Ezekiel 41
The Book of Ezekiel
܀ ܚܙܩܝܐܝܠ ܡܐ ܀
1 ܘܰܐܥܠܰܢܝ ܠܗܰܝܟܠܳܐ: ܘܡܰܫܚܶܗ ܠܰܦܪܽܘܣܬܕܳܐ: ܫܶܬ ܐܰܡܺܝ̈ܢ ܦܬܳܝܶܗ ܡܶܟܳܐ: ܘܫܶܬ ܐܰܡܺܝ̈ܢ ܦܬܳܝܶܗ ܡܶܟܳܐ.
2 ܘܰܦܬܳܝܶܗ ܕܡܰܫܟܢܳܐ ܘܰܦܬܳܝܶܗ ܕܬܰܪܥܳܐ ܥܣܰܪ ܐܰܡܺܝ̈ܢ: ܘܣܶܛܖ̈ܰܘܗܝ ܕܬܰܪܥܳܐ: ܚܰܡܶܫ ܐܰܡܺܝ̈ܢ ܡܶܟܳܐ: ܘܰܡܫܰܚ ܐܽܘܪܟܶܗ ܐܰܪܒܥܺܝܢ ܐܰܡܺܝ̈ܢ: ܘܰܦܬܳܝܶܗ ܥܶܣܪܺܝܢ ܐܰܡܺܝ̈ܢ.
3 ܘܥܰܠ ܠܓܰܘ: ܘܡܰܫܚܶܗ ܠܰܦܪܽܘܣܬܕܳܐ ܕܬܰܪܥܳܐ: ܬܰܪܬܶܝܢ ܐܰܡܺܝ̈ܢ: ܘܬܰܪܥܳܐ ܫܶܬ ܐܰܡܺܝ̈ܢ: ܘܰܦܬܳܝܶܗ ܫܒܰܥ ܐܰܡܺܝ̈ܢ.
4 ܘܰܡܫܰܚ ܐܽܘܪܟܶܗ ܥܶܣܪܺܝܢ ܐܰܡܺܝ̈ܢ: ܘܰܦܬܳܝܶܗ ܥܶܣܪܺܝܢ ܐܰܡܺܝ̈ܢ ܠܽܘܩܒܰܠ ܗܰܝܟܠܳܐ: ܘܶܐܡܰܪ ܠܺܝ ܗܳܢܰܘ ܩܕܽܘܫ ܩܽܘܕܫ̈ܶܐ.
5 ܘܰܡܫܰܚ ܐܶܣܬܶܗ ܕܒܰܝܬܳܐ ܫܶܬ ܐܰܡܺܝ̈ܢ: ܘܰܦܬܳܝܳܗ̇ ܕܕܰܦܢܳܐ ܫܒܰܥ ܐܰܡܺܝ̈ܢ ܟܰܕ ܚܳܕܰܪ ܒܰܝܬܳܐ.
6 ܘܕܰܦ̈ܢܳܬܳܐ ܕܰܦܢܳܐ ܥܰܠ ܕܰܦܢܳܐ: ܬܠܳܬܺܝܢ ܘܰܬܠܳܬ ܙܰܒ̈ܢܺܝܢ: ܘܥܳܐܠ̈ܳܢ ܒܶܐܣܬܶܗ ܕܒܰܝܬܳܐ ܕܰܦ̈ܢܳܬܳܐ ܟܰܕ ܚܳܕܖ̈ܳܢ: ܕܢܶܗܘ̈ܝܳܢ ܐܰܚܺܝ̈ܕܳܢ ܘܡܰܦܖ̈ܩܳܢ ܡܶܢ ܐܶܣܬܳܐ.
7 ܘܢܳܩ̈ܦܳܢ ܠܥܶܠ ܗܶܢܶܝܢ ܕܰܦ̈ܢܳܬܳܐ: ܕܢܶܬܟܰܖ̈ܟܳܢ ܡܶܢ ܠܥܶܠ ܠܒܰܝܬܳܐ: ܕܢܶܪܘܰܚ ܒܰܝܬܳܐ ܡܶܢ ܠܥܶܠ: ܘܡܶܢ ܠܬܰܚܬ ܢܶܗܘܽܘܢ ܣܳܠܩܺܝܢ ܠܡܶܨ̈ܥܳܝܳܬܳܐ: ܘܡܶܢ ܡܶܨ̈ܥܳܝܳܬܳܐ ܠܥܶܠܳܝ̈ܳܬܳܐ.
