Ezekiel 29
The Book of Ezekiel
܀ ܚܙܩܝܐܝܠ ܟܛ ܀
1 ܥܰܠ ܡܶܨܪܶܝܢ. ܒܫܰܢ̱ܬܳܐ ܥܣܺܝܪܳܝܬܳܐ ܒܝܰܪܚܳܐ ܕܥܶܣܪܳܐ ܒܬܰܪܬܰܥܶܣܖ̈ܶܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܣܺܝܡ ܐܰܦܰܝ̈ܟ ܥܰܠ ܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܘܶܐܬܢܰܒܳܐ ܥܠܰܘܗܝ: ܘܥܰܠ ܟܽܠܳܗ̇ ܡܶܨܪܶܝܢ.
3 ܡܰܠܶܠ ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܐܶܢܳܐ ܥܠܰܝܟ ܦܶܪܥܽܘܢ ܡܰܠܟܳܐ ܕܡܶܨܪܶܝܢ: ܬܰܢܺܝܢܳܐ ܪܰܒܳܐ ܕܪܰܒܺܝܥ ܒܓܰܘ ܢܰܗܖ̈ܰܘܳܬܳܐ: ܘܳܐܡܰܪ ܕܕܺܝܠܝ ܗ̱ܘ ܢܰܗܪܳܐ ܘܶܐ̱ܢܳܐ ܥܒܰܕܬܶܗ.
4 ܐܶܢܳܐ ܐܰܪܡܶܐ ܒܠܳܡܳܐ ܒܦܰܟܰܝ̈ܟ: ܘܰܐܕܒܶܩ ܒܓܶܦܰܝ̈ܟ ܢܽܘܢ̈ܶܐ ܕܢܰܗܪܳܟ: ܘܰܐܣܩܳܟ ܡܶܢ ܓܰܘ ܢܰܗܪܳܟ: ܘܟܽܠܗܽܘܢ ܢܽܘܢ̈ܶܐ ܕܢܰܗܪܳܟ: ܒܓܶܦܰܝ̈ܟ ܢܶܕܒܩܽܘܢ.
5 ܘܰܐܪܡܶܝܟ ܒܡܰܕܒܪܳܐ ܠܳܟ ܘܰܠܟܽܠܗܽܘܢ ܢܽܘܢ̈ܶܐ ܕܢܰܗܪܳܟ: ܘܥܰܠ ܐܰܦܰܝ̈ ܚܰܩܠܳܐ ܬܶܦܶܠ: ܘܠܳܐ ܬܶܬܟܢܶܫ ܘܠܳܐ ܬܶܬܚܡܶܠ ܠܚܰܝܽܘܬܳܐ ܕܕܰܒܪܳܐ ܘܰܠܦܳܪܰܚܬܳܐ ܕܰܫܡܰܝܳܐ ܝܰܗܒܬܳܟ ܠܡܶܐܟܽܘܠܬܳܐ.
6 ܕܢܶܕܥܽܘܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܡܶܨܪܶܝܢ ܕܶܐܢܳܐ ܐ̱ܢܳܐ ܡܳܪܝܳܐ: ܥܰܠ ܕܰܗܘܰܝܬ ܐܰܝܟ ܚܽܘܛܪܳܐ ܕܩܰܢܝܳܐ ܠܰܕܒܶܝܬ ܝܺܣܪܳܐܶܝܠ.
7 ܟܰܕ ܐܰܚܕܽܘܟ ܒܺܐܝܕܰܝ̈ܗܽܘܢ ܒ̣ܙܰܥܬ ܐܺܝܕܰܝ̈ܗܽܘܢ: ܘܟܰܕ ܐܶܣܬܡܶܟܘ ܥܠܰܝܟ: ܐܶܬܬܒܰܪܬ ܘܰܐܪܥܶܠܬ ܚܰܨܰܝ̈ܗܽܘܢ.
