Ezekiel 8
The Book of Ezekiel
܀ ܚܙܩܝܐܝܠ ܚ ܀
1 ܘܰܗܘܳܐ ܒܫܰܢ̱ܬܳܐ ܫܬܺܝܬܳܝܬܳܐ: ܒܚܰܡܶܫܬܳܐ ܒܝܰܪܚܳܐ ܫܬܺܝܬܳܝܳܐ: ܐܶܢܳܐ ܝܳܬܶܒ ܗܘܺܝ݀ܬ ܒܒܰܝܬܝ: ܘܣܳܒ̈ܶܐ ܕܺܝܗܽܘܕܳܐ ܝܳܬܒܺܝܢ ܗܘܰܘ ܩܕܳܡܰܝ: ܘܢܶܦܠܰܬ ܥܠܰܝ ܬܰܡܳܢ ܐܺܝܕܶܗ ܕܡܳܪܶܐ ܡܳܖ̈ܰܘܳܬܳܐ.
2 ܘܰܚܙܺܝ݀ܬ ܘܗܳܐ ܕܡܽܘܬܳܐ ܐܰܝܟ ܚܶܙܘܳܐ ܕܢܽܘܪܳܐ: ܡܶܢ ܚܶܙܘܳܐ ܕܚܰܨܰܘ̈ܗܝ ܘܰܠܬܰܚܬ ܢܽܘܪܳܐ: ܘܡܶܢ ܚܰܨܰܘ̈ܗܝ ܘܰܠܥܶܠ: ܚܙܺܝ݀ܬ ܐܰܝܟ ܚܶܙܘܳܐ ܕܙܰܗܪܳܐ: ܘܰܐܝܟ ܚܶܙܘܳܐ ܕܰܐܠܳܗܳܐ
3 ܘܰܐܘܫܶܛ ܒܰܕܡܽܘܬܳܐ ܕܺܐܝܕܳܐ ܘܰܐܚܕܰܢܝ ܒܥܶܕܩ̈ܶܐ ܕܪܺܝܫܝ: ܘܰܫܩܰܠܬܰܢܝ ܪܽܘܚܳܐ ܒܶܝܬ ܐܰܪܥܳܐ ܠܰܫܡܰܝܳܐ: ܘܰܐܝܬܝܰܬܰܢܝ ܠܽܐܘܪܺܫܠܶܡ ܒܚܶܙܘܳܐ ܕܰܐܠܳܗܳܐ: ܠܡܰܥܠܳܢܳܐ ܕܬܰܪܥܳܐ ܕܙܳܘܺܝܬܳܐ ܕܚܳܐܰܪ ܠܓܰܪܒܝܳܐ: ܘܬܰܡܳܢ ܩܳܝܡܳܐ ܩܳܝܶܡܬܳܐ ܕܰܛܢܳܢܳܐ.
4 ܘܗܳܐ ܬܰܡܳܢ ܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ: ܐܰܝܟ ܚܶܙܘܳܐ ܕܰܚܙܺܝ݀ܬ ܒܰܦܩܰܥܬܳܐ.
5 ܘܶܐܡܰܪ ܠܺܝ: ܒܰܪܢܳܫܳܐ: ܐܰܪܺܝܡ ܥܰܝ̈ܢܰܝܟ ܠܽܐܘܪܚܳܐ ܕܓܰܪܒܝܳܐ ܘܰܐܪܺܝܡܶ݀ܬ ܥܰܝܢܰܝ̈ ܠܽܐܘܪܚܳܐ ܕܓܰܪܒܝܳܐ: ܘܗܳܐ ܡܶܢ ܓܰܪܒܝܳܝܶܗ ܕܬܰܪܥܳܐ ܡܰܕܢܚܳܝܳܐ: ܩܳܝܡܳܐ ܩܳܝܶܡܬܳܐ ܕܰܛܢܳܢܳܐ ܒܡܰܥܠܳܢܶܗ.
