܒܰܩܨܳܨܳܐ ܠܳܐ ܝܰܗܒ: ܘܡܶܢ ܥܰܘܠܳܐ ܐܰܗܦܶܟ ܐܺܝܕܶܗ: ܘܕܳܢ ܕܺܝܢܳܐ ܕܩܽܘܫܬܳܐ ܒܶܝܬ ܓܰܒܪܳܐ ܠܚܰܒܪܶܗ.
9 ܘܰܒܦܽܘܩ̈ܕܳܢܰܝ ܗܰܠܶܟ: ܘܕܺܝܢܰܝ̈ ܢ̣ܛܰܪ ܘܰܥ̣ܒܰܕ ܩܽܘܫܬܳܐ: ܡܰܢ ܕܗܳܟܰܢܳܐ ܥ̣ܒܰܕ ܙܰܕܺܝܩܳܐ ܗ̱ܘ: ܘܡܶܚܳܐ ܢܺܚܶܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
10 ܘܶܐܢ ܢܰܘܠܶܕ ܒܪܳܐ ܥܰܘܳܠܳܐ ܐܳܫܶܕ ܕܡܳܐ: ܘܢܶܥܒܶܕ ܚܕܳܐ ܡܶܢ ܗܳܠܶܝܢ.
11 ܘܢܶܐܟܽܘܠ ܥܰܠ ܛܽܘܖ̈ܶܐ: ܘܰܢܛܰܢܶܦ ܐܰܢ̱ܬܰܬ ܚܰܒܪܶܗ.
12 ܘܢܶܛܠܽܘܡ ܠܡܶܣܟܺܢܳܐ ܘܰܠܒܳܝܫܳܐ: ܘܢܶܬܽܘܟ ܠܚܰܒܪܶܗ: ܘܠܳܐ ܢܦܰܢܶܐ ܡܶܫܟܳܢܳܐ ܠܡܳܖ̈ܰܘܗܝ: ܘܠܰܦܬܰܟܖ̈ܶܐ ܢܪܺܝܡ ܥܰܝܢܰܘ̈ܗܝ ܘܢܶܥܒܶܕ ܛܰܢܦܽܘܬܳܐ.
13 ܘܰܒܪܶܒܺܝܬܳܐ ܢܰܘܙܶܦ: ܘܒܰܩܨܳܨܳܐ ܢܶܣܰܒ: ܕܰܠܡܳܐ ܚܳܝܶܐ ܠܳܐ ܢܺܚܶܐ: ܡܶܛܽܠ ܕܗܳܠܶܝܢ ܟܽܠܗܶܝܢ ܒܺܝ̈ܫܳܬܳܐ ܥ̣ܒܰܕ: ܐܶܠܳܐ ܡܡܳܬ ܢܡܽܘܬ: ܘܰܕܡܶܗ ܥܠܰܘܗܝ ܢܶܗܘܶܐ.
14 ܘܶܐܢ ܢܰܘܠܶܕ ܒܪܳܐ: ܘܢܶܚܙܶܐ ܟܽܠܗܽܘܢ ܚܛܳܗ̈ܶܐ ܕܰܥ̣ܒܰܕ ܐܰܒܽܘܗܝ: ܘܠܳܐ ܢܶܥܒܶܕ ܐܰܟܘܳܬܗܽܘܢ.
15 ܘܥܰܠ ܛܽܘܖ̈ܶܐ ܠܳܐ ܢܶܐܟܽܘܠ: ܘܠܳܐ ܢܪܺܝܡ ܥܰܝ̈ܢܰܘܗܝ ܠܰܦܬܰܟܖ̈ܶܐ ܕܰܒܢܰܝ̈ ܝܺܣܪܳܐܶܝܠ: ܘܠܰܐܢ̱ܬܰܬ ܚܰܒܪܶܗ ܠܳܐ ܢܛܰܢܶܦ.
16 ܘܰܠܐ̱ܢܳܫ ܠܳܐ ܢܶܛܠܘܡ: ܘܡܶܫܟܳܢܳܐ ܠܐ̱ܢܳܫ ܠܳܐ ܢܶܫܩܽܘܠ: ܘܬܽܘܟܳܐ ܠܳܐ ܢܶܬܽܘܟ. ܘܠܰܚܡܶܗ ܢܶܬܶܠ ܠܟܰܦܢܳܐ: ܘܰܠܥܰܪܛܠܳܝܳܐ ܢܰܠܒܶܫ.