8 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܡܰܝܬܶܐ ܐ̱ܢܳܐ ܥܠܰܝܟ ܚܰܪܒܳܐ: ܘܰܐܘܒܶܕ ܡܶܢܟ ܒܢܰܝ̈ܢܳܫܳܐ ܘܰܒܥܺܝܪܳܐ.
9 ܘܬܶܗܘܶܐ ܐܰܪܥܳܐ ܕܡܶܨܪܶܝܢ ܠܰܚܒܳܠܳܐ ܘܰܠܚܽܘܪܒܳܐ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ: ܥܰܠ ܕܶܐܡܰܪܬ ܕܕܺܝܠܝ ܗ̱ܘ ܢܰܗܪܳܐ: ܘܶܐ̱ܢܳܐ ܥܒܰܕܬܶܗ.
10 ܡܶܛܽܠ ܗܳܢܳܐ ܐܶܢܳܐ ܥܠܰܝܟ ܘܥܰܠ ܢܰܗܪܳܟ: ܘܶܐܬܠܺܝܗ̇ ܠܰܐܪܥܳܐ ܕܡܶܨܪܶܝܢ ܠܰܚܒܳܠܳܐ ܘܰܠܚܽܘܪܒܳܐ: ܡܶܢ ܡܰܓܕܠܳܐ ܕܣܽܘܢܳܐ ܘܰܥܕܰܡܳܐ ܠܰܬܚܽܘܡܳܐ ܕܟܽܘܫ.
11 ܠܳܐ ܬܶܥܒܰܪ ܒܳܗ̇ ܪܶܓܠܳܐ ܕܒܰܪܢܳܫܳܐ: ܐܳܦܠܳܐ ܦܰܪܣܬܳܐ ܕܰܒܥܺܝܪܳܐ: ܘܠܳܐ ܬܶܬܶܒ ܐܰܪܒܥܺܝܢ ܫܢܺܝ̈ܢ.
12 ܘܶܐܬܠܺܝܗ̇ ܠܰܐܪܥܳܐ ܕܡܶܨܪܶܝܢ ܠܰܚܒܳܠܳܐ: ܒܰܝܢܳܬ ܡܕܺܝ̈ܢܳܬܳܐ ܕܨܰܕܝ̈ܳܢ: ܘܢܶܗܘ̈ܝܳܢ ܡܕܝ̈ܢܳܬܳܗ̇ ܠܰܚܒܳܠܳܐ ܐܰܪܒܥܺܝܢ ܫܢܺܝ̈ܢ: ܒܰܝܢܳܬ ܡܕܺܝ̈ܢܳܬܳܐ ܕܚܰܖ̈ܒܳܢ: ܘܶܐܒܰܕܪܺܝܗ̇ ܠܡܶܨܪܶܝܢ ܒܥܰܡ̈ܡܶܐ: ܘܶܐܕܪܶܐ ܐܶܢܽܘܢ ܒܰܡܕܺܝ̈ܢܳܬܳܐ.
13 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܒܳܬܰܪ ܐܰܪܒܥܺܝܢ ܫܢܺܝ̈ܢ: ܐܶܟܰܢܶܫ ܐܶܢܽܘܢ ܠܡܶܨܖ̈ܳܝܶܐ ܡܶܢ ܥܰܡ̈ܡܶܐ ܕܶܐܬܒܰܕܰܪܘ ܒܰܝܢܳܬܗܽܘܢ.
14 ܘܰܐܗܦܶܟ ܫܒܺܝܬܳܗ̇ ܕܡܶܨܪܶܝܢ: ܘܰܐܘܬܶܒ ܐܶܢܽܘܢ ܒܰܐܪܥܳܐ ܕܦܰܬܪܽܘܣ: ܒܰܐܪܥܳܐ ܕܶܐܙܕܰܒܰܢܘ ܡܶܢܳܗ̇: ܘܢܶܗܘܽܘܢ ܬܰܡܳܢ ܡܰܠܟܽܘܬܳܐ ܡܰܟܺܝܟܳܬܳܐ.
