Ezekiel 30
The Book of Ezekiel
܀ ܚܙܩܝܐܝܠ ܠ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܬܢܰܒܳܐ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܝܠܶܠܘ ܘܶܐܡܰܪܘ ܐܽܘܗ̇ ܠܝܰܘܡܳܐ.
3 ܕܩܰܪܺܝܒܽ ܗ̱ܘ ܝܰܘܡܳܐ ܩܰܪܺܝܒܽ ܗ̱ܘ ܝܰܘܡܶܗ: ܕܡܳܪܝܳܐ: ܝܰܘܡܳܐ ܕܰܥܢܳܢܳܐ ܘܙܰܒܢܳܐ ܕܥܰܡ̈ܡܶܐ.
4 ܘܬܺܐܬܶܐ ܚܰܪܒܳܐ ܥܰܠ ܡܶܨܪܶܝܢ: ܘܢܶܗܘܶܐ ܒܽܘܠܗܳܝܳܐ ܒܟܽܘܫ: ܡܳܐ ܕܰܢ̣ܦܰܠܘ ܚܖ̈ܺܝܒܶܐ ܒܡܶܨܪܶܝܢ: ܘܢܶܣܒܽܘܢ ܥܽܘܬܪܳܗ̇ ܘܢܶܥܩܪܽܘܢ ܫܶܬܶܐܣܶܝ̈ܗ̇.
5 ܘܟܽܘܫܳܝ̈ܶܐ: ܘܦܽܘܛܳܝ̈ܶܐ: ܘܠܽܘܒܳܝ̈ܶܐ: ܘܟܽܠܳܗ̇ ܥܰܪܳܒܳܝܳܐ ܘܟܽܘܒ: ܘܰܒܢܰܝ̈ ܐܰܪܥܳܐ ܕܰܩܝܳܡܳܐ ܥܰܡܗܽܘܢ ܒܚܰܪܒܳܐ ܢܶܦܠܽܘܢ.
6 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܢܶܦܠܽܘܢ ܣܳܡܟܶܝ̈ܗ̇ ܕܡܶܨܪܶܝܢ: ܘܢܶܬܬܒܰܪ ܚܰܝܠܳܐ ܕܥܽܘܫܢܳܗ̇: ܡܶܢ ܡܰܓܕܠܳܐ ܕܣܽܘܢܳܐ ܒܚܰܪܒܳܐ ܢܶܦܠܽܘܢ ܒܳܗ̇: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
7 ܘܢܶܚܖ̈ܒܳܢ ܒܰܝܢܳܬ ܐܰܖ̈ܥܳܬܳܐ ܕܚܰܖ̈ܒܳܢ: ܘܰܡܕܝ̈ܢܳܬܗܶܝܢ ܒܰܝܢܳܬ ܡܕܺܝ̈ܢܳܬܳܐ ܚܰܖ̈ܒܳܬܳܐ ܢܶܗܘ̈ܝܳܢ.
8 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܫܶܒܩܶ݀ܬ ܢܽܘܪܳܐ ܒܡܶܨܪܶܝܢ: ܘܶܐܬܬܒܰܪܘ ܟܽܠܗܽܘܢ ܡܥܰܕܖ̈ܳܢܶܝܗ̇.
9 ܒܶܗ ܒܝܰܘܡܳܐ ܗܰܘ: ܢܶܦܩܽܘܢ ܡܰܠܰܐܟ̈ܶܐ ܡܶܢ ܩܕܳܡܰܝ̈ ܡܣܰܪܗܒܳܐܺܝܬ: ܠܰܡܚܰܒܳܠܽܘ ܠܟܽܘܫ ܕܝܳܬܒܳܐ ܒܫܶܠܝܳܐ: ܘܢܶܗܘܶܐ ܒܗܽܘܢ ܕܠܽܘܚܝܳܐ ܒܝܰܘܡܳܗ̇ ܕܡܶܨܪܶܝܢ: ܘܗܳܐ ܡܰܛܺܝ.
