Ezekiel 33
The Book of Ezekiel
܀ ܚܙܩܝܐܝܠ ܠܓ ܀
1 ܙܽܘܗܳܪܳܐ ܘܠܽܘܒܳܒܳܐ. ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܡܰܠܶܠ ܥܰܡ ܒܢܰܝ̈ ܥܰܡܳܟ: ܘܶܐܡܰܪ ܠܗܽܘܢ: ܐܰܪܥܳܐ ܡܳܐ ܕܡܰܝܬܶܐ ܐ̱ܢܳܐ ܥܠܶܝܗ̇ ܚܰܪܒܳܐ: ܢܶܕܒܪܽܘܢ ܥܰܡܳܐ ܕܰܐܪܥܳܐ ܓܰܒܪܳܐ ܚܰܕ ܡܶܢܗܽܘܢ: ܘܢܶܥܒܕܽܘܢܶܗ ܠܗܽܘܢ ܕܰܘܩܳܐ.
3 ܘܡܳܐ ܕܰܚܙܳܐ ܚܰܪܒܳܐ ܕܳܐܬܝܳܐ ܥܠܰܝܗܽܘܢ: ܢܶܩܪܶܐ ܒܩܰܪܢܳܐ ܘܰܢܙܰܗܰܪ ܠܥܰܡܳܐ.
4 ܘܡܰܢ ܕܫܳܡܰܥ ܩܳܠܳܐ ܕܩܰܪܢܳܐ ܘܠܳܐ ܡܶܙܕܗܰܪ: ܘܳܐܬܝܳܐ ܚܰܪܒܳܐ ܘܢܳܣܒܳܐ ܠܶܗ: ܕܡܶܗ ܒܪܺܝܫܗ.
5 ܘܶܐܢ ܢܶܙܕܗܰܪ: ܢܰܦܫܶܗ ܡܦܰܨܶܐ.
6 ܕܰܘܩܳܐ ܕܶܝܢ ܡܳܐ ܕܰܚܙܳܐ ܚܰܪܒܳܐ ܕܳܐܬܝܳܐ: ܘܠܳܐ ܩ̣ܪܳܐ ܒܩܰܪܢܳܐ: ܘܰܠܥܰܡܳܐ ܠܳܐ ܙܰܗܰܪ: ܘܶܐܬܳܬ ܚܰܪܒܳܐ ܘܢܶܣܒܰܬ ܡܶܢܗܽܘܢ ܢܰܦܫܳܐ: ܗܳܝ ܢܰܦܫܳܐ ܒܰܚܛܳܗܶܝ̈ܗ̇ ܐܶܬܢܰܣܒܰܬ: ܘܰܕܡܳܗ̇ ܡܶܢ ܐܺܝܕܰܘ̈ܗܝ ܕܕܰܘܩܳܐ ܐܶܬܒܰܥ.
7 ܐܰܢ̱ܬ ܕܶܝܢ ܒܰܪܢܳܫܳܐ: ܕܰܘܩܳܐ ܝܰܗܒܬܳܟ ܠܰܕܒܶܝܬ ܝܺܣܪܳܐܶܝܠ: ܕܬܶܗܘܶܐ ܫܳܡܰܥ ܡܶܢ ܦܽܘܡܝ ܡܶܠܬܳܐ ܘܰܬܙܰܗܰܪ ܐܶܢܽܘܢ ܡܶܢܝ.
8 ܡܳܐ ܕܶܐܡܪܶܬ ܠܥܰܘܳܠܳܐ ܕܰܡܡܳܬ ܬܡܽܘܬ: ܘܠܳܐ ܐܶܡ̣ܰܪܬ ܠܶܗ ܠܥܰܘܳܠܳܐ ܕܢܶܙܕܗܰܪ ܡܶܢ ܐܽܘܪܚܶܗ: ܗܰܘ ܥܰܘܳܠܳܐ ܒܥܰܘܠܶܗ ܢܡܽܘܬ: ܘܰܕܡܶܗ ܡܶܢ ܐܺܝܕܰܝ̈ܟ ܐܶܬܒܰܥ.
9 ܐܰܢ̱ܬ ܕܶܝܢ ܐܶܢ ܙܰܗܰܪܬܳܝܗܝ ܠܥܰܘܳܠܳܐ ܕܢܶܗܦܽܘܟ ܡܶܢ ܐܽܘܪܚܶܗ ܘܠܳܐ ܗܦܰܟ: ܗܽܘ ܒܥܰܘܠܶܗ ܢܡܽܘܬ: ܘܰܐܢ̱ܬ ܢܰܦܫܳܟ ܦ̣ܰܨܺܝܬ.