15 ܘܬܶܗܘܶܐ ܡܰܟܺܝܟܳܐ ܡܶܢ ܟܽܠܗܶܝܢ ܡܰܠܟ̈ܘܳܬܳܐ: ܘܬܽܘܒ ܠܳܐ ܬܶܫܬܩܰܠ ܥܰܠ ܥܰܡ̈ܡܶܐ: ܘܰܐܙܥܰܪ ܐܶܢܽܘܢ ܕܠܳܐ ܢܫܰܥܒܕܽܘܢ ܠܥܰܡ̈ܡܶܐ.
16 ܘܬܽܘܒ ܠܳܐ ܢܶܗܘܽܘܢ ܠܰܕܒܶܝܬ ܝܺܣܪܳܐܶܝܠ ܠܣܰܒܪܳܐ ܘܰܠܥܽܘܗܕܳܢܳܐ ܕܥܰܘܠܳܐ: ܥܰܠ ܕܶܐܙܰܠܘ ܒܳܬܰܪܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܶܐ ܡܳܖ̈ܰܘܳܬܳܐ.
17 ܒܥܶܣܪܺܝܢ ܘܰܫܒܰܥ ܫܢܺܝ̈ܢ: ܒܝܰܪܚܳܐ ܩܰܕܡܳܝܳܐ ܒܚܰܕ ܒܝܰܪܚܳܐ: ܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
18 ܒܰܪܢܳܫܳܐ: ܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܫܰܥ̣ܒܶܕ ܠܟܽܠܶܗ ܚܰܝܠܶܗ ܫܽܘܥܒܳܕܳܐ ܪܰܒܳܐ ܥܰܠ ܨܽܘܪ: ܒܟܽܠ ܪܺܝܫ ܩܽܘܕܚ̈ܳܬܳܐ: ܘܟܽܠ ܟܬܶܦ ܚܠܺܝܨܳܐ: ܘܰܐܓܪܳܐ ܠܳܐ ܐܶܬܺܝܗܶܒ ܠܶܗ ܘܰܠܚܰܝܠܶܗ ܡܶܢ ܨܽܘܪ: ܥܰܠ ܫܽܘܥܒܳܕܳܐ ܕܫܰܥܒܕܳܗ̇.
19 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܗܳܐ ܝܳܗܶܒ ܐ̱ܢܳܐ ܠܢܰܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܐܰܪܥܳܐ ܕܡܶܨܪܶܝܢ: ܘܢܶܫܩܽܘܠ ܩܶܢܝܳܢܳܗ̇ ܘܢܶܫܒܶܐ ܫܒܺܝܬܳܗ̇ ܘܢܶܒܽܘܙ ܒܶܙܬܳܗ̇: ܘܬܶܗܘܶܐ ܐܰܓܪܳܐ ܠܚܰܝܠܶܗ.
20 ܘܰܚܠܳܦ ܦܳܥܠܽܘܬܳܐ ܕܰܥܒܰܕ ܒܨܽܘܪ: ܝܶܗܒܶ݀ܬ ܠܶܗ ܠܰܐܪܥܳܐ ܕܡܶܨܪܶܝܢ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
21 ܒܶܗ ܒܝܰܘܡܳܐ ܗܰܘ: ܐܰܕܢܰܚ ܩܰܪܢܳܐ ܠܰܕܒܶܝܬ ܝܺܣܪܳܐܶܝܠ: ܘܶܐܦܬܰܚ ܦܽܘܡܳܟ ܒܰܝܢܳܬܗܽܘܢ: ܘܢܶܕܥܽܘܢ ܕܶܐܢܳܐ ܐ̱ܢܳܐ ܡܳܪܶܐ ܡܳܖ̈ܰܘܳܬܳܐ.