Ezekiel 48
The Book of Ezekiel
܀ ܚܙܩܝܐܝܠ ܡܚ ܀
1 ܗܳܠܶܝܢ ܫܡܳܗ̈ܶܐ ܕܫܰܒ̈ܛܶܐ: ܡܶܢ ܚܰܪܬܳܐ ܕܓܰܪܒܝܳܐ: ܥܰܠ ܝܰܕ ܐܽܘܪܚܳܐ ܕܚܶܬܪܽܘܢ ܕܰܒܡܰܥܠܳܢܳܐ ܕܰܚܡܳܬ ܘܕܰܚܨܳܪ ܥܺܝܢܳܢ: ܘܰܬܚܽܘܡܳܐ ܕܕܰܪܡܣܽܘܩ ܕܰܒܓܰܪܒܝܳܐ ܕܥܰܠ ܝܰܕ ܚܡܳܬ: ܗܳܕܳܐ ܗ̱ܝ ܪܽܘܚܳܐ ܕܡܰܕܢܳܚܰܝ̈ ܝܰܡܳܐ ܕܕܳܢ.
2 ܘܥܰܠ ܬܚܽܘܡܳܐ ܕܕܳܢ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܳܐܫܺܝܪ.
3 ܘܥܰܠ ܬܚܽܘܡܳܐ ܕܳܐܫܺܝܪ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܢܰܦܬܳܠܺܝ.
4 ܘܥܰܠ ܬܚܽܘܡܳܐ ܕܢܰܦܬܳܠܺܝ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܰܡܢܰܫܶܐ.
5 ܘܥܰܠ ܬܚܽܘܡܳܐ ܕܰܡܢܰܫܶܐ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܪܽܘܒܺܝܠ.
6 ܘܥܰܠ ܬܚܽܘܡܳܐ ܕܪܽܘܒܺܝܠ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܰܐܦܪܶܝܡ.
7 ܘܥܰܠ ܬܚܽܘܡܳܐ ܕܰܐܦܪܶܝܡ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܺܝܗܽܘܕܳܐ.
8 ܥܰܠ ܬܚܽܘܡܳܐ ܕܺܝܗܽܘܕܳܐ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ: ܢܶܗܘܶܐ ܦܽܘܪܫܳܢܳܐ ܕܦܳܪܫܺܝܢ ܐܢ̱ܬܽܘܢ: ܦܬܳܝܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܐܘܪܟܳܐ ܐܰܝܟ ܚܕܳܐ ܡܶܢ ܡܢܰܘ̈ܳܬܳܐ: ܘܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܢܶܗܘܶܐ ܡܰܩܕܫܳܐ ܒܓܰܘܶܗ.
9 ܦܽܘܪܫܳܢܳܐ ܕܦܳܪܫܺܝܢ ܐܢ̱ܬܽܘܢ ܠܡܳܪܝܳܐ: ܐܽܘܪܟܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܐ ܥܶܣܪܳܐ ܐܰܠܦܺܝ̈ܢ
10 ܘܰܠܟܳܗ̈ܢܶܐ ܢܶܗܘܶܐ ܦܽܘܪܫܳܢܳܐ ܕܩܽܘܕܫܳܐ: ܠܓܰܪܒܝܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܐ ܥܶܣܪܳܐ ܐܰܠܦܺܝ̈ܢ: ܘܰܠܡܰܥܪܒܳܐ ܥܶܣܪܳܐ ܐܰܠܦܺܝ̈ܢ ܘܰܠܡܰܕܢܚܳܐ ܥܶܣܪܳܐ ܐܰܠܦܺܝ̈ܢ ܘܰܠܬܰܝܡܢܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܢܶܗܘܶܐ ܡܰܩܕܫܶܗ ܕܡܳܪܝܳܐ ܒܓܰܘܶܗ.
