Ezekiel 40
The Book of Ezekiel
܀ ܚܙܩܝܐܝܠ ܡ ܀
1 ܒܶܢܝܳܢܳܐ ܕܒܰܝܬܳܐ. ܒܰܫܢܰܬ ܥܶܣܪܺܝܢ ܘܚܰܡܶܫ ܕܰܫܒܺܝܬܰܢ: ܒܪܺܝܫ ܫܰܢ̱ܬܳܐ ܒܰܥܣܰܪܬܳܐ ܒܝܰܪܚܳܐ: ܒܰܫܢܰܬ ܐܰܪܒܰܥܶܣܖ̈ܶܐ ܒܳܬܰܪ ܕܶܐܬܚܰܪܒܰܬ ܡܕܺܝܢ̱ܬܳܐ: ܒܶܗ ܒܝܰܘܡܳܐ ܗܳܢܳܐ: ܗܘܳܬ ܥܠܰܝ ܐܺܝܕܶܗ ܕܡܳܪܝܳܐ.
2 ܘܰܐܝܬܝܰܢܝ ܠܰܐܪܥܳܐ ܕܺܝܣܪܳܐܶܝܠ: ܒܚܶܙܘܳܐ ܕܰܐܠܳܗܳܐ: ܘܰܐܫܪܝܰܢܝ ܥܰܠ ܛܽܘܪܳܐ ܕܛܳܒ ܪܳܡ: ܘܺܐܝܬ ܗ̱ܘܳܐ ܥܠܰܘܗܝ ܒܬܰܝܡܢܳܝܶܗ ܐܰܝܟ ܒܶܢܝܳܢܳܐ ܕܰܡܕܺܝܢ̱ܬܳܐ.
3 ܘܰܐܝܬܝܰܢܝ ܠܬܰܡܳܢ: ܘܰܚܙܺܝ݀ܬ ܓܰܒܪܳܐ: ܘܚܶܙܘܶܗ ܐܰܝܟ ܚܶܙܘܳܐ ܕܰܢܚܳܫܳܐ: ܘܰܫܘܳܝܬܳܐ ܕܟܶܬܳܢܳܐ ܒܺܐܝܕܶܗ ܘܩܰܢܝܳܐ ܕܰܡܫܽܘܚܬܳܐ: ܘܩܳܐܶܡ ܗ̱ܘܳܐ ܒܬܰܪܥܳܐ.
4 ܘܶܐܡܰܪ ܠܺܝ ܓܰܒܪܳܐ ܗܰܘ: ܒܰܪܢܳܫܳܐ: ܚܙܺܝ ܒܥܰܝ̈ܢܰܝܟ: ܘܰܫܡܰܥ ܒܶܐܕܢܰܝ̈ܟ: ܘܣܺܝܡ ܒܠܶܒܳܟ ܟܽܠ ܡܶܕܶܡ ܕܰܡܚܰܘܶܐ ܐ̱ܢܳܐ ܠܳܟ: ܡܶܛܽܠ ܕܠܰܡܚܰܘܳܝܽܘܬܳܟ ܗ̱ܘ ܐܶܬܺܝܬ ܠܗܳܪܟܳܐ: ܘܟܽܠ ܡܶܕܶܡ ܕܚܳܙܶܐ ܐܰܢ̱ܬ ܚܰܘܳܐ ܠܰܒܢܰܝ̈ ܝܺܣܪܳܐܶܝܠ.
5 ܘܰܚܙܺܝ݀ܬ ܫܽܘܪܳܐ ܕܟܳܪܶܟ ܠܶܗ ܠܒܰܝܬܳܐ ܗܰܘ: ܘܩܰܢܝܳܐ ܕܰܡܫܽܘܚܬܳܐ ܒܺܐܝܕܶܗ ܕܓܰܒܪܳܐ ܗܰܘ: ܘܫܶܬ ܐܰܡܺܝ̈ܢ ܗܳܘܶܐ ܗ̱ܘܳܐ ܘܰܦܫܶܟ: ܘܰܡܫܰܚ ܦܬܳܝܶܗ ܕܒܶܢܝܳܢܳܐ ܩܰܢܝܳܐ ܚܰܕ: ܘܪܰܘܡܶܗ ܩܰܢܝܳܐ ܚܰܕ.