17 ܘܡܶܢ ܡܶܣܟܺܢܳܐ ܠܳܐ ܢܰܗܦܶܟ ܐܺܝܕܶܗ: ܘܪܶܒܺܝܬܳܐ ܠܳܐ ܢܶܫܩܽܘܠ: ܘܝܰܬܺܝܪܳܐ ܠܳܐ ܢܶܣܰܒ: ܘܕܺܝܢܰܝ̈ ܢܶܥܒܶܕ: ܘܰܒܦܽܘܩ̈ܕܳܢܰܝ ܢܗܰܠܶܟ: ܠܳܐ ܢܡܽܘܬ ܒܥܰܘܠܶܗ ܕܰܐܒܽܘܗܝ: ܐܶܠܳܐ ܡܶܚܳܐ ܢܺܚܶܐ.
18 ܐܰܒܽܘܗܝ ܕܶܝܢ ܥܰܠ ܕܰܛܠܰܡ ܛܠܽܘܡܝܳܐ: ܘܬܰܟ ܬܽܘܟܳܐ ܠܰܐܚܽܘܗܝ: ܘܡܶܕܶܡ ܕܫܰܦܝܪ ܠܳܐ ܥ̣ܒܰܕ ܒܥܰܡܶܗ: ܡܺܝܬ ܒܰܚܛܳܗܰܘ̈ܗܝ.
19 ܘܶܐܢ ܐܳܡܪܺܝܢ ܐܰܝܟܰܘ ܠܳܐ ܡܶܬܦܪܰܥ ܒܪܳܐ ܚܛܳܗ̈ܶܐ ܕܰܐܒܽܘܗܝ: ܐܶܡܰܪ ܠܗܽܘܢ: ܡܶܛܽܠ ܕܰܥܒܰܕ ܒܪܳܐ ܕܺܝܢܳܐ ܘܙܰܕܺܝܩܽܘܬܳܐ: ܘܰܢܛܰܪ ܟܽܠܗܽܘܢ ܦܽܘܩ̈ܕܳܢܰܝ̈: ܡܶܚܳܐ ܢܺܚܶܐ.
20 ܢܰܦܫܳܐ ܕܚܳܛܝܳܐ ܗܺܝ ܬܡܽܘܬ. ܠܳܐ ܢܶܬܦܪܰܥ ܒܪܳܐ ܚܛܳܗ̈ܶܐ ܕܰܐܒܽܘܗܝ: ܐܳܦܠܳܐ ܐܰܒܳܐ ܢܶܬܦܪܰܥ ܚܛܳܗ̈ܶܐ ܕܰܒܪܶܗ: ܙܳܟܽܘܬܶܗ ܕܙܰܟܳܝܳܐ ܥܠܰܘܗܝ ܬܶܗܘܶܐ: ܘܰܚܛܺܝܬܶܗ ܕܚܰܛܳܝܳܐ ܥܠܰܘܗܝ ܬܶܗܘܶܐ.
21 ܥܰܘܳܠܳܐ ܕܶܝܢ ܐܶܢ ܢܶܗܦܽܘܟ ܡܶܢ ܟܽܠܗܽܘܢ ܚܛܳܗܰܘ̈ܗܝ ܕܰܥܒܰܕ: ܘܢܶܛܰܪ ܦܽܘܩ̈ܕܳܢܰܝ: ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ: ܡܶܚܳܐ ܢܺܚܶܐ ܘܠܳܐ ܢܡܽܘܬ.
22 ܘܟܽܠܗܽܘܢ ܚܛܳܗܰܘ̈ܗܝ ܕܰܥ̣ܒܰܕ ܠܳܐ ܢܶܬܕܰܟܪܽܘܢ ܠܶܗ: ܐܶܠܳܐ ܒܙܰܕܺܝܩܽܘܬܳܐ ܕܰܥ̣ܒܰܕ ܢܺܚܶܐ.
23 ܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܚܰܛܳܝܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܠܳܐ ܕܢܶܗܦܽܘܟ ܡܶܢ ܐܽܘܪܚܶܗ ܒܺܝܫܬܳܐ ܘܢܺܚܶܐ.
24 ܘܶܐܢ ܢܶܗܦܽܘܟ ܙܰܕܺܝܩܳܐ ܡܶܢ ܙܰܕܺܝܩܽܘܬܶܗ: ܘܢܶܥܒܶܕ ܥܰܘܠܳܐ ܘܛܰܢܦܽܘܬܳܐ ܐܰܝܟ ܗܳܠܶܝܢ ܕܰܥ̣ܒܰܕ ܚܰܛܳܝܳܐ: ܟܽܠܳܗ̇ ܙܰܕܺܝܩܽܘܬܶܗ ܕܰܥܒܰܕ ܠܳܐ ܬܶܬܕܟܰܪ ܠܶܗ: ܐܶܠܳܐ ܒܥܰܘܠܳܐ ܕܰܥܒܰܕ: ܘܒܰܚܛܳܗ̈ܶܐ ܕܰܚܛܳܐ: ܒܗܽܘܢ ܢܡܽܘܬ.
