Ezekiel 9
The Book of Ezekiel
܀ ܚܙܩܝܐܝܠ ܛ ܀
1 ܘܰܩ̣ܪܳܐ ܒܶܐܕܢܰܝ̈ ܒܩܳܠܳܐ ܪܳܡܳܐ ܘܶܐܡܰܪ. ܩܪܽܘܒܘ ܦܳܖ̈ܽܘܥܶܝܗ̇ ܕܰܡܕܺܝܢ̱ܬܳܐ: ܘܐ̱ܢܳܫ ܡܳܐܢ̈ܶܐ ܕܦܽܘܪܥܳܢܶܗ ܒܺܐܝܕܶܗ.
2 ܘܰܚܙܺܝܬ ܫܬܳܐ ܓܰܒܖ̈ܺܝܢ ܐܳܬܶܝܢ ܡܶܢ ܐܽܘܪܚܳܐ ܕܬܰܪܥܳܐ ܥܶܠܳܝܳܐ ܕܚܳܐܰܪ ܠܓܰܪܒܝܳܐ: ܘܐ̱ܢܳܫ ܡܳܐܢܰܝ̈ ܦܽܘܪܥܳܢܶܗ ܒܺܐܝܕܶܗ: ܘܓܰܒܪܳܐ ܚܰܕ ܒܰܝܢܳܬܗܽܘܢ ܘܰܠܒܺܝܫ ܒܽܘܨܳܐ: ܘܶܐܣܳܪ ܚܰܨ̈ܶܐ ܕܣܰܦܺܝܠܳܐ ܒܚܰܨܰܘ̈ܗܝ: ܘܶܐܬܰܘ ܘܩܳܡܘ ܥܰܠ ܓܶܢ̱ܒ ܡܰܕܒܚܳܐ ܕܰܢܚܳܫܳܐ.
3 ܘܫܽܘܒܚܶܗ ܕܰܐܠܳܗܳܐ ܕܺܝܣܪܳܐܶܝܠ: ܣܠܶܩ ܡܶܢ ܟܪܽܘܒܳܐ ܕܩܳܐܶܡ ܗ̱ܘܳܐ ܥܰܠ ܙܳܘܺܝܬܳܐ ܕܒܰܝܬܳܐ: ܘܰܩ̣ܪܳܐ ܠܓܰܒܪܳܐ ܕܰܠܒܺܝܫ ܒܽܘܨܳܐ: ܘܶܐܣܳܪ ܚܰܨ̈ܶܐ ܕܣܰܦܺܝܠܳܐ ܒܚܰܨܰܘ̈ܗܝ.
4 ܘܶܐܡܰܪ ܠܶܗ ܡܳܪܝܳܐ: ܥܒܰܪ ܒܓܰܘ ܡܕܺܝܢ̱ܬܳܐ ܒܓܰܘ ܐܽܘܪܺܫܠܶܡ: ܘܰܪܫܽܘܡ ܪܽܘܫܡܳܐ ܥܰܠ ܒܶܝܬ ܥܰܝ̈ܢܰܝܗܽܘܢ ܕܓܰܒܖ̈ܶܐ ܕܡܶܬܬܰܢܚܺܝܢ ܘܡܶܬܕܰܢܩܺܝܢ: ܥܰܠ ܟܽܠܗܶܝܢ ܛܰܢܦ̈ܘܳܬܳܐ ܘܒܺܝ̈ܫܳܬܳܐ ܕܡܶܬܥܰܒ̈ܕܳܢ ܒܓܰܘܳܗ̇.
5 ܘܰܠܗܳܢܽܘܢ ܕܥܰܡܶܗ ܐܶܢܽܘܢ: ܐܶܡܰܪ ܠܗܽܘܢ ܠܥܺܢܰܝ̈: ܥܒܰܪܘ ܒܓܰܘ ܡܕܺܝܢ̱ܬܳܐ ܒܳܬܰܪܝ: ܘܰܚܪܽܘܒܘ. ܘܠܳܐ ܢܚܽܘ̈ܣܳܢ ܥܰܝܢܰܝ̈ܟܽܘܢ ܘܠܳܐ ܬܪܰܚܡܽܘܢ.
