Ezekiel 10
The Book of Ezekiel
܀ ܚܙܩܝܐܝܠ ܝ ܀
1 ܘܰܚܙܺܝܬ ܡܰܛܠܠܳܐ ܕܰܠܥܶܠ ܡܶܢ ܪܺܝܫ ܟܖ̈ܽܘܒܶܐ: ܐܰܝܟ ܚܶܙܘܳܐ ܕܟܺܐܦܳܐ ܕܣܰܦܺܝܠܳܐ: ܘܰܐܝܟ ܚܶܙܘܳܐ ܕܰܕܡܽܘܬܳܐ ܕܟܽܘܪܣܝܳܐ ܠܥܶܠ ܡܶܢܗܽܘܢ.
2 ܘܰܩ̣ܪܳܐ ܠܓܰܒܪܳܐ ܕܰܠܒܺܝܫ ܒܽܘܨܳܐ: ܘܶܐܡܰܪ ܠܶܗ: ܥܽܘܠ ܠܒܰܝܢܳܬ ܓܺܝ̈ܓܠܶܐ ܠܰܬܚܶܝܬ ܟܖ̈ܽܘܒܶܐ: ܘܰܡܠܺܝ ܚܽܘܦܢܰܝ̈ܟ ܓܽܘܡܖ̈ܶܐ ܕܢܽܘܪܳܐ ܡܶܢ ܒܰܝܢܳܬ ܟܖ̈ܽܘܒܶܐ: ܘܰܕܪܺܝ ܥܰܠ ܡܕܺܝܢ̱ܬܳܐ: ܘܥܰܠ ܠܥܺܢܰܝ̈.
3 ܘܰܟܖ̈ܽܘܒܶܐ ܩܳܝܡܺܝܢ ܗܘܰܘ ܡܶܢ ܝܰܡܺܝܢܶܗ ܕܒܰܝܬܳܐ: ܟܰܕ ܥܳܐܶܠ ܓܰܒܪܳܐ ܗܰܘ: ܘܕܳܪܬܳܐ ܓܰܘܳܝܬܳܐ ܐܶܬܡܰܠܝܰܬ ܗܘܳܬ ܥܢܳܢܳܐ.
4 ܘܶܐܬܬܪܺܝܡ ܫܽܘܒܚܶܗ ܕܰܐܠܳܗܳܐ ܡܶܢ ܟܪܽܘܒܳܐ ܕܰܠܥܶܠ ܡܶܢ ܙܳܘܺܝܬܳܐ ܕܒܰܝܬܳܐ: ܘܶܐܬܡܠܺܝ ܒܰܝܬܳܐ ܥܢܳܢܳܐ: ܘܕܳܪܬܳܐ ܓܰܘܳܝܬܳܐ ܐܶܬܡܰܠܝܰܬ ܗܘܳܬ ܙܰܗܪܳܐ ܕܫܽܘܒܚܶܗ ܕܡܳܪܝܳܐ.
5 ܘܩܳܠܳܐ ܕܓܶܦܰܝ̈ܗܽܘܢ ܕܰܟܖ̈ܽܘܒܶܐ ܡܶܫܬܡܰܥ ܗ̱ܘܳܐ: ܥܕܰܡܳܐ ܠܕܳܪܬܳܐ ܒܰܪܳܝܬܳܐ: ܐܰܝܟ ܩܳܠܶܗ ܕܰܐܠܳܗܳܐ ܡܳܐ ܕܰܡܡܰܠܶܠ.
6 ܘܟܰܕ ܦ̣ܩܰܕ ܠܓܰܒܪܳܐ ܕܰܠܒܺܝܫ ܒܽܘܨܳܐ: ܐܶܡܰܪ ܠܶܗ: ܣܰܒ ܢܽܘܪܳܐ ܡܶܢ ܒܶܝܬ ܓܺܝ̈ܓܠܶܐ ܡܶܢ ܒܰܝܢܳܬ ܟܖ̈ܽܘܒܶܐ: ܘܶܐܬܳܐ ܘܩܳܡ ܥܰܠ ܓܶܢ̱ܒ ܓܺܝ̈ܓܠܶܐ.
7 ܘܰܐܘܫܶܛ ܟܪܽܘܒܳܐ ܐܺܝܕܶܗ ܡܶܢ ܒܰܝܢܳܬ ܟܖ̈ܽܘܒܶܐ ܠܢܽܘܪܳܐ ܕܒܰܝܢܳܬ ܟܖ̈ܽܘܒܶܐ: ܘܰܫ̣ܩܰܠ ܐܰܪܡܺܝ ܒܚܽܘܦܢܰܘ̈ܗܝ ܕܓܰܒܪܳܐ ܕܰܠܒܺܝܫ ܒܽܘܨܳܐ: ܘܰܢ̣ܣܰܒ ܘܰܢ̣ܦܰܩ.
