Ezekiel 21
The Book of Ezekiel
܀ ܚܙܩܝܐܝܠ ܟܐ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܠܽܐܘܪܺܫܠܶܡ: ܘܚܽܘܪ ܒܡܰܩܕܫܗܽܘܢ: ܘܶܐܬܢܰܒܳܐ ܥܰܠ ܐܰܪܥܳܐ ܕܺܝܣܪܳܐܶܝܠ.
3 ܘܶܐܡܰܪ ܠܰܐܪܥܳܐ ܕܺܝܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟܝ: ܘܰܐܦܶܩ ܣܰܦܣܺܪܝ ܡܶܢ ܚܶܠܬܳܗ̇: ܘܰܐܘܒܶܕ ܡܶܢܶܟܝ ܙܰܕܺܝܩܳܐ ܘܚܰܛܳܝܳܐ.
4 ܘܥܰܠ ܕܰܐܘܒܕܶܬ ܡܶܢܶܟܝ ܙܰܕܺܝܩܳܐ ܘܚܰܛܳܝܳܐ: ܡܶܛܽܠܗܳܢܳܐ ܬܶܦܽܘܩ ܣܰܦܣܺܪܝ ܡܶܢ ܚܶܠܬܳܗ̇ ܥܰܠ ܟܽܠ ܒܣܰܪ: ܡܶܢ ܬܰܝܡܢܳܐ ܘܰܥܕܰܡܳܐ ܠܓܰܪܒܝܳܐ.
5 ܘܢܶܕܥܽܘܢ ܟܽܠ ܒܣܰܪ: ܕܶܐܢܳܐ ܡܳܪܝܳܐ ܐܰܦܩܶ݀ܬ ܣܰܦܣܺܪܝ ܡܶܢ ܚܶܠܬܳܗ̇: ܘܬܽܘܒ ܠܳܐ ܬܶܗܦܽܘܟ.
6 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܬܬܰܢܰܚ ܒܰܬܒܳܪܳܐ ܕܚܰܨܳܐ: ܘܰܒܡܰܪܺܝܪܽܘܬܳܐ ܐܶܬܬܰܢܰܚ ܠܥܺܢܰܝ̈ܗܽܘܢ.
7 ܘܶܐܢ ܐܳܡܪܺܝܢ ܠܳܟ ܠܡܳܢܳܐ ܡܶܬܬܰܢܰܚ ܐܰܢ̱ܬ: ܐܶܡܰܪ ܠܗܽܘܢ: ܥܰܠ ܛܶܒܳܐ ܕܳܐܬܶܐ: ܘܡܶܬܡܣܶܝܢ ܟܽܠܗܽܘܢ ܠܶܒܰܘ̈ܳܬܳܐ: ܘܡܶܬܖ̈ܰܫܠܳܢ ܟܽܠܗܶܝܢ ܐܺܝ̈ܕܰܝܳܐ: ܘܟܳܝ̈ܒܳܢ ܟܽܠܗܶܝܢ ܖ̈ܽܘܚܳܬܳܐ: ܘܟܽܠܗܶܝܢ ܒܽܘܖ̈ܟܶܐ ܡܰܖ̈ܕܝܳܢ ܡܰܝ̈ܳܐ: ܗܳܐ ܐܶܬܳܬ ܘܗܳܘܝܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
8 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
9 ܒܰܪܢܳܫܳܐ: ܐܶܬܢܰܒܳܐ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܣܰܝܦܳܐ ܣܰܝܦܳܐ ܐܶܬܠܰܛܫ.
10 ܘܶܐܬܛܰܝܰܒ ܕܬܶܩܛܽܘܠ ܩܶܛܠܳܐ: ܕܬܰܒܪܶܩ ܘܶܐܬܛܰܝܰܒ ܠܡܰܪܬܳܥܽܘ ܠܫܰܪܒܬܶܗ ܕܒܶܪܝ: ܘܰܐܣܠܳܐ ܟܽܠ ܩܺܝܣ.
11 ܘܝܰܗܒܶܗ ܠܛܽܘܝܳܒܳܐ: ܘܰܠܡܶܐܚܰܕ ܐܺܝܕܳܐ ܕܣܰܝܦܳܐ ܠܛܺܝܫܳܐ ܘܰܡܛܰܝܒܳܐ: ܕܢܰܫܠܡܺܝܘܗܝ ܒܺܐܝܕܳܐ ܕܩܳܛܽܘ̈ܠܶܐ.
12 ܓܥܺܝ ܘܰܐܝܠܶܠ ܒܰܪܢܳܫܳܐ: ܡܶܛܽܠ ܕܗܽܘ ܗܘܳܐ ܥܰܠ ܥܰܡܝ: ܘܥܰܠ ܟܽܠܗܽܘܢ ܪܰܘܖ̈ܒܳܢܶܐ ܕܺܝܣܪܳܐܶܝܠ.
