Ezekiel 34
The Book of Ezekiel
܀ ܚܙܩܝܐܝܠ ܠܕ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܶܬܢܰܒܳܐ ܥܰܠ ܖ̈ܳܥܰܘܳܬܳܐ ܕܺܝܣܪܳܐܶܝܠ: ܐܶܬܢܰܒܳܐ ܘܶܐܡܰܪ ܠܗܽܘܢ: ܖ̈ܳܥܰܘܳܬܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܳܘ ܖ̈ܳܥܰܘܳܬܳܐ ܕܺܝܣܪܳܐܶܝܠ ܕܪܳܥܶܝܢ ܠܗܽܘܢ: ܠܳܐ ܗ̱ܘܳܐ ܠܥܳܢ̈ܳܐ ܪܳܥܶܝܢ ܖ̈ܳܥܰܘܳܬܳܐ.
3 ܫܰܡܺܝܢ̈ܶܐ ܐܳܟܠܺܝܢ ܐܢ̱ܬܽܘܢ: ܘܥܰܡܪܗܽܘܢ ܠܳܒܫܺܝܢ ܐܢ̱ܬܽܘܢ: ܘܰܡܦܰܛܡ̈ܶܐ ܕܳܒܚܺܝܢ ܐܢ̱ܬܽܘܢ: ܘܥܳܢ̈ܳܐ ܠܳܐ ܪܳܥܶܝܢ ܐܢ̱ܬܽܘܢ.
4 ܠܕܰܟܪܺܝܗܳܐ ܠܳܐ ܚܰܝܶܠܬܽܘܢ: ܘܰܕܡܰܪܥܳܐ ܠܳܐ ܐܰܣܺܝܬܽܘܢ: ܘܕܰܬܒܺܝܪܳܐ ܠܳܐ ܥܨܰܒܬܽܘܢ: ܘܰܕܛܳܥܝܳܐ ܠܳܐ ܐܰܗܦܶܟܬܽܘܢ: ܘܕܰܐܒܺܝܕܳܐ ܠܳܐ ܒܥܰܝܬܽܘܢ: ܐܶܠܳܐ ܒܰܩܛܺܝܪܳܐ ܫܰܥܒܶܕܬܽܘܢ ܐܶܢܶܝܢ.
5 ܘܶܐܬܒܰܕܪܰܬ ܥܳܢ̈ܝ ܡܶܢ ܒܠܰܝ ܪܳܥܝܳܐ: ܘܰܗܘܰܝ̈ ܡܶܐܟܽܘܠܬܳܐ ܠܟܽܠܳܗ̇ ܚܰܝܽܘܬܳܐ ܕܕܰܒܪܳܐ.
6 ܘܰܛܥܳܬ ܥܳܢܝ̈ ܒܟܽܠܗܽܘܢ ܛܽܘܖ̈ܶܐ: ܘܥܰܠ ܟܽܠ ܪܳܡܬܳܐ ܕܪܳܡܳܐ: ܘܰܒܟܽܠܳܗ̇ ܐܰܪܥܳܐ ܐܶܬܒܰܕܪܰܬ ܥܳܢ̈ܝ: ܘܠܰܝܬ ܕܬܳܒܰܥ ܐܳܦܠܳܐ ܕܰܡܟܰܢܶܫ.
7 ܡܶܛܽܠ ܗܳܢܳܐ ܫܡܰܥܘ ܖ̈ܳܥܰܘܳܬܳܐ ܦܶܬܓܳܡܶܗ ܕܡܳܪܝܳܐ.
8 ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܗܘܳܬ ܥܳܢ̈ܝ ܠܒܶܙܬܳܐ: ܘܰܗܘܳܬ ܥܳܢ̈ܝ ܡܶܐܟܽܘܠܬܳܐ ܠܟܽܠܳܗ̇ ܚܰܝܽܘܬܳܐ ܕܕܰܒܪܳܐ ܡܶܢ ܒܠܰܝ ܪܳܥܝܳܐ: ܘܠܳܐ ܪܥܰܘ ܖ̈ܳܥܰܘܳܬܳܐ ܠܥܳܢ̈ܝ: ܐܶܠܳܐ ܪܥܰܘ ܖ̈ܳܥܰܘܳܬܳܐ ܠܢܰܦܫܗܽܘܢ: ܘܰܠܥܳܢ̈ܝ ܠܳܐ ܪܥܰܘ.
