Ezekiel 14
The Book of Ezekiel
܀ ܚܙܩܝܐܝܠ ܝܕ ܀
1 ܘܶܐܬܰܘ ܠܘܳܬܝ ܓܰܒܖ̈ܶܐ ܡܶܢ ܣܳܒ̈ܶܐ ܕܺܝܣܪܳܐܶܝܠ ܠܡܶܫܐܰܠ ܡܶܢ ܡܳܪܝܳܐ: ܘܺܝܬܶܒܘ ܩܕܳܡܝ.
2 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
3 ܒܰܪܢܳܫܳܐ: ܓܰܒܖ̈ܶܐ ܗܳܠܶܝܢ ܐܰܣܶܩܘ ܕܶܚܠܰܬܗܽܘܢ ܥܰܠ ܠܶܒܗܽܘܢ: ܘܬܽܘܩܰܠܬܳܐ ܕܥܰܘܠܗܽܘܢ ܣ̣ܳܡܘ ܠܽܘܩܒܰܠ ܐܰܦܰܝ̈ܗܽܘܢ: ܐܶܥܒܶܕ ܦܽܘܪܥܳܢܳܐ ܡܶܢܗܽܘܢ.
4 ܡܶܟܺܝܠ ܡܰܠܶܠ ܥܰܡܗܽܘܢ ܘܶܐܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ. ܓܒܰܪ ܓܒܰܪ ܡܶܢ ܒܶܝܬ ܝܺܣܪܳܐܶܝܠ: ܕܢܰܣܶܩ ܕܶܚܠܬܶܗ ܥܰܠ ܠܶܒܶܗ: ܘܬܽܘܩܰܠܬܳܐ ܕܥܰܘܠܶܗ ܢܣܺܝܡ ܠܽܘܩܒܰܠ ܐܰܦܰܘ̈ܗܝ: ܘܢܺܐܬܶܐ ܠܘܳܬ ܢܒܺܝܳܐ: ܐܶܢܳܐ ܡܳܪܝܳܐ ܐܶܗܘܶܐ ܠܶܗ ܣܳܗܕܳܐ ܒܗܶܝܢ ܒܣܽܘܓܳܐܐ ܕܕܶܚ̈ܠܳܬܶܗ.
5 ܡܶܛܽܠ ܕܶܐܚܽܘܕ ܠܰܕܒܶܝܬ ܝܺܣܪܳܐܶܝܠ ܒܠܶܒܗܽܘܢ: ܕܰܦܪܰܩܘ ܡܶܢܝ ܒܟܽܠܗܶܝܢ ܕܶܚ̈ܠܳܬܗܽܘܢ.
6 ܡܶܟܺܝܠ ܐܶܡܰܪ ܠܰܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܽܘܒܘ ܘܶܐܬܦܢܰܘ ܡܶܢ ܟܽܠܗܶܝܢ ܕܶܚ̈ܠܳܬܟܽܘܢ: ܘܡܶܢ ܟܽܠܳܗ̇ ܛܰܢܦܽܘܬܟܽܘܢ ܐܰܦܢܰܘ ܐܰܦܰܝ̈ܟܽܘܢ.
7 ܡܶܛܽܠ ܕܓܰܒܪܳܐ ܡܶܢ ܝܺܣܪܳܐܶܝܠ: ܘܡܶܢ ܐܰܝܠܶܝܢ ܕܡܶܬܦܢܶܝܢ ܠܘܳܬܝ ܕܥܳܡܪܺܝܢ ܒܺܝܣܪܳܐܶܝܠ: ܕܢܶܗܦܽܘܟ ܡܶܢܝ ܘܢܰܣܶܩ ܕܶܚܠܬܶܗ ܥܰܠ ܠܶܒܶܗ: ܘܬܽܘܩܰܠܬܳܐ ܕܥܰܘܠܶܗ ܢܣܺܝܡ ܠܽܘܩܒܰܠ ܐܰܦܰܘ̈ܗܝ: ܘܢܺܐܬܶܐ ܠܘܳܬ ܢܒܺܝܳܐ ܠܰܡܫܰܐܳܠܽܘܬܶܗ: ܐܶܢܳܐ ܡܳܪܝܳܐ ܐܶܗܘܶܐ ܠܶܗ ܣܳܗܕܳܐ.