6 ܘܶܐܡܰܪ ܠܺܝ: ܒܰܪܢܳܫܳܐ: ܚܙܰܝܬ ܡܳܢܳܐ ܥܳܒܕܺܝܢ: ܛܰܢܦ̈ܘܳܬܳܐ ܪܰܘܖ̈ܒܳܬܳܐ ܕܥܳܒܕܺܝܢ ܕܒܶܝܬ ܝܺܣܪܳܐܶܝܠ: ܕܶܐܬܪܰܚܰܩܘ ܡܶܢ ܡܰܩܕܫܝ: ܬܽܘܒ ܬܶܗܦܽܘܟ ܬܶܚܙܶܐ ܛܰܢܦ̈ܘܳܬܳܐ ܪܰܘܖ̈ܒܳܬܳܐ ܕܥܳܒܕܺܝܢ. ܕܥܰܠ ܦܽܘܪܣܳܝ ܥܰܘܠܗܽܘܢ.
7 ܘܰܐܥܠܰܢܝ ܒܬܰܪܥܳܐ ܕܕܳܪܬܳܐ: ܘܰܚܙܺܝ݀ܬ ܢܶܩܒܳܐ ܚܰܕ ܒܶܐܣܬܳܐ.
8 ܘܶܐܡܰܪ ܠܺܝ: ܒܰܪܢܳܫܳܐ: ܚܦܽܘܪ ܒܶܐܣܬܳܐ: ܘܚܶܦܪܶܬ ܒܶܐܣܬܳܐ: ܘܶܐܫܟܚܶ݀ܬ ܬܰܪܥܳܐ ܚܰܕ.
9 ܘܶܐܡܰܪ ܠܺܝ: ܥܽܘܠ: ܘܰܚܙܺܝ ܛܰܢܦ̈ܘܳܬܳܐ ܘܒܺܝ̈ܫܳܬܳܐ ܥܳܒܕܺܝܢ ܗܳܪܟܳܐ.
10 ܘܥܶܠܶܬ ܘܰܚܙܺܝ݀ܬ ܟܠ ܕܶܡ̈ܘܳܬܳܐ ܕܖ̈ܰܚܫܳܐ ܘܕܰܒܥܺܝܪܳܐ ܘܰܕܛܰܢܦ̈ܘܳܬܳܐ. ܘܟܽܠܗܶܝܢ ܕܶܚ̈ܠܳܬܳܐ ܕܒܶܝܬ ܝܺܣܪܳܐܶܝܠ: ܕܨܺܝܖ̈ܳܢ ܥܰܠ ܐܶܣܬܳܐ ܟܰܕ ܚܳܕܪܳܐ.
11 ܘܫܰܒܥܺܝܢ ܓܰܒܖ̈ܺܝܢ ܡܶܢ ܣܳܒ̈ܶܐ ܕܒܶܝܬ ܝܺܣܪܳܐܶܝܠ: ܘܝܰܥܙܰܢܝܳܐ ܒܰܪ ܫܳܦܳܢ ܩܳܐܶܡ ܗ̱ܘܳܐ ܒܰܝܢܳܬܗܽܘܢ ܘܗܶܢܽܘܢ ܩܳܝܡܺܝܢ ܗܘܰܘ ܩܕܳܡܰܘܗܝ: ܘܐ̱ܢܳܫ ܦܺܝܪܡܶܗ ܒܺܐܝܕܶܗ: ܘܥܶܛܪܳܐ ܕܬܶܢܳܢܳܐ ܕܒܶܣ̈ܡܶܐ ܣܳܠܶܩ.
12 ܘܶܐܡܰܪ ܠܺܝ: ܚܳܙܶܐ ܐܰܢ̱ܬ ܒܰܪܢܳܫܳܐ: ܡܶܕܶܡ ܕܥܳܒܕܺܝܢ ܣܳܒ̈ܶܐ ܕܒܶܝܬ ܝܺܣܪܳܐܶܝܠ ܒܚܶܫܽܘܟܳܐ: ܐ̱ܢܳܫ ܒܬܰܘܳܢܶܗ ܟܰܣܝܳܐ: ܘܳܐܡܪܺܝܢ ܠܳܐ ܚܳܙܶܐ ܠܰܢ ܡܳܪܝܳܐ: ܡܶܛܽܠ ܕܫܰܒܩܳܗ̇ ܡܳܪܝܳܐ ܠܰܐܪܥܳܐ.
