Ezekiel 16
The Book of Ezekiel
܀ ܚܙܩܝܐܝܠ ܝܘ ܀
1 ܘܰܗܘܳܐ ܥܠܰܝ ܦܶܬܓܳܡܶܗ ܕܡܳܪܝܳܐ ܠܡܺܐܡܰܪ.
2 ܒܰܪܢܳܫܳܐ: ܐܰܘܕܰܥܶܝܗ̇ ܠܽܐܘܪܺܫܠܶܡ ܛܰܢܦܽܘܬܳܗ̇.
3 ܘܶܐܡܰܪ: ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܠܽܐܘܪܺܫܠܶܡ: ܥܶܩܳܪܶܟܝ ܘܡܰܘܠܳܕܶܟܝ ܡܶܢ ܐܰܪܥܳܐ ܕܰܟܢܰܥܢ: ܐܰܒܽܘܟܝ ܐܰܡܽܘܪܳܝܳܐ ܘܶܐܡܶܟܝ ܚܺܝܬܳܝܬܳܐ.
4 ܘܡܰܘܠܕܳܢܺܝܬܶܟܝ ܒܝܰܘܡܳܐ ܕܺܝܠܶܕܬܶܟܝ: ܠܳܐ ܦܶܣܩܰܬ ܫܶܪܶܟܝ: ܘܰܒܡܰܝ̈ܳܐ ܠܳܐ ܐܰܣܚܝܰܬܶܟܝ: ܘܰܒܡܶܠܚܳܐ ܠܳܐ ܡܠܰܚܬܶܟܝ ܘܰܒܥܰܙܪܽܘܖ̈ܶܐ ܠܳܐ ܟܪܰܟܬܶܟܝ.
5 ܘܠܳܐ ܚܳܣܰܬ ܥܠܰܝܟܝ ܥܰܝܢܳܗ̇: ܕܬܶܥܒܶܕ ܠܶܟܝ ܚܕܳܐ ܡܶܢ ܗܳܠܶܝܢ: ܘܰܬܪܰܚܶܡ ܥܠܰܝܟܝ: ܐܶܠܳܐ ܐܶܫܬܕܺܝܬܝ ܒܕܰܒܪܳܐ ܒܰܥܫܺܝܩܽܘܬܳܗ̇ ܕܢܰܦܫܶܟܝ: ܒܝܰܘܡܳܐ ܕܺܝܠܶܕܬܶܟܝ.
6 ܘܥܶܒܪܶܬ ܥܠܰܝܟܝ: ܘܰܚܙܺܝܬܶܟܝ ܕܰܡܦܰܠܦܰܠܬܝ ܒܰܕܡܶܟܝ: ܘܶܐܡܪܶܬ ܠܶܟܝ ܒܰܕܡܶܟܝ ܚܝܳܝ.
7 ܘܰܣܓܳܝ ܐܰܝܟ ܡܰܘܥܺܝܬܳܐ ܕܚܰܩܠܳܐ: ܘܰܣܓܰܝܬܝ ܘܰܪܒܰܝܬܝ ܘܥܰܠܬܝ ܠܰܡܕܺܝ̈ܢܳܬܳܐ: ܬܕܰܝ̈ܟܝ ܩܳܡܘ ܘܣܰܥܪܶܟܝ ܝܺܥܳܐ: ܘܰܗܘܰܝܬܝ ܥܰܪܛܶܠ ܘܥܰܪܝܰܬ.
8 ܘܥܶܒܪܶܬ ܥܠܰܝܟܝ ܘܰܚܙܺܝܬܶܟܝ ܘܰܚܙܺܝ݀ܬ ܙܰܒܢܶܟܝ ܙܰܒܢܳܐ ܕܥܰܙܪܳܪܬܳܐ: ܘܦܶܪܣܶ݀ܬ ܐܺܝܕܝ ܥܠܰܝܟܝ: ܘܟܰܣܺܝ݀ܬ ܦܽܘܪܣܳܝܶܟܝ: ܘܺܝܡܺܝ݀ܬ ܠܶܟܝ: ܘܥܶܠܶܬ ܥܰܡܶܟܝ ܒܰܩܝܳܡܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܘܰܗܘܰܝܬܝ ܠܺܝ.
