Ezekiel 35
The Book of Ezekiel
܀ ܚܙܩܝܐܝܠ ܠܗ ܀
1:ܘܰܗܘܳܐ ܥܠܰܝ ܦܶܬܓܶܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܠܛܽܘܪܳܐ ܕܣܳܥܺܝܪ: ܘܶܐܬܢܰܒܳܐ ܥܠܰܘܗܝ.
3 ܘܶܐܡܰܪ ܠܶܗ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟ ܛܽܘܪܳܐ ܕܣܳܥܺܝܪ: ܘܰܐܪܺܝܡ ܐܺܝܕܝ ܥܠܰܝܟ: ܘܶܐܥܒܕܳܟ ܠܰܚܒܳܠܳܐ ܘܰܠܬܶܡܗܳܐ.
4 ܘܰܡܕܺܝ̈ܢܳܬܳܟ ܐܶܥܒܶܕ ܠܚܽܘܪܒܳܐ: ܘܰܐܢ̱ܬ ܬܶܗܘܶܐ ܠܰܚܒܳܠܳܐ: ܘܬܶܕܰܥ ܕܶܐܢܳܐ ܐ̱ܢܳܐ ܡܳܪܝܳܐ.
5 ܥܰܠ ܕܰܗܘܳܬ ܠܳܟ ܒܥܶܠܕܒܳܒܽܘܬܳܐ ܠܥܳܠܰܡ: ܘܰܐܫܠܶܡܬ ܠܰܒܢܰܝ̈ ܝܺܣܪܳܐܶܝܠ ܠܺܐܝܕܳܐ ܕܣܰܝܦܳܐ ܒܙܰܒܢܳܐ ܕܥܳܩܰܬܗܽܘܢ: ܘܰܒܙܰܒܢܳܐ ܕܥܰܘܠܳܐ ܕܩܶܨܗܽܘܢ.
6 ܡܶܛܽܠ ܗܳܢܳܐ ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܰܕܡܳܐ ܐܶܥܒܕܳܟ: ܘܰܕܡܳܐ ܢܶܪܕܦܳܟ: ܕܡܳܐ ܕܰܣܢܰܝܬ: ܗܽܘ ܕܡܳܐ ܢܶܪܕܦܳܟ.
7 ܘܶܐܥܒܕܺܝܘܗܝ ܠܛܽܘܪܳܐ ܕܣܳܥܺܝܪ ܠܰܚܒܳܠܳܐ ܘܰܠܬܶܡܗܳܐ: ܘܰܐܘܒܶܕ ܡܶܢܗ ܕܥܳܒܰܪ ܘܰܕܬܳܐܶܒ.
8 ܘܶܐܡܠܶܐ ܛܽܘܖ̈ܰܘܗܝ ܡܶܢ ܚܖ̈ܺܝܒܰܘܗܝ: ܫܩܺܝܦܰܝ̈ܟ ܘܖ̈ܳܡܳܬܳܟ ܘܢܰܚܠܰܝ̈ܟ: ܚܖ̈ܺܝܒܶܐ ܕܣܰܝܦܳܐ ܢܶܦܠܽܘܢ ܒܗܽܘܢ.
9 ܘܶܐܥܒܕܳܟ ܚܽܘܪܒܳܐ ܠܥܳܠܰܡ: ܘܰܡܕܺܝ̈ܢܳܬܳܟ ܠܳܐ ܢܶܬܝ̈ܰܬܒܳܢ: ܘܬܶܕܰܥ ܕܶܐܢܳܐ ܐ̱ܢܳܐ ܡܳܪܝܳܐ.
10 ܥܰܠ ܕܶܐܡܰܪܬ ܕܰܬܪܶܝܢ ܥܰܡ̈ܡܺܝܢ ܘܬܰܪܬܶܝܢ ܡܰܠ̈ܟܽܘܢ ܕܺܝܠܝ ܐܶܢܶܝܢ: ܘܶܐ̱ܢܳܐ ܐܺܪܰܬ ܐܶܢܶܝܢ: ܘܡܳܪܝܳܐ ܬܰܡܳܢ ܗ̱ܘܳܐ.
11 ܡܶܛܽܠ ܗܳܢܳܐ ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܶܐܥܒܶܕ ܠܳܟ ܐܰܝܟ ܪܽܘܓܙܳܟ: ܘܰܐܝܟ ܒܥܶܠܕܒܳܒܽܘܬܳܟ ܕܰܥ̣ܒܰܕܬ ܘܰܣ̣ܢܰܝܬ ܐܶܢܽܘܢ: ܘܶܐܬܓܠܶܐ ܒܗܽܘܢ ܡܳܐ ܕܕܳܐܶܢ ܐ̱ܢܳܐ ܠܳܟ.
12 ܘܬܶܕܰܥ ܕܶܐܢܳܐ ܐ̱ܢܳܐ ܡܳܪܝܳܐ: ܫܶܡܥܶ݀ܬ ܟܽܠܶܗ ܓܽܘܕܳܦܳܟ: ܕܶܐܡܰܪܬ ܥܰܠ ܛܽܘܖ̈ܶܐ ܕܺܝܣܪܳܐܶܝܠ: ܕܚܰܪܒܺܝܢ ܐܶܢܽܘܢ: ܘܡܶܐܟܽܘܠܬܳܐ ܐܶܢܽܘܢ ܕܺܝܠܰܢ.
13 ܘܰܐܘܪܶܟܬܽܘܢ ܥܠܰܝ ܦܽܘܡܟܽܘܢ: ܘܰܐܣܓܺܝܬܽܘܢ ܥܠܰܝ ܡܶܠܰܝ̈ܟܽܘܢ: ܘܶܐ̱ܢܳܐ ܫܶܡܥܶ݀ܬ.
14 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܛܽܘܪܳܐ ܕܣܳܥܺܝܪ ܕܰܫܪܶܐ ܒܚܰܕܽܘܬܳܐ ܕܟܽܠܳܗ̇ ܐܰܪܥܳܐ: ܠܰܚܒܳܠܳܐ ܐܶܥܒܕܳܟ.
15 ܥܰܠ ܕܰܚܕܺܝܬ ܠܝܳܪܬܽܘܬܳܐ ܕܒܶܝܬ ܝܺܣܪܳܐܶܝܠ ܕܚܶܪܒܰܬ: ܗܳܟܰܢܳܐ ܐܶܥܒܶܕ ܠܳܟ: ܠܰܚܒܳܠܳܐ ܬܶܗܘܶܐ ܛܽܘܪܳܐ ܕܣܳܥܺܝܪ: ܘܰܐܕܽܘܡ ܟܽܠܳܗ̇: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.