Ezekiel 28
The Book of Ezekiel
܀ ܚܙܩܝܐܝܠ ܟܚ ܀
1 ܥܰܠ ܡܰܠܟܳܐ ܕܨܽܘܪ. ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܡܰܪ ܠܪܰܒܳܐ ܕܨܽܘܪ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܬܬܪܺܝܡ ܠܶܒܳܟ ܘܶܐܡ̣ܰܪܬ ܕܰܐܠܳܗܳܐ ܐ̱ܢܳܐ: ܘܡܰܘܬܒܳܐ ܕܰܐܠܳܗܳܐ ܝܶܬܒܶܬ ܒܠܶܒܳܐ ܕܝܰܡ̈ܡܶܐ: ܘܒܰܪܢܳܫܳܐ ܐܰܢ̱ܬ ܘܠܳܐ ܗܘܰܝܬ ܐܰܠܳܗܳܐ: ܘܰܚ̣ܫܰܒܬ ܠܶܒܳܟ ܐܰܝܟ ܠܶܒܳܐ ܕܰܐܠܳܗܳܐ.
3 ܕܰܠܡܳܐ ܚܰܟܺܝܡ ܐܰܢ̱ܬ ܡܶܢ ܕܳܢܺܝܐܶܝܠ: ܐܰܘ ܟܰܣ̈ܝܳܬܳܐ ܚܙܰܝܬ ܒܚܰܟܺܝܡܽܘܬܳܟ.
4 ܘܰܒܣܽܘܟܳܠܳܟ ܥ̣ܒܰܕܬ ܠܳܟ ܚܰܝܠܳܐ: ܘܰܚ̣ܡܰܠܬ ܣܺܐܡܳܐ ܘܕܰܗܒܳܐ ܒܶܝܬ ܓܰܙܰܝ̈ܟ.
5 ܒܣܽܘܓܳܐܐ ܕܚܶܟܡܬܳܟ ܘܰܕܬܶܐܓܽܘܪܬܳܟ ܐܰܣܓܺܝܬ ܥܽܘܬܪܳܟ: ܘܶܐܬܬܪܺܝܡ ܠܶܒܳܟ ܒܥܽܘܬܪܳܟ.
6 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܚ̣ܫܰܒܬ ܠܶܒܳܟ ܐܰܝܟ ܠܶܒܳܐ ܕܰܐܠܳܗܳܐ
7 ܗܳܐ ܡܰܝܬܶܐ ܐ̱ܢܳܐ ܥܠܰܝܟ ܢܽܘܟܖ̈ܳܝܶܐ ܥܰܫܺܝ̈ܢܶܐ ܕܥܰܡ̈ܡܶܐ: ܘܢܶܫܡܛܽܘܢ ܣܰܝܦܰܝ̈ܗܽܘܢ ܥܰܠ ܫܽܘܦܪܳܗ̇ ܕܚܶܟܡܬܳܟ: ܘܰܢܛܰܢܦܽܘܢ ܫܽܘܒܚܳܟ.
8 ܘܢܰܚܬܽܘܢܳܟ ܠܰܚܒܳܠܳܐ: ܘܰܬܡܽܘܬ ܡܰܘܬܳܐ ܕܰܩܛܺܝ̈ܠܶܐ ܒܠܶܒܳܐ ܕܝܰܡ̈ܡܶܐ.
9 ܕܰܠܡܳܐ ܐܳܡܰܪ ܐܰܢ̱ܬ ܩܕܳܡ ܩܳܛܽܘܠܰܝ̈ܟ ܕܰܐܠܳܗܳܐ ܐ̱ܢܳܐ: ܡܶܛܽܠ ܕܒܰܪܢܳܫܳܐ ܐܰܢ̱ܬ ܒܺܐܝܕܳܐ ܕܩܳܛܽܘܠܰܝ̈ܟ: ܘܠܳܐ ܗܘܰܝܬ ܐܰܠܳܗܳܐ
10 ܒܺܐܝܕܳܐ ܕܥܽܘܖ̈ܠܶܐ ܢܽܘܟܖ̈ܳܝܶܐ ܬܡܽܘܬ: ܡܶܛܽܠ ܕܶܐܢܳܐ ܡܰܠܠܶܬ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
11 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
12 ܒܰܪܢܳܫܳܐ: ܐܶܠܺܝ ܐܽܘܠܺܝܬܳܐ ܥܰܠ ܡܰܠܟܳܐ ܕܨܽܘܪ: ܘܶܐܡܰܪ ܠܶܗ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܢ̱ܬ ܛܰܒܥܳܐ ܐܰܢ̱ܬ ܕܰܕܡܽܘܬܳܐ ܕܰܡܠܶܐ ܚܶܟܡܬܳܐ: ܘܰܟܠܺܝܠܳܐ ܕܫܽܘܒܚܳܐ.