9 ܡܶܛܽܠ ܗܳܢܳܐ ܖ̈ܳܥܰܘܳܬܳܐ: ܫܡܰܥܘ ܦܶܬܓܳܡܶܗ ܕܡܳܪܝܳܐ.
10 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܰܠ ܖ̈ܳܥܰܘܳܬܳܐ: ܘܶܐܬܒܰܥ ܥܳܢ̈ܝ ܒܺܐܝܕܰܝ̈ܗܽܘܢ: ܘܶܐܒܰܛܶܠ ܐܶܢܽܘܢ ܕܠܳܐ ܢܶܪܥܽܘܢ ܬܽܘܒ ܠܥܳܢ̈ܝ: ܘܶܐܦܰܨܶܐ ܠܥܳܢ̈ܝ ܡܶܢ ܦܽܘܡܗܽܘܢ: ܘܬܽܘܒ ܠܳܐ ܢܶܗܘ̈ܝܳܢ ܠܗܽܘܢ ܠܡܶܐܟܽܘܠܬܳܐ.
11 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܬܳܒܰܥ ܐ̱ܢܳܐ ܠܥܳܢ̈ܝ: ܘܣܳܥܰܪ ܐ̱ܢܳܐ ܠܗܶܝܢ.
12 ܐܰܝܟ ܕܣܳܥܰܪ ܪܳܥܝܳܐ ܠܰܓܙܳܪܶܗ ܒܝܰܘܡܳܐ ܕܙܺܝܩܳܐ: ܗܳܟܰܢܳܐ ܐܶܣܥܪܺܝܗ̇ ܠܥܳܢ̈ܝ: ܘܶܐܟܰܢܶܫ ܐܶܢܶܝܢ ܡܶܢ ܟܠ ܐܰܬܖ̈ܰܘܳܬܳܐ ܕܶܐܬܒܰܕܰܖ̈ܝ ܒܗܽܘܢ: ܒܝܰܘܡܳܐ ܕܰܥܢܳܢܳܐ ܘܰܕܥܰܪܦܶܠܳܐ. 13:ܘܰܐܦܶܩ ܐܶܢܶܝܢ ܡܶܢ ܥܰܡ̈ܡܶܐ: ܘܶܐܟܰܢܶܫ ܐܶܢܶܝܢ ܡܶܢ ܡܕܺܝ̈ܢܳܬܳܐ: ܘܰܐܝܬܶܐ ܐܶܢܶܝܢ ܠܰܐܪܥܗܶܝܢ: ܘܶܐܪܥܶܐ ܐܶܢܶܝܢ ܒܛܽܘܖ̈ܶܐ ܕܺܝܣܪܳܐܶܝܠ: ܘܰܒܢܰܚ̈ܠܶܐ ܘܰܒܟܽܠܶܗ ܝܰܬܒܳܐ ܕܰܐܪܥܳܐ.
14 ܒܶܝܬ ܪܶܥܝܳܐ ܛܳܒܳܐ ܐܶܪܥܶܐ ܐܶܢܶܝܢ: ܘܰܒܛܽܘܖ̈ܶܐ ܖ̈ܳܡܶܐ ܕܺܝܣܪܳܐܶܝܠ ܢܶܗܘܶܐ ܕܰܝܪܗܶܝܢ: ܬܰܡܳܢ ܢܶܖ̈ܒܥܳܢ ܒܕܰܝܪܳܐ ܛܳܒܳܐ: ܘܪܶܥܝܳܐ ܫܰܡܺܝܢܳܐ ܢܶܖ̈ܥܝܳܢ ܒܛܽܘܖ̈ܶܐ ܕܺܝܣܪܳܐܶܝܠ.