11 ܘܢܶܗܘܶܐ ܠܟܳܗ̈ܢܶܐ ܕܡܶܬܩܰܕܫܺܝܢ ܡܶܢ ܒܢܰܝ̈ ܨܳܕܽܘܩ ܕܰܢܛܰܪܘ ܢܛܽܘܖ̈ܳܬܝ: ܘܠܳܐ ܛܥܰܘ ܐܰܝܟ ܕܰܛܥܰܘ ܒܢܰܝ̈ ܝܺܣܪܳܐܶܝܠ: ܘܰܐܝܟ ܕܰܛܥܰܘ ܠܶܘܳܝ̈ܶܐ.
12 ܘܢܶܗܘܶܐ ܠܗܽܘܢ ܦܽܘܪܫܳܢܳܐ ܡܶܢ ܦܽܘܪܫܳܢܳܗ̇ ܕܰܐܪܥܳܐ: ܩܕܽܘܫ ܩܽܘܕܫ̈ܶܐ ܒܰܬܚܽܘܡܳܐ ܕܠܶܘܳܝ̈ܶܐ.
13 ܘܠܶܘܳܝ̈ܶܐ ܠܽܘܩܒܰܠ ܬܚܽܘܡܳܐ ܕܟܳܗ̈ܢܶܐ: ܐܽܘܪܟܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܐ ܥܶܣܪܳܐ ܐܰܠܦܺܝ̈ܢ ܟܽܠܶܗ ܐܰܬܪܗܽܘܢ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܐ ܥܶܣܪܳܐ ܐܰܠܦܺܝ̈ܢ
14 ܠܳܐ ܢܙܰܒܢܽܘܢ ܡܶܢܶܗ ܘܠܳܐ ܢܚܰܠܦܽܘܢ: ܘܠܳܐ ܢܰܥܒܪܽܘܢ ܖ̈ܺܝܫܝܳܬܳܐ ܕܰܐܪܥܳܐ: ܡܶܛܽܠ ܕܩܽܘܕܫܰܐ ܗ̱ܘ ܕܡܳܪܝܳܐ.
15 ܘܚܰܡܫܳܐ ܐܰܠܦܺܝ̈ܢ ܕܡܶܫܬܚܰܪ ܥܰܠ ܦܽܘܡ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܕܽܘܟܬܳܐ ܗ̱ܝ ܠܰܡܕܺܝܢ̱ܬܳܐ ܠܝܰܬܒܳܐ ܘܰܠܫܶܛܚܳܐ: ܕܬܶܗܘܶܐ ܡܕܺܝܢ̱ܬܳܐ ܒܓܰܘܳܗ̇.
16 ܘܗܳܠܶܝܢ ܡܽܘܫ̈ܚܳܬܳܐ: ܠܪܽܘܚܳܐ ܕܓܰܪܒܝܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܠܡܰܕܢܚܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܠܬܰܝܡܢܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܠܡܰܥܪܒܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ.
17 ܘܢܶܗܘܶܐ ܫܶܛܚܳܗ̇ ܕܰܡܕܺܝܢ̱ܬܳܐ: ܠܓܰܪܒܝܳܐ ܡܰܐܬܶܝܢ ܘܚܰܡܫܺܝܢ: ܘܰܠܬܰܝܡܢܳܐ ܡܰܐܬܶܝܢ ܘܚܰܡܫܺܝܢ: ܘܰܠܡܰܥܪܒܳܐ ܡܰܐܬܶܝܢ ܘܚܰܡܫܺܝܢ: ܘܰܠܡܰܕܢܚܳܐ ܡܰܐܬܶܝܢ ܘܚܰܡܫܺܝܢ.