9 ܘܰܐܣܚܺܝܬܶܟܝ ܒܡܰܝ̈ܳܐ: ܘܰܐܫܺܝܓܶ݀ܬ ܕܡܶܟܝ ܡܶܢܶܟܝ: ܘܰܡܫܰܚܬܶܟܝ ܒܡܶܫܚܳܐ.
10 ܘܰܐܠܒܶܫܬܶܟܝ ܦܶܬܟܳܐ: ܘܰܐܣܐܶܢܬܶܟܝ ܡܣܳܢ̈ܶܐ ܘܶܐܣܪܶܬ ܒܚܰܨܰܝ̈ܟܝ ܒܽܘܨܳܐ: ܘܟܰܣܺܝܬܶܟܝ: ܚܶܠܳܐ.
11 ܘܨܰܒܶܬܬܶܟܝ ܨܶܒܬܳܐ: ܘܰܐܪܡܺܝ݀ܬ ܫܶܐܖ̈ܶܐ ܒܺܐܝܕܰܝ̈ܟܝ ܘܗܰܡܶܢܺܝܟܳܐ ܒܨܰܘܪܶܟܝ.
12 ܘܒܶܖ̈ܽܘܠܶܐ ܒܶܝܬ ܥܰܝܢܰܝ̈ܟܝ: ܘܰܩܕܳܫ̈ܶܐ ܒܶܐܕܢܰܝ̈ܟ̇ܝ: ܘܰܟܠܺܝܠܳܐ ܕܫܽܘܒܚܳܐ ܒܪܺܝܫܶܟܝ.
13 ܘܶܐܨܛܰܒܰܬܬܝ ܒܕܰܗܒܳܐ ܘܒܰܚܡܽܘܪܬܳܐ: ܘܶܐܬܠܒܶܫܬܝ ܒܽܘܨܳܐ: ܘܬܶܟܠܬܳܐ ܘܦܶܬܟܳܐ: ܘܢܰܫܺܝܦܳܐ ܘܕܶܒܫܳܐ ܘܡܶܫܚܳܐ ܐܶܟܰܠܬܝ: ܘܰܫܦܰܪܬܝ ܛܳܒ ܛܳܒ: ܘܰܐܨܠܰܚܬܝ ܒܡܰܠ̈ܟܘܳܬܳܐ.
14 ܘܰܢ̣ܦܰܩ ܫܡܳܐ ܠܫܽܘܦܪܶܟܝ ܒܥܰܡ̈ܡܶܐ: ܡܶܛܽܠ ܟܠܺܝܠܳܐ ܕܫܽܘܒܚܝ ܕܣܳܡܶ݀ܬ ܥܠܰܝܟܝ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
15 ܘܶܐܬܬܟܶܠܬܝ ܥܰܠ ܫܽܘܦܪܶܟܝ: ܘܙܰܢܺܝܬܝ ܥܰܠ ܫܡܶܟܝ: ܘܶܐܫܰܕܬܝ ܙܳܢܝܽܘܬܶܟܝ ܥܰܠ ܟܽܠ ܕܥܳܒܰܪ.
16 ܘܰܢܣܰܒܬܝ ܡܶܢ ܠܒܽܘܫܰܝ̈: ܘܰܥܒܰܕܬܝ ܠܶܟܝ ܩ̈ܢܳܝܳܬܳܐ ܘܙܰܢܺܝܬܝ ܒܗܶܝܢ: ܠܳܐ ܬܰܥܠܺܝܢ ܘܠܳܐ ܢܶܗܘ̈ܝܳܢ ܕܺܝܠܶܟܝ.
17 ܘܰܢܣܰܒܬܝ ܡܳܐܢ̈ܶܐ ܕܫܽܘܒܚܶܟܝ: ܡܶܢ ܕܰܗܒܳܐ ܘܡܶܢ ܣܺܐܡܳܐ ܕܝܶܗܒܶ݀ܬ ܠܶܟܝ: ܘܰܥ̣ܒܰܕܬܝ ܠܶܟܝ ܨܰܠ̈ܡܶܐ ܕܶܟܖ̈ܶܐ: ܘܙܰܢܺܝܬܝ ܒܗܽܘܢ.
