Ezekiel 45
The Book of Ezekiel
܀ ܚܙܩܝܐܝܠ ܡܗ ܀
1 ܘܡܳܐ ܕܰܡܦܰܠܓܺܝܢ ܐܢ̱ܬܽܘܢ ܐܰܪܥܳܐ: ܦܪܽܘܫܘ ܦܽܘܪܫܳܢܳܐ ܠܡܳܪܝܳܐ: ܘܩܰܪܶܒܘ ܡܶܢ ܐܰܪܥܳܐ: ܘܢܶܗܘܶܐ ܐܽܘܪܟܳܗ̇ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܗ̇ ܥܶܣܪܳܐ ܐܰܠܦܺܝ̈ܢ: ܘܢܶܗܘܽܘܢ ܩܰܕܺܝ̈ܫܺܝܢ ܟܽܠܗܽܘܢ ܬܚܽܘܡܶܝܗ̇ ܟܰܕ ܚܳܕܪܺܝܢ ܠܳܗ̇.
2 ܘܬܶܗܘܶܐ ܠܡܰܩܕܫܳܐ ܚܰܡܶܫܡܳܐܐ ܒܚܰܡܶܫܡܳܐܐ: ܘܬܶܗܘܶܐ ܡܪܰܒܥܳܐ ܟܰܕ ܚܳܕܪܳܐ: ܘܚܰܡܫܺܝܢ ܐܰܡܺܝ̈ܢ ܫܶܛܚܳܗ̇.
3 ܘܡܶܢ ܗܳܕܶܐ ܡܫܽܘܚܬܳܐ: ܐܽܘܪܟܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܘܰܦܬܳܝܳܐ ܥܶܣܪܳܐ ܐܰܠܦܺܝ̈ܢ ܘܒܳܗ̇ ܢܶܗܘܶܐ ܩܕܽܘܫ ܩܽܘܕܫ̈ܶܐ.
4 ܘܩܽܘܕܫܳܐ ܕܰܐܪܥܳܐ: ܢܶܗܘܶܐ ܠܟܳܗ̈ܢܶܐ ܕܰܡܫܰܡܫܺܝܢ ܡܰܩܕܫܶܗ ܕܡܳܪܝܳܐ: ܘܡܶܬܩܰܪܒܺܝܢ ܠܰܡܫܰܡܳܫܽܘܬܶܗ ܠܡܳܪܝܳܐ: ܘܢܶܗܘܶܐ ܠܗܽܘܢ ܐܰܬܪܳܐ ܠܒ̈ܳܬܶܐ: ܘܡܰܩܕܫܳܐ ܠܡܰܩܕܫܳܐ.
5 ܘܢܶܗܘܶܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܐܽܘܪܟܳܐ: ܘܥܶܣܪܺܝܢ ܐܰܠܦܺܝ̈ܢ ܦܬܳܝܳܐ: ܘܢܶܗܘܶܐ ܝܽܘܪܬܳܢܳܐ ܠܠܶܘܳܝ̈ܶܐ ܕܰܡܫܰܡܫܺܝܢ ܒܒܰܝܬܳܐ: ܥܶܣܪܺܝܢ ܒܳܬܺܝ̈ܢ.
6 ܝܽܘܪܬܳܢܳܐ ܕܰܡܕܺܝܢ̱ܬܳܐ ܚܰܡܫܳܐ ܐܰܠܦܺܝ̈ܢ ܦܬܳܝܳܐ: ܐܘܪܟܳܐ ܥܶܣܪܺܝܢ ܘܚܰܡܫܳܐ ܐܰܠܦܺܝ̈ܢ ܠܽܘܩܒܰܠ ܦܽܘܪܫܳܢܳܐ ܕܡܰܩܕܫܳܐ: ܢܶܗܘܶܐ ܠܟܽܠܗܽܘܢ ܕܒܶܝܬ ܝܺܣܪܳܐܶܝܠ.
7 ܘܠܰܡܕܰܒܪܳܢܳܐ ܕܥܰܡܳܐ: ܠܦܽܘܪܫܳܢܳܐ ܕܩܽܘܕܫܳܐ: ܘܠܝܽܘܪܬܳܢܳܐ ܕܰܡܕܺܝܢ̱ܬܳܐ: ܡܶܢ ܡܰܕܢܚܳܐ ܘܡܶܢ ܡܰܥܪܒܳܐ: ܐܘܪܟܳܐ ܢܶܗܘܶܐ ܠܽܘܩܒܰܠ ܦܳܠܓܽܘܬܳܐ: ܡܶܢ ܡܰܕܢܚܳܐ ܠܡܰܥܪܒܳܐ.