8 ܘܰܚܙܺܝ݀ܬ ܪܰܘܡܶܗ ܕܒܰܝܬܳܐ ܟܰܕ ܚܳܕܰܪ: ܘܦܰܖ̈ܺܝܩܳܢ ܗ̱ܘܰܝ̈ ܕܰܦ̈ܢܳܬܳܐ ܚܕܳܐ ܡܶܢ ܚܕܳܐ: ܡܠܶܐ ܩܰܢܝܳܐ ܫܶܬ ܐܰܡܺܝ̈ܢ.
9 ܘܰܦܬܳܝܳܗ̇ ܕܶܐܣܬܳܐ ܕܕܰܦܢܳܐ ܕܰܠܒܰܪ ܚܰܡܶܫ ܐܰܡܺܝ̈ܢ: ܘܰܕܡܶܢ ܠܓܰܘ ܚܰܡܶܫ ܐܰܡܺܝ̈ܢ.
10 ܘܒܶܝܬ ܐܰܟܣܶܕܖ̈ܶܐ ܦܬܳܝܳܐ ܥܶܣܪܺܝܢ ܐܰܡܺܝ̈ܢ ܟܰܕ ܚܳܕܖ̈ܳܢ ܠܒܰܝܬܳܐ.
11 ܘܬܰܪܥܳܐ ܕܕܰܦܢܳܐ ܕܰܫܒܺܝܩ: ܚܰܕ ܠܬܰܝܡܢܳܐ: ܘܚܰܕ ܠܓܰܪܒܝܳܐ: ܘܰܦܬܳܝܶܗ ܕܬܰܪܥܳܐ ܕܰܫܒܺܝܩ ܚܰܡܶܫ ܐܰܡܺܝ̈ܢ.
12 ܘܒܶܢܝܳܢܳܐ ܕܰܩܕܳܡ ܓܙܺܝܪܬܳܐ: ܕܰܒܬܰܪܥܳܐ ܡܰܥܪܒܳܝܳܐ: ܦܬܳܝܶܗ ܫܰܒܥܺܝܢ ܐܰܡܺܝ̈ܢ: ܘܶܐܣܬܶܗ ܕܒܶܢܝܳܢܳܐ ܚܰܡܶܫ ܐܰܡܺܝ̈ܢ ܦܬܳܝܳܐ ܟܰܕ ܚܳܕܰܪ: ܐܘܪܟܶܗ ܬܶܫܥܺܝܢ ܐܰܡܺܝ̈ܢ.
13 ܘܡܰܫܚܶܗ ܠܒܰܝܬܳܐ: ܡܳܐܐ ܐܰܡܺܝ̈ܢ ܐܽܘܪܟܶܗ: ܘܰܓܙܺܝܪܬܳܐ ܕܒܶܢܝܳܢܳܐ ܕܶܐܣ̈ܶܐ: ܐܽܘܪܟܳܐ ܡܳܐܐ ܐܰܡܺܝ̈ܢ.
14 ܘܰܦܬܳܝܳܐ ܠܽܘܩܒܰܠ ܒܰܝܬܳܐ: ܘܰܓܙܺܝܪܬܳܐ ܡܰܕܢܚܳܝܬܳܐ ܡܳܐܐ ܐܰܡܺܝ̈ܢ.
15 ܘܰܡܫܰܚ ܐܽܘܪܟܶܗ ܕܒܶܢܝܳܢܳܐ ܕܰܩܕܳܡ ܓܙܺܝܪܬܳܐ: ܘܒܶܣܬܪܶܗ ܘܰܬܝܳܟܰܘ̈ܗܝ ܡܶܟܳܐ ܘܡܶܟܳܐ: ܡܳܐܐ ܐܰܡܺܝ̈ܢ: ܘܗܰܝܟܠܳܐ ܓܰܘܳܝܳܐ: ܘܰܦܖ̈ܽܘܣܬܕܶܐ ܕܬܰܪܥܳܐ ܕܕܳܪܬܳܐ.
16 ܘܣܶܦ̈ܶܐ ܘܟܰܘ̈ܶܐ ܘܰܬܝܳܟ̈ܶܐ ܟܰܕ ܚܳܕܪܺܝܢ: ܘܠܰܬܠܳܬܰܝ̈ܗܽܘܢ ܬܰܖ̈ܥܶܐ ܩܪܰܡ ܩܰܝܣܳܐ: ܟܰܕ ܚܳܕܪܺܝܢ: ܐܘܪܟܶܗ ܥܕܰܡܳܐ ܠܟܰܘ̈ܶܐ.
