Ezekiel 5
The Book of Ezekiel
܀ ܚܙܩܝܐܝܠ ܗ ܀
1 ܐܰܢ̱ܬ ܕܶܝܢ ܒܰܪܢܳܫܳܐ ܣܰܒ ܠܳܟ: ܣܰܝܦܳܐ ܕܚܰܪܺܝܦ ܐܰܝܟ ܡܕܰܟܝܳܐ ܕܓܰܪܳܥܳܐ: ܘܰܐܥܒܰܪܳܝܗܝ ܥܰܠ ܪܺܝܫܳܟ ܘܥܰܠ ܕܰܩܢܳܟ: ܘܣܰܒ ܠܳܟ ܡܰܣܰܐܬܳܐ ܕܡܰܬܩ̈ܳܠܶܐ: ܘܦܰܠܶܓ ܐܶܢܽܘܢ ܠܰܬܠܳܬ ܡܢܰܘ̈ܳܢ.
2 ܘܰܚܕܳܐ ܡܶܢ ܬܠܳܬ ܡܢܰܘ̈ܳܢ: ܐܰܘܩܶܕ ܒܢܽܘܪܳܐ ܒܓܰܘ ܡܕܺܝܢ̱ܬܳܐ: ܡܳܐ ܕܰܫܠܶܡܘ ܝܰܘ̈ܡܳܬܳܐ ܕܰܚܒܽܘܫܝܳܟ: ܘܬܶܣܰܒ ܡܢܳܬܳܐ ܐ̱ܚܪܺܬܳܐ: ܘܬܶܦܣܽܘܩ ܒܣܰܝܦܳܐ ܚܕܳܪܶܝܗ̇ ܕܰܡܕܺܝܢ̱ܬܳܐ: ܘܰܡܢܳܬܳܐ ܕܰܬܠܳܬ ܬܶܕܪܶܐ ܒܪܽܘܚܳܐ: ܘܣܰܝܦܳܐ ܢܶܚܪܽܘܒ ܒܳܬܰܪܗܽܘܢ.
3 ܘܬܶܣܰܒ ܡܶܢ ܬܰܡܳܢ ܙܥܽܘܖ̈ܶܐ ܒܡܶܢܝܳܢܳܐ: ܘܬܶܨܽܘܪ ܐܶܢܽܘܢ ܒܟܶܢܦܳܟ.
4 ܘܡܶܢܗܽܘܢ ܬܽܘܒ ܬܶܣܰܒ: ܘܬܰܪܡܶܐ ܐܶܢܽܘܢ ܒܓܰܘ ܢܽܘܪܳܐ: ܘܬܰܘܩܶܕ ܐܶܢܽܘܢ ܒܢܽܘܪܳܐ: ܘܡܶܢܗܽܘܢ ܬܶܦܽܘܩ ܢܽܘܪܳܐ ܥܰܠ ܟܽܠܗܽܘܢ ܕܒܶܝܬ ܝܺܣܪܳܐܶܝܠ.
5 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܕܶܐ ܐܽܘܪܺܫܠܶܡ ܒܰܝܢܳܬ ܥܰܡ̈ܡܶܐ ܣܳܡܬܳܗ̇: ܘܟܽܠܗܶܝܢ ܡܕܺܝ̈ܢܳܬܳܐ ܚܕܺܝܖ̈ܳܢ ܠܳܗ̇.
6 ܘܚܰܠܦܰܬ ܕܺܝܢܰܝ̈ ܒܰܚܛܺܝܬܳܐ ܡܶܢ ܥܰܡ̈ܡܶܐ: ܘܦܽܘܩܕܳܢܰܝ̈ ܡܶܢ ܡܕܺܝ̈ܢܳܬܳܐ ܕܰܚܕܺܝܖ̈ܳܢ ܠܳܗ̇: ܡܶܛܽܠ ܕܕܺܝܢܰܝ̈ ܐܰܣܠܺܝܘ: ܘܰܒܦܽܘܩ̈ܕܳܢܰܝ ܠܳܐ ܗܰܠܶܟܘ.
7 ܡܶܛܽܠ ܗܳܠܶܝܢ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܬܚܫܶܒܬܽܘܢ ܡܶܢ ܥܰܡ̈ܡܶܐ ܕܰܚܕܺܝܪܺܝܢ ܠܟܽܘܢ: ܘܰܒܦܽܘܩ̈ܕܳܢܰܝ ܠܳܐ ܗܰܠܶܟܬܽܘܢ: ܘܕܺܝܢܰܝ̈ ܠܳܐ ܥܒܰܕܬܽܘܢ. ܕܺܝ̈ܢܶܐ ܕܥܰܡ̈ܡܶܐ ܕܰܚܕܺܝܪܺܝܢ ܠܟܽܘܢ ܥܒܰܕܬܽܘܢ.
8 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟܝ: ܘܶܐܥܒܶܕ ܒܓܰܘܟܝ ܕܺܝ̈ܢܶܐ ܠܥܺܝܢ ܟܽܠܗܽܘܢ ܥܰܡ̈ܡܶܐ.
9 ܘܶܐܥܒܶܕ ܒܶܟܝ ܡܶܕܶܡ ܕܠܳܐ ܥܶܒܕܶܬ: ܘܡܶܕܶܡ ܕܠܳܐ ܐܶܥܒܶܕ ܬܽܘܒ ܐܰܟܘܳܬܶܗ: ܡܶܛܽܠ ܟܽܠܳܗ̇ ܛܰܢܦܽܘܬܶܟܝ.