6 ܘܶܐܬܳܐ ܠܬܰܪܥܳܐ ܕܚܳܐܰܪ ܠܡܰܕܢܚܳܐ: ܘܰܣܠܶܩ ܒܕܰܖ̈ܓܰܘܗܝ: ܘܰܡܫܰܚ ܣܶܦܳܐ ܕܬܰܪܥܳܐ ܩܰܢܝܳܐ ܚܰܕ ܠܰܦܬܳܝܶܗ: ܘܣܶܦܳܐ ܐ̱ܚܪܺܢܳܐ: ܩܰܢܝܳܐ ܚܰܕ ܠܰܦܬܳܝܶܗ.
7 ܘܰܦܪܽܘܣܬܕܳܐ ܩܰܢܝܳܐ ܚܰܕ ܠܽܐܘܪܟܶܗ: ܘܩܰܢܝܳܐ ܚܰܕ ܠܰܦܬܳܝܶܗ: ܘܒܶܝܬ ܦܖ̈ܽܘܣܬܕܶܐ ܚܰܡܶܫ ܐܰܡܺܝ̈ܢ.
8 ܘܣܶܦܶܗ ܕܬܰܪܥܳܐ ܡܶܢ ܠܓܰܘ ܡܶܢ ܦܖ̈ܽܘܣܬܕܳܐ ܕܬܰܪܥܳܐ: ܩܰܢܝܳܐ ܚܰܕ.
9 ܘܰܡܫܰܚ ܠܰܦܖ̈ܽܘܣܬܕܶܐ ܕܬܰܪܥܳܐ: ܬܡܳܢܶܐ ܐܰܡܺܝܢ: ܘܶܐܣܟܽܘܦܬܶܗ ܕܬܰܪܥܳܐ ܡܶܢ ܠܓܰܘ ܬܰܪܬܶܝܢ ܐܰܡܺܝ̈ܢ.
10 ܘܓܰܘܶܗ ܕܬܰܪܥܳܐ ܡܰܕܢܚܳܝܳܐ: ܬܠܳܬܳܐ ܡܶܟܳܐ ܘܰܬܠܳܬܳܐ ܡܶܟܳܐ: ܘܰܡܫܽܘܚܬܳܐ ܚܕܳܐ ܠܰܬܠܳܬܰܝ̈ܗܽܘܢ: ܘܰܡܫܽܘܚܬܳܐ ܚܕܳܐ ܠܰܦܖ̈ܽܘܣܬܕܶܐ: ܕܡܶܟܳܐ ܘܡܶܟܳܐ.
11 ܘܰܡܫܰܚ ܦܬܳܝܶܗ ܕܡܰܥܠܳܢܳܐ ܕܬܰܪܥܳܐ ܥܣܰܪ ܐܰܡܺܝ̈ܢ: ܐܽܘܪܟܶܗ ܕܬܰܪܥܳܐ ܬܠܬܰܥܶܣܖ̈ܶܐ ܐܰܡܺܝ̈ܢ.
12 ܘܰܬܚܽܘܡܳܐ ܕܰܩܕܳܡ ܐܶܣܟܽܘܦܬܳܐ: ܐܰܡܳܐ ܐܰܡܳܐ ܡܶܟܳܐ ܘܡܶܟܳܐ: ܘܓܰܘܳܗ̇ ܫܶܬ ܐܰܡܺܝ̈ܢ ܡܶܟܳܐ: ܘܫܶܬ ܐܰܡܺܝ̈ܢ ܡܶܟܳܐ.
13 ܘܡܰܫܚܶܗ ܠܬܰܪܥܳܐ ܡܶܢ ܐܶܓܳܪܶܗ ܠܶܐܓܳܪܶܗ: ܦܬܳܝܳܐ ܥܶܣܪܺܝܢ ܘܚܰܡܶܫ ܐܰܡܺܝ̈ܢ: ܘܬܰܪܥܳܐ ܠܽܘܩܒܰܠ ܬܰܪܥܳܐ.