18 ܘܰܢ̣ܣܰܒܬܝ ܡܳܐܢ̈ܶܐ ܕܨܶܒܬܶܟܝ ܘܟܰܣܝܬܝ ܐܶܢܽܘܢ: ܘܡܶܫܚܝ ܘܒܶܣܡܰܝ̈ ܣܳܡ̣ܬܝ ܩܕܳܡܝܗܽܘܢ.
19 ܘܠܰܚܡܳܐ ܕܝܶܗܒܶ݀ܬ ܠܶܟܝ ܢܰܫܺܝܦܳܐ ܘܕܶܒܫܳܐ ܘܡܶܫܚܳܐ ܠܡܶܐܟܽܘܠܬܳܐ: ܣܳܡܬܺܝܘܗܝ ܩܕܳܡܝܗܽܘܢ ܠܪܺܝܚܳܐ ܕܰܣܘܳܬܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
20 ܘܰܢ̣ܣܰܒܬܝ ܒܢܰܝ̈ܟܝ ܘܰܒ̈ܢܳܬܶܟܝ ܕܺܝܠܶܕܬܝ ܠܺܝ: ܘܕܰܒܰܚܬܝ ܠܗܽܘܢ ܠܡܶܐܟܽܘܠܬܳܐ: ܣܛܰܪ ܡܶܢ ܙܳܢܝܽܘܬܶܟܝ.
21 ܘܰܢ̣ܟܰܣܬܝ ܒܢܰܝ̈ ܝܰܗܒ̣ܬܝ ܠܗܽܘܢ: ܟܰܕ ܐܶܫܬܰܪܰܚܬܝ ܒܗܽܘܢ.
22 ܘܰܒܟܽܠܳܗ̇ ܛܰܢܦܽܘܬܶܟܝ ܘܙܳܢܝܽܘܬܶܟܝ: ܠܳܐ ܐܶܬܕܟܰܪܬܝ ܝܰܘ̈ܡܳܬܳܐ ܕܛܰܠܝܽܘܬܶܟܝ: ܟܰܕ ܥܰܪܛܶܠܳܝܳܐ ܗܘܰܝܬܝ ܘܥܰܪܝܳܐ ܘܰܡܦܰܠܦܠܳܐ ܒܰܕܡܳܐ.
23 ܘܡܶܢ ܒܳܬܰܪ ܗܳܠܶܝܢ ܟܽܠܗܶܝܢ ܒܺܝ̈ܫܳܬܶܟܝ: ܘܳܝ ܠܶܟܝ ܘܳܝ ܠܶܟܝ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
24 ܒܢܰܝܬܝ ܠܶܟܝ ܒܰܝܬܳܐ ܕܓܰܝܒܳܐ: ܘܰܥ̣ܒܰܕܬܝ ܠܶܟܝ ܥܠܰܘ̈ܳܬܳܐ ܒܟܽܠ ܫܽܘܩ.
25 ܘܰܒܟܽܠ ܪܺܝܫ ܐܽܘܖ̈ܚܳܬܳܐ ܒܢܰܝܬܝ ܦܖ̈ܰܟܰܝܟܝ: ܘܛܰܢܶܦܬܝ ܫܽܘܦܪܶܟܝ: ܘܰܦ̣ܫܰܛܬܝ ܖ̈ܶܓܠܰܝܟܝ: ܥܰܠ ܟܽܠ ܕܥܳܒܰܪ: ܘܰܐܣܓܺܝܬܝ ܙܳܢܝܽܘܬܶܟܝ.
26 ܘܙܰܢܺܝܬܝ ܒܰܒܢܰܝ̈ ܡܶܨܪܶܝܢ ܫܒܳܒܰܝ̈ܟܝ ܪܰܘܖ̈ܒܰܝ ܒܶܣܪܳܐ: ܘܰܐܣܓܺܝܬܝ ܙܳܢܝܽܘܬܶܟܝ ܘܰܐܪܓܶܙܬܺܝܢܝ.