10 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܡܰܪ ܠܰܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܶܡܰܪܬܽܘܢ: ܕܥܰܘܠܰܢ ܘܰܚܛܳܗܰܝ̈ܢ ܥܠܰܝܢ ܐܶܢܽܘܢ: ܘܰܒܗܽܘܢ ܡܶܬܡܣܶܝܢ ܚܢܰܢ ܐܰܝܟܰܢܳܐ ܚܳܐܶܝܢ ܚܢܰܢ.
11 ܐܶܡܰܪ ܠܗܽܘܢ: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܥܰܘܳܠܳܐ: ܐܶܠܳܐ ܕܰܢܬܽܘܒ ܥܰܘܳܠܳܐ ܡܶܢ ܥܰܘܠܶܗ ܘܢܺܚܶܐ: ܬܽܘܒܘ ܘܶܐܬܦܢܰܘ ܡܶܢ ܐܽܘܖ̈ܚܳܬܟܽܘܢ ܒܺܝ̈ܫܳܬܳܐ: ܘܠܳܐ ܬܡܽܘܬܽܘܢ ܕܒܶܝܬ ܝܺܣܪܳܐܶܝܠ.
12 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܡܰܪ ܠܰܒܢܰܝ̈ ܥܰܡܳܟ: ܙܰܕܺܝܩܽܘܬܶܗ ܕܙܰܕܺܝܩܳܐ ܠܳܐ ܡܦܰܨܝܳܐ ܠܶܗ ܒܝܰܘܡܳܐ ܕܚܳܛܶܐ: ܘܥܰܘܳܠܳܐ ܠܳܐ ܡܶܬܬܩܶܠ ܒܥܰܘܠܶܗ ܒܝܰܘܡܳܐ ܕܡܶܬܦܢܶܐ ܡܶܢ ܥܰܘܠܶܗ: ܘܙܰܕܺܝܩܳܐ ܠܳܐ ܚܳܝܶܐ ܒܝܰܘܡܳܐ ܕܚܳܛܶܐ.
13 ܡܳܐ ܕܶܐܡܪܶܬ ܠܙܰܕܺܝܩܳܐ ܕܡܶܚܳܐ ܢܺܚܶܐ: ܘܶܐܬܬܟܶܠ ܥܰܠ ܙܰܕܺܝܩܽܘܬܶܗ ܘܒܳܬܰܪܟܶܢ ܥ̣ܒܰܕ ܥܰܘܠܳܐ: ܟܽܠܳܗ̇ ܙܰܕܺܝܩܽܘܬܶܗ ܕܰܥܒܰܕ ܠܳܐ ܬܶܬܕܟܰܪ ܠܶܗ: ܐܶܠܳܐ ܒܥܰܘܠܳܐ ܕܰܥܒܰܕ ܢܡܽܘܬ.
14 ܘܡܳܐ ܕܶܐܡܪܶܬ ܠܥܰܘܳܠܳܐ ܕܰܡܡܳܬ ܬܡܽܘܬ: ܘܢܶܗܦܽܘܟ ܡܶܢ ܚܛܳܗܰܘ̈ܗܝ ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ.
15 ܘܡܶܫܟܳܢܳܐ ܕܰܢ̣ܣܰܒ ܢܦܰܢܶܐ: ܘܡܶܕܶܡ ܕܰܛܠܰܡ ܢܶܦܪܽܘܥ: ܘܰܒܦܽܘܩ̈ܕܳܢܶܐ ܕܚܰܝ̈ܶܐ ܢܗܰܠܶܟ: ܘܠܳܐ ܢܶܥܒܶܕ ܥܰܘܠܳܐ: ܡܶܚܳܐ ܢܺܚܶܐ ܘܠܳܐ ܢܡܽܘܬ.
16 ܘܰܚܛܳܗ̈ܶܐ ܟܽܠܗܽܘܢ ܕܰܥܒܰܕ ܠܳܐ ܢܶܬܕܰܟܪܽܘܢ ܠܶܗ: ܐܶܠܳܐ ܒܕܺܝܢܳܐ ܘܰܒܙܰܕܺܝܩܽܘܬܳܐ ܕܰܥܒܰܕ ܢܺܚܶܐ.
17 ܘܳܐܡܪܺܝܢ ܒܢܰܝ̈ ܥܰܡܳܟ: ܠܳܐ ܫܰܦܺܝܪܳܐ ܐܽܘܪܚܶܗ ܕܡܳܪܝܳܐ: ܐܽܘܖ̈ܚܳܬܗܽܘܢ ܗ̱ܘ ܕܺܝܠܗܽܘܢ ܠܳܐ ܫܰܦܺܝܖ̈ܳܢ.
