Ezekiel 32
The Book of Ezekiel
܀ ܚܙܩܝܐܝܠ ܠܒ ܀
1 ܒܰܫܢܰܬ ܚܕܰܥܶܣܖ̈ܶܐ ܒܝܰܪܚܳܐ ܕܰܬܪܶܥܣܰܪ: ܒܚܰܕ ܒܝܰܪܚܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܠܺܝ ܐܽܘܠܺܝܬܳܐ ܥܰܠ ܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܘܶܐܡܰܪ ܠܶܗ: ܠܰܐܪܥܳܐ ܕܥܰܡ̈ܡܶܐ ܐܶܬܕܰܡܺܝܬ: ܘܰܐܢ̱ܬ ܐܰܝܟ ܬܰܢܺܝܢܳܐ ܐܰܢ̱ܬ ܕܝܰܡ̈ܡܶܐ: ܕܰܩܰܪܬ ܒܢܰܗܖ̈ܰܘܳܬܳܟ: ܘܕܰܠ̣ܰܚܬ ܡܰܝ̈ܳܐ ܒܖ̈ܶܓܠܰܝܟ: ܘܕܳܫܬ ܢܰܗܖ̈ܰܘܳܬܗܽܘܢ.
3 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܦܳܪܶܣ ܐ̱ܢܳܐ ܥܠܰܝܟ ܡܨܺܝܕܬܝ: ܒܰܟܢܽܘܫܝܳܐ ܕܥܰܡ̈ܡܶܐ ܣܰܓܺܝ̈ܐܶܐ: ܘܢܰܣܩܽܘܢܳܟ ܒܰܡܨܺܝܕܬܝ.
4 ܘܶܐܫܕܶܝܟ ܒܰܐܪܥܳܐ: ܘܥܰܠ ܐܰܦܰܝ̈ ܚܰܩܠܳܐ ܐܶܣܚܦܳܟ: ܘܰܐܫܟܶܢ ܥܠܰܝܟ ܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܶܐܣܰܒܰܥ ܡܶܢܟ ܟܽܠܳܗ̇ ܚܰܝܽܘܬܳܐ ܕܰܐܪܥܳܐ.
5 ܘܰܐܪܡܶܐ ܒܶܣܪܳܟ ܥܰܠ ܛܽܘܖ̈ܶܐ: ܘܢܶܬܡܠܽܘܢ ܢܰܚ̈ܠܶܐ ܡܶܢ ܪܶܡܬܳܟ.
6 ܘܰܐܫܩܶܐ ܐܰܪܥܳܐ ܕܕܰܘܩܰܝ̈ܟ ܡܶܢ ܕܡܳܟ: ܘܛܽܘܖ̈ܶܐ ܘܢܰܚ̈ܠܶܐ ܢܶܬܡܠܽܘܢ ܡܶܢܳܟ.
7 ܘܶܐܟܰܣܶܐ ܒܰܕܥܳܟܳܟ ܫܡܰܝܳܐ: ܘܰܐܥܡܶܛ ܟܰܘܟܒܰܝ̈ܗܽܘܢ: ܘܫܶܡܫܳܐ ܒܰܥܢܳܢ̈ܶܐ ܢܶܬܟܰܣܶܐ: ܘܣܰܗܪܳܐ ܠܳܐ ܢܰܢܗܰܪ ܢܽܘܗܪܶܗ.
8 ܘܟܽܠܗܽܘܢ ܢܰܗܺܝܖ̈ܶܐ ܕܡܰܢܗܪܺܝܢ ܒܰܫܡܰܝܳܐ ܐܰܥܡܶܛ ܐܶܢܽܘܢ ܥܠܰܝܟ: ܘܶܐܥܒܶܕ ܚܶܫܽܘܟܳܐ ܒܰܐܪܥܳܟ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
9 ܘܰܐܚܡܶܬ ܠܶܒܳܐ ܕܥܰܡ̈ܡܶܐ ܣܰܓܺܝ̈ܐܶܐ: ܡܳܐ ܕܰܐܝܬܺܝܬ ܬܒܳܪܳܟ ܒܶܝܬ ܥܰܡ̈ܡܶܐ: ܘܒܰܡܕܺܝ̈ܢܳܬܳܐ ܕܠܳܐ ܝܳܕܰܥ ܐܰܢ̱ܬ ܠܗܶܝܢ.