8 ܘܶܐܬܶܠ ܪܽܘܓܙܝ ܥܰܠ ܓܰܒܪܳܐ ܗܰܘ: ܘܶܐܥܒܕܺܝܘܗܝ ܠܳܐܬܳܐ ܘܰܠܡܰܬܠܳܐ: ܘܰܐܘܒܕܺܝܘܗܝ ܡܶܢ ܓܰܘ ܥܰܡܝ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
9 ܘܰܢܒܺܝܳܐ ܟܰܕ ܢܶܛܥܶܐ ܘܰܢܡܰܠܶܠ ܡܶܠܬܳܐ: ܐܶܢܳܐ ܡܳܪܝܳܐ ܐܰܛܥܺܝܬܶܗ ܠܰܢܒܺܝܳܐ ܗܰܘ: ܘܰܐܪܺܝܡ ܐܺܝܕܝ ܥܠܰܘܗܝ: ܘܰܐܘܒܕܺܝܘܗܝ ܡܶܢ ܓܰܘ ܥܰܡܝ ܝܺܣܪܳܐܶܝܠ.
10 ܘܢܶܫܩܠܽܘܢ ܥܰܘܠܗܽܘܢ: ܥܰܘܠܶܗ ܕܗܰܘ ܕܰܡܫܰܐܶܠ: ܐܰܝܟ ܥܰܘܠܶܗ ܕܰܢܒܺܝܳܐ ܢܶܗܘܶܐ.
11 ܘܬܽܘܒ ܠܳܐ ܢܶܛܥܽܘܢ ܕܒܶܝܬ ܝܺܣܪܳܐܶܝܠ ܡܶܢܝ: ܘܬܽܘܒ ܠܳܐ ܢܶܬܛܰܢܦܽܘܢ ܒܟܽܠܶܗ ܥܰܘܠܗܽܘܢ: ܐܶܠܳܐ ܢܶܗܘܽܘܢ ܠܺܝ ܥܰܡܳܐ: ܘܶܐ̱ܢܳܐ ܐܶܗܘܶܐ ܠܗܽܘܢ ܐܰܠܳܗܳܐ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
12 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
13 ܒܰܪܢܳܫܳܐ: ܐܰܪܥܳܐ ܐܶܢ ܬܶܚܛܶܐ ܠܺܝ ܘܬܶܥܒܶܕ ܥܰܘܠܳܐ ܩܕܳܡܝ: ܐܰܪܺܝܡ ܐܺܝܕܝ ܥܠܶܝܗ̇: ܘܶܐܬܒܰܪ ܒܳܗ̇ ܩܰܢܝܳܐ ܕܰܥܒܽܘܪܳܐ: ܘܶܐܫܰܕܰܪ ܥܠܶܝܗ̇ ܟܰܦܢܳܐ: ܘܰܐܘܒܶܕ ܡܶܢܳܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ.
14 ܘܶܐܢ ܢܶܗܘܽܘܢ ܒܳܗ̇ ܗܳܠܶܝܢ ܬܠܳܬܳܐ ܓܰܒܖ̈ܺܝܢ: ܢܽܘܚ ܘܕܳܢܺܝܐܶܝܠ: ܘܺܐܝܽܘܒ: ܗܶܢܽܘܢ ܒܙܰܕܺܝܩܽܘܬܗܽܘܢ ܢܦܰܨܽܘܢ ܢܰܦܫܗܽܘܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܘܶܐܢ ܐܰܝܬܶܐ ܚܰܝܽܘܬܳܐ ܒܺܝܫܬܳܐ ܥܰܠ ܐܰܪܥܳܐ ܘܬܰܘܒܕܺܝܗ̇: ܘܬܶܗܘܶܐ ܠܰܚܒܳܠܳܐ ܡܶܢ ܒܠܰܝ ܕܥܳܒܰܪ ܡܶܢ ܚܰܝܽܘܬܳܐ.
16 ܘܗܳܠܶܝܢ ܬܠܳܬܳܐ ܓܰܒܖ̈ܺܝܢ ܐܺܝܬ ܒܳܗ̇: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܢܦܰܨܽܘܢ ܠܳܐ ܠܰܒܢܰܝ̈ܳܐ ܘܠܳܐ ܠܰܒܢ̈ܳܬܳܐ: ܐܶܠܳܐ ܗܶܢܽܘܢ ܒܰܠܚܽܘܕܰܝܗܽܘܢ ܢܶܬܦܰܨܽܘܢ: ܘܰܐܪܥܳܐ ܬܶܗܘܶܐ ܠܰܚܒܳܠܳܐ.