15 ܐܶܢܳܐ ܐܶܪܥܶܐ ܠܥܳܢ̈ܝ: ܘܶܐ̱ܢܳܐ ܐܰܪܒܰܥ ܐܶܢܶܝܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
16 ܕܰܐܒܺܝܕܳܐ ܐܶܒܥܶܐ: ܘܰܕܛܰܥܝܳܐ ܐܰܗܦܶܟ: ܘܕܰܬܒܺܝܪܳܐ ܐܶܥܨܽܘܒ: ܘܕܰܟܪܺܝܗܳܐ ܐܶܚܰܝܶܠ: ܘܰܕܫܰܡܺܝܢܳܐ ܘܰܕܥܰܫܺܝܢܳܐ ܐܶܛܰܪ: ܘܶܐܪܥܶܐ ܐܶܢܶܝܢ ܒܕܺܝܢܳܐ.
17 ܠܟܶܝܢ ܕܶܝܢ ܥܳܢ̈ܝ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܕܳܐܶܢ ܐ̱ܢܳܐ ܒܶܝܬ ܢܶܩܝܳܐ ܠܢܶܩܝܳܐ ܘܒܶܝܬ ܕܶܟܪܳܐ ܠܕܶܟܪܳܐ.
18 ܠܳܐ ܣܳܦܶܩ ܠܟܽܘܢ ܖ̈ܳܥܰܘܳܬܳܐ: ܪܶܥܝܳܐ ܛܳܒܳܐ ܕܪܳܥܶܝܢ ܐܢ̱ܬܽܘܢ: ܘܫܰܪܟܳܐ ܕܪܶܥܺܝܟܽܘܢ ܕܳܝܫܺܝܢ ܐܢ̱ܬܽܘܢ ܒܖ̈ܶܓܠܰܝܟܽܘܢ: ܘܡܰܝ̈ܳܐ ܫܳܬܶܝܢ ܐܢ̱ܬܽܘܢ. ܘܫܰܪܟܳܐ ܕܡܰܘܬܪܺܝܢ ܐܢ̱ܬܽܘܢ ܕܳܠܚܺܝܢ ܐܢ̱ܬܽܘܢ ܒܖ̈ܶܓܠܰܝܟܽܘܢ.
19 ܘܥܳܢ̈ܝ ܖ̈ܥܰܝ ܕܰܘܫܳܐ ܕܖ̈ܶܓܠܰܝܟܽܘܢ: ܘܶܐܫ̈ܬܺܝ ܡܰܝ̈ܳܐ ܕܕܰܠܰܚ̈ܝ ܖ̈ܶܓܠܰܝܟܽܘܢ.
20 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܕܳܐܶܢ ܐ̱ܢܳܐ ܒܶܝܬ ܢܶܩܝܳܐ ܫܰܡܺܝܢܬܳܐ ܠܢܶܩܝܳܐ ܡܚܺܝܠܬܳܐ.
21 ܥܰܠ ܕܣܳܚ̈ܦܳܢ ܗ̱ܘܰܝ̈ ܒܓܰܒܰܝ̈ܗܶܝܢ ܘܰܒܟܰܬܦ̈ܳܬܗܶܝܢ: ܘܰܒܩܰܖ̈ܢܳܬܗܶܝܢ ܡܕܰܩܖ̈ܳܢ ܗ̱ܘܰܝ̈ ܠܟܽܠܗܶܝܢ ܟܖ̈ܺܝܗܳܬܳܐ: ܥܕܰܡܳܐ ܕܒܰܕܰܪ ܐܶܢܶܝܢ ܠܒܰܪ.
22 ܘܶܐܦܪܩܺܝܗ̇ ܠܥܳܢ̈ܝ: ܘܬܽܘܒ ܠܳܐ ܬܶܗܘܶܐ ܠܗܽܘܢ ܠܒܶܙܬܳܐ: ܘܶܐܕܽܘܢ ܒܶܝܬ ܢܶܩܝܳܐ ܠܢܶܩܝܳܐ: ܘܒܶܝܬ ܕܶܟܪܳܐ ܠܕܶܟܪܳܐ.
23 ܘܰܐܩܺܝܡ ܥܠܰܝܗܶܝܢ ܪܳܥܝܳܐ: ܘܢܶܪܥܶܐ ܐܶܢܶܝܢ: ܕܰܘܺܝܕ ܥܰܒܕܝ ܗܽܘ ܢܶܪܥܶܐ ܐܶܢܶܝܢ: ܘܗܽܘ ܢܶܗܘܶܐ ܠܗܶܝܢ ܪܳܥܝܳܐ.
