Ezekiel 2
The Book of Ezekiel
܀ ܚܙܩܝܐܝܠ ܒ ܀
1 ܘܶܐܡܰܪ ܠܺܝ: ܒܰܪܢܳܫܳܐ: ܩܽܘܡ ܥܰܠ ܖ̈ܶܓܠܰܝܟ ܐܶܡܰܠܶܠ ܥܰܡܳܟ.
2 ܘܥܶܠܰܬ ܒܺܝ ܪܽܘܚܳܐ ܟܰܕ ܡܡܰܠܶܠ ܥܰܡܝ: ܘܰܐܩܺܝܡܬܰܢܝ ܥܰܠ ܖ̈ܶܓܠܰܝ: ܘܫܶܡܥܶ݀ܬ ܕܰܡܡܰܠܶܠ ܥܰܡܝ.
3 ܘܶܐܡܰܪ ܠܺܝ: ܒܰܪܢܳܫܳܐ: ܡܫܰܕܰܪ ܐ̱ܢܳܐ ܠܳܟ ܥܰܠ ܒܢܰܝ̈ ܝܺܣܪܳܐܶܝܠ: ܥܰܠ ܥܰܡܳܐ ܡܳܪܽܘܕܳܐ ܕܰܡܪܰܕܘ ܥܠܰܝ ܗܶܢܽܘܢ ܘܰܐܒܳܗܰܝ̈ܗܽܘܢ: ܘܰܐܥܠܺܝܘ ܒܺܝ ܥܕܰܡܳܐ ܠܝܰܘܡܳܢܳܐ.
4 ܘܥܰܠ ܒܢܰܝ̈ܳܐ ܕܩܰܫ̈ܝܳܢ ܐܰܦܰܝ̈ܗܽܘܢ: ܘܥܰܫܺܝܢ ܠܶܒܗܽܘܢ ܡܫܰܕܰܪ ܐ̱ܢܳܐ ܠܳܟ: ܐܶܡܰܪ ܠܗܽܘܢ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
5 ܟܒܰܪ ܢܶܫܡܥܽܘܢ ܘܰܢܙܽܘܥܽܘܢ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ: ܘܢܶܕܥܽܘܢ ܕܰܢܒܺܝܳܐ ܐܰܢ̱ܬ ܒܰܝܢܳܬܗܽܘܢ.
6 ܘܰܐܢ̱ܬ ܒܰܪܢܳܫܳܐ ܠܳܐ ܬܶܕܚܰܠ ܡܶܢܗܽܘܢ: ܘܡܶܢ ܡܶܠܰܝ̈ܗܽܘܢ ܠܳܐ ܬܙܽܘܥ: ܕܣܳܪܒܺܝܢ ܘܡܰܣܠܶܝܢ ܠܳܟ: ܡܶܛܽܠ ܕܒܰܝܢܳܬ ܥܶܩܰܖ̈ܒܶܐ ܥܳܡܰܪ ܐܰܢ̱ܬ: ܠܳܐ ܬܶܕܚܰܠ ܡܶܢ ܡܶܠܰܝ̈ܗܽܘܢ: ܘܡܶܢ ܐܰܦܰܝ̈ܗܽܘܢ ܠܳܐ ܬܙܽܘܥ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
7 ܐܶܠܳܐ ܐܶܡܰܪ ܠܗܽܘܢ ܦܶܬܓܳܡܰܝ̈: ܟܒܰܪ ܢܶܫܡܥܽܘܢ ܘܰܢܙܽܘܥܽܘܢ: ܡܶܛܽܠ ܕܒܰܝܬܳܐ ܐܶܢܽܘܢ ܡܡܰܪܡܪܳܢܳܐ.
8 ܐܰܢ̱ܬ ܕܶܝܢ ܒܰܪܢܳܫܳܐ: ܫܡܰܥ ܡܶܕܶܡ ܕܳܐܡܰܪ ܐ̱ܢܳܐ ܠܳܟ: ܠܳܐ ܬܶܗܘܶܐ ܡܰܪܡܪܳܢ ܐܰܝܟ ܒܰܝܬܳܐ ܡܡܰܪܡܪܳܢܳܐ: ܐܶܠܳܐ ܦܬܰܚ ܦܽܘܡܳܟ: ܘܰܐܟܽܘܠ ܡܶܕܶܡ ܕܝܳܗܶܒ ܐ̱ܢܳܐ ܠܳܟ.
9 ܘܰܚܙܺܝ݀ܬ ܘܗܳܐ ܐܺܝܕܳܐ ܐܶܬܦܰܫܛܰܬ ܠܘܳܬ: ܘܺܐܝܬ ܒܳܗ̇ ܟܶܪܟܳܐ ܕܣܶܦܪܳܐ.
10 ܘܦܰܫܛܶܗ ܩܕܳܡܝ: ܘܰܟܬܺܝܒ ܡܶܢ ܩܕܳܡܰܘܗܝ ܘܡܶܢ ܒܶܣܬܪܶܗ: ܘܰܟܬܺܝ̈ܒܳܢ ܒܶܗ ܩܺܝ̈ܢܳܬܳܐ: ܘܚܶܫ̈ܒܳܬܳܐ: ܐܘܠ̈ܝܳܬܳܐ.