Ezekiel 31
The Book of Ezekiel
܀ ܚܙܩܝܐܝܠ ܠܐ ܀
1 ܒܰܫܢܰܬ ܚܕܰܥܶܣܖ̈ܶܐ ܒܝܰܪܚܳܐ ܬܠܺܝܬܳܝܳܐ ܒܚܰܕ ܒܝܰܪܚܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܡܰܪ ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܘܰܠܥܽܘܫܢܶܗ: ܠܡܰܢ ܕܳܡܶܝܬ ܒܪܰܒܽܘܬܳܟ.
3 ܗܳܐ ܐܳܬܽܘܪܝܳܐ ܐܰܪܙܳܐ ܕܠܶܒܢܳܢ: ܕܫܰܦܺܝܖ̈ܳܢ ܣܰܘ̈ܟܰܘܗܝ: ܘܥܰܒܺܝܛ ܛܶܠܳܠܶܗ: ܘܪܳܡܳܐ ܩܰܘܡܬܶܗ: ܘܒܰܝܢܳܬ ܥܰܒܺܝ̈ܛܶܐ ܗܘܳܬ ܡܰܘܥܺܝܬܶܗ.
4 ܡܰܝ̈ܳܐ ܪܰܒܝܽܘܗܝ: ܘܰܬܗܽܘܡܳܐ ܐܰܪܺܝܡܶܗ: ܘܥܰܠ ܢܰܗܖ̈ܰܘܳܬܳܐ ܚܶܕܪܰܬ ܢܶܨܒܬܶܗ: ܘܣܰܘܟܰܘ̈ܗܝ ܐܰܪܡܺܝ ܥܰܠ ܟܽܠܗܽܘܢ ܐܺܝ̈ܠܳܢܶܐ ܕܕܰܒܪܳܐ.
5 ܡܶܛܽܠ ܗܳܢܳܐ ܐܶܬܬܪܺܝܡܰܬ ܩܰܘܡܬܶܗ ܛܳܒ ܡܶܢ ܟܽܠܗܽܘܢ ܐܺܝ̈ܠܳܢܶܐ ܕܕܰܒܪܳܐ: ܘܰܣܓܺܝ̈ ܣܰܖ̈ܥܶܦܝܳܬܶܗ ܘܺܝܖ̈ܶܟܝ ܣܰܘ̈ܟܰܘܗܝ: ܡܶܢ ܣܽܘܓܳܐܐ ܕܡܰܝ̈ܳܐ ܕܪܰܒܝܽܘܗܝ.
6 ܒܣܰܘ̈ܟܰܘܗܝ ܐܰܩܢܰܬ ܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܬܚܶܝܬ ܥܰܘܦܰܘ̈ܗܝ ܝܶܠܕܰܬ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܘܰܒܛܶܠܳܠܶܗ ܝܺܬܶܒܘ ܥܰܡ̈ܡܶܐ ܣܰܓܺܝ̈ܐܶܐ.
7 ܘܫܰܦܺܝܪ ܗ̱ܘܳܐ ܒܪܰܒܽܘܬܶܗ ܘܰܒܣܽܘܓܳܐܐ ܕܣܰܘ̈ܟܰܘܗܝ: ܡܶܛܽܠ ܕܰܗܘܰܘ ܥܶܩܳܖ̈ܰܘܗܝ ܒܡܰܝ̈ܳܐ ܣܰܓܺܝ̈ܐܶܐ.
8 ܐܰܖ̈ܙܶܐ ܠܳܐ ܥܰܒܪܽܘܗܝ ܒܦܰܪܕܰܝܣܶܗ ܕܰܐܠܳܗܳܐ: ܘܥܰܖ̈ܩܶܐ ܠܳܐ ܕܡܺܝܘ ܠܣܰܘ̈ܟܰܘܗܝ: ܘܕܽܘ̈ܠܒܶܐ ܠܳܐ ܗܘܰܘ ܐܰܝܟ ܥܰܘܦܰܘ̈ܗܝ: ܘܟܽܠ ܐܺܝܠܳܢ ܒܦܰܪܕܰܝܣܶܗ ܕܰܐܠܳܗܳܐ ܠܳܐ ܕܳܡܶܐ ܠܶܗ ܒܫܽܘܦܪܶܗ.
9 ܫܰܦܺܝܪܳܐ ܥܒܰܕܬܶܗ ܒܣܽܘܓܳܐܐ ܕܣܰܘܟܰܘ̈ܗܝ: ܘܛܰܢܘ ܒܶܗ ܟܽܠܗܽܘܢ ܐܺܝ̈ܠܳܢܶܐ ܕܰܥܕܶܢ ܦܰܪܕܰܝܣܶܗ ܕܰܐܠܳܗܳܐ
10 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܬܬܪܺܝܡ ܒܩܰܘܡܬܶܗ: ܘܫܶܘܚܰܬ ܡܰܘܥܺܝܬܶܗ ܒܰܝܢܳܬ ܥܰܒܺܝ̈ܛܶܐ: ܘܶܐܬܬܪܺܝܡ ܠܶܒܶܗ ܒܪܳܡܽܘܬܶܗ.
11 ܐܰܫܠܡܺܝܘܗܝ ܒܝܰܕ ܬܰܩܺܝܦܳܐ ܕܥܰܡ̈ܡܶܐ: ܘܢܶܥܒܶܕ ܠܶܗ ܐܰܝܟ ܚܛܺܝܬܶܗ ܘܢܰܘܒܕܺܝܘܗܝ.