6 ܘܰܠܣܳܒ̈ܶܐ ܘܰܠܓܰܕܽܘ̈ܕܶܐ ܘܠܰܒܬܽܘ̈ܠܳܬܳܐ: ܘܠܰܛܠܳܝ̈ܶܐ ܘܰܠܢܶܫ̈ܶܐ ܩܰܛܶܠܘ ܠܰܚܒܳܠܳܐ: ܘܰܠܟܽܠ ܐ̱ܢܳܫ ܕܺܐܝܬ ܥܠܰܘܗܝ ܪܽܘܫܡܳܐ ܠܳܐ ܬܶܩܪܒܽܘܢ: ܘܡܶܢ ܡܰܩܕܰܫܝ ܫܰܪܰܘ. ܘܫܰܪܺܝܘ ܒܓܰܒܖ̈ܶܐ ܣܳܒ̈ܶܐ ܕܩܳܝܡܺܝܢ ܗܘܰܘ ܩܕܳܡ ܒܰܝܬܳܐ.
7 ܘܶܐܡܰܪ ܠܗܽܘܢ ܛܰܡܐܽܘܗܝ ܠܒܰܝܬܳܐ: ܘܰܡܠܰܘ ܕܳܖ̈ܶܐ ܚܖ̈ܺܝܒܶܐ: ܦܽܘܩܘ ܩܰܛܶܠܘ ܒܰܡܕܺܝܢ̱ܬܳܐ.
8 ܘܟܰܕ ܚܪܰܒܘ ܐܶܢܽܘܢ: ܐܶܫܬܰܚܪܶܬ ܐܶܢܳܐ ܘܢܶܦܠܶ݀ܬ ܥܰܠ ܐܰܦܰܝ̈: ܘܰܐܝܠܠܶܬ ܒܩܳܠܳܐ ܪܳܡܳܐ ܘܶܐܡܪܶܬ: ܐܽܘܗ ܡܳܪܶܐ ܡܳܖ̈ܰܘܳܬܳܐ: ܡܚܰܒܶܠ ܐܰܢ̱ܬ ܠܟܽܠ ܕܶܐܫܬܰܚܰܪ ܡܶܢ ܝܺܣܪܳܐܶܝܠ: ܘܳܐܫܶܕ ܐܰܢ̱ܬ ܪܽܘܓܙܳܟ ܥܰܠ ܐܽܘܪܺܫܠܶܡ.
9 ܘܶܐܡܰܪ ܠܺܝ: ܥܰܘܠܳܐ ܕܒܶܝܬ ܝܺܣܪܳܐܶܝܠ ܘܕܺܝܗܽܘܕܳܐ ܣܓܺܝ ܛܳܒ: ܘܶܐܬܡܰܠܝܰܬ ܐܰܪܥܳܐ ܕܡܳܐ: ܘܰܡܕܺܝܢ̱ܬܳܐ ܐܶܬܡܰܠܝܰܬ ܢܶܟܠܳܐ: ܘܶܐܡܰܪܘ ܫܰܒܩܳܗ̇ ܡܳܪܝܳܐ ܠܰܐܪܥܳܐ: ܘܠܳܐ ܚܳܙܶܐ ܠܰܢ ܡܳܪܝܳܐ.
10 ܘܶܐ̱ܢܳܐ ܠܳܐ ܐܶܚܽܘܣ ܥܠܰܝܗܽܘܢ ܘܠܳܐ ܐܰܪܰܚܶܡ: ܐܽܘܖ̈ܚܳܬܗܽܘܢ ܒܪܺܝܫܗܽܘܢ ܐܶܦܪܽܘܥ.
11 ܘܰܚܙܺܝܬ ܠܓܰܒܪܳܐ ܕܰܠܒܺܝܫ ܒܽܘܨܳܐ ܕܰܥܢܳܐ ܘܶܐܡܰܪ: ܥܶܒܕܶܬ ܐܰܝܟܰܢܳܐ ܕܦܰܩܶܕܬܳܢܝ.