17 ܘܟܰܘ̈ܶܐ ܡܟܰܣ̈ܝܳܢ ܠܥܶܠ ܡܶܢ ܬܰܪܥܳܐ ܕܒܰܝܬܳܐ ܓܰܘܳܝܳܐ: ܘܰܠܒܰܪ ܠܟܽܠܗܶܝܢ ܐܶܣ̈ܶܐ ܟܰܕ ܚܳܕܰܪ: ܡܫܰܚ ܡܶܢ ܠܒܰܪ ܘܡܶܢ ܠܓܰܘ.
18 ܘܰܥܒܰܕ ܟܖ̈ܽܘܒܶܐ ܘܕܶܩ̈ܠܶܐ: ܘܕܶܩܠܳܐ ܒܶܝܬ ܟܪܽܘܒܳܐ ܠܰܟܪܽܘܒܳܐ: ܘܬܰܪܬܶܝܢ ܐܰܦܺܝ̈ܢ ܠܰܟܪܽܘܒܳܐ.
19 ܘܰܐܦ̈ܶܐ ܕܒܰܪܢܳܫܳܐ ܥܰܠ ܕܶܩ̈ܠܶܐ ܡܶܟܳܐ ܘܡܶܟܳܐ: ܥܒܺܝܕ ܠܟܽܠܶܗ ܒܰܝܬܳܐ ܟܰܕ ܚܳܕܰܪ.
20 ܡܶܢ ܐܰܪܥܳܐ ܘܰܥܕܰܡܳܐ ܠܥܶܠ ܡܶܢ ܬܰܖ̈ܥܶܐ: ܟܖ̈ܽܘܒܶܐ ܘܕܶܩ̈ܠܶܐ ܥܒܺܝܕܺܝܢ.
21 ܘܶܐܣܬܶܗ ܕܗܰܝܟܠܳܐ ܡܪܰܒܥܳܐ ܗܘܳܬ: ܘܰܐܦܰܝ̈ ܩܽܘܕܫܳܐ ܕܚܶܙܘܳܐ: ܐܰܝܟ ܚܶܙܘܶܗ ܕܡܰܕܒܚܳܐ ܕܩܰܝܣܳܐ.
22 ܬܠܳܬ ܐܰܡܺܝ̈ܢ ܪܰܘܡܶܗ: ܐܘܪܟܶܗ ܬܰܪܬܶܝܢ ܐܰܡܺܝ̈ܢ: ܘܩܰܖ̈ܢܳܬܳܐ ܐܺܝܬ ܠܶܗ: ܐܘܪܟܶܗ ܘܰܬܝܳܟܰܘ̈ܗܝ ܕܩܰܝܣܳܐ: ܘܶܐܡܰܪ ܠܺܝ: ܗܳܢܰܘ ܦܳܬܽܘܪܳܐ ܕܰܩܕܳܡ ܡܳܪܝܳܐ.
23 ܘܰܬܪܶܝܢ ܬܪܶܝܢ ܬܰܖ̈ܥܺܝܢ ܠܡܰܪܒܳܒܳܐ.
24 ܬܪܶܝܢ ܠܡܰܪܒܳܒܳܐ ܚܰܕ: ܘܰܬܪܶܝܢ ܠܡܰܪܒܳܒܳܐ ܐ̱ܚܪܺܢܳܐ.
25 ܘܰܥܒܺܝܕ ܥܠܰܝܗܽܘܢ ܥܰܠ ܬܰܖ̈ܥܶܐ ܕܗܰܝܟܠܳܐ: ܟܖ̈ܽܘܒܶܐ ܘܕܶܩ̈ܠܶܐ ܐܰܝܟ ܕܰܥܒܺܝܕܺܝܢ ܒܶܐܣ̈ܶܐ.
26 ܘܰܐܦܰܘ̈ܗܝ ܕܰܦܪܽܘܣܬܕܳܐ ܩܖ̈ܺܝܡܳܢ ܩܰܝܣܳܐ ܡܶܢ ܠܒܰܪ: ܘܟܰܘ̈ܶܐ ܫܛܺܝ̈ܦܳܢ: ܘܕܶܩ̈ܠܶܐ ܐܺܝܬ ܡܶܟܳܐ ܘܡܶܟܳܐ ܥܰܠ ܣܶܛܖ̈ܰܘܗܝ ܕܰܦܪܽܘܣܬܕܳܐ: ܘܕܰܦ̈ܢܳܬܶܗ ܕܒܰܝܬܳܐ ܩܖ̈ܺܝܡܳܢ ܕܰܦ̈ܶܐ.