27 ܘܰܐܪܺܝܡܶ݀ܬ ܐܺܝܕܝ ܥܠܰܝܟܝ ܘܰܐܘܒܕܶܬ ܦܽܘܩܕܳܢܰܝ̈ܟܝ: ܘܰܐܫܠܶܡܬܶܟܝ ܒܝܰܕ ܣܳܢ̈ܳܐܬܶܟܝ ܒ̈ܢܳܬ ܦܶܠܫܬܳܝ̈ܶܐ: ܕܬܳܟ̈ܣܳܢ ܗ̱ܘܰܝ̈ ܠܶܟܝ ܡܶܢ ܐܽܘܖ̈ܚܳܬܶܟܝ ܕܙܳܢܝܽܘܬܳܐ.
28 ܘܙܰܢܺܝܬܝ ܒܰܒܢܰܝ̈ ܐܳܬܽܘܪ: ܘܠܳܐ ܣ̣ܒܰܥܬܝ.
29 ܘܰܐܣܓܺܝܬܝ ܙܳܢܝܽܘܬܶܟܝ ܥܰܠ ܐܰܪܥܳܐ ܕܰܟܢܰܥܢ ܘܰܕܟܰܠܕܳܝ̈ܶܐ: ܘܳܐܦ ܒܗܳܠܶܝܢ ܠܳܐ ܣܒܰܥܬܝ.
30 ܡܳܢܳܐ ܐܶܕܽܘܢ ܠܒܰܪܬܶܟܝ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܰܥܒܰܕܬܝ ܗܳܠܶܝܢ ܟܽܠܗܽܘܢ ܥܒܳܕ̈ܶܐ ܕܰܐܢ̱ܬܬܳܐ ܙܳܢܺܝܬܳܐ ܘܡܰܪܳܚܬܳܐ.
31 ܟܰܕ ܒܢܰܝܬܝ ܓܰܝܒܰܝ̈ܟܝ ܒܟܽܠ ܪܺܝܫ ܐܽܘܖ̈ܚܳܬܳܐ: ܘܰܥܠܰܘ̈ܳܬܶܟܝ ܒܟܽܠ ܫܽܘܩ. ܘܠܳܐ ܗܘܰܝܬܝ ܐܳܦܠܳܐ ܐܰܝܟ ܙܳܢܺܝܬܳܐ ܕܰܡܟܰܢܫܳܐ ܐܰܓܪܳܐ.
32 ܐܳܦܠܳܐ ܐܰܝܟ ܐܰܢ̱ܬܰܬ ܓܰܒܪܳܐ ܓܰܝܳܪܬܳܐ ܕܢܳܣܒܳܐ ܡܶܢ ܢܽܘܟܖ̈ܳܝܶܐ.
33 ܠܟܽܠܗܶܝܢ ܙܳܢ̈ܝܳܬܳܐ ܝܳܗܒܺܝܢ ܐܰܓܪܳܐ: ܘܰܐܢ̱ܬܝ ܝܰܗܒܬܝ ܐܰܓܪܳܐ ܠܟܽܠܗܽܘܢ ܖ̈ܳܚܡܰܝܟܝ: ܘܰܫܚܰܕܬܝ ܐܶܢܽܘܢ ܒܙܳܢܝܽܘܬܶܟܝ: ܕܢܺܐܬܽܘܢ ܠܘܳܬܶܟܝ ܡܶܢ ܟܽܠܗܽܘܢ ܚܕܳܪܰܝܟܝ.
34 ܘܶܐܬܦܪܶܫܬܝ ܡܶܢ ܢܶܫ̈ܶܐ ܒܙܳܢܝܽܘܬܶܟܝ: ܒܗܳܝ ܕܝܳܗܒܳܐ ܗܘܰܝܬܝ ܐܰܓܪܳܐ: ܘܰܐܓܪܳܐ ܠܳܐ ܝܰܗܒܘ ܠܶܟܝ.