10 ܘܰܐܬܡܰܗ ܥܠܰܝܟ ܥܰܡ̈ܡܶܐ ܣܰܓܺܝ̈ܐܶܐ: ܘܡܰܠܟܰܝ̈ܗܽܘܢ ܢܶܕܚܠܽܘܢ: ܡܳܐ ܕܰܐܒܪܩܶܬ ܣܰܝܦܝ ܥܰܠ ܐܰܦܰܝ̈ܗܽܘܢ: ܘܢܶܕܚܠܽܘܢ ܘܢܶܬܪܰܗܒܽܘܢ ܐ̱ܢܳܫ ܒܢܰܦܫܶܗ: ܒܝܰܘܡܳܐ ܕܡܰܦܽܘܠܬܳܟ.
11 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܚܰܪܒܶܗ ܕܡܰܠܟܳܐ ܕܒܳܒܶܠ ܬܺܐܬܶܐ ܥܠܰܝܟ.
12 ܒܚܰܪܒܳܐ ܕܓܰܢ̱ܒܳܖ̈ܶܐ ܐܰܪܡܶܐ ܥܽܘܫܢܳܟ: ܘܰܕܟܽܠܗܽܘܢ ܥܰܫܺܝ̈ܢܶܐ ܕܥܰܡ̈ܡܶܐ: ܘܢܶܒܙܽܘܢ ܥܽܘܫܢܳܗ̇ ܕܡܶܨܪܶܝܢ: ܘܢܶܬܒܙܶܙ ܟܽܠܶܗ ܥܽܘܬܪܳܗ̇.
13 ܘܰܐܘܒܶܕ ܒܥܺܝܪܳܗ̇ ܡܶܢ ܡܰܝ̈ܳܐ ܣܰܓܺܝ̈ܐܶܐ: ܘܬܽܘܒ ܪܶܓܠܳܐ ܕܒܰܪܢܳܫܳܐ ܠܳܐ ܬܕܰܠܰܚ ܐܶܢܽܘܢ: ܐܳܦܠܳܐ ܦܰܪܣܬܳܐ ܕܰܒܥܺܝܪܳܐ.
14 ܗܳܝܕܶܝܢ ܐܰܬܩܶܢ ܡܰܝ̈ܗܽܘܢ: ܘܢܰܗܖ̈ܰܘܳܬܗܽܘܢ ܐܰܪܕܶܐ ܐܰܝܟ ܡܶܫܚܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܡܳܐ ܕܰܥܒܰܕܬܳܗ̇ ܠܰܐܪܥܳܐ ܕܡܶܨܪܶܝܢ ܠܰܚܒܳܠܳܐ: ܘܬܶܚܪܰܒ ܐܰܪܥܳܐ ܒܰܡܠܳܐܳܗ̇. ܡܳܐ ܕܰܡܚܺܝ݀ܬ ܠܟܽܠܗܽܘܢ ܥܳܡܽܘܖ̈ܶܝܗ̇: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
16 ܐܽܘܠܺܝܬܳܐ ܗ̱ܝ ܘܰܒ̈ܢܳܬܗܽܘܢ ܕܥܰܡ̈ܡܶܐ ܐܳܠܶܝܢ ܠܳܗ̇: ܥܰܠ ܡܶܨܪܶܝܢ ܘܥܰܠ ܟܽܠܶܗ ܥܽܘܬܪܳܗ̇ ܢܶܐܠ̈ܝܳܢܳܗ̇: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
17 ܒܰܫܢܰܬ ܚܕܰܥܶܣܖ̈ܶܐ ܒܚܰܡܶܫܰܥܶܣܪܳܐ ܒܝܰܪܚܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
18 ܒܰܪܢܳܫܳܐ: ܐܶܠܺܝ ܐܽܘܠܺܝܬܳܐ ܥܰܠ ܚܰܝܠܳܗ̇ ܕܡܶܨܪܶܝܢ: ܘܰܐܚܶܬܳܝܗܝ ܥܰܡܳܗ̇ ܠܒܶܝܬ ܥܰܡ̈ܡܶܐ ܥܰܫܺܝ̈ܢܶܐ: ܠܰܐܪܥܳܐ ܬܰܚܬܳܝܬܳܐ ܥܰܡ ܢܳܚܬܰܝ̈ ܓܽܘܒܳܐ.
19 ܡܶܢ ܡܰܝ̈ܳܐ ܒܰܣܺܝ̈ܡܶܐ ܚܽܘܬ ܘܰܕܡܳܟ ܥܰܡ ܥܽܘܖ̈ܠܶܐ.
