Ezekiel 43
The Book of Ezekiel
܀ ܚܙܩܝܐܝܠ ܡܓ ܀
1 ܘܰܐܘܒܠܰܢܝ ܠܬܰܪܥܳܐ ܕܚܳܐܰܪ ܠܡܰܕܢܚܳܐ.
2 ܘܗܳܐ ܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ ܐܳܬܶܐ ܡܶܢ ܐܽܘܪܚܳܐ ܕܡܰܕܢܚܳܐ: ܘܩܳܠܶܗ ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܐܶܐ: ܘܰܐܪܥܳܐ ܢܶܗܪܰܬ ܡܶܢ ܫܽܘܒܚܶܗ.
3 ܐܰܝܟ ܚܶܙܘܳܐ ܕܰܚܙܺܝ݀ܬ ܟܰܕ ܐܶܬܺܝ̇ܬ ܠܰܡܚܰܒܳܠܽܘ ܠܰܡܕܺܝܢ̱ܬܳܐ: ܘܰܐܝܟ ܚܶܙܘܳܐ ܕܰܚܙܺܝ݀ܬ ܥܰܠ ܢܗܰܪ ܟܒܰܪ: ܘܢܶܦܠܶ݀ܬ ܥܰܠ ܐܰܦܰܝ̈.
4 ܘܫܽܘܒܚܶܗ ܕܡܳܪܝܳܐ ܥܰܠ ܠܒܰܝܬܳܐ: ܒܽܐܘܪܚܳܐ ܕܬܰܪܥܳܐ ܕܚܳܐܰܪ ܠܡܰܕܢܚܳܐ.
5 ܘܰܫܩܰܠܬܰܢܝ ܪܽܘܚܳܐ ܘܰܐܥܶܠܬܰܢܝ ܠܕܳܪܬܳܐ ܓܰܘܳܝܬܳܐ: ܘܰܚܙܺܝ݀ܬ ܕܶܐܬܡܠܺܝ ܒܰܝܬܶܗ ܕܡܳܪܝܳܐ ܫܽܘܒܚܶܗ.
6 ܘܫܶܡܥܶ݀ܬ ܡܶܕܶܡ ܕܶܐܡܰܪ ܠܺܝ ܡܶܢ ܓܰܘ ܒܰܝܬܳܐ: ܘܓܰܒܪܳܐ ܩܳܐܶܡ ܗ̱ܘܳܐ ܠܘܳܬܝ.
7 ܘܶܐܡܰܪ ܠܺܝ: ܒܰܪܢܳܫܳܐ: ܐܰܬܪܳܐ ܕܟܽܘܪܣܰܝ ܘܰܐܬܪܳܐ ܕܦܰܖ̈ܣܳܬܳܐ ܕܖ̈ܶܓܠܰܝ: ܕܫܳܪܶܐ ܐ̱ܢܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ ܠܥܳܠܰܡ: ܘܬܽܘܒ ܠܳܐ ܢܶܬܛܰܢܦܽܘܢ ܕܒܶܝܬ ܝܺܣܪܳܐܶܝܠ: ܘܬܽܘܒ ܠܳܐ ܢܛܰܢܦܽܘܢ ܫܡܳܐ ܕܩܽܘܕܫܝ: ܗܶܢܽܘܢ ܘܡܰܠܟܰܝ̈ܗܽܘܢ ܒܙܳܢܝܽܘܬܗܽܘܢ: ܘܒܰܫ̈ܠܰܕܶܐ ܕܡܰܠܟܰܝ̈ܗܽܘܢ ܘܒܰܦܬܰܟܖ̈ܰܝܗܽܘܢ.