10 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܰܫܠܶܡ ܐ̱ܢܳܐ ܥܽܘܬܪܳܗ̇ ܕܡܶܨܪܶܝܢ: ܒܝܰܕ ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ.
11 ܠܶܗ ܘܰܠܥܰܫܺܝ̈ܢܶܐ ܕܥܰܡܶܗ ܕܳܐܬܶܝܢ ܠܰܡܚܰܒܳܠܽܘ ܠܰܐܪܥܳܐ: ܘܢܶܫܡܛܽܘܢ ܣܰܝܦܰܝ̈ܗܽܘܢ ܥܰܠ ܡܶܨܪܶܝܢ: ܘܢܶܡܠܽܘܢܳܗ̇ ܠܰܐܪܥܳܐ ܚܖ̈ܺܝܒܶܐ.
12 ܘܶܐܥܒܶܕ ܢܰܗܖ̈ܰܘܳܬܳܐ ܠܰܚܒܳܠܳܐ: ܘܰܐܫܠܡܺܝܗ̇ ܠܰܐܪܥܳܐ ܒܺܐܝܕܳܐ ܕܒܺܝ̈ܫܶܐ: ܘܰܐܚܪܒܺܝܗ̇ ܠܰܐܪܥܳܐ ܒܰܡܠܳܐܳܗ̇ ܒܺܐܝܕܳܐ ܕܢܽܘܟܖ̈ܳܝܶܐ: ܐܶܢܳܐ ܡܳܪܝܳܐ ܡܰܠܠܶܬ.
13 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܰܘܒܶܕ ܐ̱ܢܳܐ ܦܬܰܟܖ̈ܶܐ: ܘܰܡܒܰܛܶܠ ܐ̱ܢܳܐ ܕܶܚ̈ܠܳܬܳܐ ܡܶܢ ܡܰܦܰܣ: ܘܬܽܘܒ ܠܳܐ ܢܶܗܘܶܐ ܪܰܒܳܐ ܒܰܐܪܥܳܐ ܕܡܶܨܪܶܝܢ.
14 ܘܶܐܒܰܛܠܺܝܗ̇ ܠܰܐܪܥܳܐ ܕܦܰܬܪܽܘܣ: ܘܶܐܫܒܽܘܩ ܢܽܘܪܳܐ ܒܨܳܥܳܢ: ܘܶܐܥܒܶܕ ܕܺܝܢܳܐ ܒܢܳܘ.
15 ܘܶܐܫܽܘܕ ܪܽܘܓܙܝ ܥܰܠ ܣܺܝܢ ܥܽܘܫܢܳܗ̇ ܕܡܶܨܪܶܝܢ: ܘܰܐܘܒܶܕ ܥܽܘܬܪܳܗ̇ ܕܢܳܘ.
16 ܘܶܐܫܒܽܘܩ ܢܽܘܪܳܐ ܒܡܶܨܪܶܝܢ: ܘܢܶܬܕܰܠܰܚ ܣܺܝܢ: ܘܢܳܘ ܬܶܬܪܰܥ: ܘܡܰܦܰܣ ܬܶܗܘܶܐ ܠܡܰܦܽܘܠܬܳܐ.
17 ܘܰܐܝܟ ܡܰܝ̈ܳܐ ܢܶܗܘܽܘܢ ܓܰܕܽܘ̈ܕܶܐ ܕܡܰܦܺܝܒܰܣܬ: ܘܰܒܚܰܪܒܳܐ ܢܶܦܠܽܘܢ: ܘܰܒܫܶܒܝܳܐ ܢܺܐܙܽܠܘܢ.
18 ܘܰܒܬܰܚܦܺܝܣ ܢܶܥܪܰܒ ܝܰܘܡܳܐ: ܡܳܐ ܕܬܶܒܪܶܬ ܬܰܡܳܢ ܚܽܘܛܪܳܗ̇ ܕܡܶܨܪܶܝܢ: ܘܰܒ̣ܛܶܠ ܡܶܢܳܗ̇ ܫܽܘܒܚܳܐ ܕܥܽܘܫܢܳܗ̇: ܘܰܬܟܰܣܶܝܗ̇ ܥܢܳܢܳܐ: ܘܰܒ̈ܢܳܬܳܗ̇ ܢܺܐܙܳܠ̈ܢ ܒܫܶܒܝܳܐ.