14 ܘܰܥܒܰܕ ܩܕܳܡ ܐܰܦܰܝ̈ ܬܰܪܥܳܐ ܫܬܺܝܢ ܐܰܡܺܝ̈ܢ: ܘܰܩܕܳܡ ܐܰܦܰܝ̈ ܬܰܪܥܳܐ ܐ̱ܚܪܺܢܳܐ ܒܰܪܳܝܳܐ ܫܬܺܝܢ ܐܰܡܺܝ̈ܢ.
15 ܘܰܩܕܳܡ ܬܰܪܥܳܐ ܓܰܘܳܝܳܐ ܚܰܡܫܺܝܢ ܐܰܡܺܝ̈ܢ.
16 ܘܟܰܘ̈ܶܐ ܕܰܫܛܺܝ̈ܦܳܢ ܡܶܢ ܠܓܰܘ ܘܩܰܛܺܝ̈ܢܳܢ ܡܶܢ ܠܒܰܪ: ܥܰܠ ܚ̈ܶܬܶܐ ܘܥܰܠ ܦܖ̈ܽܘܣܬܕܶܐ ܕܬܰܪܥܳܐ: ܘܟܰܘ̈ܶܐ ܚܳܕܖ̈ܳܢ ܗ̱ܘܰܝ̈ ܠܗܽܘܢ ܡܶܢ ܠܓܰܘ.
17 ܘܰܐܥܠܰܢܝ ܠܕܳܪܬܳܐ ܒܰܪܳܝܬܳܐ: ܘܰܚܙܺܝ݀ܬ ܕܰܖ̈ܓܶܐ ܟܰܕ ܚܳܕܪܳܐ: ܬܠܳܬܺܝܢ ܕܰܖ̈ܓܺܝܢ ܚܰܕ ܠܥܶܠ ܡܶܢ ܚܰܕ.
18 ܘܕܰܖ̈ܓܶܐ ܕܥܰܠ ܓܶܢ̱ܒ ܬܰܪܥܳܐ ܕܠܽܘܩܒܰܠ ܐܽܘܪܟܗܽܘܢ ܕܕܰܖ̈ܓܶܐ.
19 ܘܰܡܫܰܚ ܦܬܳܝܶܗ ܡܶܢ ܩܕܳܡ ܬܰܪܥܳܐ ܕܕܳܪܬܳܐ: ܡܳܐܐ ܐܰܡܺܝ̈ܢ ܠܡܰܕܢܚܳܐ ܘܰܠܓܰܪܒܝܳܐ.
20 ܘܬܰܪܥܳܐ ܕܰܩܕܳܡܰܘܗܝ ܡܶܢ ܓܰܪܒܝܳܝܳܗ̇ ܕܕܳܪܬܳܐ: ܡܫܰܚ ܐܽܘܪܟܶܗ ܘܰܦܬܳܝܶܗ.
21 ܘܰܡܫܽܘܚܬܶܗ ܬܠܳܬܳܐ ܡܶܟܳܐ ܘܰܬܠܳܬܳܐ ܡܶܟܳܐ. ܐܰܝܟ ܡܫܽܘܚܬܶܗ ܕܬܰܪܥܳܐ ܩܰܕܡܳܝܳܐ: ܚܰܡܫܺܝܢ ܐܰܡܺܝ̈ܢ ܐܽܘܪܟܶܗ: ܘܰܦܬܳܝܶܗ ܥܶܣܪܺܝܢ ܐܰܡܺܝ̈ܢ ܘܚܰܡܶܫ.