8 ܢܶܗܘܶܐ ܝܽܘܪܬܳܢܳܐ ܠܰܒܢܰܝ̈ ܝܺܣܪܳܐܶܝܠ: ܘܬܽܘܒ ܠܳܐ ܢܰܗܪܽܘܢ ܐܶܢܽܘܢ ܡܕܰܒܖ̈ܳܢܶܐ ܕܥܰܡܝ: ܘܰܐܪܥܳܐ ܢܶܬܠܽܘܢ ܠܰܒܢܰܝ̈ ܝܺܣܪܳܐܶܝܠ ܠܫܰܖ̈ܒܳܬܗܽܘܢ.
9 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܟܰܕܽܘ ܠܟܽܘܢ ܪܰܘܖ̈ܒܳܢܶܐ ܕܺܝܣܪܳܐܶܝܠ: ܐܰܥܒܰܪܘ ܡܶܢܟܽܘܢ ܚܛܽܘܦܝܳܐ ܘܒܶܙܬܳܐ: ܘܰܥܒܶܕܘ ܕܺܝܢܳܐ ܘܙܰܕܺܝܩܽܘܬܳܐ: ܘܰܐܦܪܶܩܘ ܫܽܘܥܒܳܕܟܽܘܢ ܡܶܢ ܥܰܡܝ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
10 ܡܰܣܰܐܬܳܐ ܕܩܽܘܫܬܳܐ: ܘܡܰܬܩ̈ܳܠܶܐ ܕܩܽܘܫܬܳܐ ܘܰܟܝܳܠܬܳܐ ܕܩܽܘܫܬܳܐ: ܢܶܗܘܽܘܢ ܠܟܽܘܢ.
11 ܟܝܳܠܬܳܐ ܘܡܰܬܩܳܠܳܐ ܬܰܩܶܢܘ: ܕܬܶܗܘܢ ܫܳܩܠܺܝܢ ܡܰܥܣܳܖ̈ܶܐ ܚܰܕ ܡܶܢ ܥܶܣܪܳܐ ܫܰܘܝܳܐܺܝܬ.
12 ܘܡܰܬܩ̈ܳܠܶܐ ܢܶܗܘܽܘܢ ܥܶܣܪܺܝܢ: ܡܰܬܩܳܠܳܐ ܡܶܢܗܽܘܢ ܥܶܣܪܺܝܢ ܘܚܰܡܶܫ ܡܳܥܺܝ̈ܢ: ܘܡܰܬܩܳܠܳܐ ܕܚܰܡܶܫܬܰܥܣܰܪ ܢܶܗܘܶܐ ܠܟܽܘܢ ܡܰܢܝܳܐ.
13 ܗܳܢܳܐ ܦܽܘܪܫܳܢܳܐ ܦܪܽܘܫܘ: ܚܕܳܐ ܡܶܢ ܫܶܬ ܡܢܰܘ̈ܳܬܶܗ ܕܟܽܘܪܳܐ ܕܚ̈ܶܛܶܐ: ܘܰܚܕܳܐ ܡܶܢ ܫܶܬ ܡܢܰܘ̈ܳܬܶܗ ܕܟܽܘܪܳܐ ܕܰܣܥܳܖ̈ܶܐ.
14 ܘܡܶܫܚܳܐ ܡܶܢ ܥܣܰܪ ܟܰܝ̈ܠܳܢ ܕܗܳܘܶܐ ܟܽܘܪܳܐ: ܢܶܣܒܽܘܢ ܡܰܥܣܳܖ̈ܶܐ ܟܝܳܠܬܳܐ ܚܕܳܐ.
15 ܘܰܚܕܳܐ ܢܶܩܝܳܐ ܡܶܢ ܡܰܐܬܶܝܢ ܥܳܢ̈ܳܐ ܕܺܝܣܪܳܐܶܝܠ: ܠܰܣܡܺܝܕܳܐ ܘܰܠܩܽܘܪܒܳܢܳܐ ܘܰܠܝܰܩܕܳܐ ܫܰܠܡܳܐ: ܕܰܢܕܰܟܶܐ ܐܶܢܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
16 ܟܽܠܶܗ ܥܰܡܳܐ ܕܰܐܪܥܳܐ: ܢܶܦܪܫܽܘܢ ܦܽܘܪܫܳܢܳܐ ܗܳܢܳܐ ܠܰܡܕܰܒܪܳܢܳܐ ܕܺܝܣܪܳܐܶܝܠ.
17 ܘܕܰܡܕܰܒܪܳܢܳܐ ܢܶܗܘܽܘܢ ܝܰܩ̈ܕܶܐ ܫܰܠ̈ܡܶܐ: ܘܰܣܡܺܝܕܳܐ ܘܢܽܘܩܳܝܳܐ ܒܪܺܝܫ ܝܰܖ̈ܚܶܐ ܘܰܒܫܰܒ̈ܶܐ: ܘܰܒܟܽܠܗܽܘܢ ܥܰܕܥܺܐܕܳܐ ܕܒܶܝܬ ܝܺܣܪܳܐܶܝܠ ܗܽܘ ܢܩܰܪܶܒ ܬܰܕܟܺܝܬܳܐ ܕܰܚܛܳܗ̈ܶܐ: ܘܰܣܡܺܝܕܳܐ ܘܢܽܘܩܳܝܳܐ ܘܝܰܩܕܳܐ ܫܰܠܡܳܐ: ܩܽܘܪܒܳܢܳܐ ܕܰܡܕܰܟܶܐ ܠܰܒܢܰܝ̈ ܝܺܣܪܳܐܶܝܠ.