8 ܥܳܒܕܺܝܢ ܗܘܰܘ ܬܰܖ̈ܥܰܝܗܽܘܢ ܥܰܠ ܓܶܢ̱ܒ ܬܰܖ̈ܥܰܝ: ܘܣܶܦܰܝ̈ܗܽܘܢ ܥܰܠ ܓܶܢ̱ܒ ܣܶܦܰܝ̈: ܘܶܐܣܬܳܐ ܗܘܳܬ ܒܰܝ̈ܢܰܝ ܘܰܠܗܽܘܢ: ܘܛܰܢܶܦܘ ܫܡܳܐ ܕܩܽܘܕܫܝ ܒܥܰܘܠܳܐ ܕܰܥܒܰܕܘ: ܘܰܐܣܺܝܦܶ݀ܬ ܐܶܢܽܘܢ ܒܪܽܘܓܙܝ.
9 ܡܶܟܺܝܠ ܢܰܪܚܩܽܘܢ ܙܳܢܽܝܘܬܗܽܘܢ ܘܰܫ̈ܠܰܕܶܐ ܕܡܰܠܟܰܝ̈ܗܽܘܢ ܡܶܢ ܩܕܳܡܝ: ܘܶܐܫܪܶܐ ܒܰܝܢܳܬܗܽܘܢ ܠܥܳܠܰܡ.
10 ܘܰܐܢ̱ܬ ܕܶܝܢ ܒܰܪܢܳܫܳܐ: ܚܰܘܳܝܗܝ ܠܒܰܝܬܳܐ ܗܳܢܳܐ ܠܰܕܒܶܝܬ ܝܺܣܪܳܐܶܝܠ: ܘܢܶܬܬܰܟܣܽܘܢ ܡܶܢ ܥܰܘܠܗܽܘܢ ܕܰܐܥܠܺܝܘ ܒܺܝ: ܘܢܶܡܫܚܽܘܢܳܗ̇ ܠܰܕܡܽܘܬܶܗ.
11 ܘܶܐܢ ܐܶܬܬܰܟܶܣܘ ܡܶܢ ܡܶܕܶܡ ܕܰܥܒܰܕܘ: ܨܽܘܖ̈ܳܬܶܗ ܕܒܰܝܬܳܐ ܘܛܽܘܝܳܒܶܗ: ܘܡܰܥ̈ܠܳܢܰܘܗܝ ܘܡܰܦܩܳܢܰܘ̈ܗܝ: ܘܟܽܠܳܗ̇ ܨܽܘܪܬܶܗ: ܘܟܽܠܗܽܘܢ ܢܳܡܽܘܣܰܘ̈ܗܝ ܘܟܽܠܗܶܝܢ ܨܽܘܖ̈ܳܬܶܗ ܚܰܘܳܐ ܐܶܢܽܘܢ: ܘܰܪܫܽܘܡ ܠܥܺܢܰܝ̈ܗܽܘܢ: ܕܢܶܛܪܽܘܢ ܟܽܠܗܶܝܢ ܨܽܘܖ̈ܳܬܶܗ: ܘܟܽܠܶܗ ܪܽܘܫܡܶܗ ܘܢܶܥܒܕܽܘܢ ܐܶܢܽܘܢ.
12 ܗܳܢܰܘ ܚܶܙܘܳܐ ܕܒܰܝܬܳܐ ܥܰܠ ܪܺܝܫ ܛܽܘܪܳܐ: ܘܟܽܠܗܽܘܢ ܬܚܽܘܡܰܘ̈ܗܝ ܟܰܕ ܚܳܕܪܺܝܢ: ܩܕܽܘܫ ܩܽܘܕܫ̈ܶܐ ܐܶܢܽܘܢ.
13 ܗܳܠܶܝܢ ܡܽܘܫ̈ܚܳܬܶܗ ܕܡܰܕܒܚܳܐ ܒܰܐܡܬܳܐ: ܕܰܐܡܳܐ ܘܰܦܫܶܟ: ܥܽܘܒܳܗ̇ ܕܰܐܡܬܳܐ ܐܰܡܳܐ: ܘܰܬܝܳܟܳܐ ܐܺܝܬ ܠܣܶܦܬܶܗ ܙܪܶܬ ܟܰܕ ܚܳܕܰܪ: ܘܗܳܟܰܢܳܐ ܒܓܰܒܶܗ.