13 ܒܰܥܕܶܢ ܦܰܪܕܰܝܣܶܗ ܕܰܐܠܳܗܳܐ ܗܘܰܝܬ: ܘܟܽܠܗܶܝܢ ܟܺܐܦ̈ܶܐ ܛܳܒ̈ܳܬܳܐ ܐܶܬܚܰܙܰܩܬ: ܣܰܪܕܽܘܢ: ܘܩܰܪܟܶܕܢܳܐ: ܘܰܙܡܰܪܓܕܳܐ: ܘܒܶܪܽܘܠܳܐ: ܘܣܰܦܺܝܠܳܐ: ܘܺܐܝܣܦܽܘܢ: ܘܰܩܪܽܘܣܛܶܠܽܘܣ: ܘܡܰܖ̈ܓܳܢܝܳܬܳܐ ܘܕܰܗܒܳܐ ܡ̣ܠܰܝܬ ܒܶܝܬ ܒܶܝܬ ܓܰܙܰܝ̈ܟ: ܘܟܺܐܦ̈ܶܐ ܛܳܒ̈ܳܬܳܐ ܒܶܝܬ ܚܡܳܠܰܝ̈ܟ: ܡܶܢ ܝܰܘܡܳܐ ܕܶܐܬܒܪܺܝܬ.
14 ܘܰܗܘܰܝܬ ܥܰܡ ܟܪܽܘܒܳܐ ܕܰܡܫܺܝܚ .ܡܰܛܰܠ: ܘܝܰܗܒܬܳܟ ܒܛܽܘܪܳܐ ܕܩܽܘܕܫܶܗ ܕܰܐܠܳܗܳܐ: ܘܰܗܘܰܝܬ ܒܰܝܢܳܬ ܟܺܐܦ̈ܶܐ ܕܢܽܘܪܳܐ.
15 ܘܗܰܠܶܟܬ ܕܠܳܐ ܡܽܘܡ ܒܽܐܘܖ̈ܚܳܬܳܟ: ܡܶܢ ܝܰܘܡܳܐ ܕܶܐܬܒܪܺܝܬ ܥܕܰܡܳܐ ܕܶܐܫܬܟܰܚ ܒܳܟ ܥܰܘܠܳܐ.
16 ܒܣܽܘܓܳܐܐ ܕܬܶܐܓܽܘܪܬܳܟ ܡ̣ܠܰܝܬ ܓܰܘܳܟ ܥܰܘܠܳܐ: ܘܰܚ̣ܛܰܝܬ ܘܰܩܛܰܠܬܳܟ ܡܶܢ ܛܽܘܪܶܗ ܕܰܐܠܳܗܳܐ: ܘܰܐܘܒܕܳܟ ܟܪܽܘܒܳܐ ܕܡܰܛܰܠ ܡܶܢ ܓܰܘ ܟܺܐܦ̈ܶܐ ܕܢܽܘܪܳܐ.
17 ܥܰܠ ܕܶܐܬܬܪܺܝܡ ܠܶܒܳܟ ܒܫܽܘܦܪܳܟ: ܐܶܬܚܰܒܠܰܬ ܚܶܟܡܬܳܟ ܥܰܡ ܫܽܘܦܪܳܟ: ܘܒܰܐܪܥܳܐ ܫܕܺܝܬܳܟ ܩܕܳܡ ܡܰܠ̈ܟܶܐ: ܘܝܰܗܒܬܳܟ ܠܗܽܘܢ ܠܚܶܙܘܳܐ.