22 ܘܟܰܘܰܘ̈ܗܝ ܘܰܦܖ̈ܽܘܣܬܕܰܘܗܝ: ܐܰܝܟ ܡܫܽܘܚܬܳܐ ܕܬܰܪܥܳܐ ܕܚܳܐܰܪ ܠܡܰܕܢܚܳܐ: ܘܰܒܫܰܒܥܳܐ ܕܰܖ̈ܓܺܝܢ ܣܳܠܩܺܝܢ ܠܶܗ: ܘܶܐܣܟܽܘܦܬܳܐ ܐܺܝܬ ܩܕܳܡܰܝܗܽܘܢ.
23 ܘܬܰܖ̈ܥܶܐ ܕܕܳܪܬܳܐ ܓܰܘܳܝܬܳܐ ܕܠܽܘܩܒܰܠ ܬܰܪܥܳܐ ܕܓܰܪܒܰܝ ܡܰܕܢܰܚ: ܡ̣ܫܰܚ ܡܶܢ ܬܰܪܥܳܐ ܠܬܰܪܥܳܐ: ܡܳܐܐ ܐܰܡܺܝ̈ܢ.
24 ܘܰܐܘܒܠܰܢܝ ܠܽܐܘܪܚܳܐ ܕܬܰܝܡܢܳܐ: ܘܰܚܙܺܝܬܶܗ ܠܬܰܪܥܳܐ ܕܬܰܝܡܢܳܐ: ܘܰܡܫܰܚ ܦܖ̈ܽܘܣܬܕܰܘܗܝ ܘܩܳܝ̈ܡܳܬܶܗ: ܐܰܝܟ ܗܳܠܶܝܢ ܡܽܘܫ̈ܚܳܬܳܐ.
25 ܘܟܰܘ̈ܶܐ ܐܺܝܬ ܠܶܗ ܘܠܰܦܖ̈ܽܘܣܬܕܰܘܗܝ ܟܰܕ ܚܳܕܪܺܝܢ: ܐܰܝܟ ܗܳܠܶܝܢ ܟܰܘ̈ܶܐ: ܘܚܰܡܫܺܝܢ ܐܰܡܺܝ̈ܢ ܐܽܘܪܟܶܗ: ܥܶܣܪܺܝܢ ܘܚܰܡܶܫ ܦܬܳܝܶܗ.
26 ܘܰܒܫܰܒܥܳܐ ܕܰܖ̈ܓܺܝܢ ܣܳܠܩܺܝܢ ܠܶܗ. ܘܶܐܣܟܽܘܦܬܳܐ ܐܺܝܬ ܩܕܳܡܰܘܗܝ: ܘܕܶܩ̈ܠܶܐ ܐܺܝܬ ܠܶܗ ܚܰܕ ܡܶܟܳܐ ܘܚܰܕ ܡܶܟܳܐ ܥܰܠ ܦܖ̈ܽܘܣܬܕܰܘܗܝ.
27 ܘܬܰܖ̈ܥܶܐ ܕܕܳܪܬܳܐ ܓܰܘܳܝܬܳܐ ܕܒܽܐܘܪܚܳܐ ܕܬܰܝܡܢܳܐ: ܡܫܰܚ ܡܶܢ ܬܰܪܥܳܐ ܠܬܰܪܥܳܐ ܡܳܐܐ ܐܰܡܺܝ̈ܢ.
28 ܘܰܐܥܠܰܢܝ ܠܕܳܪܬܳܐ ܓܰܘܳܝܬܳܐ ܒܬܰܪܥܳܐ ܕܬܰܝܡܢܳܐ: ܘܡܰܫܚܶܗ ܠܬܰܪܥܳܐ ܬܰܝܡܢܳܝܳܐ: ܐܰܝܟ ܗܳܠܶܝܢ ܡܽܘܫ̈ܚܳܬܳܐ.
29 ܘܓܰܘܶܗ ܘܰܦܖ̈ܽܘܣܬܕܰܘܗܝ ܘܶܐܣ̈ܟܦܳܬܶܗ: ܐܰܝܟ ܗܳܠܶܝܢ ܐܶܢܶܝܢ ܡܽܘܫ̈ܚܳܬܳܐ: ܘܟܰܘ̈ܶܐ ܐܺܝܬ ܠܶܗ ܘܠܰܦܖ̈ܽܘܣܬܕܰܘܗܝ ܟܰܕ ܚܳܕܰܪ: ܚܰܡܫܺܝܢ ܐܰܡܺܝ̈ܢ ܐܽܘܪܟܶܗ: ܘܥܶܣܪܺܝܢ ܘܚܰܡܶܫ ܦܬܳܝܶܗ.
