Ezekiel 36
The Book of Ezekiel
܀ ܚܙܩܝܐܝܠ ܠܘ ܀
1 ܘܰܐܢ̱ܬ ܒܰܪܢܳܫܳܐ: ܐܶܬܢܰܒܳܐ ܥܰܠ ܛܽܘܖ̈ܶܐ ܕܺܝܣܪܳܐܶܝܠ: ܘܶܐܡܰܪ ܠܛܽܘܖ̈ܶܐ ܕܺܝܣܪܳܐܶܝܠ: ܫܡܰܥܘ ܦܶܬܓܳܡܶܗ ܕܡܳܪܶܐ ܡܳܖ̈ܰܘܳܬܳܐ.
2 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܡܰܪ ܥܠܰܝܟܽܘܢ ܒܥܶܠܕܒܳܒܳܐ ܐܰܚܳܢ: ܘܶܐܡܰܪ ܕܖ̈ܳܡܳܬܳܐ ܕܡܶܢ ܥܳܠܰܡ ܕܺܝܠܰܢ ܐܶܢܶܝܢ ܝܽܘܪܬܳܢܳܐ.
3 ܡܶܛܽܠ ܗܳܢܳܐ ܐܶܬܢܰܒܳܐ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܶܐܨܛܰܥܰܪܬܽܘܢ ܘܶܐܬܚܪܶܒܬܽܘܢ: ܘܶܐܬܓܰܕܰܦܬܽܘܢ ܡܶܢ ܐܰܝܠܶܝܢ ܕܰܚܕܺܝܪܺܝܢ ܠܟܽܘܢ: ܘܰܗܘܰܝܬܽܘܢ ܝܽܘܪܬܳܢܳܐ ܠܫܰܪܟܳܐ ܕܥܰܡ̈ܡܶܐ: ܘܰܢܦܰܠܬܽܘܢ ܒܡܰܡܠܠܳܐ ܕܠܶܫܳܢ̈ܶܐ ܘܰܒܪܶܢܝܳܐ ܕܥܰܡ̈ܡܶܐ.
4 ܡܶܛܽܠ ܗܳܢܳܐ ܫܡܰܥܘ ܦܶܬܓܳܡܶܗ ܕܡܳܪܶܐ ܡܳܖ̈ܰܘܳܬܳܐ: ܛܽܘܖ̈ܶܐ ܕܺܝܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܛܽܘܖ̈ܶܐ ܘܰܠܖ̈ܳܡܳܬܳܐ ܘܰܠܢܰܚ̈ܠܶܐ: ܘܰܠܥܽܘܡ̈ܩܶܐ ܘܰܠܚܰܖ̈ܒܳܬܳܐ ܕܨܰܕܝ̈ܳܢ: ܘܠܰܡܕܺܝ̈ܢܳܬܳܐ ܕܶܐܫܬܒܶܩ̈ܝ: ܘܰܗܘܰܝ̈ ܠܒܶܙܬܳܐ ܘܰܠܡܽܘܝܳܩܳܐ ܠܫܰܪܟܳܐ ܕܥܰܡ̈ܡܶܐ ܕܰܚܕܺܝܪܺܝܢ ܠܗܽܘܢ.
5 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܢܽܘܪܳܐ ܕܰܛܢܳܢܝ ܡܰܠܠܶܬ ܥܰܠ ܫܰܪܟܳܐ ܕܥܰܡ̈ܡܶܐ ܘܥܰܠ ܟܽܠܳܗ̇ ܐܰܕܽܘܡ: ܥܰܠ ܕܰܥܒܰܕܘ ܠܗܽܘܢ ܐܰܪܥܝ ܝܽܘܪܬܳܢܳܐ: ܒܚܰܕܽܘܬܳܐ ܕܠܶܒܗܽܘܢ ܨܰܥܰܪܘ ܢܰܦ̈ܫܳܬܳܐ: ܕܢܶܫܒܽܘܢ ܐܶܢܶܝܢ ܘܢܶܒܙܽܘܢ ܐܶܢܶܝܢ.
6 ܡܶܛܽܠ ܗܳܢܳܐ ܐܶܬܢܰܒܳܐ ܥܰܠ ܐܰܪܥܳܐ ܕܺܝܣܪܳܐܶܝܠ: ܘܶܐܡܰܪ ܠܛܽܘܖ̈ܶܐ ܘܰܠܖ̈ܳܡܳܬܳܐ ܘܰܠܢܰܚ̈ܠܶܐ ܘܰܠܥܽܘܡ̈ܩܶܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܡ̣ܰܠܠܶܬ ܒܰܛܢܳܢܝ ܘܰܒܚܶܡܬܝ: ܥܰܠ ܕܩܰܒܶܠܬܽܘܢ ܚܶܣܕܳܐ ܕܥܰܡ̈ܡܶܐ.
7 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܐܰܪܺܝܡܶ݀ܬ ܐܺܝܕܝ ܥܰܠ ܥܰܡ̈ܡܶܐ ܕܰܚܕܺܝܪܺܝܢ ܠܟܽܘܢ: ܕܰܢܩܰܒܠܽܘܢ ܚܶܣܕܗܽܘܢ.
8 ܐܰܢ̱ܬܽܘܢ ܕܶܝܢ ܛܽܘܖ̈ܶܐ ܕܺܝܣܪܳܐܶܝܠ: ܥܰܘܦܰܝ̈ܟܽܘܢ ܬܶܬܠܽܘܢ: ܘܦܺܐܖ̈ܰܝܟܽܘܢ ܬܪܰܒܽܘܢ ܠܥܰܡܝ ܝܺܣܪܳܐܶܝܠ: ܡܶܛܽܠ ܕܰܩܪܶܒܘ ܠܡܶܐܬܳܐ.
9 ܘܗܳܐ ܡܶܬܦܢܶܐ ܐ̱ܢܳܐ ܥܠܰܝܟܽܘܢ: ܘܬܶܬܦܰܠܚܽܘܢ ܘܬܶܙܕܰܪܥܽܘܢ.
10 ܘܰܐܣܓܶܐ ܥܠܰܝܟܽܘܢ ܒܢܰܝ̈ܢܳܫܳܐ ܕܟܽܠܶܗ ܒܶܝܬ ܝܺܣܪܳܐܶܝܠ: ܘܢܶܬܝܰܬܒ̈ܳܢ ܡܕܺܝ̈ܢܳܬܳܐ ܘܚܰܖ̈ܒܳܬܳܐ ܢܶܬܒܰܢ̈ܝܳܢ.
11 ܘܰܐܣܓܶܐ ܥܠܰܝܟܽܘܢ ܒܢܰܝ̈ܢܳܫܳܐ ܘܰܒܥܺܝܪܳܐ: ܘܢܶܟܒܪܽܘܢ ܘܢܶܣܓܽܘܢ: ܘܰܐܘܬܶܒܟܽܘܢ ܐܰܝܟ ܕܡܶܢ ܩܕܺܝܡ: ܘܰܐܛܐܶܒ ܠܟܽܘܢ ܐܰܝܟ ܕܡܶܢ ܪܺܝܫܺܝܬܳܐ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
12 ܘܶܐܗܰܠܶܟ ܒܟܽܘܢ ܒܢܰܝ̈ܢܳܫܳܐ ܠܥܰܡܝ ܝܺܣܪܳܐܶܝܠ: ܘܢܺܐܪܬܽܘܢܳܟܽܘܢ ܘܬܶܗܘܢ ܠܗܽܘܢ ܠܝܽܘܪܬܳܢܳܐ: ܘܬܽܘܒ ܠܳܐ ܬܰܘܣܦܽܘܢ ܠܡܶܬܓܰܙܳܝܽܘ.
13 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܳܐܡܪܺܝܢ ܠܶܟܝ ܐܳܟܠܰܬ ܒܢܰܝ̈ܢܳܫܳܐ ܐܰܢ̱ܬܝ: ܘܰܡܓܰܙܝܰܬ ܥܰܡܳܗ̇.
14 ܡܶܟܺܝܠ ܒܢܰܝ̈ܢܳܫܳܐ ܠܳܐ ܬܶܐܟܠܺܝܢ: ܘܥܰܡܶܟܝ ܬܽܘܒ ܠܳܐ ܬܶܓܙܺܝܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܘܬܽܘܒ ܠܳܐ ܐܰܫܡܰܥ ܥܠܰܝܟܝ ܚܶܣܕܳܐ ܕܥܰܡ̈ܡܶܐ: ܘܨܰܥܪܗܽܘܢ ܬܽܘܒ ܠܳܐ ܬܩܰܒܠܺܝܢ: ܘܥܰܡܶܟܝ ܬܽܘܒ ܠܳܐ ܬܓܰܙܶܝܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
16 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
17 ܒܰܪܢܳܫܳܐ: ܕܒܶܝܬ ܝܺܣܪܳܐܶܝܠ ܝܳܬܒܺܝܢ ܒܰܐܪܥܗܽܘܢ: ܘܛܰܢܦܽܘܗ̇ ܒܽܐܘܖ̈ܚܳܬܗܽܘܢ ܘܰܒܨܶܢ̈ܥܳܬܗܽܘܢ: ܘܰܐܝܟ ܛܰܡܽܐܘܬܳܐ ܕܟܶܦܣܳܢܺܝܬܳܐ: ܗܳܟܰܢܳܐ ܗܘܳܬ ܩܕܳܡܝ ܐܽܘܪܚܗܽܘܢ.
18 ܘܶܐܫܕܶܬ ܪܽܘܓܙܝ ܥܠܰܝܗܽܘܢ: ܡܶܛܽܠ ܕܡܳܐ ܕܶܐܫܰܕܘ ܒܰܐܪܥܳܐ: ܘܛܰܢܦܽܘܗ̇ ܒܰܦܬܰܟܖ̈ܰܝܗܽܘܢ.
19 ܘܒܰܕܪܶܬ ܐܶܢܽܘܢ ܒܥܰܡ̈ܡܶܐ: ܘܰܕܪܺܝ݀ܬ ܐܶܢܽܘܢ ܒܰܡܕܺܝ̈ܢܳܬܳܐ: ܘܰܐܝܟ ܐܽܘܖ̈ܚܳܬܗܽܘܢ ܘܰܐܝܟ ܨܶܢ̈ܥܳܬܗܽܘܢ ܕܳܢܶ݀ܬ ܐܶܢܽܘܢ.
20 ܘܶܐܙܰܠ̣ܘ ܠܒܶܝܬ ܥܰܡ̈ܡܶܐ: ܘܛܰܘܶܫܘ ܫܡܳܐ ܕܩܽܘܕܫܝ: ܘܳܐܡܪܺܝܢ ܗܘܰܘ ܠܗܽܘܢ ܥܰܡ̈ܡܶܐ: ܗܳܠܶܝܢ ܥܰܡܶܗ ܐܶܢܽܘܢ ܕܰܐܠܳܗܳܐ ܘܡܶܢ ܐܰܪܥܶܗ ܢ̣ܦܰܩܘ.
21 ܘܚܳܣܶ݀ܬ ܥܰܠ ܫܡܳܐ ܕܩܽܘܕܫܝ: ܕܛܰܘܫܽܘܗܝ ܕܒܶܝܬ ܝܺܣܪܳܐܶܝܠ ܒܶܝܬ ܥܰܡ̈ܡܶܐ ܕܶܐܙܰܠ̣ܘ ܠܘܳܬܗܽܘܢ.
22 ܡܶܛܽܠ ܗܳܢܳܐ ܐܶܡܰܪ ܠܰܕܒܶܝܬ ܝܺܣܪܳܐܶܝܠ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܳܐ ܗ̱ܘܳܐ ܡܶܛܽܠܬܟܽܘܢ ܥܳܒܶܕ ܐ̱ܢܳܐ ܒܶܝܬ ܝܺܣܪܳܐܶܝܠ: ܐܶܠܳܐ ܡܶܛܽܠ ܫܡܳܐ ܕܩܽܘܕܫܝ: ܕܛܰܘܶܫܬܽܘܢ ܒܶܝܬ ܥܰܡ̈ܡܶܐ ܕܶܐܙܰܠܬܽܘܢ ܠܘܳܬܗܽܘܢ.
23 ܕܶܐܩܰܕܶܫ ܫܶܡܝ ܪܰܒܳܐ: ܕܶܐܬܛܰܘܰܫ ܒܶܝܬ ܥܰܡ̈ܡܶܐ ܕܛܰܘܶܫܬܽܘܢܳܝܗܝ ܒܰܝܢܳܬܗܽܘܢ: ܘܢܶܕܥܽܘܢ ܥܰܡ̈ܡܶܐ ܕܶܐܢܳܐ ܐ̱ܢܳܐ ܡܳܪܝܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܳܐ ܕܶܐܬܩܰܕܫܶܬ ܒܟܽܘܢ ܠܥܺܢܰܝ̈ܗܽܘܢ.
24 ܘܶܐܕܒܰܪܟܽܘܢ ܡܶܢ ܥܰܡ̈ܡܶܐ: ܘܶܐܟܰܢܶܫܟܽܘܢ ܡܶܢ ܡܕܺܝ̈ܢܳܬܳܐ: ܘܰܐܝܬܶܝܟܽܘܢ ܠܰܐܪܥܟܽܘܢ.
25 ܘܶܐܪܽܘܣ ܥܠܰܝܟܽܘܢ ܡܰܝ̈ܳܐ ܕܟܰܝ̈ܳܐ: ܘܶܐܕܰܟܶܝܟܽܘܢ ܡܶܢ ܟܽܠܳܗ̇ ܛܰܢܦܽܘܬܟܽܘܢ: ܘܡܶܢ ܟܽܠܗܽܘܢ ܦܬܰܟܖ̈ܰܝܟܽܘܢ.
26 ܘܶܐܬܶܠ ܠܟܽܘܢ ܠܶܒܳܐ ܚܰܕܬܳܐ: ܘܪܽܘܚܳܐ ܚܕܰܬܳܐ ܐܶܬܶܠ ܒܓܰܘܟܽܘܢ: ܘܰܐܥܒܰܪ ܠܶܒܳܐ ܕܟܺܐܦܳܐ ܡܶܢ ܒܶܣܪܟܽܘܢ: ܘܶܐܬܶܠ ܠܟܽܘܢ ܠܶܒܳܐ ܕܒܶܣܪܳܐ.
27 ܘܶܐܬܶܠ ܪܽܘܚܝ ܒܓܰܘܟܽܘܢ: ܘܶܐܥܒܶܕ ܕܰܒܦܽܘܩ̈ܕܳܢܰܝ ܬܗܰܠܟܽܘܢ: ܘܕܺܝ̈ܢܰܝ ܬܶܛܪܽܘܢ ܘܬܶܥܒܕܽܘܢ ܐܶܢܽܘܢ.
28 ܘܬܶܬܒܽܘܢ ܒܰܐܪܥܳܐ ܕܝܶܗܒܶ݀ܬ ܠܰܐܒܳܗܰܝ̈ܟܽܘܢ: ܘܬܶܗܘܢ ܠܺܝ ܥܰܡܳܐ: ܘܶܐ̱ܢܳܐ ܐܶܗܘܶܐ ܠܟܽܘܢ ܐܰܠܳܗܳܐ
29 ܘܶܐܦܪܽܘܩܟܽܘܢ ܡܶܢ ܟܽܠܳܗ̇ ܛܰܢܦܽܘܬܟܽܘܢ: ܘܶܐܩܪܶܐ ܠܰܥܒܽܘܪܳܐ ܘܰܐܣܓܶܝܘܗܝ: ܘܠܳܐ ܐܰܝܬܶܐ ܥܠܰܝܟܽܘܢ ܟܰܦܢܳܐ.
30 ܘܰܐܣܓܶܐ ܦܺܐܖ̈ܶܐ ܕܺܐܝ̈ܠܳܢܶܐ: ܘܥܰܠ̈ܠܳܬܳܐ ܕܰܐܪܥܳܐ: ܘܬܽܘܒ ܠܳܐ ܬܩܰܒܠܽܘܢ ܚܶܣܕܳܐ ܕܟܰܦܢܳܐ ܒܶܝܬ ܥܰܡ̈ܡܶܐ.
31 ܘܬܶܬܕܰܟܪܽܘܢ ܬܰܡܳܢ ܐܽܘܖ̈ܚܳܬܟܽܘܢ ܒܺܝ̈ܫܳܬܳܐ: ܘܨܶܢ̈ܥܳܬܟܽܘܢ ܫܳܛ̈ܝܳܬܳܐ: ܘܢܶܬܩܰܡ̈ܛܳܢ ܐܰܦܰܝ̈ܟܽܘܢ ܒܥܰܘܠܟܽܘܢ ܘܰܒܛܰܢܦ̈ܘܳܬܟܽܘܢ.