24 ܘܶܐ̱ܢܳܐ ܡܳܪܝܳܐ ܐܶܗܘܶܐ ܠܗܽܘܢ ܐܰܠܳܗܳܐ: ܘܕܰܘܺܝܕ ܥܰܒܕܝ ܢܶܗܘܶܐ ܫܰܠܺܝܛܳܐ ܒܰܝܢܳܬܗܽܘܢ.
25 ܘܰܐܩܺܝܡ ܠܗܽܘܢ ܩܝܳܡܳܐ ܕܰܫܠܳܡܳܐ: ܘܶܐܒܰܛܶܠ ܚܰܝܽܘܬܳܐ ܒܺܝܫܬܳܐ ܡܶܢ ܐܰܪܥܳܐ: ܘܢܶܥܡܪܽܘܢ ܒܡܰܕܒܪܳܐ ܒܫܶܠܝܳܐ: ܘܢܶܕܡܟܽܘܢ ܒܥܳܒܳܐ.
26 ܘܶܐܬܶܠ ܠܗܽܘܢ ܒܽܘܪܟܰܬܝ ܚܕܳܪ ܪܳܡܰܬܝ: ܘܰܐܚܶܬ ܡܶܛܪܳܐ ܒܙܰܒܢܶܗ: ܘܢܶܗܘܶܐ ܡܶܛܪܳܐ ܕܒܽܘܪܟܬܳܐ.
27 ܘܺܐܝ̈ܠܳܢܶܐ ܕܰܐܪܥܳܐ ܢܶܥܒܕܽܘܢ ܦܺܐܖ̈ܶܐ: ܘܰܐܪܥܳܐ ܬܶܬܶܠ ܥܰܠ̈ܠܳܬܳܗ̇: ܘܢܶܬܒܽܘܢ ܒܰܐܪܥܗܽܘܢ ܒܣܰܒܪܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܬܶܒܪܶܬ ܢܺܝܪܗܽܘܢ: ܘܦܰܨܺܝ݀ܬ ܐܶܢܽܘܢ ܡܶܢ ܐܺܝܕܳܐ ܕܰܡܫܰܥܒܕܳܢܰܝ̈ܗܽܘܢ.
28 ܘܬܽܘܒ ܠܳܐ ܢܶܗܘܽܘܢ ܒܶܙܬܳܐ ܠܥܰܡ̈ܡܶܐ: ܐܳܦܠܳܐ ܬܶܐܟܽܘܠ ܐܶܢܽܘܢ ܚܰܝܘܰܬ ܒܰܪܳܐ: ܘܢܶܬܒܽܘܢ ܒܣܰܒܪܳܐ: ܘܠܳܐ ܢܶܗܘܶܐ ܠܗܽܘܢ ܡܰܗܪܳܢܳܐ.
29 ܘܰܐܩܺܝܡ ܠܗܽܘܢ ܢܶܨܒܬܳܐ ܕܰܫܠܳܡܳܐ: ܘܬܽܘܒ ܠܳܐ ܢܶܫܬܰܢܩܽܘܢ ܒܟܰܦܢܳܐ ܒܰܐܪܥܳܐ: ܘܬܽܘܒ ܠܳܐ ܢܩܰܒܠܽܘܢ ܚܶܣܕܳܐ ܕܥܰܡ̈ܡܶܐ.
30 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܗܽܘܢ: ܘܗܶܢܽܘܢ ܐܶܢܽܘܢ ܥܰܡܝ ܕܒܶܝܬ ܝܺܣܪܳܐܶܝܠ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
31 ܐܰܢ̱ܬܶܝ̈ܢ ܕܶܝܢ ܥܳܢ̈ܝ ܥܳܢ̈ܳܐ ܕܡܰܪܥܺܝܬܝ: ܒܢܰܝ̈ܢܳܫܳܐ ܐܰܢ̱ܬܶܝ̈ܢ: ܘܶܐ̱ܢܳܐ ܐ̱ܢܳܐ ܡܳܪܝܳܐ ܐܰܠܳܗܟܶܝܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.