20 ܘܥܰܡ ܩܛܺܝܠܰܝ̈ ܣܰܝܦܳܐ ܢܶܦܠܽܘܢ: ܘܰܢܢܰܓܘܢܶܗ ܘܰܠܟܽܠܶܗ ܚܰܝܠܶܗ.
21 ܘܰܢܡܰܠܠܽܘܢ ܥܰܡ ܓܰܕܽܘܕܰܝ̈ܗܽܘܢ ܫܰܠܺܝܛܳܢ̈ܶܐ ܕܥܰܡ̈ܡܶܐ ܡܶܢ ܓܰܘ ܫܝܽܘܠ: ܘܢܶܚܬܽܘܢ ܘܢܶܫܟܒܽܘܢ ܥܽܘܖ̈ܠܶܐ ܥܰܡ ܩܛܺܝܠܰܝ̈ ܣܰܝܦܳܐ.
22 ܬܰܡܳܢ ܐܳܬܽܘܪ ܘܟܽܠܶܗ ܟܶܢܫܳܗ̇ ܚܕܳܪ ܩܰܒܪܶܗ: ܟܽܠܗܽܘܢ ܩܛܺܝ̈ܠܶܐ ܕܰܢܦܰܠܘ ܒܣܰܝܦܳܐ.
23 ܕܰܥ̣ܒܰܕܘ ܩܰܒܪܶܗ ܒܰܫܦܽܘ̈ܠܰܝ ܓܽܘܒܳܐ: ܘܰܗܘܳܐ ܟܶܢܫܶܗ ܚܕܳܪ ܩܰܒܪܶܗ: ܟܽܠܗܽܘܢ ܩܛܺܝ̈ܠܶܐ ܕܰܢ̣ܦܰܠܘ ܒܣܰܝܦܳܐ: ܥܰܠ ܕܰܥܒܰܕܘ ܬܒܳܪܳܐ ܒܰܐܪܥܳܐ ܕܚܰܝ̈ܶܐ.
24 ܬܰܡܳܢ ܥܺܝܠܰܡ ܘܟܽܠܶܗ ܚܰܝܠܳܗ̇ ܚܕܳܪ ܩܰܒܪܶܗ ܟܽܠܗܽܘܢ ܩܛܺܝ̈ܠܶܐ ܕܰܢܦܰܠܘ ܒܣܰܝܦܳܐ: ܘܰܢ̣ܚܶܬܘ ܥܽܘܖ̈ܠܶܐ ܠܰܐܪܥܳܐ ܬܰܚܬܳܝܬܳܐ: ܥܰܠ ܕܰܥ̣ܒܰܕܘ ܬܒܳܪܳܐ ܒܰܐܪܥܳܐ ܕܚܰܝ̈ܶܐ: ܘܩܰܒܶܠܘ ܨܰܥܪܗܽܘܢ ܥܰܡ ܢܳܚܬܰܝ̈ ܓܽܘܒܳܐ.
25 ܘܒܰܝܢܳܬ ܩܛܺܝ̈ܠܶܐ ܥ̣ܒܰܕܘ ܠܶܗ ܡܰܫܟܒܳܐ ܡܶܨܥܰܬ ܚܰܝܠܶܗ: ܘܰܚܕܺܝܪܺܝܢ ܠܩܰܒܪܶܗ ܟܽܠܗܽܘܢ ܥܽܘܖ̈ܠܶܐ ܕܰܩܛܺܝܠܺܝܢ ܒܣܰܝܦܳܐ: ܥܰܠ ܕܰܥ̣ܒܰܕܘ ܬܒܳܪܳܐ ܒܰܐܪܥܳܐ ܕܚܰܝ̈ܶܐ: ܘܩܰܒܶܠܘ ܨܰܥܪܗܽܘܢ ܥܰܡ ܢܳܚܬܰܝ̈ ܓܽܘܒܳܐ: ܘܒܰܝܢܳܬ ܩܛܺܝ̈ܠܶܐ ܐܶܬܚܫܶܒܘ.
26 ܬܰܡܳܢ ܡܳܫܳܟ: ܘܬܽܘܒܺܝܠ ܘܟܽܠܶܗ ܚܰܝܠܳܗ̇ ܚܕܳܪ ܩܰܒܪܶܗ: ܟܽܠܗܽܘܢ ܥܽܘܖ̈ܠܶܐ ܕܰܩܛܺܝܠܺܝܢ ܒܣܰܝܦܳܐ: ܥܰܠ ܕܰܥܒܰܕܘ ܬܒܳܪܳܐ ܒܰܐܪܥܳܐ ܕܚܰܝ̈ܶܐ.
