Ezekiel 12
The Book of Ezekiel
܀ ܚܙܩܝܐܝܠ ܝܒ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܒܓܰܘ ܒܰܝܬܳܐ ܡܡܰܪܡܪܳܢܳܐ ܝܳܬܶܒ ܐܰܢ̱ܬ: ܕܥܰܝ̈ܢܶܐ ܐܺܝܬ ܠܗܽܘܢ ܘܠܳܐ ܚܳܙܶܝܢ: ܘܶܐܕܢ̈ܶܐ ܐܺܝܬ ܠܗܽܘܢ ܘܠܳܐ ܫܳܡܥܺܝܢ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
3 ܐܰܢ̱ܬ ܕܶܝܢ ܒܰܪܢܳܫܳܐ: ܥܒܶܕ ܠܳܟ ܡܳܐܢ̈ܶܐ ܕܰܫܒܺܝܬܳܐ: ܘܶܐܫܬܒܰܝ ܒܺܐܝܡܳܡܳܐ ܠܥܺܢܰܝ̈ܗܽܘܢ: ܡܶܢ ܐܰܬܪܳܟ ܠܰܐܬܪܳܐ ܐ̱ܚܪܺܢܳܐ ܕܢܶܚܙܽܘܢ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
4 ܘܰܐܦܶܩ ܡܳܐܢܰܝ̈ܟ ܐܰܝܟ ܡܳܐܢ̈ܶܐ ܕܰܫܒܺܝܬܳܐ ܒܺܐܝܡܳܡܳܐ ܠܥܺܢܰܝ̈ܗܽܘܢ: ܘܰܐܢ̱ܬ ܦܽܘܩ ܒܪܰܡܫܳܐ ܐܰܝܟ ܕܰܒܫܶܒܝܳܐ.
5 ܘܰܬܽܪܘܥ ܐܶܣܬܳܐ ܠܥܺܢܰܝ̈ܗܽܘܢ ܘܦܽܘܩ ܒܳܗ̇.
6 ܘܰܫܩܽܘܠ ܫܩܽܘܠܬܳܐ ܥܰܠ ܟܰܬܦܳܟ: ܘܦܽܘܩ ܒܥܰܡܛܳܢܳܐ: ܘܟܰܣܳܐ ܐܰܦܰܝ̈ܟ ܘܠܳܐ ܬܶܚܙܶܐ ܠܰܐܪܥܳܐ: ܡܶܛܽܠ ܕܳܐܬܳܐ ܝܰܗܒܬܳܟ ܠܰܕܒܶܝܬ ܝܺܣܪܳܐܶܝܠ.
7 ܘܥܶܒܕܶܬ ܗܳܟܰܢܳܐ ܐܰܝܟ ܕܦܰܩܕܰܢܝ: ܡܳܐܢܰܝ̈ ܐܰܦܩܶ݀ܬ ܒܺܐܝܡܳܡܳܐ: ܐܰܝܟ ܡܳܐܢ̈ܶܐ ܕܰܫܒܺܝܬܳܐ: ܘܶܐܣܬܳܐ ܬܶܪܥܶܬ ܒܪܰܡܫܳܐ: ܘܰܒܥܰܡܛܳܢܳܐ ܢܶܦܩܶ݀ܬ: ܘܥܰܠ ܟܰܬܦܝ ܫܶܩܠܶܬ ܠܥܺܢܰܝ̈ܗܽܘܢ.
8 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܒܨܰܦܪܳܐ ܠܡܺܐܡܰܪ.
9 ܒܰܪܢܳܫܳܐ: ܐܶܢ ܐܳܡܪܺܝܢ ܠܳܟ ܕܒܶܝܬ ܝܺܣܪܳܐܶܝܠ ܒܰܝܬܳܐ ܡܡܰܪܡܪܳܢܳܐ: ܡܳܢܳܐ ܥܳܒܶܕ ܐܰܢ̱ܬ.
10 ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܪܰܒܳܐ ܢܶܫܩܽܘܠ ܫܩܽܘܠܬܳܐ ܗܳܕܶܐ ܒܽܐܘܪܺܫܠܶܡ: ܘܟܽܠܗܽܘܢ ܕܒܶܝܬ ܝܺܣܪܳܐܶܝܠ ܥܰܡܶܗ.