18 ܘܟܰܕ ܢܶܗܦܽܘܟ ܙܰܕܺܝܩܳܐ ܡܶܢ ܙܰܕܺܝܩܽܘܬܶܗ ܘܢܶܥܒܶܕ ܥܰܘܠܳܐ ܒܥܰܘܠܶܗ ܢܡܽܘܬ.
19 ܘܟܰܕ ܢܶܗܦܽܘܟ ܥܰܘܳܠܳܐ ܡܶܢ ܥܰܘܳܠܽܘܬܶܗ: ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ ܒܗܽܘܢ ܢܺܚܶܐ.
20 ܘܳܐܡܪܺܝܢ ܐܢ̱ܬܽܘܢ ܠܳܐ ܫܰܦܺܝܪܳܐ ܐܽܘܪܚܶܗ ܕܡܳܪܝܳܐ: ܐ̱ܢܳܫ ܐܰܝܟ ܐܽܘܖ̈ܚܳܬܶܗ ܐܶܕܽܘܢܟܽܘܢ ܒܶܝܬ ܝܺܣܪܳܐܶܝܠ.
21 ܒܰܫܢܰܬ ܚܕܰܥܶܣܖ̈ܶܐ ܒܚܰܡܶܫܬܳܐ ܒܝܰܪܚܳܐ ܕܥܶܣܪܳܐ ܕܰܫܒܺܝܬܰܢ: ܐܶܬܳܐ ܠܘܳܬܝ ܕܶܐܬܦܰܨܺܝ ܡܶܢ ܐܽܘܪܺܫܠܶܡ: ܘܶܐܡܰܪ ܠܺܝ: ܐܶܬܚܰܪܒܰܬ ܡܕܺܝܢ̱ܬܳܐ.
22 ܘܥܰܕܠܳܐ ܢܺܐܬܶܐ ܠܘܳܬܝ ܗܰܘ ܕܶܐܬܦܰܨܺܝ: ܗܘܳܬ ܐܺܝܕܶܗ ܕܡܳܪܝܳܐ ܥܠܰܝ ܒܪܰܡܫܳܐ: ܘܰܦܬܰܚ ܦܽܘܡܝ ܥܕܰܡܳܐ ܕܶܐܬܳܐ ܠܘܳܬܝ ܗܰܘ ܕܶܐܬܦܰܨܺܝ ܒܨܰܦܪܳܐ: ܘܟܰܕ ܐܶܬܦܬܰܚ ܦܽܘܡܝ ܬܽܘܒ ܠܳܐ ܐܶܬܬܚܶܕ.
23 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
24 ܒܰܪܢܳܫܳܐ: ܐܰܝܠܶܝܢ ܕܥܳܡܪܺܝܢ ܒܚܰܖ̈ܒܳܬܳܐ ܗܳܠܶܝܢ ܕܰܐܪܥܳܐ ܕܺܝܣܪܳܐܶܝܠ ܐܳܡܪܺܝܢ: ܐܰܒܪܳܗܳܡ ܕܚܰܕ ܗܘܳܐ ܝܺܪܶܬ ܐܰܪܥܳܐ: ܚܢܰܢ ܕܣܰܓܺܝ̈ܐܶܐ ܚܢܰܢ ܠܳܐ ܝܳܪܬܺܝܢܰܢ ܠܳܗ̇.
25 ܡܶܛܽܠ ܗܳܢܳܐ ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܡܳܐ ܐܳܟܠܺܝܢ ܐܢ̱ܬܽܘܢ: ܘܥܰܝ̈ܢܰܝܟܽܘܢ ܠܰܦܬܰܟܖ̈ܰܝܟܽܘܢ ܡܪܺܝܡܺܝܢ ܐܢ̱ܬܽܘܢ: ܘܰܕܡܳܐ ܫܳܬܶܝܢ ܐ̄ܢܬܽܘܢ: ܘܨܳܒܶܝܢ ܐܢ̱ܬܽܘܢ ܠܡܺܐܪܰܬ ܐܰܪܥܳܐ.
26 ܩܳܝܡܺܝܢ ܐܢ̱ܬܽܘܢ ܥܰܠ ܣܰܝܦܰܝ̈ܟܽܘܢ: ܘܥܳܒܕܺܝܢ ܐܢ̱ܬܽܘܢ ܛܰܢܦܽܘܬܳܐ: ܘܐ̱ܢܳܫ ܐܰܢ̱ܬܰܬ ܚܰܒܪܶܗ ܡܛܰܢܦܺܝܢ ܐܢ̱ܬܽܘܢ: ܘܨܳܒܶܝܢ ܐܢ̱ܬܽܘܢ ܠܡܺܐܪܰܬ ܐܰܪܥܳܐ.