18 ܘܰܕܡܶܫܬܚܰܪ ܠܽܘܩܒܰܠ ܦܽܘܪܫܳܢܳܐ ܕܩܽܘܕܫܳܐ: ܥܶܣܪܳܐ ܐܰܠܦܺܝ̈ܢ ܠܡܰܕܢܚܳܐ: ܘܥܶܣܪܳܐ ܐܰܠܦܺܝ̈ܢ ܠܡܰܥܪܒܳܐ: ܘܢܶܗܘܶܐ ܠܽܘܩܒܰܠ ܦܽܘܪܫܳܢܳܐ ܕܩܽܘܕܫܳܐ: ܘܬܶܗܘܶܐ ܥܠܰܠܬܳܗ̇ ܡܶܐܟܽܘܠܬܳܐ ܠܰܐܝܠܶܝܢ ܕܦܳܠܚܺܝܢ ܠܰܡܕܺܝܢ̱ܬܳܐ.
19 ܘܰܐܝܢܳܐ ܕܦܳܠܰܚ ܠܰܡܕܺܝܢ̱ܬܳܐ: ܢܶܬܦܠܰܚ ܡܶܢ ܟܽܠܗܶܝܢ ܫܰܖ̈ܒܳܬܳܐ ܕܺܝܣܪܳܐܶܝܠ.
20 ܟܽܠܶܗ ܦܽܘܪܫܳܢܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܒܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܪܽܘܫܘ ܦܽܘܪܫܳܢܳܐ ܕܩܽܘܕܫܳܐ ܡܶܢ ܝܽܘܪܬܳܢܳܐ ܕܰܡܕܺܝܢ̱ܬܳܐ.
21 ܘܰܕܡܶܫܬܰܚܰܪ ܢܶܗܘܶܐ ܠܰܡܕܰܒܪܳܢܳܐ ܕܰܡܕܺܝܢ̱ܬܳܐ: ܘܡܶܢ ܦܽܘܪܫܳܢܳܐ ܕܩܽܘܕܫܳܐ ܘܡܶܢ ܝܽܘܪܬܳܢܳܐ ܕܰܡܕܺܝܢ̱ܬܳܐ: ܠܰܬܚܽܘܡܳܐ ܕܡܰܕܢܚܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܠܡܰܥܪܒܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܒܰܬܚܽܘܡܳܐ ܕܡܰܥܪܒܳܐ: ܠܽܘܩܒܰܠ ܦܳܠܓܽܘܬܶܗ ܕܰܡܕܰܒܪܳܢܳܐ: ܘܢܶܗܘܶܐ ܦܽܘܪܫܳܢܳܐ ܕܩܽܘܕܫܳܐ: ܘܡܰܩܕܫܳܐ ܕܒܰܝܬܳܐ ܒܓܰܘܶܗ.
22 ܘܡܶܢ ܝܳܪܬܽܘܬܳܐ ܕܠܶܘܳܝ̈ܶܐ ܘܡܶܢ ܝܳܪܬܽܘܬܳܐ ܕܰܡܕܺܝܢ̱ܬܳܐ: ܡܢܳܬܶܗ ܕܰܡܕܰܒܪܳܢܳܐ ܬܶܗܘܶܐ ܒܰܡܕܺܝܢ̱ܬܳܐ ܒܰܝܢܳܬ ܬܚܽܘܡܳܐ ܕܺܝܗܽܘܕܳܐ ܠܰܬܚܽܘܡܳܐ ܕܒܶܢܝܳܡܶܝܢ.
23 ܫܰܪܟܳܐ ܕܶܝܢ ܕܫܰܒ̈ܛܶܐ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܒܶܢܝܳܡܶܝܢ.
24 ܘܥܰܠ ܬܚܽܘܡܳܐ ܕܒܶܢܝܳܡܶܝܢ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܫܶܡܥܽܘܢ.
25 ܘܥܰܠ ܬܚܽܘܡܳܐ ܕܫܶܡܥܽܘܢ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܺܐܝܣܳܟܳܪ.
26 ܘܥܰܠ ܬܚܽܘܡܳܐ ܕܺܐܝܣܳܟܳܪ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܰܙܒܽܘܠܽܘܢ.
