Ezekiel 42
The Book of Ezekiel
܀ ܚܙܩܝܐܝܠ ܡܒ ܀
1 ܘܰܐܦܩܰܢܝ ܠܕܳܪܬܳܐ ܒܰܪܳܝܬܳܐ ܠܽܐܘܪܚܳܐ ܕܓܰܪܒܝܳܐ: ܘܰܐܥܠܰܢܝ ܠܰܐܟܣܶܕܪܳܐ ܕܠܽܘܩܒܰܠ ܓܙܺܝܪܬܳܐ ܘܠܽܘܩܒܰܠ ܒܶܢܝܳܢܳܐ ܓܰܪܒܝܳܝܳܐ.
2 ܠܽܘܩܒܰܠ ܐܽܘܪܟܳܐ ܕܰܐܡ̈ܶܐ ܕܬܰܪܥܳܐ ܓܰܪܒܝܳܝܳܐ: ܘܰܦܬܳܝܳܐ ܚܰܡܫܺܝܢ ܐܰܡܺܝ̈ܢ.
3 ܠܽܘܩܒܰܠ ܬܰܪܥܳܐ ܕܕܳܪܬܳܐ ܓܰܘܳܝܬܳܐ: ܘܠܽܘܩܒܰܠ ܕܰܖ̈ܓܶܐ ܕܕܳܪܬܳܐ ܒܰܪܳܝܬܳܐ: ܕܰܒܢܶܝܢ ܚܰܕ ܥܰܠ ܚܰܕ ܥܰܠ ܬܠܳܬܳܐ ܣܶܕܖ̈ܺܝܢ.
4 ܘܰܩܕܳܡ ܐܰܟܣܶܕܖ̈ܶܐ ܒܶܝܬ ܗܶܠܰܟܬܳܐ: ܥܣܰܪ ܐܰܡܺܝ̈ܢ ܦܬܳܝܳܐ: ܐܘܪܟܳܐ ܡܳܐܐ ܐܰܡܺܝ̈ܢ: ܘܬܰܪܥܳܐ ܕܒܶܝܬ ܗܶܠܰܟܬܳܐ ܠܓܰܪܒܝܳܐ.
5 ܘܰܐܟܣܶܕܖ̈ܶܐ ܥܶܠܳܝ̈ܳܬܳܐ ܙܥܽܘܖ̈ܺܝܢ ܗ̱ܘܰܝ̈: ܡܶܛܽܠ ܕܥܳܐܠܺܝܢ ܗܘܰܘ ܒܗܶܝܢ ܕܰܖ̈ܓܶܐ.
6 ܡܬܰܠ̈ܬܳܢ ܗ̱ܘܰܝ̈ ܓܶܝܪ: ܘܠܰܝܬ ܗܘܰܘ ܠܗܶܝܢ ܥܰܡܽܘ̈ܕܶܐ ܐܰܝܟ ܥܰܡܽܘ̈ܕܶܐ ܕܕܳܪܬܳܐ: ܡܶܛܽܠ ܗܳܢܳܐ ܙܥܽܘܖ̈ܝܳܢ ܗ̱ܘܰܝ̈ ܡܶܢ ܬܰܚ̈ܬܳܝܬܳܐ ܘܡܶܢ ܡܶܨ̈ܥܳܝܳܬܳܐ.
7 ܘܒܶܐܣܬܳܐ ܕܰܠܒܰܪ ܕܠܽܘܩܒܰܠ ܐܰܟܣܶܕܖ̈ܶܐ: ܐܽܘܪܟܳܐ ܚܰܡܫܺܝܢ ܐܰܡܺܝ̈ܢ.
8 ܡܶܛܽܠ ܕܽܐܘܪܟܳܐ ܕܰܐܟܣܕܪܳܐ ܕܕܳܪܬܳܐ ܒܰܪܳܝܬܳܐ ܚܰܡܫܺܝܢ ܐܰܡܺܝ̈ܢ: ܘܠܽܘܩܒܰܠ ܗܰܝܟܠܳܐ ܡܳܐܐ ܐܰܡܺܝ̈ܢ.
9 ܘܬܰܪܥܳܐ ܕܰܐܟܣܶܕܪܳܐ ܕܡܰܥܠܳܢܳܐ ܡܰܕܢܚܳܝܳܐ: ܕܥܳܐܶܠ ܠܕܳܪܬܳܐ ܒܰܪܳܝܬܳܐ.
10 ܒܰܦܬܳܝܳܗ̇ ܕܶܐܣܬܳܐ ܕܕܳܪܬܳܐ: ܒܡܰܥܠܳܢܳܐ ܡܰܕܢܚܳܝܳܐ ܩܕܳܡ ܓܙܺܝܪܬܳܐ: ܘܰܩܕܳܡ ܒܶܢܝܳܢܳܐ ܕܰܐܟܣܶܕܖ̈ܶܐ.
11 ܐܘܪܚܳܐ ܩܕܳܡܰܝܗܶܝܢ: ܘܚܶܙܘܳܐ ܕܰܐܟܣܶܕܖ̈ܶܐ ܕܒܽܐܘܪܚܳܐ ܕܓܰܪܒܝܳܐ: ܐܽܘܪܟܗܶܝܢ ܐܰܝܟ ܦܬܳܝܗܶܝܢ: ܘܟܽܠܗܽܘܢ ܡܰܦܩܳܢܰܝ̈ܗܶܝܢ: ܘܡܰܥܠܳܢܰܝ̈ܗܶܝܢ: ܘܚܶܙܘܗܶܝܢ: ܘܬܰܖ̈ܥܰܝܗܶܝܢ.
