Ezekiel 6
The Book of Ezekiel
܀ ܚܙܩܝܐܝܠ ܘ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܠܛܽܘܖ̈ܶܐ ܕܺܝܣܪܳܐܶܝܠ: ܘܶܐܬܢܰܒܳܐ ܥܠܰܝܗܽܘܢ.
3 ܘܶܐܡܰܪ: ܛܽܘܖ̈ܶܐ ܕܺܝܣܪܳܐܶܝܠ: ܫܡܰܥܘ ܦܶܬܓܳܡܶܗ ܕܡܳܪܶܐ ܡܳܖ̈ܰܘܳܬܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܛܽܘܖ̈ܶܐ ܘܰܠܖ̈ܳܡܳܬܳܐ: ܘܰܠܢܰܚ̈ܠܶܐ ܘܠܰܦܨܺܝ̈ܕܶܐ: ܗܳܐ ܡܰܝܬܶܐ ܐ̱ܢܳܐ ܥܠܰܝܟܽܘܢ ܚܰܪܒܳܐ: ܘܰܐܘܒܶܕ ܦܖ̈ܰܟܰܝܟܽܘܢ.
4 ܘܢܶܨܕܽܘܢ ܡܰܕܒܚܰܝ̈ܟܽܘܢ: ܘܢܶܬܬܰܒܪܽܘܢ ܦܬܰܟܖ̈ܰܝܟܽܘܢ: ܘܰܐܪܡܶܐ ܚܖ̈ܺܝܒܰܝܟܽܘܢ ܩܕܳܡ ܕܶܚ̈ܠܳܬܟܽܘܢ. 5:ܘܰܐܪܡܶܐ ܫ̈ܠܰܕܶܐ ܕܒܶܝܬ ܝܺܣܪܳܐܶܝܠ ܩܕܳܡ ܦܬܰܟܖ̈ܰܝܗܽܘܢ: ܘܶܐܕܪܶܐ ܓܰܖ̈ܡܰܝܟܽܘܢ ܚܕܳܪ ܡܰܕܒܚܰܝ̈ܟܽܘܢ.
6 ܘܰܡܕܺܝ̈ܢܳܬܳܐ ܕܟܽܠܶܗ ܝܰܬܒܟܽܘܢ ܢܶܚܖ̈ܒܳܢ: ܘܰܦܖ̈ܰܟܶܐ ܢܶܨ̈ܕܝܳܢ: ܡܶܛܽܠ ܕܢܶܚܪܒܽܘܢ ܘܢܶܨܕܽܘܢ ܡܰܕܒܚܰܝ̈ܟܽܘܢ: ܘܢܶܬܬܰܒܪܽܘܢ ܘܢܶܬܒܰܛܠܽܘܢ ܦܬܰܟܖ̈ܰܝܟܽܘܢ: ܘܢܶܬܓܰܕܡܽܘܢ ܓܠܺܝܦܰܝ̈ܟܽܘܢ: ܘܢܶܬܥܛܽܘܢ ܥܒܳܕܰܝ̈ܟܽܘܢ.
7 ܘܢܶܦܠܽܘܢ ܚܖ̈ܺܝܒܶܐ ܒܰܝܢܳܬܟܽܘܢ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
8 ܐܰܘܬܰܪ ܡܶܢܟܽܘܢ ܒܶܝܬ ܥܰܡ̈ܡܶܐ: ܐܰܝܠܶܝܢ ܕܶܐܬܦܰܨܺܝܘ ܡܶܢ ܚܰܪܒܳܐ: ܘܶܐܬܒܰܕܰܪܘ ܒܰܡܕܺܝ̈ܢܳܬܳܐ.