12 ܘܢܰܘܒܕܽܘܢܶܗ ܢܽܘܟܖ̈ܳܝܶܐ ܥܰܫܺܝ̈ܢܶܐ ܕܥܰܡ̈ܡܶܐ: ܘܢܰܪܡܽܘܢܶܗ ܒܛܽܘܖ̈ܶܐ: ܘܰܒܟܽܠܗܽܘܢ ܢܰܚ̈ܠܶܐ ܢܶܦ̈ܠܳܢ ܣܰܘ̈ܟܰܘܗܝ: ܘܢܶܬܬܰܒܖ̈ܳܢ ܣܰܖ̈ܥܶܦܝܳܬܶܗ ܒܟܽܠܗܽܘܢ ܢܰܚ̈ܠܶܐ ܕܰܐܪܥܳܐ: ܘܢܶܚܬܽܘܢ ܡܶܢ ܛܶܠܳܠܶܗ ܟܽܠܗܽܘܢ ܥܰܡ̈ܡܶܐ ܕܰܐܪܥܳܐ: ܘܢܶܫܒܩܽܘܢܶܗ.
13 ܘܡܳܐ ܕܰܢܦܰܠ: ܬܶܫܟܰܢ ܥܠܰܘܗܝ ܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܬܚܶܝܬ ܣܰܖ̈ܥܶܦܝܳܬܶܗ ܬܶܗܘܶܐ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ.
14 ܕܠܳܐ ܢܶܬܬܪܺܝܡܽܘܢ ܒܩܰܘ̈ܡܳܬܗܽܘܢ ܟܽܠܗܽܘܢ ܐܺܝ̈ܠܳܢܶܐ ܕܡܰܝ̈ܳܐ: ܘܠܳܐ ܢܶܫܘ̈ܚܳܢ ܡܰܘ̈ܥܝܳܬܗܽܘܢ ܒܰܝܢܳܬ ܥܰܒܺܝ̈ܛܶܐ: ܘܠܳܐ ܢܩܽܘܡܽܘܢ ܘܠܳܐ ܢܶܗܘܽܘܢ ܐܰܟܘܳܬܗܽܘܢ ܟܽܠ ܕܫܳܬܶܝܢ ܡܰܝ̈ܳܐ: ܡܶܛܽܠ ܕܟܽܠܗܽܘܢ ܠܡܰܘܬܳܐ ܐܶܫܬܠܶܡܘ: ܒܰܐܪܥܳܐ ܬܰܚܬܳܝܬܳܐ: ܒܰܝܢܳܬ ܒܢܰܝ̈ܢܳܫܳܐ ܕܢܳܚܬܺܝܢ ܠܓܽܘܒܳܐ.
15 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܝܰܘܡܳܐ ܕܰܢ̣ܚܶܬ ܠܰܫܝܽܘܠ: ܥܶܒܕܶܬ ܐܶܒܠܳܐ: ܘܟܰܣܺܝ݀ܬ ܥܠܰܘܗܝ ܬܗܽܘܡܳܐ: ܘܰܟܠܺܝ݀ܬ ܢܰܗܖ̈ܰܘܳܬܶܗ: ܘܶܐܬܟܠܺܝܘ ܡܰܝ̈ܳܐ ܣܰܓܺܝ̈ܐܶܐ: ܘܰܐܟܡܪܶܬ ܥܠܰܘܗܝ ܠܠܶܒܢܳܢ: ܘܟܽܠܗܽܘܢ ܐܺܝ̈ܠܳܢܶܐ ܕܕܰܒܪܳܐ ܐܶܬܥܰܝܰܦܘ.
16 ܡܶܢ ܩܳܠܳܐ ܕܡܰܦܽܘܠܬܶܗ ܐܶܬܬܙܺܝܥܰܬ ܐܰܪܥܳܐ: ܘܟܰܕ ܐܰܚܶܬܬܶܗ ܠܰܫܝܽܘܠ ܥܰܡ ܢܳܚ̈ܬܰܝ ܓܽܘܒܳܐ: ܐܶܬܒܰܝܰܐܘ ܒܰܐܪܥܳܐ ܬܰܚܬܳܝܬܳܐ: ܟܽܠܗܽܘܢ ܐܺܝ̈ܠܳܢܶܐ ܕܰܥܕܶܢ: ܘܰܓܒܰܝ̈ܳܐ ܫܰܦܺܝܖ̈ܶܐ ܕܠܶܒܢܳܢ ܕܫܳܬܶܝܢ ܡܰܝ̈ܳܐ.
17 ܐܳܦ ܗܶܢܽܘܢ ܢܚܶܬܘ ܥܰܡܶܗ ܠܰܫܝܽܘܠ ܠܘܳܬ ܩܛܺܝܠܰܝ̈ ܣܰܝܦܳܐ: ܘܙܰܪܥܶܗ ܝܺܬܶܒ ܒܛܶܠܳܠܶܗ ܒܰܝܢܳܬ ܥܰܡ̈ܡܶܐ.
18 ܠܰܐܝܢܳܐ ܡܶܢ ܐܺܝ̈ܠܳܢܶܐ ܕܰܥܕܶܢ ܐܶܬܕܰܡܺܝܬ ܒܫܽܘܒܚܳܐ ܘܰܒܪܰܒܽܘܬܳܐ: ܘܰܢܚܶܬܬ ܥܰܡ ܐܺܝ̈ܠܳܢܶܐ ܕܰܥܕܶܢ ܠܰܐܪܥܳܐ ܬܰܚܬܳܝܬܳܐ: ܒܰܝܢܳܬ ܥܽܘܖ̈ܠܶܐ ܬܶܫܟܰܒ: ܥܰܡ ܐܰܝܠܶܝܢ ܕܰܩܛܺܝܠܺܝܢ ܒܣܰܝܦܳܐ: ܗܳܢܰܘ ܦܶܪܥܽܘܢ ܘܟܽܠܶܗ ܚܰܝܠܶܗ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.