25 ܘܶܐܡܰܪܬܽܘܢ ܠܳܐ ܫܰܦܺܝܖ̈ܳܢ ܐܽܘܖ̈ܚܳܬܶܗ ܕܡܳܪܝܳܐ: ܫܡܰܥܘ ܗܳܟܺܝܠ ܕܒܶܝܬ ܝܺܣܪܳܐܶܝܠ: ܐܽܘܖ̈ܚܳܬܝ ܕܺܝܠܝ ܫܰܦܺܝܖ̈ܳܢ ܐܶܢܶܝܢ: ܐܶܠܳܐ ܐܽܘܖ̈ܚܳܬܟܽܘܢ ܗܽܘ ܕܺܝܠܟܽܘܢ ܠܳܐ ܫܰܦܺܝܖ̈ܳܢ.
26 ܘܶܐܢ ܢܶܗܦܽܘܟ ܙܰܕܺܝܩܳܐ ܡܶܢ ܙܰܕܺܝܩܽܘܬܶܗ ܘܢܶܥܒܶܕ ܥܰܘܠܳܐ: ܒܶܗ ܒܥܰܘܠܳܐ ܕܰܥܒܰܕ ܢܡܽܘܬ.
27 ܘܶܐܢ ܢܶܗܦܽܘܟ ܥܰܘܠܳܐ ܡܶܢ ܥܰܘܳܠܽܘܬܶܗ: ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ: ܢܰܚܶܐ ܢܰܦܫܶܗ.
28 ܘܶܐܢ ܢܶܚܙܶܐ ܘܢܶܗܦܽܘܟ ܡܶܢ ܟܽܠܗܽܘܢ ܚܛܳܗܰܘ̈ܗܝ ܕܰܥ̣ܒܰܕ: ܡܶܚܳܐ ܢܺܚܶܐ ܘܠܳܐ ܢܡܽܘܬ.
29 ܘܳܐܡܪܺܝܢ ܕܒܶܝܬ ܝܺܣܪܳܐܶܝܠ ܠܳܐ ܫܰܦܺܝܖ̈ܳܢ ܐܽܘܖ̈ܚܳܬܶܗ ܕܡܳܪܝܳܐ: ܐܽܘܖ̈ܚܳܬܝ ܕܺܝܠܝ ܫܰܦܺܝܖ̈ܳܢ ܐܶܢܶܝܢ ܕܒܶܝܬ ܝܺܣܪܳܐܶܝܠ: ܐܶܠܳܐ ܐܽܘܖ̈ܚܳܬܟܽܘܢ ܗܽܘ ܕܺܝܠܟܽܘܢ ܠܳܐ ܫܰܦܺܝܖ̈ܳܢ.
30 ܡܶܛܽܠ ܗܳܢܳܐ ܐ̱ܢܳܫ ܐܰܝܟ ܐܽܘܖ̈ܚܳܬܶܗ ܐܶܕܽܘܢܟܽܘܢ ܒܶܝܬ ܝܺܣܪܳܐܶܝܠ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܬܽܘܒܘ ܘܶܐܬܦܢܰܘ ܡܶܢ ܟܽܠܶܗ ܥܰܘܠܟܽܘܢ: ܘܠܳܐ ܬܶܗܘܶܐ ܠܟܽܘܢ ܬܽܘܩܠܬܳܐ ܠܰܚܛܳܗܰܝ̈ܟܽܘܢ.
31 ܘܰܫܕܰܘ ܡܶܢܟܽܘܢ ܟܽܠܶܗ ܥܰܘܠܳܐ ܕܰܥܒܰܕܬܽܘܢ: ܘܰܥܒܶܕܘ ܠܟܽܘܢ ܠܶܒܳܐ ܚܰܕܬܳܐ: ܘܪܽܘܚܳܐ ܚܕܰܬܳܐ: ܘܠܳܐ ܬܡܽܘܬܽܘܢ ܕܒܶܝܬ ܝܺܣܪܳܐܶܝܠ.
32 ܡܶܛܽܠ ܕܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܡܺܝܬܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܶܠܳܐ ܬܽܘܒܘ ܘܰܚܝܰܘ.