14 ܘܡܶܢ ܐܰܪܥܳܐ ܘܰܥܕܰܡܳܐ ܠܰܬܝܳܟܳܐ ܬܰܚܬܳܝܳܐ: ܬܰܪܬܶܝܢ ܐܰܡܺܝ̈ܢ: ܘܰܦܬܳܝܶܗ ܐܰܡܬܳܐ ܚܕܳܐ: ܘܡܶܢ ܬܝܳܟܳܐ ܬܰܚܬܳܝܳܐ: ܘܰܥܕܰܡܳܐ ܠܥܶܠܳܝܳܐ ܐܰܪܒܰܥ ܐܰܡܺܝ̈ܢ: ܘܰܦܬܳܝܳܐ ܐܰܡܳܐ.
15 ܘܰܗܕܳܐܶܝܠ(ܗܢܰܘ ܡܰܕܒܚܳܐ) ܐܰܪܒܰܥ ܐܰܡܺܝ̈ܢ: ܘܡܶܢ ܗܕܳܐܶܝܠ ܘܰܠܥܶܠ ܩܰܖ̈ܢܳܬܳܐ ܐܰܪܒܰܥ.
16 ܐܘܪܟܶܗ ܕܰܗܕܳܐܶܝܠ ܬܰܪܬܰܥܶܣܖ̈ܶܐ ܐܰܡܺܝ̈ܢ: ܘܰܦܬܳܝܶܗ ܬܰܪܬܰܥܶܣܖ̈ܶܐ: ܡܪܰܒܰܥ ܠܰܐܪܒܥܳܐ ܣܶܛܖ̈ܰܘܗܝ.
17 ܘܰܬܝܳܟܶܗ ܐܰܪܒܰܥܶܣܖ̈ܶܐ ܐܰܡܺܝ̈ܢ ܐܽܘܪܟܶܗ: ܘܰܐܪܒܰܥܶܣܖ̈ܶܐ ܦܬܳܝܶܗ: ܥܰܠ ܐܰܪܒܥܳܐ ܣܶܛܖ̈ܰܘܗܝ: ܘܰܬܝܳܟܶܗ ܘܰܬܚܽܘܡܳܐ ܕܚܳܕܰܪ ܠܶܗ ܦܶܠܓܽܘܬ ܐܰܡܳܐ: ܘܥܽܘܒܳܐ ܐܺܝܬ ܠܶܗ ܟܰܕ ܚܳܕܰܪ: ܘܕܰܖ̈ܓܰܘܗܝ ܚܳܝܪܺܝܢ ܠܡܰܕܢܚܳܐ.
18 ܘܶܐܡܰܪ ܠܺܝ: ܒܰܪܢܳܫܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܠܶܝܢ ܢܳܡܽܘܣܰܘ̈ܗܝ ܕܡܰܕܒܚܳܐ ܒܝܰܘܡܳܐ ܕܡܶܬܥܒܶܕ: ܢܩܰܪܒܽܘܢ ܥܠܰܘܗܝ ܥܠܳܬܳܐ: ܘܢܶܐܫܕܽܘܢ ܥܠܰܘܗܝ ܕܡܳܐ.
19 ܘܶܐܬܶܠ ܠܟܳܗ̈ܢܶܐ ܘܰܠܠܶܘܳܝ̈ܶܐ ܕܡܶܢ ܙܰܪܥܶܗ ܕܨܳܕܽܘܩ: ܕܡܶܬܩܰܪܒܺܝܢ ܠܘܳܬܝ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܰܡܫܰܡܳܫܽܘܬܰܢܝ: ܬܰܘܪܳܐ ܒܰܪ ܒܰܩܪܳܐ ܠܬܰܕܟܺܝܬܳܐ ܕܰܚܛܳܗ̈ܶܐ.
20 ܘܬܶܣܰܒ ܡܶܢ ܕܡܶܗ: ܘܬܶܪܽܘܣ ܒܰܐܪܒܰܥ ܩܰܖ̈ܢܳܬܶܗ ܕܡܰܕܒܚܳܐ: ܘܒܰܐܪܒܰܥ ܙܳܘ̈ܝܳܬܳܐ ܕܰܬܝܳܟܶܗ: ܘܒܰܬܚܽܘܡܳܐ ܕܚܳܕܰܪ ܠܶܗ: ܘܬܶܪܽܘܣ ܥܠܰܘܗܝ ܘܢܶܬܕܰܟܶܐ.
