Ezekiel 26
The Book of Ezekiel
܀ ܚܙܩܝܐܝܠ ܟܘ ܀
1 ܥܰܠ ܨܽܘܪ. ܒܰܫܢܰܬ ܚܕܰܥܶܣܖ̈ܶܐ ܒܚܰܕ ܒܝܰܪܚܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܥܰܠ ܕܶܐܡܪܰܬ ܨܽܘܪ ܥܰܠ ܐܽܘܪܺܫܠܶܡ ܐܰܚܳܢ: ܐܶܬܬܰܒܰܪܘ ܬܰܖ̈ܥܶܐ ܕܥܰܡ̈ܡܶܐ ܘܰܦܢܰܘ ܠܘܳܬܝ: ܘܚܶܪܒܰܬ ܘܨܶܕܝܰܬ.
3 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟܝ ܨܽܘܪ: ܘܰܐܣܶܩ ܥܠܰܝܟܝ ܥܰܡ̈ܡܶܐ ܣܰܓܺܝ̈ܐܶܐ: ܐܰܝܟ ܕܣܳܠܶܩ ܝܰܡܳܐ ܒܓܰܠܠܰܘ̈ܗܝ.
4 ܘܰܢܚܰܒܠܽܘܢ ܫܽܘܖ̈ܶܝܗ̇ ܕܨܽܘܪ: ܘܢܶܣܚܦܽܘܢ ܡܰܓܕܠܶܝ̈ܗ̇: ܘܢܶܥܩܪܽܘܢ ܥܰܦܪܳܗ̇ ܡܶܢܳܗ̇: ܘܶܐܥܒܕܺܝܗ̇ ܐܰܝܟ ܟܺܐܦܳܐ ܫܰܥܺܝܥܬܳܐ.
5 ܘܒܶܝܬ ܡܰܫܛܚ̈ܶܐ ܬܶܗܘܶܐ ܠܰܡܨܝ̈ܕܳܬܳܐ ܒܓܰܘ ܝܰܡܳܐ: ܡܶܛܽܠ ܕܶܐܢܳܐ ܡ̣ܰܠܠܶܬ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܘܬܶܗܘܶܐ ܒܶܙܬܳܐ ܠܥܰܡ̈ܡܶܐ.
6 ܘܰܒ̈ܢܳܬܳܗ̇ ܕܰܒܕܰܒܪܳܐ ܒܚܰܪܒܳܐ ܢܶܬܩܰܛ̈ܠܳܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
7 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܡܰܝܬܶܐ ܐ̱ܢܳܐ ܥܰܠ ܨܽܘܪ: ܠܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ ܡܶܢ ܓܰܪܒܝܳܐ: ܡܠܶܟ ܡܰܠ̈ܟܶܐ: ܒܖ̈ܰܟܫܳܐ: ܘܰܒܡܰܖ̈ܟܒܳܬܳܐ: ܘܰܒܦܰܖ̈ܳܫܶܐ: ܘܰܒܟܢܽܘܫܝܳܐ: ܘܰܒܥܰܡܳܐ ܣܰܓܺܝܐܳܐ.
8 ܒ̈ܢܳܬܶܟܝ ܕܰܒܚܰܩܠܳܐ ܒܚܰܪܒܳܐ ܢܩܰܛܶܠ: ܘܰܢܩܺܝܡ ܥܠܰܝܟܝ ܕܰܘ̈ܩܶܐ: ܘܢܰܟܡܶܢ ܥܠܰܝܟܝ ܟܡܺܐܢ̈ܶܐ: ܘܰܢܩܺܝܡ ܥܠܰܝܟܝ ܣܰܟܪܳܐ.
9 ܘܰܫܢܳܢ̈ܶܐ ܕܢܰܝܙܟܰܘ̈ܗܝ ܢܶܬܶܠ ܒܫܽܘܖ̈ܰܝܟܝ: ܘܡܰܓܕܠܰܝ̈ܟܝ ܢܶܥܩܪܽܘܢ ܒܣܰܝܦܰܝ̈ܗܽܘܢ.