35 ܡܶܛܽܠ ܗܳܢܳܐ ܙܳܢܺܝܬܳܐ ܫܡܰܥܝ ܦܶܬܓܳܡܶܗ ܕܡܳܪܝܳܐ.
36 ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܝܰܗܒܬܝ ܢܚܳܫܶܟܝ: ܘܰܓܠܰܝܬܝ ܦܽܘܪܣܳܝܶܟܝ ܒܙܳܢܝܽܘܬܶܟܝ ܥܰܠ ܖ̈ܳܚܡܰܝܟܝ: ܘܥܰܠ ܟܽܠܗܽܘܢ ܦܬܰܟܖ̈ܶܐ ܛܰܢܦܽܘܬܶܟܝ: ܘܰܕܡܳܐ ܕܰܒܢܰܝ̈ܟܝ ܝܰܗܒܬܝ ܠܗܽܘܢ.
37 ܡܶܛܽܠ ܗܳܢܳܐ ܗܳܐ ܡܟܰܢܶܫ ܐ̱ܢܳܐ ܠܟܽܠܗܽܘܢ ܖ̈ܳܚܡܰܝܟܝ ܕܰܨܒܰܝܬܝ ܒܗܽܘܢ: ܘܰܠܟܽܠ ܕܰܪܚܶܡܬܝ ܥܰܡ ܕܰܣܢܰܝܬܝ: ܘܶܐܟܰܢܶܫ ܐܶܢܽܘܢ ܥܠܰܝܟܝ ܡܶܢ ܚܕܳܖ̈ܰܝܟܝ: ܘܶܐܓܠܶܐ ܦܽܘܪܣܳܝܶܟܝ ܠܥܺܢܰܝ̈ܗܽܘܢ: ܘܢܶܚܙܽܘܢ ܟܽܠܶܗ ܦܽܘܪܣܳܝܶܟܝ.
38 ܘܶܐܕܽܘܢܶܟܝ ܕܺܝܢܳܐ ܕܓܰܝܳܖ̈ܳܬܳܐ: ܘܕܺܝܢܳܐ ܕܰܐܝܠܶܝܢ ܕܳܐܫ̈ܕܳܢ ܕܡܳܐ: ܘܶܐܬܠܶܟܝ ܠܰܕܡܳܐ: ܘܰܠܚܶܡܬܳܐ ܘܠܰܛܢܳܢܳܐ.
39 ܘܰܐܫܠܡܶܟܝ ܒܺܐܝܕܰܝ̈ܗܽܘܢ: ܘܢܶܣܚܦܽܘܢ ܒܶܝܬ ܓܰܝܒܰܝ̈ܟܝ: ܘܢܶܥܩܪܽܘܢ ܦܖ̈ܰܟܰܝܟܝ: ܘܢܰܫܠܚܽܘܢ ܠܒܽܘܫܰܝ̈ܟܝ: ܘܢܶܣܒܽܘܢ ܡܳܐܢ̈ܶܐ ܕܫܽܘܒܚܶܟܝ: ܘܢܶܫܒܩܽܘܢܶܟܝ ܥܰܪܛܶܠ.
40 ܘܢܶܣܩܽܘܢ ܥܠܰܝܟܝ ܟܶܢ̈ܫܶܐ ܘܢܶܪܓܡܽܘܢܶܟܝ ܒܟܺܐܦ̈ܶܐ: ܘܢܶܡܚܽܘܢܶܟܝ ܒܣܰܝܦܰܝ̈ܗܽܘܢ.
41 ܘܢܰܘܩܕܽܘܢܶܟܝ ܒܓܰܘ ܢܽܘܪܳܐ: ܘܢܶܥܒܕܽܘܢ ܡܶܢܶܟܝ ܕܺܝ̈ܢܶܐ ܠܥܺܝܢ ܢܶܫ̈ܶܐ ܣܰܓܺܝ̈ܐܳܬܳܐ: ܘܶܐܒܰܛܠܶܟܝ ܡܶܢ ܙܳܢܝܽܘܬܳܐ: ܘܬܽܘܒ ܠܳܐ ܬܶܬܠܺܝܢ ܐܰܓܪܳܐ.