13 ܩܽܘܫ ܟܰܦܳܐ ܡܶܛܽܠ ܕܶܐܙܕܰܕܩܰܬ ܗܳܕܶܐ: ܘܶܐܢ ܫܰܪܒܬܳܐ ܐܶܣܬܰܠܝܰܬ: ܠܳܐ ܬܶܗܘܶܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
14 ܐܰܢ̱ܬ ܕܶܝܢ ܒܰܪܢܳܫܳܐ ܐܶܬܢܰܒܳܐ: ܘܩܽܘܫ ܟܰܦܳܐ ܐܺܝܕܳܐ ܥܰܠ ܐܺܝܕܳܐ: ܘܢܶܬܐܥܶܦ ܣܰܝܦܳܐ: ܘܣܰܝܦܳܐ ܕܰܬܠܳܬܳܐ ܕܰܩܛܺܝ̈ܠܶܐ ܗ̱ܘ: ܘܣܰܝܦܳܐ ܕܰܩܛܺܝ̈ܠܶܐ ܕܪܰܒܰܐ ܗ̱ܘ ܕܰܡܙܺܝܥ ܠܗܽܘܢ.
15 ܕܢܶܬܬܒܰܪ ܠܶܒܗܽܘܢ: ܘܢܶܣܓܽܘܢ ܟܖ̈ܺܝܗܶܐ ܒܟܽܠ ܬܰܖ̈ܥܰܝܗܽܘܢ: ܐܰܫܠܡܶ݀ܬ ܐܶܢܽܘܢ ܠܣܰܝܦܳܐ ܕܰܠܛܺܝܫ ܘܡܰܒܪܶܩ: ܘܰܡܛܰܝܰܒ ܠܩܶܛܠܳܐ.
16 ܚܰܡܣܶܢܝ ܝܰܡܺܝܢܝ ܘܚܰܡܣܶܢܝ ܣܶܡܳܠܝ: ܠܰܐܬܰܪ ܕܰܡܛܰܝ̈ܒܳܢ ܐܰܦܰܝ̈.
17 ܐܳܦ ܐܶܢܳܐ ܐܶܩܽܘܫ ܟܰܦܳܐ ܐܺܝܕܝ ܥܰܠ ܐܺܝܕܝ: ܘܰܐܢܺܝܚ ܚܶܡܬܝ: ܐܶܢܳܐ ܡܳܪܝܳܐ ܐܶܡܪܶܬ.
18 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
19 ܐܰܢ̱ܬ ܕܶܝܢ ܒܰܪܢܳܫܳܐ: ܥܒܶܕ ܠܳܟ ܬܰܪܬܶܝܢ ܐܽܘܖ̈ܚܳܢ: ܕܢܺܐܬܶܐ ܣܰܝܦܶܗ ܕܡܰܠܟܳܐ ܕܒܳܒܶܠ: ܘܡܶܢ ܐܰܪܥܳܐ ܚܕܳܐ ܢܶܦܩܽܘܢ ܬܖ̈ܰܝܗܽܘܢ: ܘܺܐܝܕܳܐ ܓܒܺܝܬܳܐ ܥܰܠ ܪܺܝܫ ܐܽܘܪܚܳܐ ܕܰܡܕܺܝܢ̱ܬܳܐ ܓܒܺܝܬܳܐ.
20 ܘܰܥܒܶܕ ܐܽܘܪܚܳܐ ܕܢܺܐܬܶܐ ܣܰܝܦܳܐ ܥܰܠ ܪܰܒܬ ܕܰܒܢܰܝ̈ ܥܰܡܽܘܢ: ܘܥܰܠ ܝܺܗܽܘܕܳܐ ܘܥܰܠ ܐܽܘܪܺܫܠܶܡ ܥܰܫܺܝܢܬܳܐ.
21 ܡܶܛܽܠ ܕܩܳܡ ܡܰܠܟܳܐ ܕܒܳܒܶܠ: ܥܰܠ ܪܺܝܫ ܐܽܘܪܚܳܐ ܕܦܳܠܫܰܬ ܐܽܘܖ̈ܚܳܬܳܐ ܠܡܶܩܨܰܡ ܩܶܨܡܳܐ: ܫܕܳܐ ܓܶܐܪܳܐ: ܘܰܫܐܶܠ ܒܰܦܬܰܟܪܶܗ: ܚܙܰܘ ܒܫܽܘܒܚܶܗ.
22 ܘܰܒܝܰܡܺܝܢܶܗ ܗܘܳܐ ܩܶܨܡܳܐ ܥܰܠ ܐܽܘܪܺܫܠܶܡ: ܕܢܰܟܡܶܢ ܥܠܶܝܗ̇ ܟܡܺܐܢ̈ܶܐ: ܘܢܶܦܬܰܚ ܦܽܘܡܶܗ ܒܥܽܘܫܢܶܗ: ܘܰܢܪܺܝܡ ܩܳܠܶܗ ܒܰܩܥܳܬܳܐ: ܘܰܢܩܺܝܡ ܬܶܠ̈ܶܐ ܠܽܘܩܒܰܠ ܬܰܖ̈ܥܶܝܗ̇: ܘܢܰܟܡܶܢ ܟܡܺܐܢ̈ܶܐ ܘܢܶܒܢܶܐ ܕܰܘ̈ܩܶܐ.