10 ܡܶܢ ܗܶܠܰܟܬܳܐ ܕܖ̈ܰܟܫܶܗ ܢܟܰܣܶܟܝ ܚܶܠܳܐ: ܘܡܶܢ ܩܳܠܳܐ ܕܦܰܖ̈ܳܫܰܘܗܝ ܘܰܕܓܺܝ̈ܓܠܶܐ ܕܡܰܖ̈ܟܒܳܬܶܗ ܢܙܽܘܥܽܘܢ ܫܽܘܖ̈ܰܝܟܝ: ܘܡܳܐ ܕܥܳܐܶܠ ܒܬܰܖ̈ܥܰܝܟܝ: ܐܰܝܟ ܗܰܘ ܕܥܳܐܶܠ ܠܰܡܕܺܝܢ̱ܬܳܐ ܡܬܰܪܰܥܬܳܐ.
11 ܘܰܒܦܰܖ̈ܣܳܬܳܐ ܕܖ̈ܰܟܫܶܗ ܢܕܽܘܫ ܟܽܠܗܽܘܢ ܫܽܘܩܰܝ̈ܟܝ: ܘܰܢܩܰܛܶܠ ܥܰܡܶܟܝ ܒܚܰܪܒܳܐ: ܘܰܥ̈ܠܘܳܬܳܐ ܕܥܽܘܫܢܶܟܝ ܒܰܐܪܥܳܐ ܢܶܣܚܽܘܦ.
12 ܘܢܶܒܙܽܘܢ ܢܶܟܣܰܝ̈ܟܝ ܘܢܶܫܒܽܘܢ ܩܶܢܝܳܢܶܟܝ: ܘܢܶܣܚܦܽܘܢ ܫܽܘܖ̈ܰܝܟܝ: ܘܢܶܥܩܪܽܘܢ ܒ̈ܳܬܶܐ ܕܪܶܓܬܶܟܝ: ܘܟܺܐܦܰܝ̈ܟܝ ܘܩܰܝܣܰܝ̈ܟܝ ܘܥܽܘܬܪܶܟܝ ܢܶܫܕܽܘܢ ܒܝܰܡܳܐ.
13 ܘܶܐܒܰܛܶܠ ܣܽܘܓܳܐܐ ܕܰܙܡܳܪܶܟܝ: ܘܬܽܘܒ ܠܳܐ ܢܶܫܬܡܰܥ ܩܳܠܳܐ ܕܟܶܢܳܪܶܟܝ.
14 ܘܶܐܥܒܕܶܟܝ ܟܺܐܦܳܐ ܫܰܥܺܝܥܬܳܐ: ܘܡܰܫܛܳܚ̈ܶܐ ܕܰܡܨܝ̈ܕܳܬܳܐ: ܘܬܽܘܒ ܠܳܐ ܬܶܬܒܢܶܝܢ: ܡܶܛܽܠ ܕܶܐܢܳܐ ܡ̣ܰܠܠܶܬ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܨܽܘܪ: ܡܶܢ ܩܳܠܳܐ ܕܡܰܦܽܘܠܬܶܟܝ ܘܡܶܢ ܫܽܘܢܳܩܳܐ ܕܰܩܛܺܝܠܰܝ̈ܟܝ: ܘܩܶܛ̈ܠܶܐ ܕܡܶܬܩܰܛܠܺܝܢ ܒܓܰܘܟܝ: ܢܙܽܘ̈ܥܳܢ ܓܳܙܖ̈ܳܬܳܐ.