42 ܘܰܐܢܺܝܚ ܚܶܡܬܝ ܥܠܰܝܟܝ: ܘܢܶܥܒܰܪ ܛܢܳܢܝ ܡܶܢܶܟܝ: ܘܶܐܬܬܢܺܝܚ ܘܠܳܐ ܐܶܪܓܰܙ ܬܽܘܒ.
43 ܥܰܠ ܕܠܳܐ ܐܶܬܕܟܰܪܬܝ ܝܰܘ̈ܡܳܬܳܐ ܕܛܰܠܝܽܘܬܶܟܝ: ܘܰܐܪܓܶܙܬܺܝܢܝ ܒܗܳܠܶܝܢ ܟܽܠܗܶܝܢ: ܐܳܦ ܐܶܢܳܐ ܗܳܐ ܦܶܪܥܶ݀ܬ ܐܽܘܖ̈ܚܳܬܶܟܝ ܒܪܺܝܫܶܟܝ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܰܠ ܕܰܥ̣ܒܰܕܬܝ ܛܰܢܦܽܘܬܳܐ ܘܙܳܢܝܽܘܬܳܐ.
44 ܘܟܽܠ ܡܶܢ ܕܡܰܡܬܶܠ ܡܰܬܠܳܐ ܥܠܰܝܟܝ ܢܰܡܬܶܠ: ܘܢܺܐܡܰܪ ܒܰܪܬܳܐ ܐܰܝܟ ܐܶܡܳܐ.
45 ܒܰܪܬ ܐܶܡܶܟܝ ܐܰܢ̱ܬܝ: ܫܶܒܩܰܬ ܒܰܥܠܳܗ̇ ܘܰܒ̈ܢܶܝܗ̇: ܘܚܳܬܳܐ ܐܰܢ̱ܬܝ ܕܰܐܚ̈ܘܳܬܳܐ ܕܰܫܒܰܩ̈ܝ ܓܰܒܖ̈ܰܝܗܶܝܢ ܘܰܒܢܰܝ̈ܗܶܝܢ: ܐܶܡܟܶܝܢ ܚܺܝܬܳܝܬܳܐ ܘܰܐܒܽܘܟܶܝܢ ܐܰܡܽܘܪܳܝܳܐ.
46 ܘܚܳܬܶܟܝ ܩܰܫܺܝܫܬܳܐ ܫܳܡܪܺܝܢ: ܗܺܝ ܘܰܒ̈ܢܳܬܳܗ̇ ܕܝܳܬܒܳܐ ܡܶܢ ܣܶܡܳܠܶܟܝ: ܘܚܳܬܶܟܝ ܙܥܽܘܪܬܳܐ ܕܝܳܬܒܳܐ ܡܶܢ ܝܰܡܺܝܢܶܟܝ: ܣܕܽܘܡ ܘܰܒ̈ܢܳܬܳܗ̇.
47 ܘܠܳܐ ܗ̱ܘܳܐ ܐܰܝܟ ܐܽܘܖ̈ܚܳܬܗܶܝܢ ܗܰܠܶܟܬܝ: ܘܠܳܐ ܗ̱ܘܳܐ ܐܰܝܟ ܛܰܢܦ̈ܘܳܬܗܶܝܢ ܥ̣ܒܰܕܬܝ: ܥܰܕ ܩܰܠܺܝܠ ܘܝܰܬܺܝܪ ܡܶܢܗܶܝܢ ܚ̣ܰܒܶܠܬܝ: ܒܟܽܠܗܶܝܢ ܐܽܘܖ̈ܚܳܬܶܟܝ.
48 ܚܰܝ ܐ̱ܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܕܠܳܐ ܥܶܒ̣ܕܰܬ ܣܕܽܘܡ ܚܳܬܶܟܝ ܗܺܝ ܘܰܒ̈ܢܳܬܳܗ̇: ܐܰܝܟ ܕܰܥ̣ܒܰܕܬܝ ܐܰܢ̱ܬܝ ܘܰܒ̈ܢܳܬܶܟܝ.