21 ܘܬܶܣܰܒ ܬܰܘܪܳܐ ܕܬܰܕܟܺܝܬܳܐ: ܘܢܰܣܩܽܘܢܶܗ ܥܰܠ ܓܰܒܶܗ ܕܒܰܝܬܳܐ: ܠܒܰܪ ܡܶܢ ܡܰܩܕܫܳܐ.
22 ܘܰܒܝܰܘܡܳܐ ܕܰܬܪܶܝܢ: ܩܰܪܶܒ ܠܬܰܕܟܺܝܬܳܐ: ܨܺܦܪܳܝܳܐ ܕܥܶܙ̈ܶܐ ܕܠܰܝܬ ܒܶܗ ܡܽܘܡܳܐ: ܘܰܢܕܰܟܽܘܢܶܗ ܠܡܰܕܒܚܳܐ: ܐܰܝܟ ܕܕܰܟܝܽܘܗܝ ܒܬܰܘܪܳܐ.
23 ܘܡܳܐ ܕܫ̣ܰܡܠܺܝܬ ܠܰܡܕܰܟܳܝܽܘ: ܩܰܪܶܒ ܬܰܘܪܳܐ ܒܰܪ ܒܰܩܪܳܐ ܕܠܰܝܬ ܒܶܗ ܡܽܘܡܳܐ: ܘܕܶܟܪܳܐ ܡܶܢ ܥܳܢ̈ܳܐ ܕܠܰܝܬ ܒܶܗ ܡܽܘܡܳܐ.
24 ܘܩܰܪܶܒ ܐܶܢܽܘܢ ܩܕܳܡ ܡܳܪܝܳܐ: ܘܢܰܪܡܽܘܢ ܥܠܰܝܗܽܘܢ ܟܳܗ̈ܢܶܐ ܡܶܠܚܳܐ: ܘܰܢܩܰܪܒܽܘܢ ܐܶܢܽܘܢ ܝܰܩ̈ܕܶܐ ܫܰܠ̈ܡܶܐ ܠܡܳܪܝܳܐ.
25 ܘܰܬܩܰܪܒܽܘܢ ܫܰܒܥܳܐ ܝܰܘܡܺܝ̈ܢ: ܨܺܦܪܳܝܳܐ ܚܰܕ ܒܝܰܘܡܳܐ ܠܬܰܕܟܺܝܬܳܐ: ܘܬܰܘܪܳܐ ܚܰܕ ܒܰܪ ܒܰܩܪܳܐ: ܘܕܶܟܪܳܐ ܡܶܢ ܥܳܢ̈ܳܐ ܕܠܰܝܬ ܒܶܗ ܡܽܘܡܳܐ.
26 ܢܶܗܘܽܘܢ ܡܩܰܪܒܺܝܢ ܫܰܒܥܳܐ ܝܰܘܡܺܝ̈ܢ: ܘܰܢܕܰܟܽܘܢܶܗ ܠܡܰܕܒܚܳܐ ܘܰܢܫܰܠܡܽܘܢ ܐܺܝܕܰܝ̈ܗܽܘܢ.
27 ܘܡܳܐ ܕܰܫܠܶܡܘ ܝܰܘ̈ܡܳܬܳܐ ܡܶܢ ܝܰܘܡܳܐ ܕܫܰܒܥܳܐ ܘܰܠܗܰܠ: ܗܳܝܕܶܝܢ ܢܩܰܪܒܽܘܢ ܟܳܗ̈ܢܶܐ ܥܰܠ ܡܰܕܒܚܳܐ: ܝܰܩܕܰܝ̈ܗܽܘܢ ܫܰܠ̈ܡܶܐ ܘܩܽܘܖ̈ܒܳܢܰܝܗܽܘܢ: ܘܶܐܨܛܒܶܐ ܒܗܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.