Ezekiel 19
The Book of Ezekiel
܀ ܚܙܩܝܐܝܠ ܝܛ ܀
1 ܐܰܢ̱ܬ ܕܶܝܢ ܒܰܪܢܳܫܳܐ ܫܩܽܘܠ ܐܽܘܠܺܝܬܳܐ ܥܰܠ ܪܰܘܖ̈ܒܳܢܶܐ ܕܺܝܣܪܳܐܶܝܠ.
2 ܘܶܐܡܰܪ: ܡܳܢܳܐ ܗ̱ܝ ܐܶܡܳܟ ܓܽܘܪܝܳܐ ܕܰܐܪܝܳܐ: ܕܒܰܝܢܳܬ ܐܰܖ̈ܝܰܘܳܬܳܐ ܪܰܒܺܝܥܳܐ: ܘܒܰܝܢܳܬ ܐܰܖ̈ܝܰܘܳܬܳܐ ܪܰܒܝܰܬ ܓܖ̈ܶܝܗ̇.
3 ܘܰܪܒܳܐ ܚܰܕ ܡܶܢ ܓܖ̈ܶܝܗ̇ ܘܰܗܘܳܐ ܐܰܪܝܳܐ: ܘܺܝܠܶܦ ܠܡܶܬܒܰܪ ܬܒܳܪܳܐ: ܘܶܐܟܰܠ ܒܰܪܢܳܫܳܐ.
4 ܘܰܫ̣ܡܰܥܘ ܛܶܒܶܗ ܥܰܡ̈ܡܶܐ: ܘܒܰܡܨܺܝܕܬܗܽܘܢ ܐܶܬܬܚܶܕ: ܘܰܐܝܬܝܽܘܗܝ ܒܰܒܠܳܡܳܐ ܠܰܐܪܥܳܐ ܕܡܶܨܪܶܝܢ.
5 ܘܟܰܕ ܚܙܳܬ ܐܶܡܶܗ ܕܶܐܬܟܰܪܗܰܬ ܘܶܐܒܰܕ ܠܶܗ ܣܰܒܪܳܗ̇: ܢܶܣܒܰܬ ܡܶܢ ܓܖ̈ܶܝܗ̇ ܘܰܥܒܰܕܬܶܗ ܐܰܪܝܳܐ.
6 ܘܗܰܠܶܟ ܒܰܝܢܳܬ ܐܰܖ̈ܝܰܘܳܬܳܐ: ܘܰܗܘܳܐ ܐܰܪܝܳܐ: ܘܺܝܠܶܦ ܠܡܶܬܒܰܪ ܬܒܳܪܳܐ: ܘܶܐܟܰܠ ܒܰܪܢܳܫܳܐ.
7 ܘܗܰܠܶܟ ܒܥܽܘܫܢܶܗ: ܘܰܡܕܺܝ̈ܢܳܬܳܐ ܐܰܚܪܶܒ: ܘܚܰܒܶܠ ܐܰܪܥܳܐ ܒܰܡܠܳܐܳܗ̇ ܒܩܳܠܳܐ ܕܢܶܗܡܬܶܗ.
8 ܘܶܐܬܟܰܢܰܫܘ ܥܠܰܘܗܝ ܥܰܡ̈ܡܶܐ ܡܶܢ ܡܕܺܝ̈ܢܳܬܳܐ ܕܰܚܕܳܖ̈ܰܘܗܝ: ܘܰܦܪܰܣܘ ܥܠܰܘܗܝ ܡܨܺܝܕܬܗܽܘܢ: ܘܒܳܗ̇ ܐܶܬܬܚܶܕ.
9 ܘܚܰܒܫܽܘܗܝ ܒܢܳܡܰܪܬܳܐ: ܘܰܐܘܒܠܽܘܗܝ ܠܡܰܠܟܳܐ ܕܒܳܒܶܠ: ܘܰܐܥܠܶܗ ܠܒܶܝܬ ܚܒܽܘܫܝܳܐ: ܕܬܽܘܒ ܠܳܐ ܢܶܫܬܡܰܥ ܩܳܠܶܗ ܒܛܽܘܖ̈ܶܐ ܕܺܝܣܪܳܐܶܝܠ.
10 ܐܶܡܳܟ ܐܰܝܟ ܓܦܶܬܳܐ ܒܰܕܡܳܟ: ܥܰܠ ܡܰܝ̈ܳܐ ܢܨܺܝܒܳܐ. ܦܺܐܖ̈ܶܝܗ̇ ܘܥܰܘ̈ܦܶܝܗ̇ ܗܘܰܘ ܒܡܰܝ̈ܳܐ ܣܰܓܺܝ̈ܐܶܐ.
11 ܘܰܗܘܰܘ ܠܳܗ̇ ܚܽܘܛܖ̈ܶܐ ܥܰܫܺܝ̈ܢܶܐ ܥܰܠ ܫܰܒ̈ܛܶܐ ܕܪܰܘܖ̈ܒܳܢܶܐ: ܘܶܬܬܪܺܝܡܰܬ ܩܰܘܡܰܬܗܽܘܢ ܡܶܢ ܒܰܝܢܳܬ ܢܽܘܖ̈ܒܶܝܗ̇: ܘܶܐܬܚܙܺܝܘ ܒܪܰܘܡܗܽܘܢ ܘܰܒܣܽܘܓܳܐܐ ܕܕܳܠ̈ܝܳܬܗܽܘܢ.
12 ܘܶܐܬܥܩܰܪܘ ܒܚܶܡܬܳܐ ܘܒܰܐܪܥܳܐ ܐܶܫܬܕܺܝܘ: ܘܪܽܘܚܳܐ ܕܫܰܘܒܳܐ ܐܰܘܒܫܰܬ ܦܺܐܖ̈ܶܝܗ̇: ܘܶܐܬܦܰܪܰܩܘ ܘܺܝܒܶܫܘ ܚܽܘܛܖ̈ܶܐ ܕܥܽܘܫܢܳܗ̇: ܘܢܽܘܪܳܐ ܐܶܟܰܠܬܳܗ̇.
13 ܡܶܟܺܝܠ ܐܶܬܢܰܨܒܰܬ ܒܡܰܕܒܪܳܐ: ܒܰܐܪܥܳܐ ܨܗܺܝܬܳܐ ܘܨܳܕܺܝܬܳܐ.
14 ܘܢܶܦܩܰܬ ܢܽܘܪܳܐ ܡܶܢ ܚܽܘܛܖ̈ܶܝܗ̇ ܓܒܰܝ̈ܳܐ ܘܶܐܟܰܠܬ ܦܺܐܖ̈ܶܝܗ̇: ܘܠܳܐ ܐܶܫܬܟܰܚ ܒܳܗ̇ ܬܽܘܒ ܚܽܘܛܪܳܐ ܥܰܫܺܝܢܳܐ: ܐܰܘ ܫܰܒܛܳܐ ܕܢܶܗܘܶܐ ܫܰܠܺܝܛܳܐ. ܐܽܘܠܺܝܬܳܐ ܗ̄ܝ ܘܬܶܗܘܶܐ ܠܽܐܘܠܺܝܬܳܐ.