11 ܘܶܐܡܰܪ ܠܗܽܘܢ: ܐܶܢܳܐ ܐ̱ܢܳܐ ܐܳܬܟܽܘܢ: ܐܰܝܟ ܕܥܶܒܕܶܬ ܗܳܟܰܢܳܐ ܢܶܬܥܒܶܕ ܠܟܽܘܢ: ܘܒܰܫܒܺܝܬܳܐ ܬܺܐܙܽܠܘܢ.
12 ܘܪܰܒܳܐ ܕܰܒܟܽܘܢ ܥܰܠ ܟܰܬܦܶܗ ܢܶܫܩܽܘܠ: ܘܰܒܥܰܡܛܳܢܳܐ ܢܶܦܽܘܩ: ܘܢܶܬܪܽܘܥ ܐܶܣܬܳܐ ܕܢܶܦܽܘܩ ܒܳܗ̇: ܘܰܢܚܰܦܶܐ ܐܰܦܰܘ̈ܗܝ ܕܠܳܐ ܢܶܚܙܶܝܗ̇ ܠܰܐܪܥܳܐ.
13 ܘܶܐܦܪܽܘܣ ܡܨܺܝܕܬܝ ܥܠܰܘܗܝ ܘܢܶܬܬܨܺܝܕ ܒܳܗ̇: ܘܰܐܝܬܶܝܘܗܝ ܠܒܳܒܶܠ ܠܰܐܪܥܳܐ ܕܟܰܠܕܳܝ̈ܶܐ: ܘܠܳܐ ܢܶܚܙܶܝܗ̇: ܘܬܰܡܳܢ ܢܡܽܘܬ.
14 ܘܟܽܠܗܽܘܢ ܕܰܚܕܺܝܪܺܝܢ ܠܶܗ ܘܰܡܥܰܕܪܺܝܢ ܠܶܗ ܘܰܡܥܰܫܢܺܝܢ ܠܶܗ: ܐܶܕܪܶܐ ܠܟܠ ܪܽܘܚ: ܘܚܰܪܒܳܐ ܐܶܫܰܕܰܪ ܒܳܬܰܪܗܽܘܢ.
15 ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܕܒܰܕܪܶܬ ܐܶܢܽܘܢ ܒܶܝܬ ܥܰܡ̈ܡܶܐ: ܘܰܕܪܺܝ݀ܬ ܐܶܢܽܘܢ ܒܰܐܖ̈ܥܳܬܳܐ.
16 ܘܰܐܘܬܰܪ ܡܶܢܗܽܘܢ ܓܰܒܖ̈ܶܐ ܒܡܶܢܝܳܢܳܐ: ܡܶܢ ܚܰܪܒܳܐ ܘܡܶܢ ܟܰܦܢܳܐ ܘܡܶܢ ܡܰܘܬܳܐ: ܕܢܶܫܬܰܥܽܘܢ ܟܽܠܳܗ̇ ܛܰܢܦܽܘܬܗܽܘܢ ܒܶܝܬ ܥܰܡ̈ܡܶܐ ܕܶܐܙܰܠܘ ܠܘܳܬܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
17 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
18 ܒܰܪܢܳܫܳܐ: ܠܰܚܡܳܟ ܒܙܰܘܥܬܳܐ ܬܶܐܟܽܘܠ: ܘܡܰܝ̈ܟ ܒܙܰܘܥܬܳܐ ܘܰܒܕܶܚܠܬܳܐ ܬܶܫܬܶܐ.
19 ܘܶܐܡܰܪ ܠܥܰܡܳܐ ܕܰܐܪܥܳܐ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ: ܘܠܰܐܪܥܳܐ ܕܺܝܣܪܳܐܶܝܠ: ܠܰܚܡܗܽܘܢ ܒܕܶܚܠܬܳܐ ܢܶܐܟܠܽܘܢ: ܘܡܰܝ̈ܗܽܘܢ ܒܬܶܡܗܳܐ ܢܶܫܬܽܘܢ: ܡܶܛܽܠ ܕܚܳܪܒܳܐ ܐܰܪܥܳܐ ܒܰܡܠܳܐܳܗ̇: ܡܶܢ ܥܰܘܠܳܐ ܕܟܽܠܗܽܘܢ ܥܳܡܽܘܖ̈ܶܝܗ̇.