27 ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܚܰܝ ܐ̱ܢܳܐ: ܕܟܽܠ ܕܰܒܚܰܖ̈ܒܳܬܳܐ ܐܶܢܽܘܢ ܒܚܰܪܒܳܐ ܢܶܦܠܽܘܢ: ܘܟܽܠ ܕܰܒܚܰܩܠܳܐ ܡܶܐܟܽܘܠܬܳܐ ܠܚܰܝܽܘܬܳܐ ܐܶܬܶܠ ܐܶܢܽܘܢ: ܘܟܽܠ ܕܰܒܦܶܥܖ̈ܶܐ ܘܒܰܡܥܰܖ̈ܶܐ ܒܡܰܘܬܳܢܳܐ ܢܡܽܘܬܽܘܢ.
28 ܘܶܐܥܒܕܺܝܗ̇ ܠܰܐܪܥܳܐ ܠܰܚܒܳܠܳܐ ܘܰܠܬܶܡܗܳܐ: ܘܢܶܒܛܰܠ ܡܶܢܳܗ̇ ܫܽܘܒܚܳܐ ܕܥܽܘܫܢܳܗ̇: ܘܢܶܨܕܽܘܢ ܛܽܘܖ̈ܶܐ ܕܺܝܣܪܳܐܶܝܠ ܡܶܢ ܒܠܰܝ ܕܥܳܒܰܪ.
29 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܰܥܒܰܕ̇ܬܳܗ̇ ܠܰܐܪܥܳܐ ܠܰܚܒܳܠܳܐ ܘܰܠܬܶܡܗܳܐ: ܡܶܛܽܠ ܟܽܠܳܗ̇ ܛܰܢܦܽܘܬܳܐ ܕܰܥ̣ܒܰܕܘ.
30 ܐܰܢ̱ܬ ܕܶܝܢ ܒܰܪܢܳܫܳܐ: ܒܢܰܝ̈ ܥܰܡܳܟ ܕܪܳܢܶܝܢ ܒܳܟ ܥܰܠ ܓܶܢ̱ܒ ܐܶܣ̈ܶܐ: ܘܰܒܬܰܖ̈ܥܶܐ ܕܒ̈ܳܬܶܐ: ܘܰܡܡܰܠܠܺܝܢ ܚܰܕ ܥܰܡ ܚܰܕ: ܓܰܒܪܳܐ ܥܰܡ ܐܰܚܽܘܗܝ: ܘܳܐܡܪܺܝܢ: ܬܰܘ ܫܡܰܥܘ ܡܳܢܳܐ ܦܶܬܓܳܡܳܐ ܢ̣ܦܰܩ ܡܶܢ ܩܕܳܡ ܡܳܪܝܳܐ.
31 ܘܳܐܬܶܝܢ ܠܘܳܬܟ ܥܰܡܳܐ ܘܝܳܬܒܺܝܢ ܩܕܳܡܰܝܟ: ܘܫܳܡܥܺܝܢ ܦܶܬܓܳܡܰܝ̈ܟ: ܘܠܳܐ ܥܳܒܕܺܝܢ ܠܗܽܘܢ: ܡܶܛܽܠ ܕܕܰܓܳܠܽܘܬܳܐ ܒܦܽܘܡܗܽܘܢ: ܘܒܳܬܰܪ ܬܰܖ̈ܥܝܳܬܳܐ ܗ̱ܘ ܕܠܶܒܗܽܘܢ ܐܳܙܺܠܝܢ.
32 ܘܰܚܫܺܝܒ ܐܰܢ̱ܬ ܠܗܽܘܢ ܐܰܝܟ ܙܡܺܝܪܬܳܐ: ܘܰܐܝܟ ܩܳܠܳܐ ܫܰܦܺܝܪܳܐ: ܘܰܐܝܟ ܟܶܢܳܪܳܐ ܚܰܠܝܳܐ: ܘܫܳܡܥܺܝܢ ܦܶܬܓܳܡܰܝ̈ܟ ܘܠܳܐ ܥܳܒܕܺܝܢ ܠܗܽܘܢ.
33 ܡܳܐ ܕܰܗܘܰܘ ܕܶܝܢ ܦܶܬܓܳܡܰܝ̈ܟ: ܗܳܝܕܶܝܢ ܢܶܕܥܽܘܢ ܕܰܢܒܺܝܳܐ ܐܰܢ̱ܬ ܒܰܝܢܳܬܗܽܘܢ.