13 ܘܶܐܡܰܪ ܠܺܝ: ܬܽܘܒ ܬܶܗܦܽܘܟ ܬܶܚܙܶܐ ܛܰܢܦ̈ܘܳܬܳܐ ܪܰܘܖ̈ܒܳܬܳܐ ܕܥܳܒܕܺܝܢ.
14 ܘܰܐܝܬܝܰܢܝ ܠܡܰܥܠܳܢܳܐ ܕܬܰܪܥܳܐ ܕܒܰܝܬܶܗ ܕܡܳܪܝܳܐ ܕܰܒܓܰܪܒܝܳܐ: ܘܰܚܙܺܝ݀ܬ ܬܰܡܳܢ ܢܶܫ̈ܶܐ ܟܕ ܝܳܬܒ̈ܳܢ ܘܰܡܒܰܟ̈ܝܳܢ ܠܬܰܡܽܘܙܳܐ.
15 ܘܶܐܡܰܪ ܠܺܝ: ܚܳܙܶܐ ܐܰܢ̱ܬ ܒܰܪܢܳܫܳܐ: ܬܽܘܒ ܬܶܗܦܽܘܟ ܬܶܚܙܶܐ ܛܰܢܦ̈ܘܳܬܳܐ ܕܪܰܘܖ̈ܒܳܢ ܡܶܢ ܗܳܠܶܝܢ.
16 ܘܰܐܥܠܰܢܝ ܠܕܳܪܰܬ ܒܰܝܬܶܗ ܕܡܳܪܝܳܐ ܓܰܘܳܝܬܳܐ: ܘܰܚܙܺܝ݀ܬ ܒܬܰܪܥܳܐ ܕܗܰܝܟܠܶܗ ܕܡܳܪܝܳܐ ܒܶܝܬ ܩܶܣܛܪܽܘܡܳܐ ܠܡܰܕܒܚܳܐ: ܐܰܝܟ ܥܶܣܪܺܝܢ ܘܚܰܡܫܳܐ ܓܰܒܖ̈ܺܝܢ ܩܳܝܡܺܝܢ: ܘܚܰܨܰܝ̈ܗܽܘܢ ܠܽܘܩܒܰܠ ܗܰܝܟܠܶܗ ܕܡܳܪܝܳܐ: ܘܰܐܦܰܝ̈ܗܽܘܢ ܠܡܰܕܢܚܳܐ: ܘܰܡܩܰܕܡܺܝܢ ܘܣܳܓܕܺܝܢ ܠܫܶܡܫܳܐ.
17 ܘܶܐܡܰܪ ܠܺܝ: ܚܳܙܶܐ ܐܰܢ̱ܬ ܒܰܪܢܳܫܳܐ: ܕܰܠܡܳܐ ܙܥܽܘܪܝܳܐ ܗ̱ܝ ܠܰܕܒܶܝܬ ܝܺܗܽܘܕܳܐ ܛܰܢܦܽܘܬܳܐ ܗܳܕܶܐ ܕܥܳܒܕܺܝܢ ܗܳܪܟܳܐ: ܕܰܡܠܳܐܗ̇ ܠܰܐܪܥܳܐ ܥܰܘܠܳܐ ܘܰܗܦܰܟܘ ܠܡܰܪܓܳܙܽܘܬܰܢܝ. ܘܗܶܢܽܘܢ ܡܰܦܩܥܺܝܢ ܒܰܢܚܺܝܖ̈ܰܝܗܽܘܢ.
18 ܐܳܦ ܐܶܢܳܐ ܐܶܥܒܶܕ ܒܚܶܡܬܳܐ: ܘܠܳܐ ܬܚܽܘܣ ܥܰܝܢܝ ܘܠܳܐ ܐܰܪܰܚܶܡ: ܘܢܶܩܪܽܘܢ ܒܶܐܕܢܰܝ̈ ܒܩܳܠܳܐ ܪܳܡܳܐ ܘܠܳܐ ܐܶܫܡܰܥ ܐܶܢܽܘܢ.