Ezekiel 38
The Book of Ezekiel
܀ ܚܙܩܝܐܝܠ ܠܚ ܀
ܥܰܠ ܕܒܶܝܬ ܓܽܘܓ ܘܡܰܓܽܘܓ ܕܣܳܠܩܺܝܢ ܥܠܰܝܗܽܘܢ ܡܳܐ ܕܰܣܠܶܩܘ ܡܶܢ ܒܳܒܶܠ.
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܥܰܠ ܓܽܘܓ: ܘܥܰܠ ܐܰܪܥܳܐ ܕܡܰܓܽܘܓ: ܡܕܰܒܪܳܢܳܐ ܘܪܺܝܫܳܐ ܕܡܳܫܳܟ ܘܰܕܬܽܘܒܺܝܠ: ܘܶܐܬܢܰܒܳܐ ܥܠܰܘܗܝ ܘܶܐܡܰܪ.
3 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟ ܓܽܘܓ: ܡܕܰܒܪܳܢܳܐ ܘܪܺܝܫܳܐ ܕܡܳܫܳܟ ܘܰܕܬܽܘܒܺܝܠ.
4 ܘܶܐܟܰܢܫܳܟ ܘܰܐܪܡܶܐ ܒܠܳܡܳܐ ܒܦܰܟܰܝ̈ܟ: ܘܰܐܦܩܳܟ ܡܶܢ ܐܰܬܪܳܟ ܠܳܟ ܘܰܠܟܽܠܶܗ ܚܰܝܠܳܟ: ܘܖ̈ܰܟܫܳܐ ܘܦܰܖ̈ܳܫܶܐ ܕܰܠܒܺܝܫܺܝܢ ܙܰܝܢܳܐ: ܟܽܠܗܽܘܢ. ܟܶܢܫܳܐ ܪܰܒܳܐ: ܒܢܰܝ̈ܙܟܶܐ ܘܰܒܣܰܟܖ̈ܶܐ ܘܰܐܚܺܝܕܰܝ̈ ܣܰܝ̈ܦܶܐ.
5 ܟܽܠܗܽܘܢ ܦܳܖ̈ܣܳܝܶܐ: ܘܟܽܘ̈ܫܳܝܶܐ: ܘܦܽܘܛܳܝ̈ܶܐ: ܥܰܡܗܽܘܢ ܒܣܰܟܖ̈ܶܐ: ܘܰܒܣܰܢܘܖ̈ܳܬܳܐ.
6 ܓܳܡܰܪ ܘܟܽܠܶܗ ܚܰܝܠܳܗ̇: ܘܒܶܝܬ ܬܽܘܓܶܪܡܳܐ: ܘܰܫܦܽܘܠܰܝ̈ ܓܰܪܒܝܳܐ ܘܟܽܠܶܗ ܚܰܝܠܗܽܘܢ: ܘܥܰܡ̈ܡܶܐ ܣܰܓܺܝ̈ܐܶܐ ܕܥܰܡܳܟ.
7 ܐܶܬܛܰܝܰܒ ܐܰܢ̱ܬ ܘܟܽܠܶܗ ܟܶܢܫܳܟ ܕܰܟܢܺܝܫ ܥܰܡܳܟ: ܘܰܗܘܺܝ ܠܗܽܘܢ ܡܰܛܰܪܬܳܐ.
8 ܡܶܢ ܝܰܘ̈ܡܳܬܳܐ ܩܰܕܡܳܝ̈ܶܐ ܐܶܬܦܩܶܕܬ: ܘܰܒܚܰܪܬܳܐ ܕܰܫܢܰܝ̈ܳܐ ܬܺܐܬܶܐ ܥܰܠ ܛܽܘܖ̈ܶܐ ܕܺܝܣܪܳܐܶܝܠ: ܘܥܰܠ ܐܰܪܥܳܐ ܕܶܐܫܬܰܝܢܰܬ ܡܶܢ ܚܰܪܒܳܐ: ܘܶܐܬܟܰܢܫܰܬ ܡܶܢ ܥܰܡ̈ܡܶܐ ܣܰܓܺܝ̈ܐܶܐ: ܘܺܝܬܶܒܘ ܒܳܗ̇ ܟܽܠܗܽܘܢ ܒܫܶܠܝܳܐ.
9 ܘܬܶܣܰܩ ܐܰܝܟ ܕܠܽܘܚܝܳܐ: ܘܰܐܝܟ ܥܢܳܢܳܐ ܕܰܡܟܰܣܝܳܐ ܠܰܐܪܥܳܐ: ܐܰܢ̱ܬ ܘܟܽܠܶܗ ܚܰܝܠܳܟ: ܘܥܰܡ̈ܡܶܐ ܣܰܓܺܝ̈ܐܶܐ ܕܥܰܡܳܟ.