10 ܡܶܛܽܠ ܗܳܢܳܐ ܐܰܒܳܗ̈ܶܐ ܢܶܐܟܠܽܘܢ ܒܢܰܝ̈ܗܽܘܢ ܒܓܰܘܶܟܝ: ܘܰܒܢܰܝ̈ܳܐ ܢܶܐܟܠܽܘܢ ܠܰܐܒܳܗܰܝ̈ܗܽܘܢ: ܘܶܐܥܒܶܕ ܒܶܟܝ ܕܺܝ̈ܢܶܐ: ܘܶܐܕܪܶܐ ܠܰܐܝܠܶܝܢ ܕܡܶܫܬܰܚܪܺܝܢ ܒܓܰܘܟܝ ܠܟܽܠ ܪܽܘܚ.
11 ܡܶܛܽܠ ܗܳܢܳܐ ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܛܰܢܶܦܬܝ ܡܩܕܰܫܝ ܒܟܽܠ ܛܰܢܦ̈ܘܳܬܶܟܝ: ܘܰܒܟܽܠܳܗ̇ ܛܰܡܐܽܘܬܶܟܝ: ܐܳܦ ܐܶܢܳܐ ܐܶܕܚܩܶܟܝ: ܘܠܳܐ ܬܚܽܘܣ ܥܰܝܢܝ ܥܠܰܝܟܝ ܘܠܳܐ ܐܶܪܰܚܶܡ.
12 ܚܕܳܐ ܡܢܳܬܶܟܝ ܒܡܰܘܬܳܐ ܢܡܽܘܬܽܘܢ. ܘܰܒܟܰܦܢܳܐ ܢܣܽܘܦܽܘܢ ܒܓܰܘܟܝ: ܘܰܐ̱ܚܪܺܬܳܐ ܒܚܰܪܒܳܐ ܢܶܦܠܽܘܢ ܚܕܳܖ̈ܰܝܟܝ: ܘܕܰܬܠܳܬ ܠܟܽܠ ܪܽܘܚ ܐܶܕܪܶܐ: ܘܣܰܝܦܳܐ ܢܶܚܪܽܘܒ ܒܳܬܰܪܗܽܘܢ.
13 ܘܶܐܫܰܡܠܶܐ ܪܽܘܓܙܝ: ܘܰܐܢܺܝܚ ܚܶܡܬܝ ܒܗܽܘܢ ܘܶܐܬܒܰܝܰܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܕܡ̣ܰܠܠܶܬ ܒܰܛܢܳܢܝ: ܡܳܐ ܕܫܰܡܠܺܝ݀ܬ ܒܗܽܘܢ ܪܽܘܓܙܝ.
14 ܘܶܐܬܠܶܟܝ ܠܚܰܪܒܳܐ: ܘܰܠܚܶܣܕܳܐ ܒܥܰܡ̈ܡܶܐ ܕܰܚܕܺܝܪܺܝܢ ܠܶܟܝ ܩܕܳܡ ܟܠ ܕܥܳܒܰܪ.
15 ܘܬܶܗܘܶܝܢ ܠܚܶܣܕܳܐ ܘܰܠܓܽܘܕܳܦܳܐ: ܘܰܠܡܰܪܕܽܘܬܳܐ ܘܰܠܬܶܡܗܳܐ ܠܥܰܡ̈ܡܶܐ ܕܰܚܕܺܝܪܺܝܢ ܠܶܟܝ: ܡܳܐ ܕܥܶܒܕܶܬ ܒܶܟܝ ܕܺܝ̈ܢܶܐ: ܒܪܽܘܓܙܳܐ ܘܰܒܚܶܡܬܳܐ ܘܰܒܡܰܟܣܳܢܽܘܬܳܐ ܕܪܽܘܓܙܝ: ܐܶܢܳܐ ܡܳܪܝܳܐ ܐܶܡܪܶܬ.
16 ܡܳܐ ܕܫܰܕܪܶܬ ܥܠܰܝܟܽܘܢ ܓܶܐܖ̈ܰܝ ܒܺܝ̈ܫܶܐ ܕܟܰܦܢܳܐ ܕܰܗܘܰܘ ܠܰܚܒܳܠܳܐ: ܕܶܐܫܰܕܰܪ ܐܶܢܽܘܢ ܠܰܡܚܰܒܳܠܽܘܬܟܽܘܢ: ܘܟܰܦܢܳܐ ܐܰܘܣܶܦ ܥܠܰܝܟܽܘܢ: ܘܶܐܬܒܰܪ ܩܰܢܝܳܐ ܕܰܥܒܽܘܪܟܽܘܢ.
17 ܘܶܐܫܰܕܰܪ ܥܠܰܝܟܽܘܢ ܟܰܦܢܳܐ ܘܚܰܝܽܘܬܳܐ ܒܺܝܫܬܳܐ ܘܰܐܘܒܶܕܟܽܘܢ: ܘܡܰܘܬܳܐ ܘܰܕܡܳܐ ܢܶܥܒܰܪ ܒܟܽܘܢ: ܘܚܰܪܒܳܐ ܐܰܝܬܶܐ ܥܠܰܝܟܽܘܢ: ܐܶܢܳܐ ܡܳܪܝܳܐ ܐܶܡܪܶܬ.