9 ܘܢܶܬܕܰܟܪܽܘܢܳܢܝ ܐܰܝܠܶܝܢ ܕܶܐܬܦܰܨܺܝܘ ܡܶܢܟܽܘܢ: ܒܶܝܬ ܥܰܡ̈ܡܶܐ ܕܶܐܫܬܒܺܝܘ ܠܬܰܡܳܢ: ܡܳܐ ܕܬܶܒܪܶܬ ܠܠܶܒܗܽܘܢ ܙܰܢܳܝܳܐ ܕܰܣܛܰܘ ܡܶܢܝ: ܘܥܰܝ̈ܢܰܝܗܽܘܢ ܕܰܛܥܰܝ̈ ܒܳܬܰܪ ܦܬܰܟܖ̈ܰܝܗܽܘܢ: ܘܢܶܬܩܰܡ̈ܛܳܢ ܐܰܦܰܝ̈ܗܽܘܢ ܒܒܺܝܫܬܳܐ ܕܰܥܒܰܕܘ: ܘܰܒܟܽܠܳܗ̇ ܛܰܢܦܽܘܬܗܽܘܢ.
10 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܘܠܳܐ ܗ̱ܘܳܐ ܣܪܺܝܩܳܐܺܝܬ ܐܶܡܪܶܬ ܕܶܐܥܒܶܕ ܠܗܽܘܢ ܒܺܝܫܬܳܐ ܗܳܕܶܐ.
11 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܩܽܘܫ ܒܟܰܦܳܟ ܘܰܪܦܽܘܣ ܒܪܶܓܠܳܟ: ܘܶܐܡܰܪ. ܐܰܚܳܢ ܥܰܠ ܟܽܠܳܗ̇ ܛܰܢܦܽܘܬܳܐ ܘܒܺܝܫܬܳܐ ܕܒܶܝܬ ܝܺܣܪܳܐܶܝܠ: ܕܰܒܚܰܪܒܳܐ ܘܰܒܟܰܦܢܳܐ ܘܰܒܡܰܘܬܳܢܳܐ ܢܶܦܠܽܘܢ.
12 ܕܪܰܚܺܝܩ ܢܡܽܘܬ ܒܡܰܘܬܳܢܳܐ: ܘܰܕܩܰܪܺܝܒ ܒܚܰܪܒܳܐ ܢܶܦܶܠ: ܘܰܕܡܶܫܬܰܚܰܪ ܘܰܕܡܶܬܦܰܨܶܐ ܒܟܰܦܢܳܐ ܢܡܽܘܬ: ܘܶܐܫܰܡܠܶܐ ܪܽܘܓܙܝ ܒܗܽܘܢ.
13 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܡܳܐ ܕܰܗܘܰܘ ܩܛܺܝܠܰܝ̈ܗܽܘܢ ܒܰܝܢܳܬ ܦܬܰܟܖ̈ܰܝܗܽܘܢ ܚܕܳܪ ܡܰܕܒܚܰܝ̈ܗܽܘܢ: ܥܰܠ ܟܽܠ ܪܳܡܬܳܐ ܕܪܳܡܳܐ: ܘܰܬܚܶܝܬ ܟܽܠ ܖ̈ܺܝܫܰܝ ܛܽܘܖ̈ܶܐ: ܘܰܬܚܶܝܬ ܟܽܠ ܐܺܝܠܳܢ ܕܡܰܛܰܠ: ܘܰܬܚܶܝܬ ܟܠ ܒܶܛܡܬܳܐ ܥܰܒܺܝܛܬܳܐ: ܒܰܐܬܪܳܐ ܕܣܳܡܘ ܬܰܡܳܢ ܒܶܣ̈ܡܶܐ ܠܟܽܠܗܽܘܢ ܦܬܰܟܖ̈ܰܝܗܽܘܢ.
14 ܘܰܐܪܺܝܡ ܐܺܝܕܝ ܥܠܰܝܗܽܘܢ: ܘܶܐܥܒܕܺܝܗ̇ ܠܰܐܪܥܳܐ ܠܰܚܒܳܠܳܐ ܘܰܠܬܶܡܗܳܐ ܡܶܢ ܡܰܕܒܪܳܐ ܕܕܶܒܠܰܬ: ܘܟܽܠܶܗ ܒܶܝܬ ܡܰܥܡܰܪܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.