30 ܘܰܬܝܳܟܰܘ̈ܗܝ ܚܳܕܪܺܝܢ ܠܶܗ: ܐܽܘܪܟܗܽܘܢ ܥܶܣܪܺܝܢ ܘܚܰܡܶܫ ܐܰܡܺܝ̈ܢ: ܘܰܦܬܳܝܗܽܘܢ ܚܰܡܶܫ ܐܰܡܺܝ̈ܢ.
31 ܘܰܦܖ̈ܽܘܣܬܕܶܐ ܕܕܳܪܬܳܐ ܒܰܪܳܝܬܳܐ: ܕܶܩ̈ܠܶܐ ܐܺܝܬ ܒܗܽܘܢ: ܘܕܰܖ̈ܓܰܝܗܽܘܢ ܬܡܳܢܝܳܐ.
32 ܘܰܐܥܠܰܢܝ ܠܕܳܪܬܳܐ ܓܰܘܳܝܬܳܐ ܒܽܐܘܪܚܳܐ ܕܡܰܕܢܚܳܐ: ܘܡܰܫܚܶܗ ܠܬܰܪܥܳܐ ܐܰܝܟ ܗܳܠܶܝܢ ܡܽܘܫ̈ܚܳܬܳܐ.
33 ܘܓܰܘܶܗ ܘܰܦܖ̈ܽܘܣܬܕܰܘܗܝ ܘܶܐܣ̈ܟܦܳܬܶܗ: ܘܟܰܘ̈ܶܐ ܐܺܝܬ ܠܶܗ ܘܠܰܦܖ̈ܽܘܣܬܕܰܘܗܝ ܟܰܕ ܚܳܕܰܪ: ܐܽܘܪܟܳܐ ܚܰܡܫܺܝܢ ܐܰܡܺܝ̈ܢ: ܘܰܦܬܳܝܳܐ ܥܶܣܪܺܝܢ ܘܚܰܡܶܫ.
34 ܘܶܐܣܟܽܘܦܬܳܐ ܕܕܳܪܬܳܐ ܒܰܪܳܝܬܳܐ: ܘܕܶܩ̈ܠܶܐ ܐܺܝܬ ܒܰܦܖ̈ܽܘܣܬܕܶܐ ܡܶܟܳܐ ܘܡܶܟܳܐ: ܘܰܬܡܳܢܝܳܐ ܠܶܗ ܕܰܖ̈ܓܺܝܢ.
35 ܘܰܐܥܠܰܢܝ ܠܬܰܪܥܳܐ ܕܓܰܪܒܝܳܐ: ܘܰܡ̣ܫܰܚ ܐܰܝܟ ܗܳܠܶܝܢ ܡܽܘܫ̈ܚܳܬܳܐ.
36 ܘܓܰܘܶܗ ܘܰܦܖ̈ܽܘܣܬܕܰܘܗܝ ܘܶܐܣ̈ܟܦܳܬܶܗ: ܘܟܰܘ̈ܶܐ ܚܳܕܖ̈ܳܢ ܠܶܗ: ܐܽܘܪܟܶܗ ܚܰܡܫܺܝܢ ܐܰܡܺܝ̈ܢ: ܘܰܦܬܳܝܶܗ ܥܶܣܪܺܝܢ ܘܚܰܡܶܫ.
37 ܘܰܦܖ̈ܽܘܣܬܕܶܐ ܕܕܳܪܬܳܐ ܒܰܪܳܝܬܳܐ: ܘܕܶܩ̈ܠܶܐ ܐܺܝܬ ܒܰܦܖ̈ܽܘܣܬܕܶܐ ܡܶܟܳܐ ܘܡܶܟܳܐ: ܘܰܬܡܳܢܝܳܐ ܠܶܗ ܕܰܖ̈ܓܺܝܢ.