18 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܚܰܕ ܒܝܰܪܚܳܐ ܩܰܕܡܳܝܳܐ: ܣܰܒ ܬܰܘܪܳܐ ܚܰܕ ܒܰܪ ܒܰܩܪܳܐ: ܕܠܰܝܬ ܒܶܗ ܡܽܘܡܳܐ: ܘܕܰܟܳܝܗܝ ܠܡܰܩܕܫܳܐ.
19 ܘܢܶܣܰܒ ܟܳܗܢܳܐ ܡܶܢ ܕܡܳܐ ܕܬܰܕܟܺܝܬܳܐ: ܘܢܶܪܽܘܣ ܥܰܠ ܐܶܣ̈ܟܦܳܬܶܗ ܕܒܰܝܬܳܐ: ܘܥܰܠ ܐܰܪܒܰܥ ܙܳܘ̈ܝܳܬܶܗ ܕܡܰܕܒܚܳܐ: ܘܥܰܠ ܐܶܣܟܽܘܦܬܶܗ ܕܬܰܪܥܳܐ ܕܕܳܪܬܳܐ ܓܰܘܳܝܬܳܐ.
20 ܘܗܳܟܰܢܳܐ ܢܶܗܘܶܐ ܥܳܒܶܕ ܒܰܫܒܰܥܬܳܐ ܒܝܰܪܚܳܐ: ܓܰܒܪܳܐ ܕܫܳܛܶܐ: ܘܰܢܕܰܟܽܘܢܶܗ ܠܒܰܝܬܳܐ.
21 ܘܒܰܐܪܒܰܥܶܣܖ̈ܶܐ ܒܝܰܪܚܳܐ: ܩܰܕܡܳܝܐ: ܢܶܗܘܶܐ ܠܟܽܘܢ ܦܶܨܚܳܐ ܘܥܰܕܥܺܐܕܳܐ: ܘܫܰܒܥܳܐ ܝܰܘܡܺܝ̈ܢ ܦܰܛܺܝܪܳܐ ܬܶܐܟܠܽܘܢ.
22 ܘܰܢܩܰܪܶܒ ܡܕܰܒܪܳܢܳܐ ܒܶܗ ܒܝܰܘܡܳܐ ܗܰܘ: ܥܰܠ ܐܰܦܰܝ̈ ܢܰܦܫܶܗ: ܘܥܰܠ ܐܰܦܰܝ̈ ܟܽܠܶܗ ܥܰܡܳܐ ܕܰܐܪܥܳܐ: ܬܰܘܪܳܐ ܠܬܰܕܟܺܝܬܳܐ ܕܰܚܛܳܗ̈ܶܐ.
23 ܘܫܰܒܥܳܐ ܝܰܘܡܰܘ̈ܗܝ ܕܥܰܕܥܺܐܕܳܐ: ܢܩܰܪܶܒ ܝܰܩ̈ܕܶܐ ܫܰܠ̈ܡܶܐ ܠܡܳܪܝܳܐ: ܫܰܒܥܳܐ ܬܰܘܖ̈ܺܝܢ: ܘܫܰܒܥܳܐ ܕܶܟܖ̈ܺܝܢ ܕܠܰܝܬ ܒܗܽܘܢ ܡܽܘܡܳܐ: ܘܰܠܬܰܕܟܺܝܬܳܐ ܕܰܚܛܳܗ̈ܶܐ: ܨܺܦܪܳܝܳܐ ܕܥܶܙ̈ܶܐ ܒܝܰܘܡܳܐ.
24 ܘܰܣܡܺܝܕܳܐ ܣܰܐܬܳܐ ܠܬܰܘܪܳܐ: ܘܣܰܐܬܳܐ ܠܕܶܟܪܳܐ: ܘܡܶܫܚܳܐ ܗܶܡܺܝܢܳܐ ܠܣܰܐܬܳܐ.
25 ܘܰܒܚܰܡܫܰܥܶܣܖ̈ܶܐ ܒܝܰܪܚܳܐ ܕܫܰܒܥܳܐ: ܢܶܥܒܶܕ ܥܰܕܥܺܐܕܳܐ ܐܰܝܟ ܗܳܠܶܝܢ ܫܰܒܥܳܐ ܝܰܘܡܺܝ̈ܢ: ܐܰܝܟ ܬܰܕܟܺܝܬܳܐ ܕܰܚܛܳܗ̈ܶܐ: ܘܰܐܝܟ ܝܰܩ̈ܕܶܐ ܫܰܠ̈ܡܶܐ: ܘܰܐܝܟ ܣܡܺܝܕܳܐ ܘܰܐܝܟ ܡܶܫܚܳܐ.