27 ܠܳܐ ܢܶܫܟܒܽܘܢ ܥܰܡ ܓܰܢ̱ܒܳܖ̈ܶܐ ܕܢܳܦܠܺܝܢ ܡܶܢ ܥܽܘܖ̈ܠܶܐ: ܕܰܢ̣ܚܶܬܘ ܠܰܫܝܽܘܠ ܒܡܳܐܢܰܝ̈ ܩܪܳܒܗܽܘܢ: ܘܣ̣ܳܡܘ ܣܰܝܦܰܝ̈ܗܽܘܢ ܬܚܶܝܬ ܖ̈ܺܝܫܰܝܗܽܘܢ: ܘܰܗܘܳܐ ܥܰܘܠܗܽܘܢ ܥܰܠ ܓܰܖ̈ܡܰܝܗܽܘܢ: ܥܰܠ ܕܰܥܒܰܕܘ ܒܓܰܢ̱ܒܳܪܽܘܬܗܽܘܢ ܬܒܳܪܳܐ ܒܰܐܪܥܳܐ ܕܚܰܝ̈ܶܐ.
28 ܐܰܢ̱ܬ ܕܶܝܢ ܒܰܝܢܳܬ ܥܽܘܖ̈ܠܶܐ ܬܶܫܟܰܒ: ܘܬܶܕܡܰܟ ܥܰܡ ܩܛܺܝ̈ܠܰܝ ܣܰܝܦܳܐ.
29 ܬܰܡܳܢ ܐܰܕܽܘܡ ܘܡܰܠܟܶܝ̈ܗ̇ ܘܟܽܠܗܽܘܢ ܪܰܘܖ̈ܒܳܢܶܝܗ̇: ܕܶܐܬܚܫܶܒܘ ܒܓܰܢ̱ܒܳܪܽܘܬܗܽܘܢ ܥܰܡ ܩܛܺܝ̈ܠܰܝ ܣܰܝܦܳܐ: ܥܰܡ ܥܽܘܖ̈ܠܶܐ ܢܶܕܡܟܽܘܢ ܘܥܰܡ ܢܳܚܬܰܝ̈ ܓܽܘܒܳܐ.
30 ܬܰܡܳܢ ܫܰܠܺܝܛܳܢ̈ܶܐ ܕܓܰܪܒܝܳܐ ܘܟܽܠܗܽܘܢ ܨܰܝ̈ܕܢܳܝܶܐ: ܕܰܢܚܶܬܘ ܥܰܡ ܩܛܺܝܠܰܝ̈ ܣܰܝܦܳܐ: ܟܰܕ ܒܗܶܬܘ ܘܶܐܬܬܒܰܪܘ ܡܶܢ ܓܰܢ̱ܒܳܪܽܘܬܗܽܘܢ: ܘܰܕܡܶܟܘ ܥܽܘܖ̈ܠܶܐ ܥܰܡ ܩܛܺܝܠܰܝ̈ ܣܰܝܦܳܐ: ܘܩ̣ܰܒܶܠܘ ܒܶܗܬܰܬܗܽܘܢ ܥܰܡ ܢܳܚܬܰܝ̈ ܓܽܘܒܳܐ.
31 ܠܗܳܠܶܝܢ ܢܶܚܙܶܐ ܦܶܪܥܽܘܢ ܘܢܶܬܒܰܝܰܐ ܥܰܠ ܟܽܠܶܗ ܚܰܝܠܶܗ ܩܛܺܝܠܰܝ̈ ܣܰܝܦܳܐ: ܦܶܪܥܽܘܢ ܗܽܘ ܘܟܽܠܶܗ ܚܰܝܠܶܗ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
32 ܥܶܒܕܶܬ ܓܶܝܪ ܬܒܳܪܶܗ ܒܰܐܪܥܳܐ ܕܚܰܝ̈ܶܐ: ܘܰܐܕܡܶܟܬܶܗ ܒܰܝܢܳܬ ܥܽܘܖ̈ܠܶܐ ܥܰܡ ܩܛܺܝܠܰܝ̈ ܣܰܝܦܳܐ: ܦܶܪܥܽܘܢ ܗܽܘ ܘܟܽܠܶܗ ܚܰܝܠܶܗ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.