8 ܘܰܚܙܺܝ݀ܬ ܠܰܟܖ̈ܽܘܒܶܐ: ܕܡܽܘܬܳܐ ܕܺܐܝܕܳܐ ܕܒܰܪܢܳܫܳܐ ܬܚܶܝܬ ܓܶܦܰܝ̈ܗܽܘܢ.
9 ܘܰܚܙܺܝ݀ܬ ܐܰܪܒܰܥ ܓܺܝ̈ܓܠܺܝܢ ܥܰܠ ܓܶܢ̱ܒ ܟܖ̈ܽܘܒܶܐ: ܚܕܳܐ ܚܕܳܐ ܓܺܝܓܠܳܐ ܥܰܠ ܓܶܢ̱ܒ ܟܪܽܘܒܳܐ ܚܰܕ: ܘܚܶܙܘܗܶܝܢ ܕܓܺܝ̈ܓܠܶܐ: ܐܰܝܟ ܚܶܙܘܳܐ ܕܟܺܐܦܳܐ ܕܬܰܪܫܺܝܫ.
10 ܘܚܰܕ ܗ̱ܘܳܐ ܚܶܙܘܗܶܝܢ ܘܰܕܡܽܘܬܗܶܝܢ ܕܰܐܖ̈ܒܥܳܬܰܝܗܶܝܢ: ܐܰܝܟ ܓܺܝܓܠܳܐ ܒܓܰܘ ܓܺܝܓܠܳܐ.
11 ܘܡܳܐ ܕܳܐܙܳܠ̱̈ܢ ܗ̱ܘܰܝ̈ ܥܰܠ ܐܰܪܒܥܳܐ ܓܰܒܰܝ̈ܗܶܝܢ ܐܳܙܳܠ̱̈ܢ ܗ̱ܘܰܝ̈: ܘܠܳܐ ܗܳܦ̈ܟܳܢ ܗ̱ܘܰܝ̈: ܐܶܠܳܐ ܠܰܐܬܪܳܐ ܕܳܐܙܳܠ̱ܐ ܗܘܳܬ ܪܺܝܫܺܝܬܗܶܝܢ: ܒܳܬܪܳܗ̇ ܐܳܙܳܠ̱ܢ ܗ̱ܘܰܝ̈ ܘܠܳܐ ܡܶܬܗܰܦ̈ܟܳܢ ܗ̱ܘܰܝ̈.
12 ܘܟܽܠܶܗ ܒܶܣܪܗܶܝܢ ܘܚܰܨܰܝ̈ܗܶܝܢ ܘܺܐܝܕܰܝ̈ܗܶܝܢ ܘܓܶܦܰܝ̈ܗܶܝܢ ܕܓܺܝ̈ܓܠܶܐ: ܡܠܶܐ ܥܰܝ̈ܢܶܐ ܗ̱ܘܰܝ̈ ܟܰܕ ܚܳܕܖ̈ܳܢ ܗ̱ܘܰܝ̈ ܠܓܰܒܰܝ̈ܗܶܝܢ.
13 ܘܰܠܐܽܘܦܢ̈ܶܐ ܩ̣ܪܳܐ ܐܶܢܽܘܢ ܓܺܝ̈ܓܠܶܐ ܩܕܳܡܝ.
14 ܘܰܐܪܒܰܥ ܐܰܦܺܝ̈ܢ ܠܚܰܕ ܚܰܕ ܡܶܢܗܽܘܢ: ܚܕܳܐ ܐܰܦܰܝ̈ ܟܪܽܘܒܳܐ: ܘܰܐ̱ܚܪܺܬܳܐ ܐܰܦ̈ܶܐ ܕܒܰܪܢܳܫܳܐ: ܘܰܐ̱ܚܪܳܬܳܐ ܐܰܦ̈ܶܐ ܕܰܐܪܝܳܐ: ܘܰܐ̱ܚܪܺܬܳܐ ܐܰܦ̈ܶܐ ܕܢܶܫܪܳܐ.
15 ܘܶܐܬܬܪܺܝܡܘ ܟܖ̈ܽܘܒܶܐ: ܗܳܝ ܚܰܝܘܬܳܐ ܕܰܚܙܺܝܬ ܒܰܢܗܰܪ ܟܒܰܪ.