18 ܒܣܽܘܓܳܐܐ ܕܥܶܬܳܟ ܘܰܒܥܰܘܠܳܐ ܕܬܶܐܓܽܘܪܬܳܟ ܛܰܢܶܦ̣ܬ ܡܰܩܕܫܳܟ: ܐܰܦܶܩ ܢܽܘܪܳܐ ܡܶܢ ܓܰܘܳܟ ܘܗܺܝ ܬܶܐܟܠܳܟ: ܘܶܐܥܒܕܳܟ ܩܶܛܡܳܐ ܒܰܐܪܥܳܐ: ܠܥܺܝܢ ܟܽܠ ܕܚܳܙܶܝܢ ܠܳܟ.
19 ܘܟܽܠ ܕܝܳܕܥܺܝܢ ܠܳܟ ܒܶܝܬ ܥܰܡ̈ܡܶܐ: ܢܶܬܡܗܽܘܢ ܥܠܰܝܟ: ܘܗܳܘܶܐ ܐܰܢ̱ܬ ܠܰܐܒܕܳܢܳܐ: ܘܠܰܝܬ ܐܰܢ̱ܬ ܠܥܳܠܰܡ. ܥܰܠ ܨܰܝܕܳܢ.
20 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
21 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܥܰܠ ܨܰܝܕܳܢ: ܘܶܐܬܢܰܒܳܐ ܥܠܶܝܗ̇.
22 ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟܝ ܨܰܝܕܳܢ: ܘܶܐܫܬܰܒܰܚ ܒܶܟܝ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܥܶܒܕܶܬ ܒܳܗ̇ ܕܺܝܢܰܝ̈ ܘܶܐܬܩܰܕܫܶ݀ܬ ܒܳܗ̇.
23 ܘܫܰܕܪܶܬ ܥܠܶܝܗ̇ ܡܰܘܬܳܢܳܐ ܘܰܕܡܳܐ ܒܫܽܘ̈ܩܶܝܗ̇: ܘܢܶܦܠܽܘܢ ܚܖ̈ܺܝܒܶܝܗ̇ ܒܓܰܘܳܗ̇ ܒܚܰܪܒܳܐ ܕܬܶܚܕܪܺܝܗ̇: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
24 ܘܬܽܘܒ ܠܳܐ ܢܶܗܘܶܐ ܠܰܕܒܶܝܬ ܝܺܣܪܳܐܶܝܠ: ܓܶܕܕ̈ܶܐ ܡܰܪܺܝܖ̈ܳܬܳܐ ܘܟܺܐܒܳܐ ܕܰܡܢܰܘܶܠ: ܡܶܢ ܟܽܠܗܽܘܢ ܕܰܚܕܺܝܪܺܝܢ ܠܗܽܘܢ: ܘܰܡܨܰܥܪܺܝܢ ܠܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܶܐ ܡܳܖ̈ܰܘܳܬܳܐ.
25 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܳܐ ܕܟܰܢܫܶ݀ܬ ܠܰܕܒܶܝܬ ܝܺܣܪܳܐܶܝܠ ܡܶܢ ܥܰܡ̈ܡܶܐ ܕܶܐܬܒܰܕܰܪܘ ܒܰܝܢܳܬܗܽܘܢ: ܘܶܐܬܩܰܕܫܶ݀ܬ ܒܗܽܘܢ ܠܥܺܝܢ ܥܰܡ̈ܡܶܐ: ܘܢܶܬܒܽܘܢ ܒܰܐܪܥܳܐ ܕܝܶܗܒܶ݀ܬ ܠܥܰܒܕܝ ܝܰܥܩܽܘܒ.
26 ܘܢܶܬܒܽܘܢ ܒܳܗ̇ ܒܫܶܠܝܳܐ: ܘܢܶܒܢܽܘܢ ܒ̈ܳܬܶܐ ܘܢܶܨܒܽܘܢ ܟܰܖ̈ܡܶܐ: ܘܢܶܬܒܽܘܢ ܒܣܰܒܪܳܐ: ܡܳܐ ܕܥܶܒܕܶܬ ܕܺܝ̈ܢܶܐ ܡܶܢ ܟܽܠܗܽܘܢ ܥܰܡ̈ܡܶܐ ܕܰܚܕܳܖ̈ܰܝܗܽܘܢ: ܕܡܰܗܪܺܝܢ ܠܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܗܽܘܢ.