Ezekiel 7
The Book of Ezekiel
܀ ܚܙܩܝܐܝܠ ܙ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܐܰܢ̱ܬ ܕܶܝܢ ܒܰܪܢܳܫܳܐ: ܐܶܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܰܛܺܝ ܩܶܨܳܐ ܥܰܠ ܐܰܪܥܳܐ ܕܺܝܣܪܳܐܶܝܠ: ܘܡܰܛܺܝ ܣܰܘܦܳܐ ܥܰܠ ܐܰܪܒܰܥ ܟܶܢ̈ܦܶܝܗ̇ ܕܰܐܪܥܳܐ.
3 ܡܶܟܺܝܠ ܩܶܨܳܐ ܥܠܰܝܟܝ: ܕܶܐܫܽܘܕ ܥܠܰܝܟܝ ܪܽܘܓܙܝ: ܘܶܐܕܽܘܢܶܟܝ ܐܰܝܟ ܐܽܘܖ̈ܚܳܬܶܟܝ: ܘܰܐܝܬܶܐ ܥܠܰܝܟܝ ܟܽܠܳܗ̇ ܛܰܢܦܽܘܬܶܟܝ.
4 ܘܠܳܐ ܬܚܽܘܣ ܥܰܝܢܝ ܥܠܰܝܟܝ ܘܠܳܐ ܐܶܪܰܚܶܡ: ܡܶܛܽܠ ܕܽܐܘܖ̈ܚܳܬܶܟܝ ܥܠܰܝܟܝ ܐܶܬܶܠ: ܘܛܰܢܦܽܘܬܶܟܝ ܒܓܰܘܶܟܝ ܬܶܗܘܶܐ: ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ.
5 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܳܬܝܳܐ ܒܺܝܫܬܳܐ ܚܠܳܦ ܒܺܝܫܬܳܐ.
6 ܕܩܶܨܳܐ ܐܳܬܶܐ ܘܰܐܥܺܝܩ ܥܠܰܝܟܝ.
7 ܘܳܐܬܶܐ ܨܺܦܪܳܝܳܐ ܥܳܡܽܘܪܳܐ ܕܰܐܪܥܳܐ ܥܠܰܝܟܝ: ܡܰܛܺܝ ܙܰܒܢܳܐ ܘܰܩܪܶܒ ܝܰܘܡܳܐ ܕܰܕܠܽܘܚܝܳܐ.
8 ܡܶܟܺܝܠ ܡܶܢ ܩܽܘܪܒܳܐ ܐܶܫܽܘܕ ܚܶܡܬܝ ܥܠܰܝܟܝ: ܘܶܐܫܽܘܕ ܪܽܘܓܙܝ ܥܠܰܝܟܝ: ܘܶܐܕܽܘܢܶܟܝ ܐܰܝܟ ܐܽܘܖ̈ܚܳܬܶܟܝ: ܘܶܐܬܶܠ ܥܠܰܝܟܝ ܟܽܠܳܗ̇ ܛܰܢܦܽܘܬܶܟܝ.
9 ܘܠܳܐ ܬܚܽܘܣ ܥܰܝܢܝ ܥܠܰܝܟܝ ܘܠܳܐ ܐܰܪܰܚܶܡ: ܐܶܠܳܐ ܐܰܝܟ ܐܽܘܖ̈ܚܳܬܶܟܝ ܐܶܦܪܥܶܟܝ: ܘܛܰܢܦܽܘܬܶܟܝ ܒܓܰܘܟܶܝ ܬܶܗܘܶܐ: ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ ܕܰܡܚܳܟܝ.
10 ܗܳܐ ܝܰܘܡܳܐ ܐܶܬܳܐ: ܢ̣ܦܰܩ ܨܺܦܪܳܝܳܐ ܘܰܒ̣ܠܰܨ ܚܽܘܛܪܳܐ: ܘܰܦܪܰܥ ܨܰܥܪܳܐ.
11 ܘܥܰܘܠܳܐ ܩܳܡ ܥܰܠ ܚܽܘܛܪܶܗ ܕܥܰܘܳܠܳܐ: ܠܳܐ ܡܶܢܗܽܘܢ ܘܠܳܐ ܡܶܢ ܕܠܽܘܚܝܗܽܘܢ: ܘܠܳܐ ܡܶܢ ܡܰܥܒܕܳܢܽܘܬܗܽܘܢ: ܘܠܳܐ ܐܶܬܬܢܺܝܚ ܒܗܽܘܢ.
12 ܡܰܛܺܝ ܙܰܒܢܳܐ ܘܰܩܪܶܒ ܝܰܘܡܳܐ: ܕܩܳܢܶܐ ܠܳܐ ܢܶܚܕܶܐ: ܘܕܰܡܙܰܒܶܢ ܠܳܐ ܬܶܟܪܶܐ ܠܶܗ: ܡܶܛܽܠ ܕܪܽܘܓܙܳܐ ܥܰܠ ܟܽܠܶܗ ܩܶܢܝܳܢܗܽܘܢ.
13 ܘܙܳܒܽܘܢܳܐ ܠܳܐ ܗܳܦܶܟ ܥܰܠ ܡܙܰܒܢܳܢܳܐ: ܘܬܽܘܒ ܠܰܝܬ ܚܰܝ̈ܶܐ ܒܚܰܝܰܝ̈ܗܽܘܢ: ܡܶܛܽܠ ܕܚܶܙܘܳܐ ܠܳܐ ܢܶܗܦܽܘܟ ܥܰܠ ܟܽܠܶܗ ܩܶܢܝܳܢܗܽܘܢ: ܘܓܰܒܪܳܐ ܒܥܰܘܠܶܗ ܠܳܐ ܢܚܰܡܣܶܢ ܚܰܝܰܘ̈ܗܝ.
14 ܩ̣ܪܰܘ ܒܩܰܪܢܳܐ ܘܛܰܝܶܒ ܟܽܠ: ܘܠܰܝܬ ܕܳܐܙܶܠ ܠܰܩܪܳܒܳܐ: ܡܶܛܽܠ ܕܪܽܘܓܙܝ ܥܰܠ ܟܽܠܶܗ ܩܶܢܝܳܢܗܽܘܢ.
15 ܚܰܪܒܳܐ ܒܫܽܘ̈ܩܶܐ: ܘܡܰܘܬܳܢܳܐ ܘܟܰܦܢܳܐ ܒܒ̈ܳܬܶܐ: ܐܰܝܢܳܐ ܕܰܒܕܰܒܪܰܐ ܗ̱ܘ ܢܡܽܘܬ ܒܚܰܪܒܳܐ: ܘܰܐܝܢܳܐ ܕܒܰܡܕܺܝܢ̱ܬܰܐ ܗ̱ܘ ܟܰܦܢܳܐ ܘܡܰܘܬܳܢܳܐ ܢܶܐܟܠܺܝܘܗܝ.
16 ܘܢܶܬܦܰܨܽܘܢ ܐܰܝܠܶܝܢ ܕܡܶܬܦܰܨܶܝܢ ܡܶܢܗܽܘܢ ܒܛܽܘܖ̈ܶܐ: ܐܰܝܟ ܝܰܘ̈ܢܶܐ ܒܰܓܕܳܢܦ̈ܶܐ: ܟܽܠܗܽܘܢ ܢܡܽܘܬܽܘܢ ܐ̱ܢܳܫ ܒܰܚܛܳܗܰܘ̈ܗܝ. 17:ܟܽܠܗܶܝܢ ܐܺܝܕܰܝܳܐ ܢܶܬܖ̈ܰܫܠܳܢ: ܘܟܽܠܗܶܝܢ ܒܽܘܖ̈ܟܶܐ ܢܰܖ̈ܕܝܳܢ ܡܰܝ̈ܳܐ. 18:ܘܢܶܬܟܰܒܢܽܘܢ ܣܰܩ̈ܶܐ: ܘܰܢܟܰܣܽܘܢ ܐܶܢܽܘܢ ܨܰܘܖ̈ܳܢܶܐ: ܒܶܗܬܬܳܐ ܒܟܽܠ ܐܰܦܰܝ̈ܗܽܘܢ: ܘܩܽܘ̈ܕܚܳܬܳܐ ܒܟܽܠ ܖ̈ܺܝܫܰܝܗܽܘܢ.
19 ܣܺܐܡܗܽܘܢ ܒܫܽܘ̈ܩܶܐ ܢܶܫܕܽܘܢ: ܘܕܰܗܒܗܽܘܢ ܡܰܣܠܝܳܐ ܢܶܗܘܶܐ: ܣܺܐܡܗܽܘܢ. ܘܕܰܗܒܗܽܘܢ ܠܳܐ ܢܶܫܟܰܚ ܠܰܡܦܰܨܳܝܽܘ ܐܶܢܽܘܢ ܒܝܰܘܡܳܐ ܕܪܽܘܓܙܶܗ ܕܡܳܪܝܳܐ: ܢܰܦ̈ܫܳܬܗܽܘܢ ܠܳܐ ܢܣܰܒܥܽܘܢ: ܘܟܰܖ̈ܣܳܬܗܽܘܢ ܠܳܐ ܢܶܡܠܽܘܢ ܗܳܢܳܐ ܫܽܘܢܳܩܳܐ: ܦܽܘܪܥܳܢܳܐ ܕܥܰܘܠܗܽܘܢ.
20 ܘܫܽܘܒܚܳܐ ܕܨܶܒܬܗܽܘܢ ܕܰܥܒܰܕܘ ܒܓܰܐܝܽܘܬܳܐ: ܠܨܰܠ̈ܡܶܐ ܕܛܰܢܦ̈ܘܳܬܗܽܘܢ ܘܰܕܕܶܚ̈ܠܳܬܗܽܘܢ: ܡܶܛܽܠ ܗܳܢܳܐ ܥܒܰܕܬܶܗ ܡܰܣܠܝܳܐ.
21 ܘܶܐܬܠܺܝܘܗܝ ܒܺܐܝܕܳܐ ܕܢܽܘܟܖ̈ܳܝܶܐ ܠܒܶܙܬܳܐ: ܘܰܠܚܰܛܳܝܶܝ̈ܗ̇ ܕܰܐܪܥܳܐ ܠܰܫܒܺܝܬܳܐ ܘܰܢܛܰܘܫܽܘܢܶܗ.
22 ܘܰܐܦܢܶܐ ܐܰܦܰܝ̈ ܡܶܢܗܽܘܢ ܘܰܢܛܰܘܫܽܘܢ ܕܰܘ̈ܩܰܝ: ܘܢܶܥܠܽܘܢ ܒܳܗ̇ ܬܳܖ̈ܽܘܥܶܐ ܘܰܢܛܰܘܫܽܘܢܳܗ̇.
23 ܘܢܶܥܒܪܽܘܢ ܒܠܶܒ̈ܢܶܐ: ܡܶܛܽܠ ܕܰܐܪܥܳܐ ܐܶܬܡܰܠܝܰܬ ܕܺܝܢܳܐ ܕܰܕܡܳܐ: ܘܰܡܕܺܝܢ̱ܬܳܐ ܐܶܬܡܰܠܝܰܬ ܥܰܘܠܳܐ.
24 ܘܰܐܝܬܶܐ ܖ̈ܳܥܰܘܳܬܳܐ ܕܥܰܡ̈ܡܶܐ ܘܢܺܐܪܬܽܘܢ ܒܳܬܰܝ̈ܗܽܘܢ: ܘܰܐܗܦܶܟ ܓܰܐܝܽܘܬܳܐ ܕܥܰܫܺܝ̈ܢܶܐ: ܘܢܺܐܪܬܽܘܢ ܡܰܩܕܫܗܽܘܢ.
25 ܪܽܘܓܙܳܐ ܐܳܬܶܐ: ܘܢܶܒܥܽܘܢ ܫܠܳܡܳܐ ܘܠܳܐ ܢܶܫܬܟܰܚ.
26 ܘܳܝܳܐ ܥܰܠ ܘܳܝܳܐ ܢܺܐܬܶܐ: ܘܰܫܡܽܘܥܬܳܐ ܥܰܠ ܫܡܽܘܥܬܳܐ ܬܶܫܬܡܰܥ: ܘܢܶܒܥܽܘܢ ܚܶܙܘܳܐ ܡܶܢ ܢܒܺܝ̈ܶܐ: ܘܢܳܡܽܘܣܳܐ ܢܺܐܒܰܕ ܡܶܢ ܟܳܗ̈ܢܶܐ: ܘܡܶܠܟܳܐ ܡܶܢ ܣܳܒ̈ܶܐ.
27 ܡܰܠܟܳܐ ܢܶܬܶܒ ܒܶܐܒܠܳܐ: ܘܪܰܒܳܐ ܢܶܠܒܰܫ ܚܒܳܠܳܐ: ܘܺܐܝܕܰܘ̈ܗܝ ܕܥܰܡܳܐ ܕܰܐܪܥܳܐ ܢܶܬܖ̈ܰܫܠܳܢ: ܐܰܝܟ ܐܽܘܖ̈ܚܳܬܗܽܘܢ ܐܶܥܒܶܕ ܠܗܽܘܢ: ܘܰܒܕܺܝ̈ܢܰܝܗܽܘܢ ܐܶܕܽܘܢ ܐܶܢܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.