32 ܘܕܰܥܘ ܕܠܳܐ ܗ̱ܘܳܐ ܡܶܛܽܠܬܟܽܘܢ ܥܳܒܶܕ ܐ̱ܢܳܐ ܗܳܠܶܝܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܗܰܬܘ ܘܶܐܬܬܰܟܣܘ ܡܶܢ ܐܽܘܖ̈ܚܳܬܟܽܘܢ ܒܺܝ̈ܫܳܬܳܐ: ܘܠܳܐ ܬܡܽܘܬܽܘܢ ܕܒܶܝܬ ܝܺܣܪܳܐܶܝܠ.
33 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܝܰܘܡܳܐ ܕܰܡܕܟܶܐ ܐ̱ܢܳܐ ܠܟܽܘܢ ܡܶܢ ܟܽܠܶܗ ܥܰܘܠܟܽܘܢ: ܡܰܘܬܶܒ ܐ̱ܢܳܐ ܡܕܺܝ̈ܢܳܬܳܐ ܘܒܳܢܶܐ ܚܰܖ̈ܒܳܬܳܐ.
34 ܘܰܐܪܥܳܐ ܕܚܰܪܒܳܐ ܗܘܳܬ ܬܶܬܦܠܰܚ: ܕܨܰܕܝܳܐ ܗܘܳܬ ܒܥܰܝ̈ܢܰܝ ܟܠ ܕܥܳܒܰܪ.
35 ܘܢܺܐܡܪܽܘܢ ܐܰܪܥܳܐ ܗܳܝ ܚܰܪܒܬܳܐ: ܗܘܳܬ ܐܰܝܟ ܦܰܪܕܰܝܣܳܐ ܕܰܥܕܶܢ: ܘܰܡܕܺܝ̈ܢܳܬܳܐ ܕܚܰܖ̈ܒܳܢ ܗ̱ܘܰܝ̈ ܘܰܡܣܰܚ̈ܦܳܢ: ܗܘܰܝ̈ ܟܰܖ̈ܟܶܐ ܥܰܫܺܝ̈ܢܶܐ.
36 ܘܢܶܕܥܽܘܢ ܥܰܡ̈ܡܶܐ ܕܡܶܫܬܰܚܪܺܝܢ ܚܕܳܖ̈ܰܝܟܽܘܢ: ܕܶܐܢܳܐ ܡܳܪܝܳܐ ܒܳܢܶܐ ܐ̱ܢܳܐ ܡܣܰܚ̈ܦܳܬܳܐ: ܘܢܳܨܶܒ ܐ̱ܢܳܐ ܚܰܖ̈ܒܳܬܳܐ: ܐܶܢܳܐ ܡܳܪܝܳܐ ܐܶܡܪܶܬ ܘܥܳܒܶܕ ܐ̱ܢܳܐ.
37 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܽܘܒ ܒܗܳܕܶܐ ܬܳܒܰܥ ܐ̱ܢܳܐ ܠܰܕܒܶܝܬ ܝܺܣܪܳܐܶܝܠ: ܕܶܐܥܒܶܕ ܠܗܽܘܢ ܘܰܐܣܓܶܐ ܐܶܢܽܘܢ: ܐܰܝܟ ܥܳܢ̈ܳܐ ܕܰܒܢܰܝ̈ܢܳܫܳܐ.
38 ܐܰܝܟ ܥܳܢ̈ܳܐ ܩܰܕܺܝܫܬܳܐ: ܘܰܐܝܟ ܥܳܢ̈ܳܐ ܕܽܐܘܪܺܫܠܶܡ ܒܙܰܒܢܳܐ ܕܥܰܕܥܺܐܕܶܝ̈ܗ̇: ܗܳܟܰܢܳܐ ܢܶܗܘ̈ܝܳܢ ܡܕܺܝ̈ܢܳܬܳܐ ܕܚܰܖ̈ܒܳܢ ܗ̱ܘܰܝ̈: ܘܢܶܬܡܰܠ̈ܝܳܢ ܥܳܢ̈ܳܐ ܕܰܒܢܰܝ̈ܢܳܫܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.