10 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܶܗ ܒܝܰܘܡܳܐ ܗܰܘ: ܢܶܣ̈ܩܳܢ ܡ̈ܶܠܶܐ ܥܰܠ ܠܶܒܳܟ: ܘܬܶܬܚܰܫܰܒ ܡܰܚܫܰܒܬܳܐ ܒܺܝܫܬܳܐ: ܘܬܺܐܡܰܪ.
11 ܐܶܣܰܩ ܥܰܠ ܐܰܪܥܳܐ ܟܰܗܺܝܢܬܳܐ: ܘܺܐܙܰܠ ܥܰܠ ܐܰܝܠܶܝܢ ܕܝܳܬܒܺܝܢ ܒܫܶܠܝܳܐ: ܕܠܳܐ ܫܽܘܖ̈ܶܐ: ܘܠܳܐ ܣܽܘܟܖ̈ܶܐ: ܘܠܳܐ ܬܰܖ̈ܥܶܐ ܐܺܝܬ ܠܗܽܘܢ.
12 ܕܬܶܫܒܶܐ ܫܒܺܝܬܳܐ: ܘܬܶܒܽܘܙ ܒܶܙܬܳܐ: ܘܬܰܗܦܶܟ ܐܺܝܕܳܟ ܥܰܠ ܚܰܖ̈ܒܳܬܳܐ ܕܶܐܬܝܰܬܰܒ̈ܝ: ܘܥܰܠ ܥܰܡܳܐ ܕܶܐܬܟܰܢܰܫ ܡܶܢ ܥܰܡ̈ܡܶܐ: ܕܰܩ̣ܢܰܘ ܒܥܺܝܪܳܐ ܘܩܶܢܝܳܢܳܐ: ܘܝܳܬܒܺܝܢ ܥܰܠ ܫܽܘܦܪܳܗ̇ ܕܰܐܪܥܳܐ.
13 ܫܒܳܐ ܘܕܳܪܳܢ ܘܬܰܓܳܖ̈ܐ ܕܬܰܪܫܺܝܫ: ܘܟܽܠܗܶܝܢ ܩܽܘܖ̈ܝܳܐ ܢܺܐܡܖ̈ܳܢ ܠܳܟ: ܐܶܬܰܝܬ ܠܡܶܫܒܳܐ ܫܒܺܝܬܳܐ: ܘܰܠܡܶܒܰܙ ܒܶܙܬܳܐ: ܘܟ̣ܰܢܶܫܬ ܟܢܽܘܫܝܳܟ ܕܬܶܫܩܽܘܠ ܣܺܐܡܳܐ ܘܕܰܗܒܳܐ: ܘܬܶܣܰܒ ܒܥܺܝܪܳܐ ܘܩܶܢܝܳܢܳܐ: ܘܬܶܕܒܰܪ ܕܒܳܪܬܳܐ ܪܰܒܬܳܐ.
14 ܡܶܛܽܠ ܗܳܢܳܐ ܐܶܬܢܰܒܳܐ ܒܰܪܢܳܫܳܐ: ܘܶܐܡܰܪ ܠܓܽܘܓ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܶܗ ܒܝܰܘܡܳܐ ܕܢܶܬܶܒ ܥܰܡܝ ܝܺܣܪܳܐܶܝܠ ܒܫܶܠܝܳܐ: ܬܶܕܰܥ.
15 ܘܬܺܐܬܶܐ ܡܶܢ ܐܰܬܪܳܟ ܡܶܢ ܫܦܽܘܠܰܝ̈ ܓܰܪܒܝܳܐ: ܘܥܰܡ̈ܡܶܐ ܣܰܓܺܝ̈ܐܶܐ ܕܥܰܡܳܟ: ܟܽܠܗܽܘܢ ܖ̈ܳܟܒܰܝ ܖ̈ܰܟܫܳܐ: ܟܢܽܘܫܝܳܐ ܪܰܒܳܐ ܘܚܰܝܠܳܐ ܣܰܓܺܝܐܳܐ.