27 ܘܥܰܠ ܬܚܽܘܡܳܐ ܕܰܙܒܽܘܠܽܘܢ: ܡܶܢ ܪܽܘܚܳܐ ܕܡܰܕܢܚܳܐ ܘܰܥܕܰܡܳܐ ܠܪܽܘܚܳܐ ܕܡܰܥܪܒܳܐ ܕܓܳܕ.
28 ܘܥܰܠ ܬܚܽܘܡܳܐ ܕܓܳܕ: ܡܶܢ ܪܽܘܚܳܐ ܕܬܰܝܡܢܳܐ: ܢܶܗܘܶܐ ܬܚܽܘܡܶܗ ܡܶܢ ܬܳܡܳܪ ܘܰܥܕܰܡܳܐ ܠܡܰܝ̈ ܡܪܺܝܒܰܬ: ܩܰܕܺܝܫ ܝܽܘܪܬܳܢܶܗ ܥܰܠ ܝܰܡܳܐ ܪܰܒܳܐ.
29 ܗܳܕܳܐ ܗ̱ܝ ܐܰܪܥܳܐ ܕܰܬܦܰܠܓܽܘܢ ܝܳܪܬܽܘܬܳܐ ܠܫܰܒ̈ܛܶܐ ܕܺܝܣܪܳܐܶܝܠ: ܘܗܳܠܶܝܢ ܐܶܢܶܝܢ ܦܳܠܰܓܘ̈ܳܬܗܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
30 ܘܗܳܠܶܝܢ ܡܰܦܩܳܢܶܝ̈ܗ̇ ܕܰܡܕܺܝܢ̱ܬܳܐ: ܡܶܢ ܪܽܘܚܳܐ ܕܓܰܪܒܝܳܐ: ܡܫܽܘܚܬܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ.
31 ܘܬܰܖ̈ܥܶܝܗ̇ ܕܰܡܕܺܝܢ̱ܬܳܐ: ܥܰܠ ܫܡܳܗ̈ܶܐ ܕܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ: ܒܓܰܪܒܝܳܐ ܬܠܳܬܳܐ ܬܰܖ̈ܥܺܝܢ: ܚܰܕ ܕܪܽܘܒܺܝܠ: ܘܚܰܕ ܕܺܝܗܽܘܕܳܐ: ܘܚܰܕ ܕܠܶܘܺܝ.
32 ܘܰܒܡܰܕܢܚܳܐ ܡܫܽܘܚܬܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܬܠܳܬܳܐ ܬܰܖ̈ܥܺܝܢ: ܚܰܕ ܕܝܰܘܣܶܦ: ܘܚܰܕ ܕܒܶܢܝܳܡܶܝܢ: ܘܚܰܕ ܕܕܳܢ.
33 ܘܰܒܬܰܝܡܢܳܐ ܡܫܽܘܚܬܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܬܠܳܬܳܐ ܬܰܖ̈ܥܺܝܢ: ܚܰܕ ܕܫܶܡܥܽܘܢ: ܘܚܰܕ ܕܺܐܝܣܳܟܳܪ: ܘܚܰܕ ܕܰܙܒܽܘܠܽܘܢ.
34 ܘܰܒܡܰܥܪܒܳܐ ܡܫܽܘܚܬܳܐ ܐܰܪܒܥܳܐ ܐܰܠܦܺܝ̈ܢ ܘܚܰܡܶܫܡܳܐܐ: ܘܰܬܠܳܬܳܐ ܬܰܖ̈ܥܺܝܢ: ܚܰܕ ܕܓܳܕ: ܘܚܰܕ ܕܳܐܫܺܝܪ: ܘܚܰܕ ܕܢܰܦܬܳܠܺܝ.
35 ܘܰܚܕܳܪܶܝܗ̇ ܬܡܳܢܬܰܥܣܰܪ ܐܰܠܦܺܝ̈ܢ ܘܰܫܡܳܗ̇ ܕܰܡܕܺܝܢ̱ܬܳܐ ܡܶܢ ܝܰܘ̈ܡܶܝܗ̇ ܡܳܪܝܳܐ ܫܰܡܗܳܗ̇.