49 ܗܳܢܰܘ ܥܰܘܠܳܐ ܕܰܣܕܽܘܡ ܚܳܬܶܟܝ ܓܰܐܺܝܬܳܐ: ܕܣܳܒܥܳܐ ܗܘܳܬ ܠܰܚܡܳܐ: ܘܝܳܬܒܳܐ ܗܘܳܬ ܒܫܶܠܝܳܐ ܗܺܝ ܘܰܒ̈ܢܳܬܳܗ̇: ܘܒܺܐܝܕܳܐ ܕܒܳܝ̈ܫܶܐ ܘܰܕܡܶܣܟܺܢ̈ܶܐ ܠܳܐ ܐܶܚܰܕ̈ܝ.
50 ܐܶܠܳܐ ܐܶܬܬܖ̈ܺܝܡܝ ܘܰܥܒܰܕ̈ܝ ܒܺܝܫܬܳܐ ܩܕܳܡܝ: ܘܟܰܕ ܗܳܠܶܝܢ ܚܙܺܝ݀ܬ ܒܗܶܝܢ ܗܶܦܟܶ݀ܬ ܐܶܢܶܝܢ.
51 ܫܳܡܪܺܝܢ ܐܰܝܟ ܦܶܠܓܳܐ ܕܰܚܛܳܗܰܝ̈ܟܝ ܠܳܐ ܚܛܳܬ: ܐܰܣܓܺܝܬܝ ܛܰܢܦܽܘܬܶܟܝ ܡܶܢܗܶܝܢ: ܘܰܙܟܰܝܬܝ ܠܰܐܚ̈ܘܳܬܶܟܝ ܒܟܽܠܳܗ̇ ܛܰܢܦܽܘܬܶܟܝ ܕܰܥ̣ܒܰܕܬܝ.
52 ܘܳܐܦ ܐܰܢ̱ܬܝ ܩܰܒܶܠܝ ܒܶܗܬܬܶܟܝ: ܕܰܙܟܰܝܬܝ ܠܰܐܚ̈ܘܳܬܶܟܝ ܒܰܚܛܳܗܰܝ̈ܟܝ: ܘܶܐܬܛܰܢܦܬܝ ܝܰܬܺܝܪ ܡܶܢܗܶܝܢ: ܘܗܶܢܶܝܢ ܐܶܙܕܕܰܩ̈ܝ ܝܰܬܺܝܪ ܡܶܢܶܟܝ: ܘܳܐܦ ܐܰܢ̱ܬܝ ܒܗܰܬܝ: ܘܩܰܒܶܠܝ ܚܶܦܪܶܟܝ: ܕܶܐܙܕܰܕܰܩ̈ܝ ܐܰܚ̈ܘܳܬܶܟܝ ܝܰܬܺܝܪ ܡܶܢܶܟܝ.
53 ܘܰܐܗܦܶܟ ܫܒܺܝܬܗܶܝܢ: ܫܒܺܝܬܳܐ ܕܰܣܕܽܘܡ ܘܕܰܒ̈ܢܳܬܳܗ̇: ܘܰܫܒܺܝܬܳܐ ܕܫܳܡܪܺܝܢ ܘܕܰܒ̈ܢܳܬܳܗ̇: ܘܰܐܫܒܶܐ ܫܒܺܝܬܶܟܝ ܒܰܝܢܳܬܗܶܝܢ.
54 ܕܰܬܩܰܒܠܺܝܢ ܒܶܗܬܬܳܐ: ܘܬܰܚܦܪܺܝܢ ܒܟܽܠ ܡܶܕܶܡ ܕܰܥ̣ܒܰܕܬܝ ܕܬܰܪܓܙܺܝܢܳܢܝ.