38 ܘܰܐܟܣܶܕܪܳܐ ܬܰܪܥܶܗ ܒܰܦܖ̈ܽܘܣܬܕܶܐ ܕܬܰܪܥܳܐ: ܘܬܰܡܳܢ ܣܳܝܡܺܝܢ ܝܰܩ̈ܕܶܐ ܫܰܠ̈ܡܶܐ.
39 ܘܒܰܦܖ̈ܽܘܣܬܕܶܐ ܕܬܰܪܥܳܐ: ܬܪܶܝܢ ܦܳܬܽܘܖ̈ܺܝܢ ܡܶܟܳܐ: ܘܰܬܪܶܝܢ ܦܳܬܽܘܖ̈ܺܝܢ ܡܶܟܳܐ: ܠܡܶܟܰܣ ܥܠܰܝܗܽܘܢ ܝܰܩ̈ܕܶܐ ܫܰܠ̈ܡܶܐ: ܘܩܽܘܖ̈ܒܳܢܶܐ ܘܬܰܕܟܺܝܬܳܐ ܕܰܚܛܳܗ̈ܶܐ.
40 ܘܰܒܣܶܛܪܶܗ ܕܬܰܪܥܳܐ ܓܰܪܒܝܳܝܳܐ: ܕܰܠܒܰܪ ܡܶܢ ܝܰܩ̈ܕܶܐ ܫܰܠ̈ܡܶܐ: ܬܪܶܝܢ ܦܳܬܽܘܖ̈ܺܝܢ: ܘܰܒܣܶܛܪܳܐ ܐ̱ܚܪܺܢܳܐ ܕܰܦܪܽܘܣܬܕܳܐ ܬܪܶܝܢ ܦܳܬܽܘܖ̈ܺܝܢ.
41 ܐܰܪܒܥܳܐ ܦܳܬܽܘܖ̈ܺܝܢ ܡܶܟܳܐ: ܘܰܐܪܒܥܳܐ ܦܳܬܽܘܖ̈ܺܝܢ ܡܶܟܳܐ: ܒܰܦܖ̈ܽܘܣܬܕܰܘܗܝ ܕܬܰܪܥܳܐ: ܘܰܬܡܳܢܝܳܐ ܐܶܢܽܘܢ ܦܳܬܽܘܖ̈ܺܝܢ ܕܢܳܟܣܺܝܢ ܥܠܰܝܗܽܘܢ.
42 ܘܰܐܪܒܥܳܐ ܦܳܬܽܘܖ̈ܺܝܢ ܕܰܦܣܺܝܠܬܳܐ ܠܝܰܩ̈ܕܶܐ ܫܰܠ̈ܡܶܐ: ܐܽܘܪܟܗܽܘܢ ܐܰܡܳܐ ܘܰܦܠܶܓ: ܘܰܦܬܳܝܗܽܘܢ ܐܰܡܳܐ ܘܰܦܠܶܓ: ܘܰܥܠܰܝܗܽܘܢ ܣܳܝܡܺܝܢ ܡܳܐܢ̈ܶܐ ܕܢܳܟܣܺܝܢ ܗܘܰܘ ܒܗܽܘܢ ܝܰܩ̈ܕܶܐ ܫܰܠ̈ܡܶܐ ܘܕܶܒܚܬܳܐ.
43 ܣܶܦ̈ܘܳܬܗܽܘܢ ܦܫܶܟ ܦܫܶܟ ܟܰܕ ܚܳܕܪܺܝܢ: ܘܥܰܠ ܦܳܬܽܘܖ̈ܶܐ ܣܳܝܡܺܝܢ ܗܘܰܘ ܒܶܣܪܳܐ ܕܩܽܘܖ̈ܒܳܢܶܐ.