16 ܘܬܶܣܰܩ ܥܰܠ ܥܰܡܝ ܝܺܣܪܳܐܶܝܠ: ܐܰܝܟ ܥܢܳܢܳܐ ܕܰܡܟܰܣܝܳܐ ܠܰܐܪܥܳܐ: ܠܚܰܪܬܳܐ ܕܝܰܘ̈ܡܳܬܳܐ ܬܺܐܬܶܐ: ܘܰܐܝܬܶܝܟ ܠܰܐܪܥܝ: ܘܢܶܕܥܽܘܢܳܢܝ ܥܰܡ̈ܡܶܐ ܡܳܐ ܕܶܐܬܩܰܕܫܶܬ ܒܳܟ ܠܥܺܢܰܝ̈ܗܽܘܢ.
17 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܢ̱ܬ ܗ̱ܘ̣ ܕܶܐܡܪܶܬ ܥܠܰܝܟ ܒܝܰܘ̈ܡܳܬܳܐ ܩܰܕܡܳܝ̈ܶܐ: ܒܺܐܝܕܳܐ ܕܥܰܒ̈ܕܰܝ ܢܒܺܝ̈ܶܐ ܕܺܝܣܪܳܐܶܝܠ: ܕܡܶܬܢܰܒܶܝܢ ܗܘܰܘ ܒܝܰܘ̈ܡܳܬܳܐ ܗܳܢܽܘܢ: ܘܒܰܫܢܰܝ̈ܳܐ ܗܳܠܶܝܢ: ܕܰܐܝܬܶܝܟ ܥܠܰܝܗܽܘܢ.
18 ܒܶܗ ܒܝܰܘܡܳܐ ܗܰܘ ܕܢܺܐܬܶܐ ܓܽܘܓ: ܥܰܠ ܐܰܪܥܳܐ ܕܺܝܣܪܳܐܶܝܠ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܢܺܐܩܰܕ ܪܽܘܓܙܝ ܒܚܶܡܬܝ ܘܒܰܛܢܳܢܝ.
19 ܒܢܽܘܪܳܐ ܕܪܽܘܓܙܝ ܡ̣ܰܠܠܶܬ: ܕܒܶܗ ܒܝܰܘܡܳܐ ܗܰܘ: ܢܶܗܘܶܐ ܙܰܘܥܳܐ ܪܰܒܳܐ ܒܰܐܪܥܳܐ ܕܺܝܣܪܳܐܶܝܠ.
20 ܘܰܢܙܽܘܥܽܘܢ ܩܕܳܡܰܘܗܝ ܢܽܘܢ̈ܶܐ ܕܝܰܡܳܐ: ܘܦܳܪܰܚܬܳܐ ܕܰܫܡܰܝܳܐ: ܘܚܰܝܽܘܬܳܐ ܕܕܰܒܪܳܐ: ܘܟܽܠ ܖ̈ܰܚܫܳܐ ܕܪܳܚܶܫ ܒܰܐܪܥܳܐ: ܘܟܽܠܗܽܘܢ ܒܢܰܝ̈ܢܳܫܳܐ ܕܥܰܠ ܐܰܦܰܝ̈ ܐܰܪܥܳܐ: ܘܢܶܣܬܰܚܦܽܘܢ ܛܽܘܖ̈ܶܐ: ܘܢܶܦܠܽܘܢ ܡܰܓ̈ܕܠܶܐ.
21 ܘܟܽܠܗܽܘܢ ܫܽܘܖ̈ܶܐ ܒܰܐܪܥܳܐ ܢܶܦܠܽܘܢ: ܘܶܐܩܪܶܐ ܥܠܰܘܗܝ ܚܰܪܒܳܐ ܒܟܽܠܗܽܘܢ ܛܽܘܖ̈ܰܝ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܣܰܝܦܶܗ ܕܓܰܒܪܳܐ ܒܰܐܚܽܘܗܝ ܢܶܗܘܶܐ.
22 ܘܶܐܕܽܘܢܺܝܘܗܝ ܒܡܰܘܬܳܐ ܘܒܰܕܡܳܐ: ܘܡܶܛܪܳܐ ܕܓܳܪܶܦ ܘܟܺܐܦ̈ܶܐ ܕܕܰܚܪܳܐ: ܘܢܽܘܪܳܐ ܘܟܶܒܪܺܝܬܳܐ ܐܰܚܶܬ ܥܠܰܘܗܝ ܘܥܰܠ ܪܰܘܖ̈ܒܳܢܰܘܗܝ: ܘܥܰܠ ܥܰܡ̈ܡܶܐ ܣܰܓܺܝ̈ܐܶܐ ܕܥܰܡܶܗ.
23 ܘܺܐܪܰܒ ܘܶܐܬܩܰܕܰܫ ܠܥܺܝܢ ܥܰܡ̈ܡܶܐ ܣܰܓܺܝ̈ܐܶܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.