16 ܘܢܶܚܬܽܘܢ ܡܶܢ ܟܽܘܖ̈ܣܰܘܳܬܗܽܘܢ ܟܽܠܗܽܘܢ ܪܰܘܖ̈ܒܳܢܶܐ ܕܝܰܡܳܐ: ܘܢܶܫܩܠܽܘܢ ܡܶܢܗܽܘܢ ܐܶܣܛܠܰܝ̈ܗܽܘܢ: ܘܢܶܫܠܚܽܘܢ ܡܳܐܢ̈ܶܐ ܕܨܶܒܬܗܽܘܢ: ܘܢܶܠܒܫܽܘܢ ܙܰܘܥܬܳܐ: ܘܢܶܬܒܽܘܢ ܒܰܐܪܥܳܐ ܘܢܶܬܘܪܽܘܢ ܘܠܳܐ ܢܶܬܬܢܺܝܚܽܘܢ: ܘܢܶܬܡܗܽܘܢ ܥܠܰܝܟܝ.
17 ܘܢܺܐܠܽܘܢ ܥܠܰܝܟܝ ܐܽܘܠ̈ܝܳܬܳܐ: ܘܢܺܐܡܪܽܘܢ ܠܶܟܝ: ܐܰܝܟܰܢܳܐ ܐܶܒܰܕܬܝ ܥܳܡܽܘܪܬܳܐ ܕܝܰܡ̈ܡܶܐ: ܡܕܺܝܢ̱ܬܳܐ ܥܰܫܺܝܢܬܳܐ ܕܥܰܫܺܝܢܳܐ ܗܘܳܬ ܒܝܰܡܳܐ ܗܺܝ ܘܥܳܡܽܘܖ̈ܶܝܗ̇: ܕܝܰܗܒܘ ܕܶܚܠܰܬܗܽܘܢ ܒܟܽܠܗܽܘܢ ܥܳܡܽܘܖ̈ܶܝܗ̇.
18 ܡܶܟܺܝܠ ܢܙܽܘ̈ܥܳܢ ܓܳܙܖ̈ܳܬܳܐ ܒܝܰܘܡܳܐ ܕܡܰܦܽܘܠܬܶܟܝ: ܘܢܶܬܕܰܠ̈ܚܳܢ ܓܳܙܖ̈ܳܬܳܐ ܒܝܰܘܡܳܐ ܕܡܰܦܽܘܠܬܶܟܝ.
19 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܨܽܘܪ: ܡܳܐ ܕܰܥܒܰܕܬܶܟܝ ܡܕܺܝܢ̱ܬܳܐ ܚܰܪܒܬܳܐ ܐܰܝܟ ܡܕܺܝ̈ܢܳܬܳܐ ܕܠܳܐ ܐܶܬܝܰܬܰܒ̈ܝ: ܡܰܣܶܩ ܐ̱ܢܳܐ ܥܠܰܝܟܝ ܬܗܽܘܡܳܐ: ܘܰܢܟܰܣܽܘܢܶܟܝ ܡܰܝ̈ܳܐ ܣܰܓܺܝ̈ܐܶܐ.
20 ܘܰܐܚܬܶܟܝ ܥܰܡ ܢܳܚ̈ܬܰܝ ܓܽܘܒܳܐ ܠܘܳܬ ܥܰܡܳܐ ܕܥܳܠܰܡ: ܘܰܐܘܬܒܶܟܝ ܒܰܐܪܥܳܐ ܬܰܚܬܳܝܬܳܐ: ܒܚܰܖ̈ܒܳܬܳܐ ܕܡܶܢ ܥܳܠܰܡ ܥܰܡ ܢܳܚ̈ܬܰܝ ܓܽܘܒܳܐ: ܘܠܳܐ ܬܶܬܝܰܬܒܺܝܢ: ܘܠܳܐ ܐܶܥܒܶܕ ܩܝܳܡܶܟܝ ܒܰܐܪܥܳܐ ܕܚܰܝ̈ܶܐ.
21 ܠܰܐܒܕܳܢܳܐ ܐܶܬܠܶܟܝ: ܘܬܶܬܒܥܶܝܢ ܘܠܳܐ ܬܶܫܬܰܟܚܺܝܢ ܬܽܘܒ ܠܥܳܠܰܡ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.