20 ܘܰܡܕܺܝ̈ܢܳܬܳܐ ܕܝܳܬܒ̈ܳܢ ܢܶܚܖ̈ܒܳܢ: ܘܰܐܪܥܳܐ ܠܰܚܒܳܠܳܐ ܬܶܗܘܶܐ: ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ.
21 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
22 ܒܰܪܢܳܫܳܐ: ܡܳܢܰܘ ܡܰܬܠܳܐ ܗܳܢܳܐ ܕܡܰܡܬܠܺܝܢ ܥܠܰܝܟܽܘܢ ܒܰܐܪܥܳܐ ܕܺܝܣܪܳܐܶܝܠ: ܘܳܐܡܪܺܝܢ ܢܶܓܪܽܘܢ ܝܰܘ̈ܡܳܬܳܐ: ܘܢܺܐܒܰܕ ܟܽܠܶܗ ܚܶܙܘܳܐ.
23 ܡܶܛܽܠ ܗܳܢܳܐ ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܡܒܰܛܶܠ ܐ̱ܢܳܐ ܠܶܗ ܠܡܰܬܠܳܐ ܗܳܢܳܐ: ܘܠܳܐ ܢܰܡܬܠܽܘܢܶܗ ܬܽܘܒ ܒܺܝܣܪܳܐܶܝܠ: ܐܶܠܳܐ ܐܶܡܰܪ ܠܗܽܘܢ: ܢܶܩܪܒܽܘܢ ܝܰܘ̈ܡܳܬܳܐ ܘܢܶܗܘܶܐ ܟܽܠܶܗ ܚܶܙܘܳܐ.
24 ܘܬܽܘܒ ܠܳܐ ܢܶܗܘܶܐ ܟܠ ܚܶܙܘܳܐ ܕܰܓܳܠܳܐ: ܘܩܶܨܡܳܐ ܕܦܳܠܓܽܘܬܳܐ ܒܰܝܢܳܬ ܒܢܰܝ̈ ܝܺܣܪܳܐܶܝܠ.
25 ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܐܶܡܪܶܬ: ܘܳܐܡܰܪ ܐ̱ܢܳܐ ܡܶܠܬܳܐ ܘܥܳܒܶܕ ܐ̱ܢܳܐ ܠܳܗ̇: ܘܠܳܐ ܡܫܰܘܚܰܪ ܐ̱ܢܳܐ: ܘܰܒܝܰܘ̈ܡܳܬܟܽܘܢ ܒܰܝܬܳܐ ܡܡܰܪܡܪܳܢܳܐ: ܐܺܡܰܪ ܡܶܠܬܳܐ ܘܶܐܥܒܕܺܝܗ̇ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
26 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
27 ܒܰܪܢܳܫܳܐ: ܗܳܐ ܕܒܶܝܬ ܝܺܣܪܳܐܶܝܠ ܐܳܡܪܺܝܢ: ܚܶܙܘܳܐ ܕܚܳܙܶܐ ܗܳܢܳܐ: ܠܝܰܘ̈ܡܳܬܳܐ ܗ̱ܘ ܣܰܓܺܝ̈ܐܶܐ ܘܰܠܙܰܒܢ̈ܶܐ ܖ̈ܰܚܺܝܩܶܐ ܡܶܬܢܰܒܶܐ.
28 ܡܶܛܽܠ ܗܳܢܳܐ ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܬܽܘܒ ܠܳܐ ܢܶܗܘܶܐ ܦܰܘܫܳܐ ܠܡܶܠܰܝ̈: ܡܶܠܬܳܐ ܕܳܐܡܰܪ ܐ̱ܢܳܐ ܥܳܒܶܕ ܐ̱ܢܳܐ ܠܳܗ̇ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.