44 ܘܰܠܒܰܪ ܡܶܢ ܬܰܪܥܳܐ ܓܰܘܳܝܳܐ ܚܳܢ̈ܘܳܬܳܐ ܕܪܰܘܖ̈ܒܳܢܶܐ: ܒܕܳܪܬܳܐ ܓܰܘܳܝܬܳܐ ܕܰܒܣܶܛܪܳܐ ܕܬܰܪܥܳܐ ܓܰܪܒܝܳܝܳܐ: ܘܰܐܦܰܝ̈ܗܽܘܢ ܠܬܰܝܡܢܳܐ: ܡܶܢ ܣܶܛܪܳܐ ܕܬܰܪܥܳܐ ܡܕܢܚܳܝܳܐ ܕܠܽܘܩܒܰܠ ܪܽܘܚܳܐ ܕܓܰܪܒܝܳܐ.
45 ܘܶܐܡܰܪ ܠܺܝ: ܗܳܕܶܐ ܐܰܟܣܶܕܪܳܐ ܕܚܳܝܪܳܐ ܠܬܰܝܡܢܳܐ: ܠܟܳܗ̈ܢܶܐ ܕܢܳܛܪܺܝܢ ܡܰܛܰܪܬܳܐ ܕܒܰܝܬܳܐ.
46 ܘܰܐܟܣܶܕܪܳܐ ܕܚܳܝܪܳܐ ܠܓܰܪܒܝܳܐ: ܠܟܳܗ̈ܢܶܐ ܒܢܰܝ̈ ܨܳܕܽܘܩ ܕܢܳܛܪܺܝܢ ܡܰܛܰܪܬܳܐ ܕܡܰܕܒܚܳܐ: ܕܡܶܬܩܰܪܒܺܝܢ ܡܶܢ ܒܢܰܝ̈ ܠܶܘܺܝ: ܠܰܡܫܰܡܳܫܽܘ ܬܶܫܡܶܫܬܶܗ ܕܡܳܪܝܳܐ.
47 ܘܰܡܫܰܚ ܠܕܳܪܬܳܐ ܐܽܘܪܟܳܐ ܡܳܐܐ ܐܰܡܺܝ̈ܢ: ܘܰܦܬܳܝܳܗ̇ ܡܳܐܐ ܐܰܡܺܝ̈ܢ ܡܪܰܒܥܳܐܺܝܬ: ܘܡܰܕܒܚܳܐ ܐܺܝܬ ܗ̱ܘܳܐ ܩܕܳܡ ܒܰܝܬܳܐ.
48 ܘܰܐܝܬܝܰܢܝ ܠܶܐܣܟܽܘܦܬܶܗ ܕܒܰܝܬܳܐ: ܘܡܰܫܚܳܗ̇ ܠܶܐܣܟܽܘܦܬܳܐ: ܚܰܡܶܫ ܐܰܡܺܝ̈ܢ ܡܶܟܳܐ: ܘܚܰܡܶܫ ܐܰܡܺܝ̈ܢ ܡܶܟܳܐ: ܘܰܦܬܳܝܶܗ ܕܬܰܪܥܳܐ: ܬܠܳܬ ܐܰܡܺܝ̈ܢ ܡܶܟܳܐ ܘܰܬܠܳܬ ܐܰܡܺܝ̈ܢ ܡܶܟܳܐ.
49 ܐܘܪܟܳܗ̇ ܕܶܐܣܟܽܘܦܬܳܐ ܥܶܣܪܺܝܢ ܐܰܡܺܝ̈ܢ: ܘܰܦܬܳܝܳܗ̇ ܚܕܰܥܶܣܖ̈ܶܐ ܐܰܡܺܝ̈ܢ: ܘܰܒܕܰܖ̈ܓܶܐ ܣܳܠܩܺܝܢ ܠܳܗ̇: ܘܥܰܡܽܘ̈ܕܶܐ ܩܳܝܡܺܝܢ ܥܰܠ ܦܖ̈ܽܘܣܬܕܶܝܗ̇: ܚܰܕ ܡܶܟܳܐ ܘܚܰܕ ܡܶܟܳܐ.