55 ܘܚܳܬܶܟܝ ܣܕܽܘܡ ܘܰܒ̈ܢܳܬܳܗ̇ ܢܶܬܩ̈ܢܳܢ ܐܰܝܟ ܕܡܶܢ ܩܕܺܝܡ: ܘܫܳܡܪܺܝܢ ܘܰܒ̈ܢܳܬܳܗ̇ ܢܶܬܩ̈ܢܳܢ ܐܰܝܟ ܕܡܶܢ ܩܕܺܝܡ: ܘܰܐܢ̱ܬܝ ܘܰܒ̈ܢܳܬܶܟܝ ܬܶܗܘܶܝܢ ܐܰܝܟ ܕܡܶܢ ܩܕܺܝܡ.
56 ܘܠܳܐ ܗܘܳܬ ܣܕܽܘܡ ܚܳܬܶܟܝ ܠܛܶܒܳܐ ܒܦܽܘܡܶܟܝ ܒܝܰܘܡܳܐ ܕܓܰܐܝܽܘܬܶܟܝ.
57 ܡܶܢ ܩܕܳܡ ܕܬܶܬܓܠܶܐ ܒܺܝܫܬܶܟܝ: ܐܰܝܟ ܚܶܣܕܳܐ ܕܰܒ̈ܢܳܬ ܐܰܕܽܘܡ: ܘܟܽܠܗܶܝܢ ܒ̈ܢܳܬ ܦܶܠܫܬܳܝ̈ܶܐ ܕܰܚܕܺܝܖ̈ܳܢ ܗ̱ܘܰܝ̈ ܠܳܗ̇: ܘܫܳܝ̈ܛܳܢ ܗ̱ܘܰܝ̈ ܠܳܗ̇.
58 ܘܰܚܛܳܗܰܝ̈ܟܝ ܘܛܰܢܦ̈ܘܳܬܶܟܝ ܐܰܢ̱ܬܝ ܫܩ̣ܰܠܬܝ ܐܶܢܽܘܢ: ܐܳܡܰܪ ܡܳܪܶܐ ܡܳܖ̈ܰܘܳܬܳܐ.
59 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ: ܥܳܒܶܕ ܐ̱ܢܳܐ ܠܶܟܝ ܐܰܝܟ ܕܰܥ̣ܒܰܕܬܝ: ܥܰܠ ܕܫ̣ܳܛܬܝ ܡܰܘܡܳܬܝ ܘܒ̣ܰܛܠܶܬܝ ܩܝܳܡܝ.
60 ܐܶܢܳܐ ܕܶܝܢ ܐܶܬܕܟܰܪ ܩܝܳܡܝ ܕܥܰܡܶܟܝ ܕܰܒܝܰܘ̈ܡܳܬܳܐ ܕܛܰܠܝܽܘܬܶܟܝ: ܘܰܐܩܺܝܡ ܠܶܟܝ ܩܝܳܡܳܐ ܕܥܳܠܰܡ.
61 ܘܬܶܥ̱ܗܕܺܝܢ ܐܽܘܖ̈ܚܳܬܶܟܝ ܘܬܶܒܗܬܺܝܢ: ܕܢܶܣܒܶ݀ܬ ܠܰܐܚ̈ܘܳܬܶܟܝ ܠܩܰܫܺܝܫܬܳܐ ܘܠܰܙܥܽܘܪܬܳܐ: ܘܝܶܗܒܶ݀ܬ ܐܶܢܶܝܢ ܠܶܟܝ ܒ̈ܢܳܬܳܐ ܠܳܐ ܡܶܢ ܩܝܳܡܶܟܝ.
62 ܘܰܐܩܺܝܡ ܐܶܢܳܐ ܩܝܳܡܝ ܥܰܡܶܟܝ: ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ.
63 ܡܶܛܽܠ ܕܬܶܬܕܰܟܪܺܝܢ ܘܬܶܒܗܬܺܝܢ: ܘܬܽܘܒ ܠܳܐ ܬܶܦܬܚܺܝܢ ܦܽܘܡܶܟܝ ܡܶܢ ܒܶܗܬܬܶܟܝ: ܡܳܐ ܕܫܶܒܩܶ݀ܬ ܠܶܟܝ ܟܽܠܡܶܕܶܡ ܕܰܥ̣ܒܰܕܬܝ ܐܳܡܰܪ ܡܳܪܶܐ ܡܳܖ̈ܰܘܳܬܳܐ.