17 ܘܶܐܢ ܐܰܝܬܶܐ ܚܰܪܒܳܐ ܥܰܠ ܐܰܪܥܳܐ ܗܳܝ: ܘܺܐܡܰܪ ܕܬܶܥܒܰܪ ܚܰܪܒܳܐ ܒܰܐܪܥܳܐ ܗܳܝ: ܘܰܐܘܒܶܕ ܡܶܢܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ.
18 ܘܗܳܠܶܝܢ ܬܠܳܬܳܐ ܓܰܒܖ̈ܺܝܢ ܐܺܝܬ ܒܳܗ̇: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܢܦܰܨܽܘܢ ܠܳܐ ܠܰܒܢܰܝ̈ܳܐ ܘܠܳܐ ܠܰܒܢ̈ܳܬܳܐ: ܐܶܠܳܐ ܗܶܢܽܘܢ ܒܰܠܚܽܘܕܰܝܗܽܘܢ ܢܶܬܦܰܨܽܘܢ.
19 ܘܶܐܢ ܐܶܫܰܕܰܪ ܡܰܘܬܳܢܳܐ ܥܰܠ ܐܰܪܥܳܐ ܗܳܝ: ܘܶܐܫܽܘܕ ܚܶܡܬܝ ܥܠܶܝܗ̇ ܒܰܕܡܳܐ: ܘܰܐܘܒܶܕ ܡܶܢܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ.
20 ܘܢܽܘܚ ܘܕܳܢܺܝܐܶܝܠ ܘܺܐܝܽܘܒ ܐܺܝܬ ܒܓܰܘܳܗ̇: ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܒܪܳܐ ܘܠܳܐ ܒܰܪܬܳܐ ܢܦܰܨܽܘܢ: ܐܶܠܳܐ ܗܶܢܽܘܢ ܒܙܰܕܺܝܩܽܘܬܗܽܘܢ ܢܦܰܨܽܘܢ ܢܰܦܫܗܽܘܢ.
21 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܐܰܪܒܥܳܐ ܕܺܝ̈ܢܺܝܢ ܒܺܝ̈ܫܺܝܢ ܫܰܕܪܶܬ ܥܰܠ ܐܽܘܪܺܫܠܶܡ: ܚܰܪܒܳܐ: ܘܟܰܦܢܳܐ: ܘܚܰܝܽܘܬܳܐ ܒܺܝܫܬܳܐ: ܘܡܰܘܬܳܢܳܐ: ܘܰܐܘܒܶܕ ܡܶܢܳܗ̇ ܒܢܰܝ̈ܢܳܫܳܐ ܘܰܒܥܺܝܪܳܐ.
22 ܘܢܶܫܬܰܚܪܽܘܢ ܒܳܗ̇ ܐܰܝܠܶܝܢ ܕܡܶܬܦܰܨܶܝܢ ܕܡܰܦܩܺܝܢ ܒܢܰܝ̈ܳܐ ܘܰܒܢ̈ܳܬܳܐ: ܘܗܶܢܽܘܢ ܢܶܦܩܽܘܢ ܠܘܳܬܟܽܘܢ: ܘܬܶܚܙܽܘܢ ܐܽܘܖ̈ܚܳܬܗܽܘܢ ܘܨܶܢ̈ܥܳܬܗܽܘܢ: ܘܬܶܬܒܰܝܐܽܘܢ ܡܶܢ ܒܺܝܫܬܳܐ ܕܰܐܝܬܺܝܬ ܥܰܠ ܐܽܘܪܺܫܠܶܡ: ܘܟܽܠܡܶܕܶܡ ܕܰܐܝܬܺܝܬ ܥܠܶܝܗ̇.
23 ܘܰܢܒܰܝܐܽܘܢܳܟܽܘܢ ܟܰܕ ܬܶܚܙܽܘܢ ܐܽܘܖ̈ܚܳܬܗܽܘܢ ܘܨܶܢ̈ܥܳܬܗܽܘܢ: ܘܬܶܕܥܽܘܢ ܕܠܳܐ ܗ̱ܘܳܐ ܡܰܓܳܢ ܥܶܒܕܶܬ ܟܽܠ ܕܥܶܒܕܶܬ ܒܳܗ̇: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.