23 ܘܢܶܗܘܶܐ ܠܗܽܘܢ ܐܰܝܟ ܩܶܨܡܳܐ ܣܪܺܝܩܳܐ ܠܽܘܩܒܰܠ ܥܰܝܢܰܝ̈ܗܽܘܢ: ܘܗܽܘ ܢܶܬܕܟܰܪ ܥܰܘܠܳܐ ܘܢܶܬܬܚܶܕ.
24 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܬܕܟܪܬܽܘܢ ܥܰܘܠܟܽܘܢ ܒܰܫܒܺܝܬܳܐ ܕܰܚܛܳܗܰܝ̈ܟܽܘܢ: ܘܰܚܙܰܝܬܽܘܢ ܚܛܳܗܰܝ̈ܟܽܘܢ ܘܟܽܠܗܶܝܢ ܨܶܢ̈ܥܳܬܟܽܘܢ: ܒܺܐܝܕܳܐ ܬܶܬܰܚܕܽܘܢ.
25 ܐܰܢ̱ܬ ܕܶܝܢ ܛܰܢܦܳܐ ܚܰܛܳܝܳܐ ܪܰܒܳܐ ܕܺܝܣܪܳܐܶܝܠ: ܕܰܡ̣ܛܳܐ ܝܰܘܡܳܟ ܘܙܰܒܢܳܐ ܕܥܰܘܠܳܟ ܘܚܰܪܬܳܟ.
26 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܣܰܒ ܡܶܢܳܟ ܡܰܨܢܰܦܬܳܐ: ܘܰܐܢܺܝܚ ܡܶܢܳܟ ܟܠܺܝܠܳܐ: ܡܰܟܺܝܟܳܐ ܐܰܪܺܝܡ: ܘܪܳܡܳܐ ܐܰܡܶܟ.
27 ܐܳܦ ܗܳܕܶܐ ܠܥܰܘܠܳܐ ܘܰܠܥܶܬܳܐ ܐܶܥܒܕܺܝܗ̇: ܥܕܰܡܳܐ ܕܢܺܐܬܶܐ ܡܰܢ ܕܕܺܝܠܶܗ ܗܽܘ ܕܺܝܢܳܐ ܘܰܐܫܠܡܺܝܘܗܝ ܠܶܗ.
28 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܬܢܰܒܳܐ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܒܢܰܝ̈ ܥܰܡܽܘܢ ܘܥܰܠ ܚܶܣܕܗܽܘܢ: ܘܶܐܡܰܪ: ܣܰܝܦܳܐ ܣܰܝܦܳܐ: ܕܰܡܛܰܝܰܒ ܠܩܶܛܠܳܐ: ܘܰܠܛܺܝܫ ܘܡܰܒܪܶܩ.
29 ܥܰܠ ܚܶܙܘܟܽܘܢ ܣܪܺܝܩܳܐ: ܘܥܰܠ ܩܶܨܡܟܽܘܢ ܕܰܓܳܠܳܐ: ܠܡܶܬܠܳܟ ܥܰܠ ܨܰܘܖ̈ܰܝܗܽܘܢ ܕܚܰܛܳܝ̈ܶܐ ܥܰܘ̈ܳܠܶܐ: ܕܰܡ̣ܛܳܐ ܝܰܘܡܗܽܘܢ ܘܙܰܒܢܳܐ ܕܥܰܘܠܗܽܘܢ ܘܩܶܨܗܽܘܢ.
30 ܐܶܬܚܰܡܠ ܒܚܶܠܬܳܟ ܒܰܐܬܪܳܐ ܕܶܐܬܺܝܠܶܕܬ ܒܶܗ: ܘܬܰܡܳܢ ܐܶܕܽܘܢܳܟ.
31 ܘܶܐܫܽܘܕ ܥܠܰܝܟ ܪܽܘܓܙܝ: ܘܰܒܢܽܘܪܳܐ ܕܚܶܡܬܝ ܐܶܦܽܘܚ ܒܳܟ: ܘܰܐܫܠܡܳܟ ܒܺܐܝܕܳܐ ܕܓܰܒܖ̈ܶܐ ܒܰܥܪܺܝܖ̈ܳܝܶܐ ܕܣܳܥܪܺܝܢ ܚܒܳܠܳܐ.
32 ܘܬܶܗܘܶܐ ܡܶܐܟܽܘܠܬܳܐ ܠܢܽܘܪܳܐ: ܘܰܕܡܳܟ ܢܶܗܘܶܐ ܒܓܰܘ ܐܰܪܥܳܐ: ܘܠܳܐ ܬܶܬܕܟܰܪ. ܡܶܛܽܠ ܕܶܐܢܳܐ ܡܳܪܝܳܐ ܡܰܠܠܶܬ.