16 ܘܡܳܐ ܕܳܐܙܺܠܝܢ ܗܘܰܘ ܟܖ̈ܽܘܒܶܐ: ܐܳܙܳܠ̱̈ܢ ܗ̱ܘܰܝ̈ ܓܺܝ̈ܓܠܶܐ ܥܰܡܗܽܘܢ: ܘܡܳܐ ܕܫܳܩܠܺܝܢ ܗܘܰܘ ܟܖ̈ܽܘܒܶܐ ܓܶܦܰܝ̈ܗܽܘܢ ܠܡܶܬܬܪܳܡܽܘ ܡܶܢ ܐܰܪܥܳܐ: ܠܳܐ ܗܳܦ̈ܟܳܢ ܗ̱ܘܝ̈ ܓܺܝ̈ܓܠܶܐ ܡܶܢܗܽܘܢ.
17 ܘܡܳܐ ܕܩܳܝܡܺܝܢ ܗܘܰܘ ܩܳܝ̈ܡܳܢ ܗ̱ܘܰܝ̈: ܘܡܳܐ ܕܡܶܬܬܪܺܝܡܺܝܢ ܗܘܰܘ ܡܶܬܬܖ̈ܺܝܡܳܢ ܗ̱ܘܰܝ̈: ܘܡܳܐ ܕܫܳܩܠܺܝܢ ܗܘܰܘ ܟܖ̈ܽܘܒܶܐ ܓܶܦܰܝ̈ܗܽܘܢ: ܫܳܩ̈ܠܳܢ ܗ̱ܘܰܝ̈ ܓܺܝ̈ܓܠܶܐ ܥܰܡܗܽܘܢ: ܡܶܛܽܠ ܕܪܽܘܚܳܐ ܕܚܰܝ̈ܶܐ ܐܺܝܬ ܗܘܳܬ ܒܗܶܝܢ.
18 ܘܰܢ̣ܦܰܩ ܫܽܘܒܚܶܗ ܕܡܳܪܝܳܐ ܡܶܢ ܙܳܘܺܝܬܳܐ ܕܒܰܝܬܳܐ: ܘܩܳܡ ܥܰܠ ܟܖ̈ܽܘܒܶܐ.
19 ܘܰܫܩܰܠܘ ܟܖ̈ܽܘܒܶܐ ܓܶܦܰܝ̈ܗܽܘܢ: ܘܶܐܬܬܪܺܝܡܘ ܡܶܢ ܐܰܪܥܳܐ ܠܥܺܢܰܝ̈: ܘܟܰܕ ܢ̣ܦܰܩܘ ܓܺܝ̈ܓܠܶܐ ܥܰܡܗܽܘܢ ܗ̱ܘܰܝ̈: ܘܩܳܡܘ ܒܡܰܥܠܳܢܳܐ ܕܬܰܪܥܳܐ ܡܰܕܢܚܳܝܳܐ ܕܒܰܝܬܶܗ ܕܡܳܪܝܳܐ: ܘܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ: ܠܥܶܠ ܡܶܢܗܽܘܢ.
20 ܗܳܕܳܐ ܗ̱ܝ ܚܰܝܽܘܬܳܐ ܕܰܚܙܺܝ݀ܬ ܬܚܶܝܬ ܐܰܠܳܗܳܐ ܕܺܝܣܪܳܐܶܝܠ ܥܰܠ ܢܗܰܪ ܟܒܰܪ: ܘܝܶܕܥܶܬ ܕܰܟܖ̈ܽܘܒܶܐ ܐܶܢܽܘܢ.
21 ܐܰܪܒܰܥ ܐܰܪܒܰܥ ܐܰܦܺܝ̈ܢ ܠܚܰܕ ܚܰܕ ܡܶܢܗܽܘܢ: ܘܰܐܪܒܥܳܐ ܓܶܦܺܝ̈ܢ ܠܚܰܕ ܡܶܢܗܽܘܢ: ܘܰܕܡܽܘܬܳܐ ܕܺܐܝܕܳܐ ܕܒܰܪܢܳܫܳܐ ܬܚܶܝܬ ܓܶܦܰܝ̈ܗܽܘܢ.
22 ܘܰܕܡܽܘܬܳܐ ܕܰܐܦܰܝ̈ܗܽܘܢ: ܐܰܝܟ ܗܳܠܶܝܢ ܐܰܦ̈ܶܐ ܕܰܚܙܺܝ݀ܬ ܥܰܠ ܢܗܰܪ ܟܒܰܪ: ܘܗܳܟܘܳܬ ܚܶܙܘܗܽܘܢ. ܘܚܰܕ ܚܰܕ ܠܓܰܒܶܗ ܐܳܙܺܠ̱ܝܢ ܗ̱ܘܰܘ.