19 ܘܶܐܥܒܶܕ ܕܺܝܢܳܐ ܒܡܶܨܪܶܝܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
20 ܒܰܫܢܰܬ ܚܕܰܥܣܰܖ̈ܶܐ: ܒܰܫܒܰܥܬܳܐ ܒܝܰܪܚܳܐ ܩܰܕܡܳܝܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
21 ܒܰܪܢܳܫܳܐ: ܕܪܳܥܶܗ ܕܦܶܪܥܽܘܢ ܡܰܠܟܳܐ ܕܡܶܨܪܶܝܢ ܬܶܒ̣ܪܶܬ: ܘܠܳܐ ܡܶܬܥܨܶܒ ܕܬܶܗܘܶܐ ܠܶܗ ܐܳܣܝܽܘܬܳܐ: ܘܠܳܐ ܢܶܬܬܣܺܝܡ ܥܠܰܘܗܝ ܡܳܠܰܓܡܳܐ: ܘܠܳܐ ܢܶܬܥܨܶܒ ܘܠܳܐ ܢܶܬܚܠܶܡ: ܕܢܶܐܚܽܘܕ ܣܰܝܦܳܐ.
22 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܰܠ ܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܘܶܐܬܰܒܰܪ ܕܖ̈ܳܥܰܘܗܝ ܥܰܫܺܝ̈ܢܶܐ: ܘܰܐܪܡܶܐ ܣܰܝܦܳܐ ܡܶܢ ܐܺܝܕܰܘ̈ܗܝ.
23 ܘܶܐܒܰܕܪܺܝܗ̇ ܠܡܶܨܪܶܝܢ ܒܥܰܡ̈ܡܶܐ: ܘܶܐܕܪܶܐ ܐܶܢܽܘܢ ܒܰܡܕܺܝ̈ܢܳܬܳܐ.
24 ܘܶܐܚܰܝܶܠ ܕܖ̈ܳܥܰܘܗܝ ܕܡܰܠܟܳܐ ܕܒܳܒܶܠ: ܘܶܐܬܶܠ ܣܰܝܦܝ ܒܺܐܝ̈ܕܰܘܗܝ: ܘܢܶܦܣܽܘܩ ܕܖ̈ܳܥܰܘܗܝ ܕܦܶܪܥܽܘܢ: ܘܢܶܬܬܰܢܰܚ ܬܶܢ̈ܚܳܬܳܐ ܕܰܩܛܺܝ̈ܠܶܐ ܩܕܳܡܰܘܗܝ.
25 ܘܶܐܥܰܫܶܢ ܕܖ̈ܳܥܰܘܗܝ ܕܡܰܠܟܳܐ ܕܒܳܒܶܠ: ܘܰܕܖ̈ܳܥܰܘܗܝ ܕܦܶܪܥܽܘܢ ܢܶܦܠܽܘܢ: ܘܢܶܕܥܽܘܢ ܕܶܐܢܳܐ ܡܳܪܝܳܐ: ܡܳܐ ܕܝܶܗܒܶ݀ܬ ܣܰܝܦܝ ܒܺܐܝ̈ܕܰܘܗܝ ܕܡܰܠܟܳܐ ܕܒܳܒܶܠ: ܘܫܰܡ̣ܛܶܗ ܥܰܠ ܐܰܪܥܳܐ ܕܡܶܨܪܶܝܢ.
26 ܘܶܐܒܰܕ̇ܪܺܝܗ̇ ܠܡܶܨܪܶܝܢ ܒܥܰܡ̈ܡܶܐ: ܘܶܐܕܪܶܐ ܐܶܢܽܘܢ ܒܰܡܕܺܝ̈ܢܳܬܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.