12 ܐܰܝܟ ܬܰܖ̈ܥܶܐ ܕܰܐܟܣܶܕܖ̈ܶܐ ܕܒܽܐܘܪܚܳܐ ܕܬܰܝܡܢܳܐ: ܬܰܪܥܳܐ ܒܪܺܝܫ ܐܽܘܪܚܳܐ: ܐܽܘܪܚܳܐ ܒܰܐܦܰܝ̈ ܐܶܣܬܳܐ: ܕܒܽܐܘܪܚܳܐ ܕܢܰܚܠܳܐ ܡܰܕܢܚܳܝܳܐ ܐܰܝܟ ܕܳܐܬܶܐ.
13 ܘܶܐܡܰܪ ܠܺܝ: ܐܰܟܣܶܕܖ̈ܶܐ ܕܓܰܪܒܝܳܐ: ܘܰܐܟܣܶܕܖ̈ܶܐ ܕܬܰܝܡܢܳܐ ܕܰܩܕܳܡ ܓܙܺܝܪܬܳܐ: ܗܳܠܶܝܢ ܐܶܢܶܝܢ ܐܰܟܣܶܕܖ̈ܶܐ ܐܰܬܰܪ ܕܳܐܟܠܺܝܢ ܟܳܗ̈ܢܶܐ ܕܰܡܩܰܪܒܺܝܢ ܠܡܳܪܝܳܐ ܩܕܽܘܫ ܩܽܘܕܫ̈ܶܐ: ܬܰܡܳܢ ܣܳܝܡܺܝܢ ܩܕܽܘܫ ܩܽܘܕܫ̈ܶܐ: ܘܰܣܡܺܝܕܳܐ ܘܬܰܕܟܺܝܬܳܐ ܕܰܚܛܳܗ̈ܶܐ: ܡܶܛܽܠ ܕܰܐܬܪܰܐ ܗ̱ܘ ܩܰܕܺܝܫܳܐ.
14 ܘܡܳܐ ܕܥܳܐܠܺܝܢ ܟܳܗ̈ܢܶܐ: ܠܳܐ ܢܳܦܩܺܝܢ ܡܶܢ ܩܽܘܕܫܳܐ ܠܕܳܪܬܳܐ ܒܰܪܳܝܬܳܐ: ܐܶܠܳܐ ܬܰܡܳܢ ܣܳܝܡܺܝܢ ܡܳܐܢܰܝ̈ܗܽܘܢ ܗܳܢܽܘܢ ܕܰܡܫܰܡܫܺܝܢ ܒܗܽܘܢ: ܡܶܛܽܠ ܕܩܽܘܕܫܳܐ ܐܶܢܽܘܢ: ܘܠܳܒܫܺܝܢ ܡܳܐܢ̈ܶܐ ܐ̱ܚܖ̈ܳܢܶܐ: ܘܰܡܩܰܪܒܺܝܢ ܩܽܘܖ̈ܒܳܢܶܐ ܚܠܳܦ ܥܰܡܳܐ.
15 ܘܰܫܠܶܡ̈ܝ ܡܽܘܫ̈ܚܳܬܶܗ ܕܒܰܝܬܳܐ ܓܰܘܳܝܳܐ. ܘܰܐܦܩܰܢܝ ܠܽܐܘܪܚܳܐ ܕܬܰܪܥܳܐ ܕܚܳܐܰܪ ܠܡܰܕܢܚܳܐ: ܘܡܰܫܚܶܗ ܟܰܕ ܚܳܕܰܪ.
16 ܘܰܡܫܰܚ ܠܪܽܘܚܳܐ ܕܡܰܕܢܚܳܐ: ܒܩܰܢܝܳܐ ܕܰܡܫܽܘܚܬܳܐ ܚܰܡܶܫܡܳܐܐ ܩܢܺܝ̈ܢ.
17 ܘܰܡ̣ܫܰܚ ܠܪܽܘܚܳܐ ܕܓܰܪܒܝܳܐ: ܒܩܰܢܝܳܐ ܕܰܡܫܽܘܚܬܳܐ: ܚܰܡܶܫܡܳܐܐ ܩܢܺܝ̈ܢ ܟܰܕ ܚܳܕܰܪ.
18 ܘܰܡܫܰܚ ܠܪܽܘܚܳܐ ܕܬܰܝܡܢܳܐ: ܚܰܡܶܫܡܳܐܐ ܩܢܺܝ̈ܢ: ܒܩܰܢܝܳܐ ܕܰܡܫܽܘܚܬܳܐ.
19 ܘܰܡܫܰܚ ܠܪܽܘܚܳܐ ܕܡܰܥܪܒܳܐ: ܚܰܡܶܫܡܳܐܐ ܩܢܺܝ̈ܢ: ܒܩܰܢܝܳܐ ܕܰܡܫܽܘܚܬܳܐ.
20 ܠܰܐܪܒܰܥ ܖ̈ܽܘܚܰܘܗܝ ܡܰܫܚܶܗ: ܘܫܽܘܪܳܐ ܟܰܕ ܚܳܕܰܪ: ܐܽܘܪܟܶܗ ܚܰܡܶܫܡܳܐܐ ܘܰܦܬܳܝܶܗ ܚܰܡܶܫܡܳܐܐ: ܕܢܶܦܪܽܘܫ ܒܶܝܬ ܩܽܘܕܫܳܐ ܠܚܽܘܠܳܐ.